(1)

Iż-żrieragħ tal-kolza ibrida Ms1xRf2 (ACS-BNØØ4-7xACS-BNØØ2-5) ingħataw il-kunsens skond id-Direttiva tal-Kunsill 90/220/KEE tat-23 ta’ April 1990 dwar ir-rilaxx intenzjonat fl-ambjent ta’ organiżmi modifikati ġenetikament ( 2 ) bid-Deċiżjoni tal-Kummissjoni 97/393/KE tas-6 ta’ Ġunju 1997 rigward it-tqegħid fis-suq ta’ kolza Żvediża modifikata ġenetikament (Brassica napus L. oleifera Metzg. MS1, RF2) skond id-Direttiva tal-Kunsill 90/220/KEE ( 3 ) għall-użu maħsub ta’ tkabbir u negozjar fl-ambjent qabel u matul il-proċess għal frazzjonijiet mhux vijabbli. Id-Direttiva 90/220/KEE reġgħet ġiet imfassla u rrevokata bid-Direttiva 2001/18/KE.

(2)

Il-kunsens kien imsejjes fuq it-tagħrif miġbur fid-dokumentazzjoni mressqa skond id-Direttiva 90/220/KEE u fuq it-tagħrif kollu mressaq mill-Istati Membri.

(3)

Żejt ipproċessat minn ACS-BNØØ4-7, ACS-BNØØ2-5 u l-kombinazzjoni ta’ l-ibridi ACS-BNØØ4-7xACS-BNØØ2-5 taż-żrieragħ tal-kolza tqiegħdu fis-suq skond l-Artikolu 5 tar-Regolament (KE) Nru 258.97 tal-Parlament Ewropew u tal-Kunsill tas-27 ta’ Jannar 1997 dwar ikel ġdid u ingredjenti ġodda ta’ l-ikel ( 4 ).

(4)

L-ACS-BNØØ4-7, ACS-BNØØ2-5 u l-kombinazzjoni ta’ l-ibridi ACS-BNØØ4-7xACS-BNØØ2-5 taż-żrieragħ tal-kolza u l-prodotti ġejjin minnhom ġew notifikati sussegwentement bħala prodotti eżistenti minn Bayer CropScience AG (minn issa ‘l quddiem “in-notifikant”) skond l-Artikolu 8(1)(a) u l-Artikolu 20(1) tar-Regolament (KE) Nru 1829/2003 (minn issa ‘l quddiem “ir-Regolament”) u tniżżlu fir-Reġistru Komunitarju ta’ ikel u għalf modifikat ġenetikament. L-ambitu tan-notifika kopra ikel (żejt ipproċessat) prodott mil-linji maskili sterili tal-kolża MS1Bn (B91-4) u l-inkroċji konvenzjonali kollha, il-linji taż-żrieragħ tal-kolza RF2Bn (B94-2) li jservu ta’ riġeneraturi tal-fertilità u kull inkroċju konvenzjonali u l-kombinazzjoni ta’ l-ibridi MS1xRF2 (ACS-BNØØ4-7xACS-BNØØ2-5) kif ukoll l-għalf li fih jew huwa magħmul minn żrieragħ tal-kolza Żvediża ġejja mil-linja maskili sterili taż-żrieragħ tal-kolza MS1 (B91-4), varjeta’ Drakkar, (Brassica napus L. oleifera Metzg.), il-linji ta’ żrieragħ tal-kolza li jservu ta’ riġeneraturi tal-fertilità RF2 (B94-2), varjeta’ Drakkar, (Brassica napus L. oleifera Metzg), u l-kombinazzjoni ta’ l-ibridi MS1xRF2 (ACS-BNØØ4-7xACS-BNØØ2-5) (Brassica napus L. oleifera Metzg.

(5)

In-notifikant ta’ l-ibridi taż-żrieragħ tal-kolza ACS-BNØØ4-7xACS-BNØØ2-5, f’ittra lill-Kummissjoni ddatata 15 ta’ Novembru 2005, wera li varjetajiet li fihom dan l-avveniment ma kinux qed jiġu offruti aktar għall-bejgħ fuq bażi globali u li ż-żrieragħ kollha fl-inventarju nġabru u nqerdu wara l-istaġun tal-bejgħ ta’ l-2003.

(6)

In-notifikant ġibed ukoll l-attenzjoni tal-Kummissjoni li huwa mhuwiex intenzjonat iressaq applikazzjoni għat-tiġdid ta’ l-awtorizzazzjoni ta’ l-ACS-BNØØ4-7, l-ACS-BNØØ2-5 u l-kombinazzjoni ta’ l-ibridi ACS-BNØØ4-7xACS-BNØØ2-5 taż-żrieragħ tal-kolza skond ir-Regolament f’konformità ma’ l-ewwel sub-paragrafu ta’ l-Artikolu 8(4), l-Artikolu 11, l-Artikolu 20(4) u l-Artikolu 23 rispettivament. Għalhekk la l-koltivazzjoni u lanqas it-tqegħid fis-suq ta’ l-ibridi taż-żrieragħ tal-kolza ACS-BNØØ4-7xACS-BNØØ2-5 u l-prodotti ġejjin minnhom m’huma se jiġu awtorizzati mill-Komunità wara t-18 ta’ April 2007.

(7)

Għandhom għalhekk jiġu adottati miżuri sabiex jiżguraw l-irtirar effettiv mis-suq taż-żrieragħ ta’ l-ibridi tal-kolza ACS-BNØØ4-7xACS-BNØØ2-5. B’konsegwenza tan-nuqqas ta’ disponibilità taż-żrieragħ, kwalunkwe prodotti ġejjin mill-ACS-BNØØ4-7, l-ACS-BNØØ2-5 u l-kombinazzjoni ta’ l-ibridi ACS-BNØØ4-7xACS-BNØØ2-5 taż-żrieragħ tal-kolza huma mistennija li ma jidhrux aktar fil-katina ta’ l-ikel u ta’ l-għalf f’perjodu raġjonevoli ta’ żmien.

(8)

Billi n-notifikant waqaf ibigħ żrieragħ ta’ l-ibridi tal-kolza ACS-BNØØ4-7xACS-BNØØ2-5 wara l-istaġun tat-tħawwil ta’ l-2003, il-ħażniet ta’ prodotti ġejjin mill-ACS-BNØØ4-7, l-ACS-BNØØ2-5 u l-kombinazzjoni ta’ l-ibridi ACS-BNØØ4-7xACS-BNØØ2-5 taż-żrieragħ tal-kolza ntużaw u mhumiex mistennija li jkunu fis-suq wara t-18 t’April 2007. Madankollu, jistgħu jibqgħu jinstabu xi traċċi żgħar ta’ materjal modifikat ġenetikament mill-ACS-BNØØ4-7, l-ACS-BNØØ2-5 u l-ACS-BNØØ4-7xACS-BNØØ2-5 taż-żrieragħ tal-kolza fil-prodotti ta’ l-ikel jew ta’ l-għalf għal ċertu perjodu ta’ żmien.

(9)

Għal raġunijiet ta’ ċertezza legali, huwa għalhekk meħtieġ li jiġi stabbilit perjodu tranżitorju ta’ żmien li matulu prodotti ta’ l-ikel u ta’ l-għalf jista’ jkollhom traċċi ta’ materjal bħal dan mingħajr ma jiġu kkunsidrati li qed jiksru l-Artikolu 4(2) jew l-Artikolu 16(2) tar-Regolament fejn din il-preżenza hija aċċidentali jew teknikament inevitabbli.

(10)

Għandhom jiġu stabbiliti l-livell tollerat u l-perjodu ta’ żmien filwaqt li jittieħed kont taż-żmien meħtieġ sakemm l-irtirar effettiv taż-żrieragħ mis-suq jipproduċi l-effett tiegħu tul il-katina ta’ l-ikel u ta’ l-għalf. Fil-każijiet kollha, il-livell tollerat għandu jibqa’ ‘l isfel mil-limitu ta’ tikkettjar u ta’ traċċabilità ta’ mhux aktar minn 0.9 % stipulat bir-Regolament għall-preżenza aċċidentali jew teknikament inevitabbli ta’ materjal modifikat ġenetikament fl-ikel u l-għalf.

(11)

L-inklużjoni fir-Reġistru Komunitarju ta’ l-ikel u l-għalf modifikat ġenetikament, kif stipulat fl-Artikolu 28 tar-Regolament, rigward l-ACS-BNØØ4-7, l-ACS-BNØØ2-5 u l-kombinazzjoni ta’ l-ibridi ACS-BNØØ4-7xACS-BNØØ2-5 taż-żrieragħ tal-kolza għandha tinbidel biex jittieħed kont ta’ din id-Deċiżjoni.

(12)

In-notifikant ġie kkonsultat dwar il-miżuri stipulati f’din id-Deċiżjoni.

(13)

Il-miżuri stipulati f’din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,