1

Permezz tal-appell tagħha, l-appellanti titlob l-annullament tas-sentenza tal-Qorti Ġenerali tal-Unjoni Ewropea tad‑29 ta’ Ġunju 2018, HF vs Il-Parlament, (T‑218/17, iktar ’il quddiem is-“sentenza appellata”, EU:T:2018:393), li permezz tagħha l-Qorti Ġenerali ċaħdet ir-rikors tagħha intiż, minn naħa, għall-annullament tad-deċiżjoni tal-Parlament Ewropew tat‑3 ta’ Ġunju 2016 li permezz tagħha l-awtorità li għandha s-setgħa tikkonkludi kuntratti ta’ reklutaġġ ċaħdet it-talba tagħha għal assistenza mressqa fil‑11 ta’ Diċembru 2014 u, min-naħa l-oħra, għall-kumpens tad-dannu mġarrab minnha minħabba l-illegalitajiet imwettqa minn din l-awtorità fit-trattament tal-imsemmija talba għal assistenza.

2

Permezz tal-appell tagħha, il-Parlament jitlob lill-Qorti tal-Ġustizzja sabiex tannulla s-sentenza appellata minħabba żbalji ta’ liġi mwettqa mill-Qorti Ġenerali fil-punti 80 sa 81 u 123 ta’ dik is-sentenza, sabiex tiċħad ir-rikors fl-ewwel istanza u tikkundanna lill-appellanti għall-ispejjeż.

Il-kuntest ġuridiku

3

L-Artikolu 12 tar-Regolamenti tal-Persunal tal-Unjoni Ewropea fil-verżjoni tagħhom applikabbli għall-kawża (iktar ’il quddiem ir-“Regolamenti tal-Persunal”), jipprevedi:

4

L-Artikolu 24 ta’ dawn ir-regolamenti jipprevedi:

5

Skont l-Artikolu 90 tal-imsemmija regolamenti:

Il-fatti li wasslu għall-kawża

6

Il-fatti li wasslu għall-kawża huma esposti fil-punti 1 sa 33 tas-sentenza appellata u jistgħu jiġu miġbura fil-qosor kif ġej.

7

Bejn l-2005 u l-2015, l-appellanti, HF, ħadmet, taħt Regolamenti tal-Persunal differenti, jiġifieri bħala membru tal-persunal awżiljarju, membru tal-persunal bil-kuntratt jew anki membru tal-persunal temporanju, fi ħdan l-Unità tal-Awdjożiv tad-Direttorat Ġenerali “Komunikazzjoni” tal-Parlament Ewropew.

8

Permezz ta’ ittra tal‑11 ta’ Diċembru 2014, indirizzata lis-Segretarju Ġenerali tal-Parlament (iktar ’il quddiem is-“Segretarju Ġenerali”), b’kopja lill-President tal-Kumitat Konsultattiv dwar il-Fastidju u l-Prevenzjoni Tiegħu fuq il-Post tax-Xogħol (iktar ’il quddiem il-“Kumitat Konsultattiv”) kif ukoll lill-President tal-Parlament u lid-Direttur Ġenerali tad-Direttorat Ġenerali (DĠ) “Persunal” tas-Segretarjat Ġenerali tal-Parlament (iktar ’il quddiem id-“Direttur Ġenerali tal-Persunal”), l-appellanti, taħt l-Artikolu 90(1) tar-Regolamenti tal-Persunal, ressqet talba għal assistenza, fis-sens tal-Artikolu 24 tar-Regolamenti tal-Persunal (iktar ’il quddiem it-“talba għal assistenza”). B’mod iktar preċiż, hija talbet li jiġu adottati miżuri urġenti sabiex tiġi protetta immedjatament mill-persuna li allegatament kienet qiegħda tagħtiha fastidju u li tinfetaħ investigazzjoni amministrattiva mill-awtorità li għandha s-setgħa tikkonkludi kuntratti ta’ reklutaġġ mal-Parlament (iktar ’il quddiem l-“ASTK”) sabiex tiġi stabbilita r-realtà tal-fatti.

9

Insostenn ta’ din it-talba, l-appellanti sostniet li kienet vittma ta’ fastidju psikoloġiku, fis-sens tal-Artikolu 12a tar-Regolamenti tal-Persunal, min-naħa tal-Kap tal-Unità tal-Awdjoviżiv (iktar ’il quddiem il-“Kap tal-Unità’”). Dan il-fastidju seħħ permezz ta’ aġir, kliem u kitbiet ta’ dan tal-aħħar, b’mod partikolari fil-kuntest ta’ laqgħat tad-dipartiment.

10

Permezz ta’ ittra tal‑4 ta’ Frar 2015, id-Direttur Ġenerali tal-Persunal informa lill-appellanti li kienet ġiet adottata miżura favur tagħha li tikkonsisti fl-assenjazzjoni mill-ġdid tagħha lill-Unità tal-Programm ta’ Żjarat sabiex titbiegħed mill-Kap tal-Unità.

11

Permezz ta’ ittra tat‑8 ta’ Diċembru 2015, id-Direttur Ġenerali tal-Persunal informa lill-appellanti bl-intenzjoni tiegħu li jqis li t-talba tagħha għal assistenza ma kinitx fondata, b’mod partikolari, wara s-smigħ tal-Kap tal-Unità u ta’ erbatax-il uffiċjal u membru tal-persunal tal-Unità tal-Awdjoviżjiv mill-Kumitat Konsultattiv.

12

Permezz ta’ ittra tas‑17 ta’ Diċembru 2015, l-appellanti talbet il-komunikazzjoni tar-rapport, li skontha hija tal-“investigazzjoni”, imħejji mill-Kumitat Konsultattiv. Din it-talba reġgħet saret b’ittra tal‑5 ta’ Frar 2016.

13

Permezz ta’ ittra tad‑9 ta’ Frar 2016, id-Direttur Ġenerali tal-Persunal ta lill-appellanti terminu li jiskadi fl‑1 ta’ April 2016 sabiex tippreżenta l-osservazzjonijiet tagħha bil-miktub dwar l-intenzjoni tiegħu li jiċħad l-imsemmija talba għal assistenza. Barra minn hekk, huwa indikalha li l-Kumitat Konsultattiv kien bagħatlu biss opinjoni fejn ikkonkluda li ma kienx hemm fastidju psikoloġiku. F’dan ir-rigward, kien normali li l-Kumitat Konsultattiv ma kienx ikkomunikalha rapport, kif imsemmi fl-Artikolu 14 tar-Regoli interni dwar il-fastidju, għaliex tali rapport jiġi stabbilit mill-Kumitat Konsultattiv fil-każijiet biss fejn l-imsemmi kumitat jikkonstata l-eżistenza ta’ fastidju psikoloġiku.

14

Fl‑1 ta’ April 2016, l-appellanti ppreżentat l-osservazzjonijiet bil-miktub tagħha li fihom, filwaqt li tenniet il-fatt li l-aġir tal-Kap tal-Unità fil-konfront tagħha kien jikkostitwixxi “turment [fastidju] psikoloġiku” fis-sens tal-Artikolu 12a tar-Regolamenti tal-Persunal, hija b’mod partikolari kkontestat l-affermazzjoni tad-Direttur Ġenerali tal-Persunal li tgħid li l-Kumitat Konsultattiv ma ħejjiex rapport, skont l-Artikolu 14 tar-Regoli interni dwar il-fastidju, imma ta biss opinjoni. F’dan ir-rigward, hija sostniet li r-rifjut tad-Direttur Ġenerali tal-Persunal li jikkomunikalha l-konklużjonijiet kollha kemm huma tal-Kumitat Konsultattiv jikser id-drittijiet tad-difiża tagħha u jċaħħad minn kull effett utli l-osservazzjonijiet li hija ppreżentat.

15

Permezz ta’ deċiżjoni tat‑3 ta’ Ġunju 2016, id-Direttur Ġenerali tal-Persunal, li kien qiegħed jaġixxi fil-kwalità ta’ ASTK, ċaħad it-talba għal assistenza (iktar ’il quddiem id-“deċiżjoni kontenzjuża”). F’din id-deċiżjoni, huwa b’mod partikolari spjega li l-appellanti kienet ġiet informata, b’mod sħiħ u ddettaljat, bil-motivi li għalihom huwa kellu l-intenzjoni, fit-8 ta’ Diċembru 2015, li jiċħad it-talba għal assistenza. Barra minn hekk, skont id-Direttur Ġenerali tal-Persunal, minn naħa, l-appellanti ma kellha ebda dritt suġġettiv għall-komunikazzjoni ta’ rapport ta’ investigazzjoni, ta’ opinjoni jew ta’ depożizzjonijiet tas-smigħ tax-xhieda stabbiliti mill-Kumitat Konsultattiv. Min-naħa l-oħra, id-Direttur Ġenerali tal-Persunal żamm mal-analiżi li huwa kien espona fl-ittra tiegħu tat‑8 ta’ Diċembru 2015 u, għaldaqstant, iddeċieda li ma jirrikonoxxix li s-sitwazzjoni deskritta mill-appellanti kienet taqa’ taħt il-kunċett ta’ “turment [(fastidju] psikoloġiku” fis-sens tal-Artikolu 12a tar-Regolamenti tal-Persunal.

16

Fis‑6 ta’ Settembru 2016, l-appellanti ressqet, skont l-Artikolu 90(2) tar-Regolamenti tal-Persunal, ilment kontra d-deċiżjoni konenzjuża. Insostenn ta’ dan l-ilment, hija invokat ksur tad-drittijiet tad-difiża, tal-Artikolu 41 tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”), tad-dritt għal smigħ u tal-prinċipju tal-kontradittorju kif ukoll irregolaritajiet fil-proċedura segwita mill-Kumitat Konsultattiv, żbalji manifesti ta’ evalwazzjoni, ksur tal-Artikoli 12a u 24 tar-Regolamenti tal-Persunal kif ukoll tal-obbligu ta’ assistenza u tad-dmir ta’ premura.

17

Permezz ta’ deċiżjoni tal‑4 ta’ Jannar 2017, is-Segretarju Ġenerali, fil-kwalità tiegħu ta’ ASTK, ċaħad l-imsemmi lment.

18

Fir-rigward tal-ilment tal-appellanti dwar l-assenza ta’ komunikazzjoni, mill-ASTK, tar-rapport imħejji mill-kumitat konsultattiv u d-depożizzjonijiet tas-smigħ tax-xhieda, is-Segretarju Ġenerali qies b’mod partikolari li, fid-dawl tal-ġurisprudenza li tirriżulta mis-sentenzi tal‑11 ta’ Lulju 2013, Tzirani vs Il-Kummissjoni (F‑46/11, EU:F:2013:115), u tat‑23 ta’ Settembru 2015, Cerafogli vs BĊE (T‑114/13 P, EU:T:2015:678), ma kien hemm l-ebda obbligu, għall-ASTK, li tittrażmetti dawn id-dokumenti lil-appellanti, b’mod partikolari peress li, fi ħdan il-Parlament, il-Kumitat Konsultattiv kellu jaħdem bl-ikbar kunfidenzjalità u li l-ħidma tiegħu kienet sigrieta. Issa, sabiex tkun żgurata l-libertà tal-espressjoni ta’ dawk kollha involuti, b’mod partikolari tax-xhieda, kien ikun impossibbli, għall-ASTK, li tittrażmetti dawn id-dokumenti lill-appellanti.

19

Fir-rigward tal-eżistenza, f’dan il-każ, ta’ “turment [fastidju] psikoloġiku” fis-sens tal-Artikolu 12a(3) tar-Regolamenti, is-Segretarju Ġenerali qies li “b’mod ġenerali, il-fatti invokati [mill-appellanti]” ma jidhrux li jikkostitwixxu abbuż minn kap tal-unità fil-konfront ta’ subordinat.” [traduzzjoni mhux uffiċjali]

Il-proċedura quddiem il-Qorti Ġenerali u s-sentenza appellata

20

Permezz ta’ att ippreżentat fir-Reġistrtu tal-Qorti Ġenerali fit‑12 ta’ April 2017, l-appellanti ppreżentat rikors intiż, minn naħa, għall-annullament tad-deċiżjoni tal-Parlament tat‑3 ta’ Ġunju 2016 li permezz tagħha l-ASTK ċaħdet it-talba tagħha għal assistenza mressqa fil‑11 ta’ Diċembru 2014 u, min-naħa l-oħra, għall-kumpens għad-dannu allegatament subit minnha bħala riżultat tal-atti illegali mwettqa minn din l-awtorità fit-trattament ta’ dik it-talba.

21

Insostenn tat-talbiet għal annullament tagħha, l-appellanti invokat tliet motivi bbażati, l-ewwel wieħed, fuq ksur tad-drittijiet tad-difiża, tal-Artikolu 41 tal-Karta, tad-dritt għal smigħ u tal-prinċipju tal-kontradittorju, it-tieni wieħed, fuq żbalji proċedurali, u, iktar preċiżament, fuq li l-proċedura segwita mill-Kumitat Konsultattiv kienet irregolari u parzjali kif ukoll, it-tielet wieħed, fuq żbalji manifesti ta’ evalwazzjoni, fuq ksur tal-obbligu ta’ assistenza u tad-dmir ta’ premura kif ukoll fuq ksur tal-Artikoli 12a u 24 tar-Regolamenti tal-Persunal.

22

Insostenn tat-talbiet tagħha għal kumpens, l-appellanti ssostni li hija ġarrbet dannu morali minħabba l-illegalitajiet imwettqa mill-ASTK fit-trattament tat-talba għal assistenza. Hija talbet, għal dawn ir-raġunijiet, l-għoti ta’ ammont ta’ EUR 70 000 bħala kumpens għad-danni. Barra minn hekk, l-appellanti titlob ammont addizzjonali ta’ EUR 20 000 bħala kumpens għad-dannu morali li jirriżulta mill-irregolaritajiet li affettwa l-proċedura ta’ investigazzjoni, f’dan il-każ fir-rigward tax-xogħol tal-Kumitat Konsultattiv. B’hekk, skont l-appellanti, l-ASTK kienet kisret b’mod partikolari l-prinċipju tat-terminu raġonevoli għat-trattament tat-talba għal assistenza tagħha.

23

Permezz tas-sentenza appellata, il-Qorti Ġenerali ċaħdet ir-rikors fl-intier tiegħu bħala infondat.

It-talbiet tal-partijiet

It-talbiet tal-appell

24

Permezz tal-appell tagħha, l-appellanti titlob li l-Qorti tal-Ġustizzja jogħġobha:

–

tannulla s-sentenza appellata u, konsegwentement,

–

tagħti lill-appellanti l-benefiċċju tat-talbiet tagħha fl-ewwel istanza,

–

tannulla d-deċiżjoni kontenzjuża;

–

tikkundanna lill-Parlament għall-kumpens tad-dannu morali tagħha stmat ex aequo et bono fis-somma ta’ EUR 90 000, u

–

tikkundanna lill-Parlament għall-ispejjeż kollha taż-żewġ istanzi.

25

Il-Parlament jitlob li l-Qorti tal-Ġustizzja jogħġobha:

–

li tiddikjara l-appell infondat;

–

tikkundanna lill-appellanti għall-ispejjeż.

It-talbiet tal-appell inċidentali

26

Permezz tal-appell inċidentali tiegħu, il-Parlament jitlob li l-Qorti tal-Ġustizzja:

–

tannulla s-sentenza appellata;

–

tagħti deċiżjoni fil-mertu sabiex tiċħad ir-rikors, u

–

tikkundanna lill-appellanti għall-ispejjeż.

27

L-appellanti titlob li l-Qorti tal-Ġustizzja jogħġobha:

–

tikkonferma s-sentenza appellata fir-rigward tal-prinċipji stabbiliti fil-punti 80, 81 u 123 ta’ dik is-sentenza;

–

tannulla s-sentenza appellata sa fejn ċaħdet it-talbiet tal-appellanti u, konsegwentement,

–

tagħti lill-appellanti l-benefiċċju tat-talbiet tagħha fl-ewwel istanza;

–

tannulla d-deċiżjoni kontenzjuża;

–

tikkundanna lill-Parlament għall-kumpens tad-dannu morali tagħha stmat ex aequo et bono fis-somma ta’ EUR 90 000, u

–

tikkundanna lill-Parlament għall-ispejjeż kollha taż-żewġ istanzi.

Fuq l-appell inċidentali

L-argumenti tal-partijiet

28

Insostenn tal-appell inċidentali tiegħu, il-Parlament jinvoka żewġ aggravji bbażati, l-ewwel wieħed, fuq żball ta’ liġi imwettaq mill-Qorti Ġenerali meta ddeċidiet, fil-punt 81 tas-sentenza appellata, li din l-istituzzjoni kellha tikkomunika lil HF l-opinjoni tal-Kumitat Konsultattiv, u t-tieni wieħed, fuq żball ta’ liġi fil-punt 123 tas-sentenza appellata, sa fejn il-Qorti Ġenerali ma llimitatx ruħha għall-eżami ta’ żball manifest ta’ evalwazzjoni.

29

L-appellanti tikkontesta dan l-argument.

Il-kunsiderazzjonijiet tal-Qorti tal-Ġustizzja

30

Għandu jitfakkar qabel kollox li hija l-Qorti tal-Ġustizzja li għandha tqajjem ex officio kwalunkwe kwistjoni relatata mal-ammissibbiltà tal-appell jew mal-aggravji (ara, f’dan is-sens, is-sentenza tat‑28 ta’ Frar 2008, Neirinck vs Il-Kummissjoni, C‑17/07 P, EU:C:2008:134, punt 38 u l-ġurisprudenza ċċitata).

31

F’dan ir-rigward, għandu jiġi rrilevat li, minn naħa, skont l-ewwel u t-tieni paragrafu tal-Artikolu 56 tal-Istatut tal-Qorti tal-Ġustizzja tal-Unjoni Ewropea, jista’ jiġi ppreżentat appell quddiem il-Qorti tal-Ġustizzja kontra d-deċiżjonijiet tal-Qorti Ġenerali li jtemmu l-proċeduri, minn kwalunkwe parti li parzjalment jew totalment tilfet fit-talbiet tagħha.

32

Minn naħa, l-Artikolu 178(1) tar-Regoli tal-Proċedura tal-Qorti tal-Ġustizzja jirrikjedi li t-talbiet tal-appell inċidentali jkunu intiżi għall-annullament, totali jew parzjali, tad-deċiżjoni tal-Qorti Ġenerali.

33

F’dan il-każ, kif irrileva l-Avukat Ġenerali, essenzjalment, fil-punt 37 tal-konklużjonijiet tiegħu, peress li l-Qorti Ġenerali ċaħdet ir-rikors tal-appellanti u b’hekk it-talba ta’ din tal-aħħar għall-annullament tad-deċiżjoni kontenzjuża, il-Parlament ma jistax jitqies li tilef fit-talbiet tiegħu.

34

Peress li ż-żewġ aggravji tal-appell inċidentali ma għandhomx it-tendenza, fir-realtà, li jiksbu sostituzzjoni tal-motivi fir-rigward tal-analiżi mwettqa mill-Qorti Ġenerali fil-punti 80 sa 81 u 123 tas-sentenza appellata, ma jistgħux jintlaqgħu (ara, f’dan is-sens, is-sentenza tas‑27 ta’ Marzu 2019, Canadian Solar Emea et vs il-Kunsill, C‑236/17 P, EU:C:2019:258, punt 75 kif ukoll il-ġurisprudenza ċċitata).

35

Minn dan isegwi li ż-żewġ aggravju tal-appell inċidentali għandhom jitwarrbu bħala inammissibbli.

36

Fir-rigward tat-talba tal-Parlament dwar l-oneru tal-ispejjeż, għandu jitfakkar li, skont l-Artikolu 58 tal-Istatut tal-Qorti tal-Ġustizzja tal-Unjoni Ewropea, appell ma jistax jikkonċerna biss l-oneru u l-ammont tal-ispejjeż. Issa, sa fejn iż-żewġ aggravji tal-appell inċidentali huma inammissibbli, din it-talba tal-Parlament ma tistax tintlaqa’.

37

Fid-dawl tal-kunsiderazzjonijiet preċedenti, l-appell inċidentali għandu jiġi miċħud kollu kemm hu.

Fuq l-appell prinċipali

38

Insostenn tal-appell tagħha, l-appellanti tinvoka tliet aggravji. L-ewwel wieħed huwa bbażat fuq ksur tad-dritt għal smigħ sanċit fl-Artikolu 41(2)(a) tal-Karta. It-tieni wieħed huwa bbażat fuq ksur tal-Artikolu 41(1) tal-Karta u tal-obbligu tal-Qorti tal-Ġustizzja u tal-obbligu ta’ motivazzjoni li għandha l-Qorti Ġenerali, kif ukoll distorsjoni tal-kontenut tal-proċess u tal-argumenti tagħha. It-tielet huwa bbażat fuq ksur tal-Artikolu 31(1) tal-Karta, tal-Artikolu 12a(1) u (3) tar-Regolamenti tal-Persunal kif ukoll tal-Artikolu 24 ta’ dawn ir-Regolamenti tal-Persunal.

L-argumenti tal-partijiet

39

Skont l-appellanti, fl-ewwel lok, il-Qorti Ġenerali kisret l-Artikolu 12a(1) u (3) tar-Regolamenti tal-Persunal kif ukoll l-Artikolu 24 ta’ dawn ir-regolamenti billi naqset milli tieħu inkunsiderazzjoni, fil-punti 84 u 85 tas-sentenza appellata, li wieħed mill-għanijiet tal-ipproċessar ta’ talba għal assistenza, jiġifieri dak li jikkonsisti fir-restawr tas-serenità fid-dipartiment ikkonċernat, mingħajr ma jittieħed kont ta’ wieħed minn dawn l-għanijiet li madankollu tfakkar fil-punt 83 ta’ din is-sentenza, jiġifieri l-implimentazzjoni konkreta tal-projbizzjoni ta’ kwalunkwe forma ta’ fastidju psikoloġiku.

40

Fit-tieni lok, is-sentenza appellata hija vvizzjata minn nuqqas ta’ motivazzjoni u minn kontradizzjoni sa fejn il-Qorti Ġenerali kkunsidrat li d-depożizzjonijiet tas-smigħ tax-xhieda ma għandhomx jiġu kkomunikati lill-appellanti sabiex tiġi protetta l-anonimità ta’ dawn ix-xhieda. Fil-fatt, fil waqt li l-Qorti Ġenerali speċifikat, fil-punt 80 tas-sentenza appellata, li l-opinjoni tal-Kumitat Konsultattiv tista’ tiġi stabbilita f’forma mhux kunfidenzjali li tosserva l-anonimità mogħtija lix-xhieda, il-Qorti Ġenerali ma ħaditx pożizzjoni dwar din il-kwistjoni fir-rigward tad-depożizzjonijiet tas-smigħ. B’hekk, il-Qorti Ġenerali, mingħajr spjegazzjoni, ma applikatx l-istess kriterji għaż-żewġ dokumenti inkwistjoni rigward il-komunikazzjoni tagħhom. Il-Qorti Ġenerali ukoll ikkontradixxiet lilha nnifisha sa fejn ma kkunsidratx l-anonimizzazzjoni possibbli tad-depożizzjonijiet tas-smigħ tax-xhieda, għalkemm l-istess għan li tiggarantixxi l-anonimità tax-xhieda jgħodd kemm għall-komunikazzjoni tal-opinjoni tal-Kumitat Konsultattiv kif ukoll għal dawn id-depożizzjonijiet tas-smigħ.

41

Skont l-appellanti, sa fejn l-illegalitajiet li hija kkonstatat, fil-punti 83 sa 85 tas-sentenza appellata, wasslu lill-Qorti Ġenerali sabiex tiddeċiedi li d-depożizzjonijiet tas-smigħ tax-xhieda ma għandhomx jiġu kkomunikati lilha qabel tissottometti l-osservazzjonijiet tagħha, il-Qorti Ġenerali b’hekk kisret l-Artikolu 41(2)(a) tal-Karta kif ukoll id-dritt tagħha għal smigħ.

42

Fit-tielet lok, l-appellanti ssostni, essenzjalment, li l-Qorti Ġenerali, fil-punt 89 tas-sentenza appellata, impliċitament, iżda neċessarjament, ammettiet li d-dritt tagħha għal smigħ ma kienx ġie ggarantit, billi rrikonoxxiet li, sabiex tiddeċiedi dwar it-talba għal assistenza, l-ASTK kellha bżonn id-depożizzjonijiet tas-smigħ sabiex tikkompleta n-natura konċiża tal-opinjoni tal-Kumitat Konsultattiv.

43

Fir-raba’ lok l-appellanti tqis, essenzjalment, li, għalkemm il-Qorti Ġenerali ammettiet, fil-punt 90 tas-sentenza appellata, li hija kienet ressqet argumenti ġodda bbażati fuq ir-rapporti tas-smigħ matul il-fażi kontenzjuża, li setgħu jwasslu għal riżultat differenti fir-rigward tal-eżitu tat-talba għal assistenza, hija ddeċidiet li ma kien hemm l-ebda ksur tad-dritt għal smigħ. Skont l-appellanti, din l-evalwazzjoni tal-Qorti Ġenerali hija bbażata fuq il-premessa żbaljata li t-traskrizzjonijiet tas-seduti ma kellhomx jiġu kkomunikati lilha.

44

Bi tweġiba, il-Parlament jikkunsidra, essenzjalment, li l-ewwel aggravju għandu jiġi miċħud bħala infondat.

45

Il-Parlament isostni, fl-ewwel lok, li, skont l-Artikolu 41(2)(b) tal-Karta, il-kunfidenzjalità hija limitu leġittimu fuq id-dritt għal smigħ.

46

F’dan ir-rigward, il-Parlament jispeċifika li huwa essenzjali li tiġi ggarantita l-kunfidenzjalità tax-xhieda waqt inkjesti amministrattivi mhux biss kontra l-persuna allegata responsabbli għal fastidju, iżda wkoll kontra l-lanjant, sabiex tkun iggarantita li x-xhieda jkollhom il-libertà li jitkellmu. Fil-fatt, minn naħa, tneħħija eventwali ta’ din il-kunfidenzjalità, b’mod partikolari matul il-proċedura kontenzjuża, tista’ tipprevjeni ż-żamma ta’ investigazzjonijiet newtrali u oġġettivi li jibbenefikaw mingħajr restrizzjoni mill-kontribuzzjoni ta’ persuni msejħa sabiex jinstemgħu, fuq bażi volontarja, bħala xhieda. Min-naħa l-oħra, il-kunfidenzjalità tipprovdi garanziji lil dawn ix-xhieda sa fejn ikollhom b’hekk l-assigurazzjoni li ma jiffaċċjawx ritaljazzjoni jew pressjoni mill-persuni involuti.

47

Il-Parlament iżid li, konformement mar-regoli interni tiegħu f’dan il-qasam, il-president tal-Kumitat Konsultattiv assigura lix-xhieda li x-xhieda tagħhom ser tinżamm kunfidenzjali.

48

Fit-tieni lok, il-Parlament jinnota li l-għan li terġa’ tinkiseb is-serenità lura fi ħdan id-dipartiment huwa komplimentari u inseparabbli minn dak li jitwaqqaf il-fastidju. B’hekk, it-tneħħija tal-kunfidenzjalità tista’ potenzjalment toħloq kunflitti fid-dipartiment billi terġa’ titqajjem xi animosità fi ħdanu. Konsegwentement, l-appellanti ma tistax issostni li l-Qorti Ġenerali ma ħaditx inkonsiderazzjoni t-tieni wieħed minn dawn l-għanijiet.

49

Fit-tielet lok il-Parlament jenfasizza li l-anonimizzazzjoni ta’ smigħ, jiġifieri t-tħassir tal-ismijiet tax-xhieda, ma hijiex biżżejjed sabiex tiggarantixxi l-impossibilità ta’ identifikazzjoni tal-persuna li tagħti x-xhieda tagħha peress li x-xhud jista’ jkun identifikabbli wkoll permezz ta’ sovrappożizzjonijiet ta’ informazzjoni u, b’mod partikolari, mill-fatti stess li jikkonferma.

50

Fir-raba’ lok, il-Parlament isostni li l-appellanti ingħatat l-opportunità kollha li teżerċita d-dritt tagħha għal smigħ, skont l-Artikolu 41 tal-Karta, fl‑1 ta’ April 2016, peress li kienet irċeviet, f’dik id-data, komunikazzjoni tal-motivi li fuqhom l-amministrazzjoni bbażat l-intenzjoni tagħha li tiċħad it-talba tagħha għal assistenza. F’dan il-kuntest, il-Parlament ifakkar li, skont il-qorti tal-Unjoni, fi kwistjonijiet ta’ assistenza għal fastidju, min jitlob l-assistenza ma jgawdix minn protezzjoni ġuridika tant estensiva bħal dik mogħtija fil-kuntest tad-drittijiet tad-difiża imma, sabiex tirrispetta d-dritt għal amministrazzjoni tajba, jibbenefika mid-dritt għal smigħ, skont l-Artikolu 41(2)(a) tal-Karta.

51

Konsegwentement, interpretazzjoni korretta tal-Artikolu 41 tal-Karta timplika li l-appellanti hija intitolata li tirċievi mhux id-dokumenti kollha mħejjija fil-kuntest tal-ipproċessar tat-talba tagħha għal assistenza, iżda biss il-motivi li fuqhom l-amministrazzjoni bbażat l-intenzjoni tagħha li tiċħad din it-talba. Minn dan isegwi li l-appellanti ma jistax ikollha aċċess għar-rendikonti tas-smigħ waqt l-eżerċizzju tad-dritt tagħha għal ta’ smigħ.

52

Fil-ħames lok, fir-rigward tal-oġġezzjoni tal-appellanti għall-punt 90 tas-sentenza appellata, il-Parlament iqis li hija ineffettiva peress li, fi kwalunkwe każ, l-appellanti ma jistax ikollha aċċess għal xhieda li hija, min-natura tagħha, kunfidenzjali. Anki jekk wieħed jissupponi li l-appellanti kellha tali dritt, il-Parlament iqis li hija ma ressqet l-ebda argument ġdid li seta’ jkollu impatt fuq id-deċiżjoni tad-Direttur Ġenerali tal-Persunal tat‑3 ta’ Ġunju 2016 li tiċħad it-talba għal assistenza.

Il-kunsiderazzjonijiet tal-Qorti tal-Ġustizzja

53

Permezz tal-ewwel aggravju tagħha, l-appellanti tikkritika lill-Qorti Ġenerali li, essenzjalment, fuq ksur tad-dritt għal smigħ, kif iggarantit fl-Artikolu 41(2)(a) tal-Karta sa fejn ikkunsidrat li l-fatt li ġiet irrifjutata l-aċċess għad-depożizzjonijiet tas-smigħ tax-xhieda mħejjija mill-Kumitat Konsultattiv, qabel l-adozzjoni tad-deċiżjoni kontenzjuża, ma kienx kuntrarju għal dik id-dispożizzjoni.

54

Fl-ewwel lok, għandu jiġi nnotat li l-appellanti ċertament kienet instemgħet mill-ASTK abbażi tal-ittra tat‑8 ta’ Diċembru 2015 li esponiet il-motivi li għalihom id-Direttur Ġenerali tal-Persunal kellu l-intenzjoni li jiċħad it-talba tagħha għal assistenza. Madankollu, l-appellanti la kellha l-opinjoni tal-Kumitat Konsultattiv u lanqas ir-rapporti tas-smigħ imwettqa minn dak il-kumitat sabiex tifformula l-osservazzjonijiet tagħha dwar il-motivi invokati mill-ASTK f’dik l-ittra, sabiex tiċħad it-talba għal assistenza.

55

Fit-tieni lok, kif fakkret il-Qorti Ġenerali fil-punti 73 u 74 tas-sentenza appellata, id-deċiżjoni kontenzjuża tikkostitwixxi, peress li tiċħad it-talba għall assistenza u, għaldaqstant, tikkonkludi li ma hemmx fastidju psikoloġiku, miżura individwali meħuda fir-rigward tal-appellanti li taffettwaha negattivament, fis-sens tal-Artikolu 41(2) tal-Karta.

56

Fit-tielet lok, għandu jiġi speċifikat li, fil-kuntest ta’ proċedura bħal dik inkwistjoni, l-allegata vittma ta’ fastidju tista’ tinvoka d-dritt għal smigħ, skont il-prinċipju ta’ amministrazzjoni tajba. Fil-fatt, l-Artikolu 41 tal-Karta, intitolat “Id-dritt għal amministrazzjoni tajba” jipprevedi, fl-Artikolu 41(1) tiegħu, li kull persuna għandha d-dritt li dak kollu li jirrigwardaha jiġi ttrattat b’mod imparzjali u ġust u fi żmien raġonevoli mill-istituzzjonijiet u l-korpi tal-Unjoni.

57

Barra minn hekk, dan l-Artikolu 41jipprevedi fil-paragrafu 2 tiegħu li d-dritt għal amministrazzjoni tajba b’mod partikolari jinkludi, b’mod partikolari, id-dritt ta’ kull persuna għal smigħ, qabel ma tittieħed kwalunkwe miżura individwali li tolqotha negattivament, id-dritt ta’ kull persuna li jkollha aċċess għall-fajl li jikkonċernaha, filwaqt li jiġu osservati l-interessi leġittimi tal-kunfidenzjalità u tas-segretezza professjonali u tan-negozju; kif ukoll l-obbligu għall-amministrazzjoni li tagħti motivi għad-deċiżjonijiet tagħha.

58

B’mod partikolari, id-dritt għal smigħ jiggarantixxi lil kull persuna l-possibbiltà li tesprimi, b’mod utli u effettiv, il-perspettiva tagħha matul il-proċedura amministrattiva u qabel l-adozzjoni ta’ kull deċiżjoni li tista’ taffettwa negattivament l-interessi tagħha (ara s-sentenza tal‑4 ta’ April 2019, OZ vs BEI, C‑558/17 P, EU:C:2019:289, punt 53).

59

Għaldaqstant, hija l-Qorti tal-Ġustizzja li għandha tivverifika jekk il-Qorti Ġenerali wettqitx żball ta’ liġi billi ddeċidiet, fil-punti 82 sa 87 tas-sentenza appellata, li d-dritt għal smigħ ma kienx jimplika l-obbligu li tibgħat lill-appellanti r-rapporti tas-smigħ tax-xhieda qabel l-adozzjoni tad-deċiżjoni kontenzjuża. F’dan ir-rigward, il-Qorti Ġenerali tikkunsidra li, bħala prinċipju, sabiex tiġi żgurata implimentazzjoni effikaċi tal-projbizzjoni ta’ kwalunkwe forma ta’ fastidju psikoloġiku fuq il-post tax-xogħol, huwa permess għall-amministrazzjoni li tipprevedi l-possibbiltà li tiggarantixxi lix-xhieda, li jaċċettaw li jagħtu l-istqarrija tal-fatti kontenzjużi f’każ ta’ fastidju allegat, li x-xhieda tagħhom tinżamm kunfidenzjali, fir-rigward kemm tal-persuna allegatament responsabbli għall-fastidju kif ukoll tal-allegata vittma.

60

Il-Qorti tal-Ġustizzja diġà kkunsidrat li, fil-kuntest ta’ tilwima fil-qasam ta’ fastidju li timplika uffiċjali Ewropej, il-persuna li ressqet ilment għal fastidju quddiem id-Direttorat tal-Persunal kienet intitolata, sabiex tkun tista’ tippreżenta b’mod utli l-osservazzjonijiet tagħha lill-istituzzjoni kkonċernata qabel din tieħu deċiżjoni dwar l-ilment tagħha, li tirċievi, minn tal-inqas, sunt tad-dikjarazzjonijiet tal-persuna allegatament responsabbli għall-fastidju u tad-diversi xhieda li nstemgħu matul il-proċedura ta’ investigazzjoni, jekk ikun il-każ, fl-osservanza tal-prinċipju ta’ kunfidenzjalità. Il-Qorti tal-Ġustizzja indikat li dan kien il-każ sa fejn dawn id-dikjarazzjonijiet ġew użati fir-rapport mogħti lill-awtorità li ħadet id-deċiżjoni li ma taġixxix fuq l-ilment, u li kienet tinkludi rakkomandazzjonijiet li fid-dawl tagħhom din l-awtorità kienet ibbażat id-deċiżjoni tagħha (ara, f’dan is-sens, is-sentenza tal‑4 ta’ April 2019, OZ vs BEI, C‑558/17 P, EU:C:2019:289, punt 57).

61

F’dan il-każ, mill-punti 80 u 89 tas-sentenza appellata jirriżulta li, sabiex tiddeċiedi fuq it-talba għal assistenza, l-ASTK kellha mhux biss din l-opinjoni tal-Kumitat Konsultattiv, iżda wkoll id-depożizzjonijiet tas-smigħ ta’ xhieda, li pprovdewlha ħarsa komprensiva u ddettaljata tar-realtà ta’ dawn il-fatti kif ukoll fuq il-perċezzjoni tagħhom minn membri differenti tal-persunal tal-unità inkwistjoni.

62

Kif l-Avukat Ġenerali irrileva fil-punt 62 tal-konklużjonijiet tiegħu, sa fejn id-depożizzjonijiet tas-smigħ ittieħdu inkunsiderazzjoni mill-ASTK għall-finijiet tal-adozzjoni tad-deċiżjoni kontenzjuża, l-appellanti kellha tkun tista’ tesprimi ruħha dwarhom. Għaldaqstant, l-appellanti kellha d-dritt, sabiex tkun tista’ tippreżenta b’mod utli l-osservazzjonijiet tagħha, li tiġi kkomunikata, tal-inqas, sunt kemm tal-opinjoni tal-Kumitat Konsultattiv kif ukoll tad-depożizzjonijiet tas-smigħ tax-xhieda, sa fejn l-ASTK ibbażat id-deċiżjoni kontenzjuża fuq dawn id-dokumenti.

63

Madankollu, il-komunikazzjoni tal-imsemmija dokumenti lill-appellanti kellha titwettaq fl-osservanza tal-interessi leġittimi ta’ kunfidenzjalità li għandhom b’hekk ikunu bbilanċjati kontra d-dritt għal smigħ (ara, f’dan is-sens, is-sentenza tal‑4 ta’ April 2019, OZ vs BEI, C‑558/17 P, EU:C:2019:289, punt 57).

64

Il-Qorti Ġenerali ddeċidiet, fil-punt 83 tas-sentenza appellata, li kien permess li l-amministrazzjoni tipprevedi l-possibbiltà li tiggarantixxi lix-xhieda mismugħa waqt investigazzjoni li x-xhieda tagħhom tibqa’ kunfidenzjali.

65

Issa, din il-libertà mogħtija lill-amministrazzjoni ma hijiex neċessarjament inkompatibbli mar-rispett tad-dritt ta’ smigħ tal-persuna li tkun irrappurtat il-fatti tal-fastidju.

66

Fil-fatt, sabiex tkun iggarantita l-kunfidenzjalità tax-xhieda u l-għanijiet li tipproteġi, filwaqt li jkun assigurat li huwa b’mod utli li l-appellanti tinstema’ qabel ma tiġi adottata deċiżjoni li tikkawżalha preġudizzju, kif l-Avukat Ġenerali enfasizza, fil-punt 71 tal-konklużjonijiet tiegħu, jistgħu jintużaw ċerti tekniki bħall-anonimizzazzjoni jew saħansitra l-iżvelar tas-sustanza tax-xhieda fil-forma ta’ sunt, jew ukoll li jinħbew ċerti partijiet tal-kontenut tax-xhieda (ara, f’dan is-sens, is-sentenza tal‑4 ta’ April 2019, OZ vs BEI, C‑558/17 P, EU:C:2019:289, punt 59).

67

Issa, il-Qorti Ġenerali kkunsidrat li l-ASTK ma kinitx kisret id-dritt tal-appellanti għal smigħ billi rrifjutat li tingħatilha d-depożizzjonijiet tax-xhieda qabel l-adozzjoni tad-deċiżjoni kontenzjuża, mingħajr ma riedet issir taf kienx possibbli li jiġi rrikonċiljata r-rispett għall-interessi leġittimi tal-kunfidenzjalità ma’ dan id-dritt.

68

Barra minn hekk, għandu jiġi enfasizzat li tekniki bħal dawk imsemmija fil-punt 66 ta’ din is-sentenza ntużaw preċiżament waqt il-proċedura quddiem il-Qorti Ġenerali, li ordnat lill-Parlament sabiex jipproduċi verżjoni anonimizzata tad-depożizzjonijiet mogħtija inkwistjoni, parzjalment moħbija.

69

Għaldaqstant, kif l-Avukat Ġenerali irrileva fil-punt 76 tal-konklużjonijiet tiegħu, il-Qorti Ġenerali wettqet żball ta’ liġi billi ma kkonstatatx li kien kontra r-rekwiżiti li jirriżultaw mill-Artikolu 41 tal-Karta l-fatt li l-appellanti ma kinitx ġiet ikkomunikata, tal-inqas, sunt anonimizzat tad-dikjarazzjonijiet tad-diversi xhieda u li hija ma setgħetx tinstema’ dwarhom, b’tali mod li hija ma kinitx tpoġġiet f’pożizzjoni li tippreżenta b’mod utli osservazzjonijiet dwar il-kontenut tagħhom qabel ma d-Direttur Ġenerali tal-Persunal ħa d-deċiżjoni kontenzjuża, li affettwatha negattivament.

70

Minn dak li ntqal hawn fuq jirriżulta li l-ewwel aggravju tal-appell prinċipali għandu jintlaqa’ u s-sentenza appellata għandha tiġi annullata fuq din il-bażi kollha kemm hi, mingħajr ma jkun neċessarju li jiġu eżaminati l-argumenti l-oħra mqajma mill-appellanti fil-kuntest ta’ dan l-aggravju jew l-aggravji l-oħra tal-appell prinċipali.

Fuq ir-rikors quddiem il-Qorti Ġenerali

71

Konformement mat-tieni sentenza tal-ewwel paragrafu tal-Artikolu 61 tal-Istatut tal-Qorti tal-Ġustizzja tal-Unjoni Ewropea, din tal-aħħar tista’, fil-każ ta’ annullament tad-deċiżjoni tal-Qorti Ġenerali, tiddeċiedi hija stess definittivament il-kawża meta din tkun fi stat li tiġi deċiża.

72

Issa, għandu jitfakkar li minn ġurisprudenza stabbilita jirriżulta li ksur tad-drittijiet tad-difiża, b’mod partikolari tad-dritt għal smigħ, iwassal għall-annullament ta’ deċiżjoni adottata fit-tmiem il-proċedura biss jekk, fl-assenza ta’ din l-irregolarità, din il-proċedura setgħet twassal għal riżultat differenti (sentenzi tal‑10 ta’ Settembru 2013, G. u R., C‑383/13 PPU, EU:C:2013:533, punt 38, kif ukoll tal‑4 ta’ April 2019, OZ vs BEI, C‑558/17 P, EU:C:2019:289, punt 76).

73

F’dan il-każ, kif jirriżulta mill-punt 69 ta’ din is-sentenza, huwa bi ksur tal-Artikolu 41 tal-Karta li l-appellanti ma kinitx ġiet ikkomunikata, tal-inqas, sunt anonimizzat tad-dikjarazzjonijiet tad-diversi xhieda u li hija ma setgħetx tinstema’ dwarhom, b’tali mod li hija ma kinitx tpoġġiet f’pożizzjoni li tippreżenta b’mod utli osservazzjonijiet dwar il-kontenut tagħhom qabel ma d-Direttur Ġenerali tal-Persunal ħa d-deċiżjoni kontenzjuża, li affettwatha negattivament. Issa, kif irrileva l-Avukat Ġenerali, fil-punti 121 sa 123 tal-konklużjonijiet tiegħu, dan in-nuqqas ta’ komunikazzjoni jikkostitwixxi irregolarità li inevitabbilment taffettwa kemm l-opinjoni tal-Kumitat Konsultattiv kif ukoll id-deċiżjoni kontenzjuża. Fil-fatt, jekk l-appellanti ngħatat l-opportunità li tinstema’ b’mod utli, setgħet ikkonvinċiet lid-Direttur Ġenerali tal-Persunal li evalwazzjoni oħra tal-fatti u tal-elementi varji tal-kuntest, li kienet deċiżiva għal din id-deċiżjoni, kienet possibbli u li għandu jiġi applikat piż differenti għalihom.

74

Għaldaqstant, ma jistax jiġi eskluż li d-deċiżjoni meħuda mid-Direttur Ġenerali tal-Persunal dwar it-talba għal assistemza imressqa mill-appellanti kienet tkun waħda pożittiva.

75

Għaldaqstant hemm lok li d-deċiżjoni kontenzjuża tiġi annullata.

76

Fir-rigward tat-talbiet għall-finijiet tal-kumpens għad-dannu tagħha mressqa mill-appellanti, għandu jiġi rrilevat, minn naħa, li l-annullament tad-deċiżjoni kontenzjuża jikkostitwixxi kumpens adegwat għal kull dannu morali li l-appellanti setgħet ġarrbet f’dan il-każ.

77

It-talbiet għal kumpens intiżi sabiex jinkiseb kumpens għal dan id-dannu morali huma għaldaqstant mingħajr skop u ma hemmx lok li tingħata deċiżjoni dwar dan is-suġġett (ara, f’dan is-sens, is-sentenza tal-4 ta’ April 2019, OZ vs BEI, C‑558/17 P, EU:C:2019:289, punt 81).

78

F’dawn iċ-ċirkustanzi, it-talbiet imressqa mill-appellanti għall-finijiet tal-kumpens għad-dannu tagħha għandhom jiġu miċħuda.

Fuq l-ispejjeż

79

Skont l-Artikolu 184(2) tar-Regoli tal-Proċedura tal-Qorti tal-Ġustizzja, meta l-appell ikun fondat u l-Qorti tal-Ġustizzja tiddeċiedi definittivament il-kawża hija stess, hija għandha tiddeċiedi dwar l-ispejjeż.

80

Skont l-Artikolu 138(1) tal-istess regoli, applikabbli għall-proċedura ta’ appell skont l-Artikolu 184(1) tagħhom, il-parti li titlef il-kawża għandha tiġi kkundannata għall-ispejjeż, jekk dawn ikunu ntalbu f’dan is-sens.

81

Peress li l-Parlament tilef fir-rigward tal-parti essenzjali tat-talbiet tiegħu, għandu jiġi kkundannat ibati, minbarra l-ispejjeż tiegħu stess, dawk sostnuti mill-appellanti u marbuta, skont it-talbiet ta’ din tal-aħħar, kemm mal-proċedura tal-ewwel istanza u kemm mal-proċedura tal-appell.

1)

Is-sentenza tal-Qorti Ġenerali tal-Unjoni Ewropea tad‑29 ta’ Ġunju 2018, HF vs Il-Parlament (T‑218/17, EU:T:2018:393), hija annullata.

2)

Id-deċiżjoni tad-Direttur Ġenerali tal-Persunal tal-Parlament Ewropew, li jaġixxi bħala l-awtorità bis-setgħa tikkonkludi l-kuntratti ta’ reklutaġġ ta’ din l-istituzzjoni, tat‑3 ta’ Ġunju 2016, li tiċħad it-talba għal assistenza, fis-sens tal-Artikolu 24 tar-Regolamenti tal-Persunal tal-Unjoni Ewropea, mitluba minn HF, hija annullata.

3)

Il-kumplament tar-rikors huwa miċħud.

4)

Il-Parlament Ewropew huwa kkundannat ibati, minbarra l-ispejjeż tiegħu stess, dawk sostnuti minn HF, marbuta kemm mal-proċedura tal-ewwel istanza u kemm mal-proċedura tal-appell.