19.3.2021   

GA

Iris Oifigiúil an Aontais Eorpaigh

L 96/6


RIALACHÁN (AE) 2021/468 ÓN gCOIMISIÚN

an 18 Márta 2021

lena leasaítear Iarscríbhinn III a ghabhann le Rialachán (CE) Uimh. 1925/2006 ó Pharlaimint na hEorpa agus ón gComhairle maidir le speiceas luibheolaíoch ina bhfuil díorthaigh hiodrocsa-antraicéine

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (CE) Uimh. 1925/2006 ó Pharlaimint na hEorpa agus ón gComhairle an 20 Nollaig 2006 maidir le vitimíní agus mianraí agus substaintí áirithe eile a chur le bia (1), agus go háirithe Airteagal 8(2)(a)(i) agus (b) de,

De bharr an mhéid seo a leanas:

(1)

De bhun Airteagal 8(2) de Rialachán (CE) Uimh. 1925/2006, ar a thionscnamh féin nó ar bhonn na faisnéise a chuirfidh na Ballstáit ar fáil, féadfaidh an Coimisiún nós imeachta a thionscnamh chun substaint nó comhábhar ina bhfuil substaint nach vitimín ná mianra í in Iarscríbhinn III a ghabhann le Rialachán (CE) Uimh. 1925/2006 lena liostaítear na substaintí ar ina leith atá a n-úsáid toirmeasctha, srianta nó faoi ghrinnscrúdú an Aontais i mbianna, má tá baint idir an tsubstaint sin agus riosca a d'fhéadfadh a bheith ann do thomhaltóirí mar a shainítear in Airteagal 8(1) de Rialachán (CE) Uimh. 1925/2006.

(2)

Is líonmhar iad na plandaí ina bhfuil díorthaigh hiodrocsa-antraicéine agus baineann siad le héagsúlacht finte agus géinis luibheolaíocha. Baintear úsáid astu i bhforbhianna go forleathan.

(3)

Agus tuairim eolaíoch á glacadh ag an Údarás Eorpach um Shábháilteacht Bia an 9 Deireadh Fómhair 2013 faoi bhunús eolaíoch maímh i leith sláinte maidir le díorthaigh hiodrocsa-antraicéine agus le feabhas a chur ar fheidhmíocht na stéige (2), is é an chonclúid a bhí acu gur féidir le díorthaigh hiodrocsa-antraicéine sa bhia feabhas a chur ar fheidhmíocht na stéige, ach mhol siad gan iad a úsáid go fadtéarmach agus gan dáileoga arda a ghlacadh mar gheall ar cheisteanna sábháilteachta a d’fhéadfadh a bheith ann amhail contúirt na héagothroime leictrilíte, feidhmíocht lagaithe na putóige, agus spleáchas ar phurgóidí.

(4)

I bhfianaise na tuairime sin, agus na gcúiseanna buartha a chuir na Ballstáit in iúl, sa phlé a rinneadh in 2013 ar an maíomh sláinte i dtrácht maidir leis na héifeachtaí dochracha a bhaineann le bia a ithe ina bhfuil díorthaigh hiodrocsa-antraicéine agus ullmhóidí de, d'iarr an Coimisiún ar an Údarás in 2016 tuairim eolaíoch a chur ar fáil maidir le sábháilteacht úsáid díorthach hiodrocsa-antraicéine sa bhia a mheas i gcomhréir le hAirteagal 8 de Rialachán (CE) Uimh. 1925/2006.

(5)

An fhaisnéis a chuir na Ballstáit ar fáil don Choimisiún, chomhlíon sé na coinníollacha riachtanacha agus na ceanglais a leagadh síos in Airteagail 3 agus 4 de Rialachán Cur Chun Feidhme an Choimisiúin (AE) Uimh. 307/2012 (3).

(6)

An 22 Samhain 2017, ghlac an tÚdarás tuairim eolaíoch maidir le sábháilteacht úsáid díorthach hiodrocsa-antraicéine sa bhia a mheas (4). Is iad Rheum palmatum L. agus/nó Baillon Rheum officinale agus/nó a hibridí na díorthaigh hiodrocsa-antraicéine a mheastar a bheith ábhartha don mheasúnú riosca seo; duilleoga nó torthaí Cassia senna L.; coirt Rhamnus frangula L., coirt Rhamnus purshiana DC. agus i nduilleoga Miller Aloe barbadensis agus/nó speicis Aloe éagsúla, Miller Aloe ferox agus a hibridí don chuid is mó.

(7)

Na díorthaigh hiodrocsa-antraicéine aló-eamóidin agus eamóidin agus dantrón atá gaolmhar leo ó thaobh struchtúir, feictear don Údarás gur léiríodh go bhfuil siad géineatocsaineach in vitro. Léiríodh go bhfuil eastóscáin aló géineatocsaineach in vitro, agus sin is dóchúla de bharr díorthaigh hiodrocsa-antraicéine atá le fáil san eastóscán. Ina theannta sin, léiríodh go bhfuil aló-eamóidin géineatocsaineach in vivo. Léiríodh go bhfuil eastóscán duilleoga lána aló agus dantrón, analóg ó thaobh struchtúir de, carcanaigineach.

(8)

Ós rud é go bhfuil aló-eamóidin agus eamóidin le fáil sna heastóscáin, is é an chonclúid a bhí ag an Údarás gur cheart a mheas go bhfuil díorthaigh hiodrocsa-antraicéine géineatocsaineach agus carcainigineach mura nochtar a mhalairt agus go bhfuil imní maidir le sábháilteacht i gcás eastóscán ina bhfuil díorthaigh hiodrocsa-antraicéine cé go bhfuil roinnt éiginnteachta ann. Ní raibh an tÚdarás ábalta comhairle a chur ar fáil maidir le hiontógáil laethúil díorthach hiodrocsa-antraicéine nach ábhar imní maidir le sláinte an duine a bheidh i gceist léi.

(9)

Mar gheall ar na hiarmhairtí dochracha tromchúiseacha a bhaineann leis an úsáid a bhaintear as aló-eamóidin, eamóidin, dantrón agus eastóscáin aló ina bhfuil díorthaigh hiodrocsa-antraicéine sa bhia, agus nach bhféadfaí aon iontógáil laethúil díorthach hiodrocsa-antraicéine nach bhfuil ina ábhar imní do shláinte an duine a leagan síos, ba cheart na substaintí sin a thoirmeasc. Dá bhrí sin, ullmhóidí aló-eamóidin, eamóidin, dantrón, agus aló ina bhfuil díorthaigh hiodrocsa-antraicéine, ba cheart iad a áireamh in Iarscríbhinn III, Cuid A de Rialachán (CE) Uimh. 1925/2006.

(10)

Le linn na monaraíochta, is féidir díorthaigh hiodrocsa-antraicéine a bhaint as na hullmhóidí luibheolaíocha trí bhíthin sraith próisis scagtha a mbeidh de thoradh orthu táirgí nach mbíonn ach rianleibhéil de na substaintí sin i bhfoirm eisíontas iontu.

(11)

Ós rud é gur féidir go mbaineann iarmhairtí dochracha ar an tsláinte leis an úsáid a bhaintear as Rheum, Cassia agus Rhamnus agus a n-ullmhóidí sa bhia, ach éiginnteacht eolaíoch a bheith fós ann an bhfuil na substaintí a liostaítear in Iarscríbhinn III, Cuid A a ghabhann le Rialachán (CE) Uimh. 1925/2006 sna hullmhóidí sin, ba cheart na substaintí a chur faoi ghrinnscrúdú an Aontais agus dá bhrí sin, ba cheart iad a áireamh i gCuid C d'Iarscríbhinn III a bhaineann le Rialachán (CE) Uimh. 1925/2006.

(12)

Ba cheart, dá bhrí sin, Rialachán (CE) Uimh. 1925/2006 a leasú dá réir sin.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH:

Airteagal 1

Leasaítear Iarscríbhinn III a ghabhann le Rialachán (CE) Uimh. 1925/2006 mar a leanas:

(1)

le Cuid A, cuirfear na hiontrálacha seo a leanas de réir ord aibítre:

“aló-eamóidin agus gach ullmhóid ina bhfuil an tsubstaint seo”;

“eamóidin agus gach ullmhóid ina bhfuil an tsubstaint seo”;

“ullmhóidí ó dhuilleog speiceas Aloe ina bhfuil díorthaigh hiodrocsa-antraicéine”;

“dantrón agus gach ullmhóid ina bhfuil an tsubstaint seo”.

(2)

le Cuid C, cuirfear na hiontrálacha seo a leanas de réir ord aibítre:

“ullmhóidí ó fhréamh nó ó riosóm Rheum palmatum L., Baillon Rheum officinale agus a hibridí ina bhfuil díorthaigh hiodrocsa-antraicéine”;

“ullmhóidí ó dhuilleog nó ó thoradh Cassia senna L. ina bhfuil díorthaigh hiodrocsa-antraicéine”;

“ullmhóidí ó choirt Rhamnus frangula L., Rhamnus purshiana DC. ina bhfuil díorthaigh hiodrocsa-antraicéine”.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 18 Márta 2021.

Thar ceann an Choimisiúin

An tUachtarán

Ursula VON DER LEYEN


(1)   IO L 404, 30.12.2006, lch. 26.

(2)  Iriseán EFSA 2013;11(10) :3412

(3)  Rialachán Cur Chun Feidhme an Choimisiúin (AE) Uimh. 307/2012 an 11 Aibreán 2012 lena mbunaítear rialacha le haghaidh cur i bhfeidhm Airteagal 8 de Rialachán (CE) Uimh. 1925/2006 ó Pharlaimint na hEorpa agus ón gComhairle maidir le vitimíní agus mianraí agus substaintí áirithe eile a chur le bia (IO L 102, 12.4.2012, lch. 2).

(4)  An Painéal um Breiseáin agus Foinsí Cothaitheacha a chuirtear le Bia (ANS); Tuairim Eolaíoch maidir le sábháilteacht díorthach hiodrocsa-antraicéine. Iriseán EPSA, 2018;16(1):5090.