(1)

Le hAirteagail 168 agus 168a de Threoir 2006/112/CE rialaítear ceart na ndaoine inchánacha an cháin bhreisluacha (CBL) a ghearrtar ar sholáthairtí earraí agus seirbhísí a úsáideann siad chun críocha a n-idirbheart cáinmhuirearaithe a asbhaint. Údaraíodh don Ghearmáin beart speisialta a thabhairt isteach lena mbeartaítear a eisiamh ón gceart asbhainte an CBL a ghearrtar ar earraí agus ar sheirbhísí a mbíonn níos mó ná 90 % dá n-úsáid d’úsáid phríobháideach daoine inchánach nó d’úsáid phríobháideach a gcuid fostaithe, nó go ginearálta, chun críoch neamhghnó nó gníomhaíochtaí neamheacnamaíocha (‘an beart speisialta’).

(2)

Le Cinneadh 2000/186/CE ón gComhairle (2), údaraíodh don Ghearmáin bearta speisialta a thabhairt isteach agus a chur i bhfeidhm de mhaolú ar Airteagail 6 agus 17 de Threoir 77/388/CEE (3) ón gComhairle go dtí an 31 Nollaig 2002. Le Cinneadh 2003/354/CE ón gComhairle (4), údaraíodh don Ghearmáin an beart speisialta a chur i bhfeidhm, de mhaolú ar Airteagal 17 de Threoir 77/388/CEE, go dtí an 30 Meitheamh 2004. Le Cinneadh 2004/817/CE ón gComhairle (5), cuireadh síneadh leis an údarú go dtí an 31 Nollaig 2009.

(3)

Le Cinneadh 2009/791/CE ón gComhairle (6) údaraíodh don Ghearmáin an beart speisialta a chur i bhfeidhm, de mhaolú ar Airteagal 168 de Threoir 2006/112/CEE, go dtí an 31 Nollaig 2012.

(4)

Le Cinneadh Cur Chun Feidhme 2012/705/AE ón gComhairle (7), leasaíodh Cinneadh 2009/791/CE, lenar údaraíodh don Ghearmáin an beart speisialta a chur i bhfeidhm, de mhaolú ar Airteagail 168 agus 168a de Threoir 2006/112/CE, go dtí an 31 Nollaig 2015. Cuireadh síneadh leis an údarú sin ina dhiaidh sin le Cinntí Cur Chun Feidhme (AE) 2015/2428 (8), (AE) 2018/2060 (9) agus (AE) 2021/1776 (10) ón gComhairle.

(5)

Tá Cinneadh 2009/791/CE le dul in éag an 31 Nollaig 2024.

(6)

Le litir a chláraíodh leis an gCoimisiún an 19 Feabhra 2024, d’iarr an Ghearmáin údarú chun leanúint den bheart speisialta a chur i bhfeidhm. Bhí tuarascáil maidir le cur i bhfeidhm an bhirt speisialta ag gabháil leis an iarraidh sin, lena n-áirítear athbhreithniú ar an ráta cionroinnte a chuirtear i bhfeidhm maidir leis an gceart CBL a asbhaint mar a cheanglaítear le hAirteagal 2 de Chinneadh 2009/791/CE ón gComhairle. D’iarr an Coimisiún mínithe breise ar an nGearmáin an 26 Márta 2024 agus fuarthas freagra an 27 Márta 2024.

(7)

I gcomhréir le hAirteagal 395(2), an dara fomhír, de Threoir 2006/112/CE, tharchuir an Coimisiún an iarraidh a rinne an Ghearmáin chuig na Ballstáit eile le litreacha dar dáta an 27 Bealtaine 2024. Le litir dar dáta an 28 Bealtaine 2024, thug an Coimisiún fógra don Ghearmáin go raibh an fhaisnéis riachtanach ar fad aige chun breithmheas a dhéanamh ar an iarraidh.

(8)

Dar leis an nGearmáin, tá léirithe go bhfuil an beart speisialta an-éifeachtach maidir le bailiú CBL a shimpliú agus imghabháil cánach agus seachaint cánach a chosc. Leis an mbeart speisialta, laghdaítear an t-ualach riaracháin ar ghnólachtaí agus ar údaráis chánach, ós rud é nach bhfuil aon ghá le faireachán a dhéanamh ar úsáid na n-earraí agus na seirbhísí ina dhiaidh sin a raibh feidhm ag an eisiamh ón asbhaint maidir leo tráth a n-éadála. Ba cheart, dá bhrí sin, údarú a thabhairt don Ghearmáin leanúint den bheart speisialta a chur i bhfeidhm go dtí an 31 Nollaig 2027.

(9)

I gcás ina measfaidh an Ghearmáin go mbeidh gá síneadh a chur leis an mbeart speisialta tar éis 2027, ba cheart di iarraidh ar shíneadh a chur faoi bhráid an Choimisiúin faoin 31 Márta 2027. Ba cheart tuarascáil maidir le cur i bhfeidhm an bhirt a bheith ag gabháil leis an iarraidh sin, lena n-áiritear athbhreithniú ar an ráta cionroinnte arna chur i bhfeidhm.

(10)

Ní dheanfaidh an beart speisialta dochair d’acmhainní dílse an Aontais a fhabhraíonn ó CBL.

(11)

Ba cheart, dá bhrí sin, Cinneadh 2009/791/CE a leasú dá réir sin,