(1)

Le Rialachán (CE) Uimh. 1831/2003 déantar foráil maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta chun an t-údarú sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le hullmhóid in-1,4-béite-xiolanáise, in-1,4-béite-ghlúcanáise agus in-béite-1,4-glúcanáise a ghníomhaíonn go sonrach ar xileaglúcan arna táirgeadh ag Trichoderma citrinoviride DSM 33578 a údarú. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(3)

Baineann an t-iarratas sin leis an ullmhóid in-1,4-béite-xiolanáise, in-1,4-béite-ghlúcanáise agus in-béite-1,4-glúcanáise a ghníomhaíonn go sonrach ar xileaglúcan arna táirgeadh ag Trichoderma citrinoviride DSM 33578 a údarú mar bhreiseán beathaithe le haghaidh gach speicis éanlaithe clóis, éin ornáideacha agus banbh, ullmhóid atá le haicmiú sa chatagóir ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid, sa tuairim uaidh an 23 Samhain 2022 (2), nach bhfuil éifeachtaí díobhálacha ag ullmhóid in-1,4-béite-xiolanáise, in-1,4-béite-ghlúcanáise agus in-béite-1,4-glúcanáise a ghníomhaíonn go sonrach ar xileaglúcan a tháirgtear le Trichoderma citrinoviride DSM 33578 ar shláinte ainmhithe, ar shábháilteacht tomhaltóirí ná ar an gcomhshaol, faoi na coinníollacha úsáide atá beartaithe. Tháinig an tÚdarás ar an gconclúid freisin gur cheart an ullmhóid a mheas mar íogróir riospráide ach, in éagmais sonraí, nach raibh sé in ann teacht ar chonclúid maidir le greannú craicinn na hullmhóide don chraiceann. Tháinig an tÚdarás ar an gconclúid freisin go bhféadfadh an ullmhóid in-1,4-béite-xiolanáise, in-1,4-béite-ghlúcanáise agus in-béite-1,4-glúcanáise a ghníomhaíonn go sonrach ar xileaglúcan agus arna táirgeadh ag Trichoderma citrinoviride DSM 33578 a bheith éifeachtúil in éanlaith chlóis lena ramhrú, in éanlaith chlóis a thógtar le bheith ina mbéaróga agus a thógtar le haghaidh pórúcháin, agus in éin ornáideacha. I ngeall ar easpa sonraí leordhóthanacha, áfach, ní raibh an tÚdarás in ann teacht ar chonclúid maidir le héifeachtúlacht na hullmhóide le haghaidh béaróg agus bainbh scoite. Mheas an tÚdarás nach raibh gá le ceanglais shonracha maidir le faireachán iarmhargaidh. D’fhíoraigh sé freisin an tuarascáil ar na modhanna a úsáidtear chun anailís a dhéanamh ar an mbreiseán beathaithe agus é i mbeatha, tuarascáil arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

Leis an measúnú ar an ullmhóid in-1,4-béite-xiolanáise, in-1,4-béite-ghlúcanáise agus in-béite-1,4-glúcanáise a ghníomhaíonn go sonrach ar xileaglúcan arna táirgeadh ag Trichoderma citrinoviride DSM 33578, léirítear go gcomhlíontar na coinníollacha maidir le húdarú, dá bhforáiltear in Airteagal 5 de Rialachán (CE) Uimh. 1831/2003, le haghaidh éanlaith chlóis lena ramhrú, le haghaidh éanlaith chlóis a thógtar le bheith ina mbéaróga agus a thógtar le haghaidh pórúcháin, agus le haghaidh éin ornáideacha. Dá réir sin, ba cheart úsáid na hullmhóide sin a údarú le haghaidh na speiceas agus na gcatagóirí ainmhithe sin. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe a mhéid a bhaineann le húsáideoirí an bhreiseáin.

(6)

Iarradh ar an iarratasóir, agus ghlac sé leis, faisnéis fhorlíontach a chur isteach a thugann aghaidh ar na heasnaimh a sainaithníodh sa tuairim ón Údarás maidir le héifeachtúlacht na hullmhóide le haghaidh béaróg agus le haghaidh bainbh scoite.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,