(1)

Le Rialachán (AE) 2021/1153, bunaítear catagóir de thionscadail trasteorann i réimse an fhuinnimh in-athnuaite (tionscadail trasteorann maidir leis an bhfuinneamh in-athnuaite) a rannchuidíonn leis an dícharbónú, leis an margadh inmheánach fuinnimh a chomhlánú agus le slándáil an tsoláthair a fheabhsú. Bunaítear na tionscadail sin trí chomhaontú comhair idir dhá Bhallstát nó níos mó, nó idir aon Bhallstát amháin nó níos mó agus aon tríú tír amháin nó níos mó mar a leagtar amach in Airteagail 8, 9, 11 agus 13 de Threoir (AE) 2018/2001 ó Pharlaimint na hEorpa agus ón gComhairle (2).

(2)

Tá roghnú na dtionscadal sin faoi réir na gcritéar agus na nósanna imeachta ginearálta a leagtar amach i Rialachán (AE) 2021/1153 agus a shonraítear a thuilleadh i Rialachán Tarmligthe (AE) 2022/342 ón gCoimisiún (3).

(3)

Roghnaítear na tionscadail trasteorann maidir leis an bhfuinneamh in-athnuaite agus áirítear ar liosta tiomnaithe iad, liosta arna ghlacadh ag an gCoimisiúin trí bhíthin gníomh tarmligthe. Glacadh an chéad liosta le Rialachán Tarmligthe (AE) 2022/2202 ón gCoimisiún (4). Glacadh an dara liosta le Rialachán Tarmligthe (AE) 2023/2639 ón gCoimisiún (5). Mar thoradh ar chuimsiú na dtionscadal ar an liosta, bíonn siad incháilithe chun iarratas a dhéanamh ar chistiú faoin tSaoráid um Chónascadh na hEorpa. Thairis sin, bíonn buntáistí ann do na tionscadail toisc go mbíonn méadú infheictheachta i gceist le bheith ar an liosta.

(4)

Na tionscadail trasteorann nua maidir leis an bhfuinneamh in-athnuaite atá ar an liosta a tugadh cothrom le dáta, roghnaíodh iad tar éis glao ar thograí a foilsíodh an 7 Samhain 2023 agus a dúnadh an 6 Feabhra 2024. Rinne saineolaithe seachtracha agus saineolaithe ón nGníomhaireacht Feidhmiúcháin Eorpach um an Aeráid, Bonneagar agus Comhshaol agus ón gCoimisiún measúnú ar na tionscadail a chuir isteach iarratas.

(5)

Thug an Coimisiún fógra don Ghrúpa Saineolaithe maidir le torthaí an mheasúnaithe i dtaca le hullmhú agus tarraingt suas an ghnímh tharmligthe lena bhforlíontar an tSaoráid um Chónascadh na hEorpa a mhéid a bhaineann leis na critéir sainaitheantais agus na próisis le haghaidh tionscadail trasteorann i réimse an fhuinnimh in-athnuaite. Tar éis an chomhaontaithe ar tháinig an grúpa saineolaithe air maidir le dréachtliosta tionscadail trasteorann maidir leis an bhfuinneamh in-athnuaite, glacann an Coimisiún an liosta deiridh.

(6)

Ar an liosta de na tionscadail trasteorann maidir leis an bhfuinneamh in-athnuaite, tá tionscadail lena rannchuidítear le saothrú costéifeachtach an fhuinnimh in-athnuaite san earnáil leictreachais, tionscadail atá le cur chun feidhme trí theicneolaíochtaí éagsúla in-athnuaite, lena n-áirítear gaoth ón talamh agus ón bhfarraige.

(7)

Tá cuimsiú tionscadal ar an liosta de thionscadail trasteorann maidir leis an bhfuinneamh in-athnuaite gan dochar dá gcomhlíontacht le dlí an Aontais is infheidhme, lena n-áirítear le toradh an mheasúnaithe ábhartha comhshaoil agus na nósanna imeachta um cheadú,