(1)

Is-sustanza attiva kkonċernata hija fungu li qabel kellha l-isem Verticillium lecanii. Sussegwentement, għal raġunijiet xjentifiċi, dak l-isem inbidel għal Lecanicillium muscarium tar-razza Ve6. Aktar ’il quddiem reġa’ nbidel għall-isem attwali Akanthomyces muscarius tar-razza Ve6.

(2)

Id-Direttiva tal-Kummissjoni 2008/113/KE (2) daħħlet il-Lecanicillium muscarium (li qabel kienet Verticilium lecanii) tar-razza Ve6 bħala sustanza attiva fl-Anness I tad-Direttiva tal-Kunsill 91/414/KEE (3).

(3)

Is-sustanzi attivi elenkati fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(4)

Kif stabbilit fil-Parti A tal-Anness tar-Regolament ta’ Implimentazzjoni (UE) Nru 540/2011, l-approvazzjoni tas-sustanza attiva Akanthomyces muscarius tar-razza Ve6 (li qabel kienet Lecanicillium muscarium tar-razza Ve6),tiskadi fit-30 ta’ April 2021.

(5)

Tressqet applikazzjoni għat-tiġdid tal-approvazzjoni tas-sustanza attiva Akanthomyces muscarius tar-razza Ve6 f’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) fil-perjodu taż-żmien previst f’dak l-Artikolu.

(6)

L-applikant ressaq il-fajls addizzjonali meħtieġa f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet sħiħa.

(7)

L-Istat Membru relatur ħejja abbozz tar-rapport ta’ valutazzjoni għat-tiġdid b’konsultazzjoni mal-Istat Membru korelatur u fit-30 ta’ Jannar 2018 ippreżentah lill-Awtorità Ewropea dwar is-Sigurtà fl-Ikel (minn hawn ’il quddiem, “l-Awtorità”) u lill-Kummissjoni.

(8)

L-Awtorità bagħtet l-abbozz tar-rapport ta’ valutazzjoni tat-tiġdid lill-applikant u lill-Istati Membri għall-kummenti tagħhom u għaddiet il-kummenti li rċeviet lill-Kummissjoni. L-Awtorità qiegħdet id-dossier sommarju supplimentari disponibbli għall-pubbliku.

(9)

Fis-27 ta’ April 2020, l-Awtorità kkomunikat lill-Kummissjoni l-konklużjoni tagħha (6) dwar jekk jistax ikun mistenni li s-sustanza attiva Akanthomyces muscarius tar-razza Ve6 tissodisfa l-kriterji tal-approvazzjoni previsti fl-Artikolu 4 tar-Regolament (KE) Nru 1107/2009. Il-Kummissjoni ppreżentat ir-rapport għat-tiġdid tal-Akanthomyces muscarius tar-razza Ve6 lill-Kumitat Permanenti dwar il-Pjanti, l-Annimali, l-Ikel u l-Għalf fit-22 ta’ Ottubru 2020, u l-abbozz tar-Regolament dwar dik is-sustanza fl-4 ta’ Diċembru 2020.

(10)

Il-Kummissjoni stiednet lill-applikant iressaq il-kummenti tiegħu dwar il-konklużjoni tal-Awtorità u, f’konformità mat-tielet paragrafu tal-Artikolu 14(1) tar-Regolament ta’ Implimentazzjoni (UE) Nru 844/2012, dwar ir-rapport għat-tiġdid. L-applikant ippreżenta l-kummenti tiegħu, u dawn ġew eżaminati bir-reqqa.

(11)

Dwar użu rappreżentattiv wieħed jew aktar, ta’ mill-inqas prodott wieħed tal-protezzjoni tal-pjanti li fih is-sustanza attiva Akanthomyces muscarius tar-razza Ve6, ġie stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati. Għalhekk, jixraq li tiġġedded l-approvazzjoni tal-Akanthomyces muscarius tar-razza Ve6.

(12)

Il-valutazzjoni tar-riskju għat-tiġdid tal-approvazzjoni tas-sustanza attiva Akanthomyces muscarius tar-razza Ve6 hija bbażata fuq għadd limitat ta’ użi rappreżentattivi, li madankollu ma jillimitawx l-użi li għalihom jistgħu jiġu awtorizzati l-prodotti għall-protezzjoni tal-pjanti li fihom l-Akanthomyces muscarius tar-razza Ve6. Għalhekk, jixraq li ma tinżammx ir-restrizzjoni li dik is-sustanza tintuża biss bħala insettiċida.

(13)

Barra minn hekk, il-Kummissjoni hija tal-fehma li l-Akanthomyces muscarius tar-razza Ve6 hija sustanza attiva b’riskju baxx skont l-Artikolu 22 tar-Regolament (KE) Nru 1107/2009. L-Akanthomyces muscarius tar-razza Ve6 mhijiex sustanza li tqajjem tħassib, u tissodisfa l-kundizzjonijiet stipulati fil-punt 5 tal-Anness II tar-Regolament (KE) Nru 1107/2009. Meta titqies il-valutazzjoni tal-Istat Membru Relatur u tal-Awtorità, u l-użi maħsubin, l-Akanthomyces muscarius tar-razza Ve6 hija mikroorganiżmu li mistenni jkollu riskju żgħir għall-bnedmin, għall-annimali u għall-ambjent. Ma ġewx identifikati oqsma ta’ tħassib, u lAkanthomyces muscarius mhuwiex magħruf li għandha xi rabta ma’ ebda patoġenu tal-bnedmin jew tal-annimali. L-Akanthomyces muscarius tar-razza Ve6 ilha tintuża aktar minn għaxar snin għall-protezzjoni tal-pjanti mingħajr ma wasslet għal ebda effett ħażin fuq il-bnedmin, u fl-użu maħsub (jiġifieri fis-serer (permanenti), inklużi dawk forma ta’ mina li tista’ timxi fihom, mgħammra b’teknoloġija avvanzata) il-potenzjal għall-esponiment tal-bnedmin, tal-organiżmi mhux fil-mira u tal-ambjent jitqies li hu negliġibbli. Għaldaqstant, jenħtieġ li jittieħdu biss miżuri ta’ mitigazzjoni ġenerali għall-operaturi u l-ħaddiema.

(14)

Għalhekk, jixraq li tiġġedded l-approvazzjoni tal-Akanthomyces muscarius tar-razza Ve6 bħala sustanza b’riskju baxx. Għalhekk, f’konformità mal-Artikolu 20(3) tar-Regolament (KE) Nru 1107/2009, flimkien mal-Artikolu 13(4) tiegħu, jenħtieġ li l-Anness tar-Regolament ta’ Implimentazzjoni (UE) Nru 540/2011 jiġi emendat skont dan.

(15)

L-aħħar li ġġedded il-perjodu tal-approvazzjoni tal-Akanthomyces muscarius tar-razza Ve6 (li qabel kienet Lecanicillium muscarium tar-razza Ve6) kien sat-30 ta’ April 2021 permezz tar-Regolament ta’ Implimentazzjoni tal-Kummissjoni (UE) 2020/421 (7) sabiex ikun hemm biżżejjed żmien għat-tlestija tal-proċess tat-tiġdid qabel l-iskadenza ta’ dak il-perjodu. Madankollu, billi ttieħdet deċiżjoni favur it-tiġdid qabel din id-data ta’ skadenza estiża, jenħtieġ li dan ir-Regolament jibda japplika minn qabel dik id-data.

(16)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,