(1)

Ar an 7 Iúil 2021 chuir an monaróir Stellantis iarratas isteach (“an t-iarratas”) ar Théitheoir Breosla Díosail Cliste a fhormheas mar theicneolaíocht nuálach lena úsáid i ngluaisteáin paisinéirí (“feithiclí M1”) agus i bhfeithiclí tráchtála éadroma (“feithiclí N1”) le gnáthinnill dócháin inmheánaigh (“ICE”) a oibrítear ar dhíosal agus i bhfeithiclí M1 nó N1 hibrideacha leictreacha arna luchtú go neamhsheachtrach (NOVC-HEVanna) a oibrítear ar dhíosal agus ar ina leith is féidir luachanna neamhcheartaithe ó thaobh ídiú breosla ríofa agus astaíochtaí CO2 a úsáid i gcomhréir le mír 1.1.4 d’Fhoscríbhinn 2 a ghabhann le Fo-Iarscríbhinn 8 a ghabhann le hIarscríbhinn XXI a ghabhann le Rialachán (AE) 2017/1151 ón gCoimisiún (2).

(2)

Rinneadh an t-iarratas a mheasúnú i gcomhréir le hAirteagal 11 de Rialachán (AE) 2019/631, Rialacháin Cur Chun Feidhme (AE) Uimh. 725/2011 (3) agus (AE) Uimh. 427/2014 (4) agus leis na Treoirlínte Teicniúla maidir le hiarratais a ullmhú le haghaidh teicneolaíochtaí nuálacha a fhormheas de bhun Rialachán (CE) Uimh. 443/2009 agus Rialachán (AE) Uimh. 510/2011 (leagan Iúil 2018) (5). I gcomhréir le hAirteagal 11(3) de Rialachán (AE) 2019/631, bhí tuarascáil fíorúcháin a rinne comhlacht neamhspleách deimhnithe ag gabháil leis an iarratas.

(3)

Chun é a úsáid i bhfeithiclí, is gá breosla díosail a scagadh chun próiseas dócháin ard-cháilíochta agus inoibritheacht chuí feithiclí a áirithiú. I gcás breoslaí díosail, tá teocht sonrach intreach íseal ann ar a dtosaíonn na paraifíní is troime iontu ar dheascadh agus ar criostail chéarach a chruthú, rud a thachtann na heilimintí scagacháin laistigh den chóras breosla, agus mar thoradh air sin ní bhítear in ann an t-inneall a thosú, tarlaíonn loiceadh nó cailleann an t-inneall cumhacht le linn tiomána. Dá bhrí sin, feistítear feithiclí díosail le téitheoir breosla a ghníomhachtaítear ar theocht íseal agus a chuireann cosc ar an bpróiseas tachta sin.

(4)

Léirigh an t-iarratasóir nár mhó an dul i bhfód ar an margadh a rinne an teicneolaíocht nuálach ná 3 % sa bhliain 2019, ar dáta é atá níos déanaí ná an bhliain tagartha dá bhforáiltear in Airteagal 2(2)(a) de Rialacháin Cur Chun Feidhme (AE) Uimh. 725/2011 agus (AE) Uimh. 427/2014. Dá bhrí sin tá critéar na nuálaíochta comhlíonta.

(5)

Táthar tar éis a dheimhniú nach bhfuil na buntáistí a bhaineann leis an teicneolaíocht cumhdaithe le tástáil Chineál I cineálcheadaithe CO2, ó tharla nach ngníomhachtaítear an Téitheoir Breosla Díosail Cliste ar an teocht ar a ndéantar an tástáil.

(6)

Is é an teicneolaíocht bhunlíne ar ina aghaidh ba cheart na coigiltis CO2 a mheasúnú gnáth-théitheoir breosla díosail atá comhtháite i gcóimeáil an scagaire agus a ghníomhachtaítear ar theocht breosla faoi bhun +5 C agus a mhúchtar arís ag teocht breosla os cionn +8 C, ar bhonn an chomhartha a thagann ón mbraiteoir teochta laistigh de chóimeáil an scagaire díosail. Is le tairseach theochta amháin a dhéantar rialú ar ghníomhachtú an téitheora breosla díosail bunlíne sin. Gníomhachtaítear an Téitheoir Breosla Díosail Cliste ar bhonn staid an ualaigh pairifín i gcartús an scagaire ar a dhéantar monatóireacht le braiteoir brú scagaire i dteannta an bhraiteora teochta. Laghdaíonn sé sin an t-achar ama a ngníomhachtaítear an téitheoir breosla lena linn, agus ar an gcaoi sin soláthraítear laghdú ar úsáid fuinnimh agus ar astaíochtaí CO2.

(7)

Sholáthair an t-iarratasóir modheolaíocht chun coigiltis CO2 a chinneadh ón Téitheoir Breosla Díosail Cliste. Chun ídiú cumhachta na dteicneolaíochtaí bunlíne agus éicea-nuálach a chinneadh, tá tástáil le cur ar fheithicil atá feistithe leis an teicneolaíocht éicea-nuálach faoi choinníollacha teorann an Timthrialla Tástála Comhchuibhithe Domhanda d’Fheithiclí Éadroma (WLTC) a leagtar amach i Rialachán (AE) 2017/1151, ar theocht -20 °C agus úsáid á baint as breosla Artach díosail. Tá an fheithicil le feistiú le haonad rialaithe leictreonach (ECU) oscailte lena gceadaítear asléamh ar na comharthaí a dhéanfadh an téitheoir breosla a dhíghníomhachtú. Cinneadh fachtóir úsáide lena léirítear sciar meánach na húsáide teicneolaíochta nuálaí faoi dhálaí fíorshaoil agus ina gcuirtear san áireamh, i measc nithe eile, cáilíocht bhreosla, teocht chomhthimpeallach, saintréithe teicniúla comhpháirteanna, sonraí comhairthe tráchta agus sciartha díolacháin feithiclí agus ó Bhallstát go chéile.

(8)

Agus na breithnithe thuas á gcur san áireamh, ba cheart a mheas go bhfuil an mhodheolaíocht tástála iomchuí chun na coigiltis CO2 ón teicneolaíocht nuálach atá i gceist a chinneadh. Tríd an modheolaíocht tástála a chur chun feidhme, tá an t-iarratasóir tar éis a léiriú freisin go sáraítear ar bhealach infhíoraithe an tairseach íosta coigilteas CO2, arb éard é 0,5 g CO2/km, agus go bhfuil sé suntasach ó thaobh staitistice de.

(9)

Ba cheart go mbeadh monaróirí in ann iarratas a dhéanamh chuig údarás cineálcheadaithe ar dheimhniú na gcoigilteas CO2 ón teicneolaíocht nuálach a úsáid i gcás ina gcomhlíontar na coinníollacha a leagtar síos sa Chinneadh seo. Chun na críche sin ba cheart do mhonaróirí a áirithiú go mbeidh ag gabháil leis an iarratas ar dheimhniú tuarascáil fíorúcháin ó chomhlacht neamhspleách deimhnithe lena ndeimhnítear go gcomhlíonann an teicneolaíocht nuálach na coinníollacha a leagtar síos sa Chinneadh seo agus gur cinneadh na coigiltis i gcomhréir leis an modheolaíocht tástála dá dtagraítear sa Chinneadh seo.

(10)

Is é an t-údarás cineálcheadaithe atá freagrach as a fhíorú go críochnúil go gcomhlíontar na coinníollacha a shonraítear sa Cinneadh seo maidir le deimhniú a dhéanamh ar na coigiltis CO2 ó theicneolaíocht nuálach a úsáid. I gcás ina n-eisítear deimhniú, ba cheart don údarás cineálcheadaithe freagrach a áirithiú go ndéantar na heilimintí uile a cuireadh san áireamh le haghaidh an deimhnithe a thaifeadadh i dtuarascáil agus go gcoinnítear iad in éindí leis an tuarascáil fíorúcháin agus go gcuirtear an fhaisnéis sin ar fáil don Choimisiún arna iarraidh sin.

(11)

Chun a chinneadh cad é an cód éiceanuálaíochta ginearálta atá le húsáid sna doiciméid chineálcheadaithe ábhartha i gcomhréir le hIarscríbhinní I, VIII agus IX a ghabhann le Rialachán (AE) 2018/858 ó Pharlaimint na hEorpa agus ón gComhairle (6), is gá cód aonair a shannadh don teicneolaíocht nuálach,

(a)

Feistítear é i bhfeithiclí M1 nó N1 ina bhfuil gnáthinneall dócháin inmheánaigh agus a oibrítear ar dhíosal nó i bhfeithiclí hibrideacha leictreacha de chatagóir M1 nó N1 arna luchtú go neamhsheachtrach a oibrítear ar dhíosal agus ar ina leith is féidir luachanna neamhcheartaithe ó thaobh ídiú breosla ríofa agus astaíochtaí CO2 a úsáid i gcomhréir le mír 1.1.4 d’Fhoscríbhinn 2, Fo-Iarscríbhinn 8 a ghabhann le Iarscríbhinn XXI a ghabhann le Rialachán (AE) 2017/1151;

(b)

Gníomhachtaíonn sé é féin ar an teocht néalphointe a bhaineann go sonrach leis an mbreosla ar a thúisce, nuair is gá cosc a chur ar thachtadh na n-eilimintí scagacháin laistigh den chóras breosla, trí thairseach theochta agus an t-ualach paraifín i gcartús an scagaire araon a chur san áireamh.