A.   Litir ón Aontas Eorpach

A Dhuine Uasail,

Tá sé d’onóir agam tagairt a dhéanamh don chaibidlíocht a rinneadh i gcomhréir le hAirteagal XXVIII de Chomhaontú Ginearálta 1994 um Tharaifí agus Trádáil (CGTT) i ndáil leis an modhnú lamháltas ar na taraif-chuótaí a chuimsítear i Sceideal Taraife CLXXV an Aontais Eorpaigh de thoradh tharraingt siar na Ríochta Aontaithe as an Aontas Eorpach mar a cuireadh in iúl do Chomhaltaí EDT i nDoiciméad G/SECRET/42/Add.2), comhaontaíonn Poblacht Ioslamach na Pacastáine agus an tAontas Eorpach na comhairliúcháin a thabhairt i gcrích ar an mbonn seo a leanas:

Comhaontaíonn Poblacht Ioslamach na Pacastáine leis an bprionsabal agus leis an modheolaíocht maidir le gealltanais chainníochtúla sceidealaithe a chionroinnt i bhfoirm taraif-chuótaí de chuid an Aontais Eorpaigh lenar cuimsíodh an Ríocht Aontaithe, trína nglacfaidh an tAontas Eorpach cainníocht chionroinnte air féin, cainníocht nach gcuimsítear an Ríocht Aontaithe ann a thuilleadh, agus ina nglacann an Ríocht Aontaithe fuílleach na cainníochta uirthi féin.

Aithníonn an tAontas Eorpach go bhfuil Poblacht Ioslamach na Pacastáine i mbun comhairliúchán ar leithligh leis an Ríocht Aontaithe maidir le fuílleach chainníochtaí tharaif-chuótaí tosaigh an Aontais Eorpaigh a ghlac an Ríocht Aontaithe uirthi féin.

Cuireann Poblacht Ioslamach na Pacastáine in iúl, maidir leis na taraif-chuótaí ar ina leith a bhfuil cearta caibidlíochta ag Poblacht Ioslamach na Pacastáine faoi Airteagal XXVIII de CGTT 1994, go gcomhaontaíonn sí leis an gcionroinnt a mholtar, mar a leagtar amach i nDoiciméad G/SECRET/42/Add.2 í, agus leis na gealltanais chainníochtúla a leanann aisti a ghlac an tAontas Eorpach air féin tar éis tharraingt siar na Ríochta Aontaithe, agus go bhfuil sí sásta leo.

Ní dochar an Comhaontú seo don chaibidlíocht idir an tAontas Eorpach agus Comhaltaí eile EDT a bhfuil cearta acu faoi Airteagal XXVIII de CGTT 1994 a mhéid a bhaineann leis na taraif-chuótaí lena mbaineann. Glacann an tAontas Eorpach mar chúram air féin dul i gcomhairle le Poblacht Ioslamach na Pacastáine dá mba rud é gurbh é an toradh a bheadh ar an gcaibidlíocht sin na sciartha a leagtar amach i ndoiciméad G/SECRET/42/Add.2 a athrú.

Aithníonn an tAontas Eorpach go bhfuil cearta caibidlíochta tosaigh ag Poblacht Ioslamach na Pacastáine a mhéid a bhaineann le líne taraife 10062000 Rís Scilligthe Dhonn, mar a aithníonn an tAontas i ndoiciméad EDT ‘G/SECRET/18/Add.3’ dar dáta an 19 Meitheamh 2013.

Tabharfaidh an tAontas Eorpach agus Poblacht Ioslamach na Pacastáine fógra dá chéile faoi chomhlánú a nósanna imeachta inmheánacha maidir le teacht i bhfeidhm an Chomhaontaithe seo. Tiocfaidh an Comhaontú seo i bhfeidhm ar dháta an fhógra dheireanaigh. Beidh feidhm aige ón dáta sin nó ón dáta a scoirfidh an Ríocht Aontaithe de bheith cumhdaithe ag sceideal lamháltas agus gealltanas CLXXV an Aontais Eorpaigh, cibé acu is déanaí.

Bheinn faoi chomaoin agat ach a dheimhniú cibé acu an aontaíonn nó nach n-aontaíonn do Rialtas leis an méid sin thuas.

Tá sé d’onóir agam a mholadh, má tá an méid seo thuas inghlactha ag do Rialtas, gurb ionann an litir seo agus do dheimhniú, i dteannta a chéile, agus Comhaontú i bhfoirm malartú litreacha idir an tAontas Eorpach agus Poblacht Ioslamach na Pacastáine, lena n-áirítear chun críocha Airteagal XXVIII 3(a) agus (b) de CGTT 1994.

Deimhne mo mhodha fhíormhóir duit, a dhuine uasail.

B.   Litir ó Phoblacht Ioslamach na Pacastáine

A Dhuine Uasail,

Tá sé d’onóir agam a admháil go bhfuarthas do litir dar dáta inniu, atá mar a leanas:

Tá sé d’onóir agam leis seo a chur in iúl go gcomhaontaíonn mo Rialtas leis an litir thuas.