An Bhruiséil,18.7.2024

COM(2024) 319 final

TUARASCÁIL ÓN gCOIMISIÚN CHUIG PARLAIMINT NA hEORPA AGUS CHUIG AN gCOMHAIRLE

maidir le caiteachas CERT

















Córas Luathrabhaidh 1-6/2024


1.Nós imeachta buiséadach CERT le haghaidh 2024

An 22 Samhain 2023 ghlac Parlaimint na hEorpa buiséad ginearálta an Aontais Eorpaigh le haghaidh 2024. Is é EUR 40 517 milliún de leithreasuithe faoi chomhair gealltanas agus EUR 40 505 mhilliún de leithreasuithe faoi chomhair íocaíochta atá i mbuiséad an Chiste Eorpaigh um Ráthaíocht Talmhaíochta (CERT). Is é is cúis leis na méideanna éagsúla le haghaidh an dá chineál leithreasuithe an úsáid a bhaintear as leithreasuithe difreáilte le haghaidh bearta áirithe a bhíonn á gcur chun feidhme go díreach ag an gCoimisiún. Baineann siad sin go príomha le bearta maidir le táirgí talmhaíochta a chur chun cinn agus le bearta maidir le straitéis bheartais, comhordúchán agus iniúchadh.

2.Ioncam a shanntar do CERT

Ar bhonn fhorálacha Airteagal 45 de Rialachán (AE) 2021/2116, ioncam a thagann as ceartuithe airgeadais faoi chinntí imréitigh cuntasaíochta agus imréitigh feidhmíochta, agus as neamhrialtachtaí, is ioncam é a shanntar do mhaoiniú chaiteachas CERT.

De réir Airteagal 45(2), is féidir ioncam sannta a athúsáid chun riachtanais mhaoinithe aon chaiteachais CERT a chumhdach. An t‑ioncam a bhailítear agus nach n‑úsáidtear laistigh den bhliain airgeadais, tugtar anonn go huathoibríoch é go dtí an bhliain airgeadais ina dhiaidh sin 1 .

Áirítear an méid seo a leanas i mbuiséad CERT le haghaidh 2024:

·meastacháin an Choimisiúin ar na riachtanais mhaoiniúcháin le haghaidh bearta margaidh, íocaíochtaí díreacha agus caiteachas eile faoi bhainistíocht dhíreach agus indíreach

·na meastacháin maidir le hioncam sannta atá le bailiú i gcaitheamh na bliana airgeadais.

Sa togra ón gCoimisiún maidir le leithreasuithe buiséadacha CERT le haghaidh 2024, chuir sé san áireamh an t‑ioncam sannta iomlán a bhfuil coinne leis. I gcás bhuiséad 2024, d’iarr an Coimisiún leibhéal leithreasuithe a ríomhfaí tríd an ioncam sannta measta a asbhaint ó na riachtanais mheasta. Ghlac an tÚdarás Buiséadach buiséad CERT le haghaidh 2024 agus an t‑ioncam sannta a bhfuil coinne leis á chur san áireamh.

Tráth a bunaíodh an buiséad le haghaidh 2024, ba é EUR 739,8 milliún meastachán an Choimisiúin maidir leis an ioncam sannta a bhí ar fáil, EUR 339.8 mhilliún de sin a tugadh anonn ó Bhuiséad 2023. Chuir an Coimisiún an méid sin a tugadh anonn agus an t‑ioncam measta atá le bailiú in 2024 san áireamh nuair a d’iarr sé na leithreasuithe le haghaidh na tacaíochta bunúsaí ioncaim i dtaobh na hinbhuanaitheachta (ítim 08 02 04 01). Is é EUR 19 022 mhilliún suim na leithreasuithe a vótáladh agus an ioncaim shannta mheasta le haghaidh na scéime sin.

Bhí an t‑ioncam sannta a tugadh anonn ar deireadh ó 2023, EUR 340.3 milliún, beagán níos airde.

3.Tábla maidir le tomhaltas sealadach an 31/03/2024

Cuirtear i láthair sa tuarascáil seo cur chun feidhme sealadach bhuiséad CERT le haghaidh 2024 an 31/03/2024, agus tugtar mionsonraí sa tábla thíos.

Cuirtear an leibhéal cur chun feidhme i gcomparáid le próifíl chaiteachais an chórais luathrabhaidh a cuireadh ar bun i gcomhréir le hAirteagal 19 de
Rialachán (AE) Uimh. 2021/2116.

4.Barúlacha maidir le cúlchiste talmhaíochta 2024

Áiríodh i mBuiséad 2024 méid EUR 832 mhilliún le haghaidh an chúlchiste talmhaíochta, lena n‑áirítear méid EUR 315,5 milliún a tugadh anonn ó Bhuiséad 2023.

Glacadh dhá bheart, ar luach EUR 98.3 milliún san iomlán 2 . Déanfar sin a mhaoiniú faoi cúlchiste talmhaíochta 2024 go heisiach, agus dá bhrí sin faoi Bhuiséad 2024.

A mhéid a bhaineann leis an gcaiteachas, dhearbhaigh na Ballstáit EUR 375,3 milliún san iomlán go dtí seo. Baineann an méid a íocadh leis an dá bheart eisceachtúla dheireanacha (pacáistí a dó agus a trí) a glacadh faoi Bhuiséad 2023, ach a mhaoinítear i bpáirt faoi Bhuiséad 2024.

5.Barúlacha maidir le cur chun feidhme sealadach bhuiséad CERT le haghaidh 2024

Maidir leis an gcuid is mó de na hidirghabhálacha in earnálacha áirithe, ba sa bhliain airgeadais 2023 a cuireadh tús le cur chun feidhme an chaiteachais dá bhforáiltear sna pleananna straitéiseacha CBT. Ba sa bhliain airgeadais 2024 a rinneadh na chéad íocaíochtaí le haghaidh chineálacha íocaíochtaí díreacha na n‑idirghabhálacha faoi na pleananna. Dá bhrí sin, is ar éigean a bhí aon sonraí stairiúla ar fáil chun próifíl chaiteachais na n‑idirghabhálacha sin a tharraingt suas le haghaidh na bliana airgeadais 2024. Mar sin, tá próifíl mhíosúil an chaiteachais sin bunaithe ar phróifílí a breathnaíodh roimhe seo le haghaidh caiteachas comhchosúil ar earnálacha an mhargaidh agus ar íocaíochtaí díreacha lasmuigh de na pleananna straitéiseacha, agus cuirtear san áireamh inti freisin an caiteachas iarbhír le haghaidh idirghabhálacha ‘an phlean’ a rinneadh sa chéad 2 mhí den bhliain airgeadais 2024.

Maidir le forghníomhú sealadach na leithreasuithe buiséadacha CERT le haghaidh 2024 i gcomhair na tréimhse go dtí an 31 Márta 2024, tá sé gar don phróifíl chaiteachais arna ríomh (-0.5 % pointe).

Léiríonn an caiteachas le haghaidh beagnach gach cineál idirghabhála de réir earnála faoi na pleananna (08 02 02) diall anuas ón bpróifíl, ach méid níos lú ná mar a bhí sa bhliain airgeadais roimhe sin.

Tá ioncam sannta (6 2 0 0) EUR 606.2 milliún ar fáil cheana féin agus meastar go mbaileofar suimeanna breise i gcaitheamh na bliana airgeadais.

Faoi láthair, maidir leis na leithreasuithe a vótáladh, mar aon le méid an ioncaim shannta a bheidh ar fáil faoi dheireadh na bliana airgeadais, measann an Coimisiún go mbeidh an méid sin leordhóthanach chun an caiteachas uile a chumhdach.

(1)

   Le hAirteagal 12(4)(b) de Rialachán (AE, Euratom) 2018/1046 ó Pharlaimint na hEorpa agus ón gComhairle maidir leis na rialacha airgeadais is infheidhme maidir le buiséad ginearálta an Aontais, cinntear go bhféadfar na leithreasuithe a chomhfhreagraíonn d’ioncam sannta inmheánach a thabhairt anonn go dtí an bhliain airgeadais ina dhiaidh sin agus go dtí an bhliain sin amháin. Dá bhrí sin, ar mhaithe le bainistiú fónta buiséid, is iondúil go n‑úsáidtear an t‑ioncam sannta sin ar dtús, roimh an leithreasú a vótáladh i dtaca leis an airteagal buiséid lena mbaineann.

(2)

 Rialachán Cur Chun Feidhme (AE) 2023/2820 ón gCoimisiún an 15 Nollaig 2023 lena ndéantar foráil maidir le tacaíocht airgeadais éigeandála do na hearnálacha talmhaíochta atá buailte ag tubaistí nádúrtha sa Ghréig agus sa tSlóivéin (IO L, 2023/2820, 18.12.2023, ELI: http://data.europa.eu/eli/reg_impl/2023/2820/oj ) ; Rialachán Cur Chun Feidhme (AE) 2024/453 ón gCoimisiún an 5 Feabhra 2024 maidir le bearta tacaíochta margaidh eisceachtúla le haghaidh earnálacha na n‑uibheacha agus na feola éanlaithe clóis san Iodáil (IO L, 2024/453, 6.2.2024, ELI: http://data.europa.eu/eli/reg_impl/2024/453/oj ).