L_202402613MT.000101.fmx.xml

REGOLAMENT DELEGAT TAL-KUMMISSJONI (UE) 2024/2613

tal-24 ta’ Lulju 2024

li jemenda r-Regolament Delegat tal-Kummissjoni (UE) 2022/2202 li jissupplimenta r-Regolament (UE) 2021/1153 tal-Parlament Ewropew u tal-Kunsill billi jistabbilixxi lista tal-proġetti transfruntieri magħżula fil-qasam tal-enerġija rinnovabbli

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2021/1153 tal-Parlament Ewropew u tal-Kunsill tas-7 ta’ Lulju 2021 li jistabbilixxi l-Faċilità Nikkollegaw l-Ewropa u li jħassar ir-Regolamenti (UE) Nru 1316/2013 u (UE) Nru 283/2014 (1), u b’mod partikolari l-Artikolu 25(1)(b) tiegħu,

Billi:

(1)

Ir-Regolament (UE) 2021/1153 stabbilixxa kategorija ta’ proġetti transfruntieri fil-qasam tal-enerġija rinnovabbli (proġetti transfruntieri tal-enerġija rinnovabbli) li jikkontribwixxu għad-dekarbonizzazzjoni, għat-tlestija tas-suq intern tal-enerġija u għat-titjib tas-sigurtà tal-provvista. Dawk il-proġetti jiġu stabbiliti bi ftehim ta’ kooperazzjoni bejn żewġ Stati Membri jew aktar, jew bejn Stat Membru wieħed jew aktar u pajjiż terz wieħed jew aktar, kif stabbilit fl-Artikoli 8, 9, 11 u 13 tad-Direttiva (UE) 2018/2001 tal-Parlament Ewropew u tal-Kunsill (2).

(2)	L-għażla ta’ dawk il-proġetti hija soġġetta għall-kriterji ġenerali u għall-proċeduri stabbiliti fir-Regolament (UE) 2021/1153 u spjegati f’aktar dettall fir-Regolament Delegat tal-Kummissjoni (UE) 2022/342 (3).

(3)

Il-proġetti transfruntieri tal-enerġija rinnovabbli jintgħażlu u jiġu inklużi f’lista apposta, adottata mill-Kummissjoni permezz ta’ att delegat. L-ewwel lista ġiet adottata permezz tar-Regolament Delegat tal-Kummissjoni (UE) 2022/2202 (4). It-tieni lista ġiet adottata permezz tar-Regolament Delegat tal-Kummissjoni (UE) 2023/2639 (5). L-inklużjoni tal-proġetti fil-lista tagħmilhom eliġibbli biex japplikaw għall-finanzjament mill-Faċilità Nikkollegaw l-Ewropa. Barra minn hekk, l-inklużjoni fil-lista tagħtihom bosta benefiċċji mil-lat ta’ viżibbiltà akbar.

(4)

Il-proġetti transfruntieri l-ġodda fil-qasam tal-enerġija rinnovabbli li hemm fil-lista aġġornata ntgħażlu wara sejħa għall-proposti li ġiet ippubblikata fis-7 ta’ Novembru 2023 u li għalqet fis-6 ta’ Frar 2024. Il-proġetti li applikaw ivvalutawhom għadd ta’ esperti esterni u esperti mill-Aġenzija Eżekuttiva Ewropea għall-Klima, għall-Infrastruttura u għall-Ambjent u mill-Kummissjoni Ewropea.

(5)

Il-Kummissjoni nnotifikat ir-riżultati tal-evalwazzjoni lill-Grupp ta’ Esperti dwar it-tħejjija u t-tfassil tal-att delegat li jissupplimenta l-Faċilità Nikkollegaw l-Ewropa fir-rigward tal-kriterji u l-proċess tal-identifikazzjoni tal-proġetti transfruntieri fil-qasam tal-enerġija rinnovabbli. Wara li l-grupp ta’ esperti jaqbel fuq abbozz ta’ lista tal-proġetti transfruntieri tal-enerġija rinnovabbli, il-Kummissjoni tadotta l-lista finali.

(6)

Il-lista tal-proġetti transfruntieri tal-enerġija rinnovabbli fiha proġetti li jikkontribwixxu għall-isfruttar kosteffettiv tal-enerġija rinnovabbli fis-settur tal-elettriku u li se jiġu implimentati permezz ta’ teknoloġiji rinnovabbli differenti, inkluż l-enerġija mir-riħ lil hinn mill-kosta u fuq l-art.

(7)	L-inklużjoni tal-proġetti fil-lista tal-proġetti transfruntieri tal-enerġija rinnovabbli hija mingħajr preġudizzju għall-konformità tagħhom mad-dritt tal-UE applikabbli, inkluż mal-eżitu tal-valutazzjoni ambjentali u tal-proċeduri tal-permessi rilevanti,

ADOTTAT DAN IR-REGOLAMENT:

Artikolu 1

L-Artikolu 1 tar-Regolament Delegat (UE) 2022/2202 hu sostitwit b’li ġej:

“Il-lista tal-proġetti transfruntieri fil-qasam tal-enerġija rinnovabbli li ntgħażlu skont il-Parti IV, il-punt 4(g), tal-Anness tar-Regolament (UE) 2021/1153 għandha tkun kif ġej:

Numru tal-proġett	Isem il-proġett	Żviluppaturi tal-proġett	Pajjiżi parteċipanti
2022-05	ELWIND – proġett ibridu konġunt bejn l-Estonja u l-Latvja għall-enerġija mir-riħ lil hinn mill-kosta	Il-Ministeru għall-Affarijiet Ekonomiċi u għall-Komunikazzjoni tal-Estonja; Il-Ministeru għall-Ekonomija tar-Repubblika tal-Latvja	L-Estonja u l-Latvja
2022-07	CICERONE CEO Alliance – alleanza transfrutiera Ewropea għall-katina tal-valur tal-idroġenu ekoloġiku	EON.SE; ENEL Green Power Spa; IBERDROLA CLIENTES S.A.U.	Il-Ġermanja, l-Italja, Spanja u n-Netherlands
2022-10	UNITED HEAT – tisħin distrettwali newtrali għall-klima fil-belt Ewropea ta’ Goerlitz Zgorzelec	Stadtwerke Görlitz AG; SEC Zgorzelec Sp. z o.o.	Il-Ġermanja u l-Polonja
2023-2	ULP-RES WP – il-park eoliku ta’ Utilitas Lode-Penuja RES	Utilitas Wind SIA; Utilitas Wind OÜ	Il-Latvja u l-Estonja
2023-3	SLOWP – il-park eoliku lil hinn mill-kosta ta’ Saare-Liivi	Utilitas Wind OÜ	Il-Lussemburgu u l-Estonja
2023-6	TMNHSA – armar tal-istrutturi idrawliċi ta’ Turnu Magurele - Nikopol	Natsionalna Elektricheska Kompania EAD; S.P.E.E.H. HIDROELECTRICA S.A.	Il-Bulgarija u r-Rumanija
2023-7	BEI – il-gżira tal-enerġija ta’ Bornholm	Il-Ministeru għall-Klima, l-Enerġija u l-Utilitajiet	Id-Danimarka u l-Ġermanja
2023-9	PONTIS – żvilupp fit-trasferiment tal-enerġija rinnovabbli għall-provvista internazzjonali f’Ewropea konnessa	Iberdrola Clientes SAU; Mitsubishi Corporation	Spanja u n-Netherlands”

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-24 ta’ Lulju 2024.

Għall-Kummissjoni

Il-President

Ursula VON DER LEYEN

(1) ĠU L 249, 14.7.2021, p. 38, ELI: http://data.europa.eu/eli/reg/2021/1153/oj.

(2) Id-Direttiva (UE) 2018/2001 tal-Parlament Ewropew u tal-Kunsill tal-11 ta’ Diċembru 2018 dwar il-promozzjoni tal-użu tal-enerġija minn sorsi rinnovabbli (ĠU L 328, 21.12.2018, p. 82, ELI: http://data.europa.eu/eli/dir/2018/2001/oj).

(3) Ir-Regolament Delegat tal-Kummissjoni (UE) 2022/342 tal-21 ta’ Diċembru 2021 li jissupplimenta r-Regolament (UE) 2021/1153 tal-Parlament Ewropew u tal-Kunsill fir-rigward tal-kriterji speċifiċi tal-għażla u d-dettalji tal-proċess għall-għażla ta’ proġetti transfruntieri fil-qasam tal-enerġija rinnovabbli (ĠU L 62, 1.3.2022, p. 1, ELI: http://data.europa.eu/eli/reg_del/2022/342/oj).

(4) Ir-Regolament Delegat tal-Kummissjoni (UE) 2022/2202 tad-29 ta’ Awwissu 2022, li jissupplimenta r-Regolament (UE) 2021/1153 tal-Parlament Ewropew u tal-Kunsill billi jistabbilixxi lista tal-proġetti transfruntieri magħżula fil-qasam tal-enerġija rinnovabbli (ĠU L 293, 14.11.2022, p. 1, ELI: http://data.europa.eu/eli/reg_del/2022/2202/oj).

(5) Ir-Regolament Delegat tal-Kummissjoni (UE) 2023/2639 tad-19 ta’ Settembru 2023 li jemenda r-Regolament Delegat (UE) 2022/2202 li jissupplimenta r-Regolament (UE) 2021/1153 tal-Parlament Ewropew u tal-Kunsill billi jistabbilixxi lista tal-proġetti transfruntieri magħżula fil-qasam tal-enerġija rinnovabbli (ĠU L, 2023/2639, 27.11.2023, p. 1, ELI: http://data.europa.eu/eli/reg_del/2023/2639/oj).