29.9.2023   

GA

Iris Oifigiúil an Aontais Eorpaigh

L 241/106


RIALACHÁN CUR CHUN FEIDHME (AE) 2023/2090 ÓN gCOIMISIÚN

an 28 Meán Fómhair 2023

lena leagtar síos rialacha maidir le cur i bhfeidhm Rialachán (AE) 2023/1231 ó Pharlaimint na hEorpa agus ón gComhairle a mhéid a bhaineann le hábhar agus foirm shamplach an lipéid sláinte plandaí do phlandaí le haghaidh plandú seachas prátaí síl, agus maidir le hinnealra agus feithiclí a oibríodh chun críocha talmhaíochta nó foraoiseachta, a thagann isteach i dTuaisceart Éireann ó chodanna eile den Ríocht Aontaithe, lena gcur ar an margadh

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2023/1231 ó Pharlaimint na hEorpa agus ón gComhairle an 14 Meitheamh 2023 maidir le rialacha sonracha a bhaineann le teacht isteach i dTuaisceart Éireann ó chodanna eile den Ríocht Aontaithe coinsíneachtaí áirithe earraí miondíola, plandaí le haghaidh plandú, prátaí síl, innealra agus feithiclí áirithe a oibrítear chun críoch talmhaíochta nó foraoiseachta, chomh maith le gluaiseachtaí neamhthráchtála peataí áirithe isteach i dTuaisceart Éireann (1), agus go háirithe Airteagail 10(3) de,

De bharr an mhéid seo a leanas:

(1)

Le Rialachán (AE) 2023/1231 leagtar síos rialacha sonracha a bhaineann, inter alia, le teacht isteach i dTuaisceart Éireann ó chodanna eile den Ríocht Aontaithe coinsíneachtaí plandaí le haghaidh plandú seachas prátaí síl, mar aon le hinnealra agus feithiclí a oibríodh chun críocha talmhaíochta nó foraoiseachta, lena seoladh agus lena ndíol ag oibreoirí gairmiúla (‘na coinsíneachtaí’).

(2)

Go sonrach, foráiltear le hAirteagal 10(1) de Rialachán (AE) 2023/1231 go mbeidh teacht isteach i dTuaisceart Éireann ó chodanna eile den Ríocht Aontaithe coinsíneachtaí lena gcur ar an margadh faoi réir rialacha sonracha agus ceanglais maidir le lipéadú sláinte plandaí, faoi réir chomhlíonadh coinníollacha áirithe, lena n-áirítear ráthaíochtaí i scríbhinn atá le soláthar ag an Ríocht Aontaithe i gcomhréir le hAirteagal 10(1), pointe (g), den Rialachán sin (‘na ráthaíochtaí i scríbhinn’).

(3)

Leis na ráthaíochtaí i scríbhinn, tugtar dearbhú go bhfuil próiseas údaraithe agus clárúcháin oibreoirí gairmiúla i bhfeidhm, chun a áirithiú go seolfar na coinsíneachtaí i gcomhréir le Rialachán (AE) 2023/1231, lena n-áirítear nósanna imeachta oifigiúla chun a áirithiú go gcomhlíonfaidh siad an Rialachán sin agus chun aghaidh a thabhairt ar neamhchomhlíonadh, agus go ndéanfar rialuithe oifigiúla ar na coinsíneachtaí sula dtiocfaidh siad isteach i dTuaisceart Éireann den chéad uair ag Saoráidí Cigireachta sláintíochta agus fíteashláintíochta (SPS) a chomhlíonann na ceanglais a leagtar amach in Iarscríbhinn II a ghabhann leis an Rialachán sin, agus go ndéanfar na rialuithe oifigiúla sin i gcomhréir le Rialachán (AE) 2017/625 ó Pharlaimint na hEorpa agus ón gComhairle (2). Tá na ráthaíochtaí i scríbhinn freisin chun dearbhú a thabhairt go bhfuil rialuithe oifigiúla, a léirítear trí phlean rialaithe, agus bearta faireachais á ndéanamh lena gcumhdaítear gluaiseachtaí na gcoinsíneachtaí ó Shaoráidí Cigireachta SPS an chéad teacht isteach i dTuaisceart Éireann go dtí a gceann scríbe i dTuaisceart Éireann chun a áirithiú nach n-aistreofar na coinsíneachtaí go Ballstát ina dhiaidh sin.

(4)

Sna litreacha ón Ríocht Aontaithe dar dátaí an 4, 11 agus 15 Meán Fómhair 2023, luaitear go bhfuil próiseas údaraithe agus clárúcháin oibreoirí gairmiúla i gcodanna den Ríocht Aontaithe seachas Tuaisceart Éireann agus i dTuaisceart Éireann i bhfeidhm, agus go ndéanfar na nósanna imeachta oifigiúla chun a áirithiú go gcomhlíonfaidh na hoibreoirí sin Rialachán (AE) 2023/1231 agus chun aghaidh a thabhairt ar neamhchomhlíonadh a ghlacadh agus a chur chun feidhme faoin 1 Deireadh Fómhair 2023.

(5)

Sna litreacha ón Ríocht Aontaithe dar dátaí an 4, 11 agus 15 Meán Fómhair 2023, luaitear freisin go gcomhlíonfaidh Saoráidí Iniúchta SPS an chéad teacht isteach i dTuaisceart Éireann na ceanglais a leagtar amach i gCuid 1 d’Iarscríbhinn II a ghabhann le Rialachán (AE) 2023/1231 faoin 1 Deireadh Fómhair 2023 agus go ndéanfar rialuithe oifigiúla ar coinsíneachtaí ag Saoráidí Iniúchta SPS i gcomhréir le Rialachán (AE) 2017/625.

(6)

Sna litreacha ón Ríocht Aontaithe dar dáta an 4, 11 agus 15 Meán Fómhair 2023, luaitear freisin go ndéanfar rialuithe oifigiúla agus bearta faireachais ón 1 Deireadh Fómhair 2023 lena gcumhdófar gluaiseachtaí na gcoinsíneachtaí ó Shaoráidí Iniúchta SPS an chéad teacht isteach i dTuaisceart Éireann chuig a gceann scríbe i dTuaisceart Éireann.

(7)

I gcomhréir le hAirteagal 4(3) de Rialachán (AE) 2023/1231, rinne seirbhísí an Choimisiúin rialú de chuid an Choimisiúin i dTuaisceart Éireann ón 11 go dtí an 14 Meán Fómhair 2023 lena fhíorú an gcomhlíonann na Saoráidí Iniúchta SPS i dTuaisceart Éireann na ceanglais a leagtar amach i gCuid 1 d’Iarscríbhinn II a ghabhann le Rialachán (AE) 2023/1231. I dtuarascáil an 15 Meán Fómhair 2023 a tarraingíodh suas tar éis an rialaithe sin de chuid an Choimisiúin, luaitear go gcomhlíonann Saoráidí Iniúchta SPS Chalafort Bhéal Feirste, Chalafort Latharna agus Chalafort an Phointe na ceanglais ábhartha a leagtar amach i gCuid 1 d’Iarscríbhinn II a ghabhann le Rialachán (AE) 2023/1231.

(8)

Sholáthair an Ríocht Aontaithe na ráthaíochtaí i scríbhinn is gá agus a cheanglaítear le hAirteagal 10(1), pointe (g), de Rialachán (AE) 2023/1231 sna litreacha uaithi an 4, 11 agus 15 Meán Fómhair 2023. Is iomchuí, dá bhrí sin, rialacha a leagan síos maidir le hábhar agus foirm shamplach an lipéid sláinte plandaí dá dtagraítear in Airteagal 10(3) den Rialachán sin.

(9)

Ar an lipéad sláinte plandaí a úsáidfear le haghaidh coinsíneachtaí a thagann isteach i dTuaisceart Éireann ó chodanna eile den Ríocht Aontaithe, ba cheart na heilimintí uile is gá lena sainaithint agus lena n-inrianaitheacht a léiriú, lena n-áirítear cláruimhir an oibreora ghairmiúil lena mbaineann, an cód inrianaitheachta, agus tagairt don reachtaíocht is infheidhme de chuid an Aontais. Go háirithe, ba cheart go sonrófaí ar an lipéad sláinte plandaí ainm luibheolaíoch na speiceas plandaí nó an tacsóin lena mbaineann, agus, de rogha, ainm an chineáil planda. I gcás innealra agus feithiclí, ba cheart go sonrófaí ar an lipéad sláinte plandaí, ina theannta sin, ainm an réada lena mbaineann.

(10)

Ba cheart formáid an lipéid sláinte plandaí a chaighdeánú chun a infheictheacht a áirithiú agus chun é a dhéanamh éagsúil ó lipéid eile a d’fhéadfadh a bheith ag gabháil leis na plandaí le haghaidh plandú seachas prátaí síl, agus an t-innealra agus na feithiclí lena mbaineann. Chun trédhearcacht agus faisnéis iomchuí a áirithiú do tháirgeoirí agus d’úsáideoirí, ba cheart na tásca ‘NI plant health label’ agus ‘for use in the United Kingdom only’ a bheith ar an lipéad sláinte plandaí.

(11)

Ar mhaithe le deimhneacht dhlíthiúil agus chun cur isteach míchuí ar thrádáil a sheachaint, ba cheart an Rialachán seo a theacht i bhfeidhm mar ábhar práinne.

(12)

Luaitear sna ráthaíochtaí i scríbhinn arna soláthar ag an Ríocht Aontaithe go gcomhlíonfar na coinníollacha uile dá dtagraítear in Airteagal 10(1) de Rialachán (AE) 2023/1231 ón 1 Deireadh Fómhair 2023. Dá bhrí sin, ba cheart feidhm a bheith ag an Rialachán seo ón dáta sin chun deimhneacht dhlíthiúil a áirithiú agus cur isteach míchuí ar thrádáil a sheachaint.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH:

Airteagal 1

Ábhar agus raon feidhme

Leis an Rialachán seo, leagtar síos rialacha maidir le hábhar agus foirm shamplach an lipéid sláinte plandaí dá dtagraítear in Airteagal 10(1), pointe (b), de Rialachán (AE) 2023/1231, a bhfuil gá leo chun teacht isteach i dTuaisceart Éireann ó chodanna eile den Ríocht Aontaithe na coinsíneachtaí seo a leanas agus chun na coinsíneachtaí sin a chur ar an margadh (‘an lipéad sláinte plandaí’):

(a)

plandaí le haghaidh plandú seachas prátaí síl;

(b)

innealra agus feithiclí a oibríodh chun críocha talmhaíochta nó foraoiseachta sula ndeachaigh siad isteach i dTuaisceart Éireann.

Airteagal 2

Ceanglais maidir leis an lipéad sláinte plandaí agus foirm shamplach an lipéid sláinte plandaí

1.   Beidh na heilimintí seo a leanas ar an lipéad sláinte plandaí:

(a)

ar bharr an lipéid sláinte plandaí, na focail ‘NI plant health label’;

(b)

an litir ‘A.’, agus ina dhiaidh sin:

(i)

i gcás plandaí le haghaidh plandú, ainm luibheolaíoch na speiceas plandaí nó an tacsóin lena mbaineann agus, de rogha, ainm an chineáil planda; nó

(ii)

i gcás innealra nó feithicle, ainm an réada;

(c)

an litir ‘B.’, agus ina dhiaidh sin, uimhir chlárúcháin an oibreora ghairmiúil;

(d)

an litir ‘C.’, agus ina dhiaidh sin:

(i)

i gcás plandaí le haghaidh plandú, cód inrianaitheachta an phlanda le haghaidh plandú; nó,

(ii)

i gcás innealra nó feithicle, cód inrianaitheachta an réada;

(e)

an litir ‘D.’, agus ina dhiaidh sin:

(i)

cód QR ina dtagraítear do leathanach ar shuíomhanna gréasáin oifigiúla údaráis inniúla na Ríochta Aontaithe, ar leathanach é a bhaineann leis an oibreoir gairmiúil i dTuaisceart Éireann a fhaigheann coinsíneachtaí dá dtagraítear in Airteagal 1 agus lena gcuirtear an t-oibreoir gairmiúil sin ar an eolas faoi reachtaíocht an Aontais is infheidhme agus tagairt shainráite do Rialachán (AE) 2023/1231 agus don Rialachán seo; nó

(ii)

an tásc ‘complies with Article 10 of Regulation (EU) 2023/1231’;

(f)

ag bun an lipéid sláinte plandaí, na focail ‘for use in the United Kingdom only’.

2.   Comhlíonfaidh an lipéad sláinte plandaí an fhoirm shamplach a leagtar amach san Iarscríbhinn.

Airteagal 3

Teacht i bhfeidhm agus cur i bhfeidhm

Tiocfaidh an Rialachán seo i bhfeidhm lá a fhoilsithe in Iris Oifigiúil an Aontais Eorpaigh.

Beidh feidhm aige ón 1 Deireadh Fómhair 2023.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 28 Meán Fómhair 2023.

Thar ceann an Choimisiúin

An tUachtarán

Ursula VON DER LEYEN


(1)   IO L 165, 29.6.2023, lch. 103.

(2)  Rialachán (AE) 2017/625 ó Pharlaimint na hEorpa agus ón gComhairle an 15 Márta 2017 maidir le rialuithe oifigiúla agus gníomhaíochtaí oifigiúla eile arna ndéanamh lena áirithiú go gcuirtear i bhfeidhm dlí an bhia agus na beatha, rialacha maidir le sláinte agus leas ainmhithe, sláinte plandaí agus táirgí cosanta plandaí, lena leasaítear Rialacháin (CE) Uimh. 999/2001, (CE) Uimh. 396/2005, (CE) Uimh. 1069/2009, (CE) Uimh. 1107/2009, (AE) Uimh 1151/2012, (AE) Uimh 652/2014, (AE) 2016/429 agus (AE) 2016/2031 ó Pharlaimint na hEorpa agus ón gComhairle, Rialacháin (CE) Uimh. 1/2005 agus (CE) Uimh. 1099/2009 ón gComhairle agus Treoracha 98/58/CE, 1999/74/CE, 2007/43/CE, 2008/119/CE agus 2008/120/CE ón gComhairle, agus lena n-aisghairtear Rialacháin (CE) Uimh. 854/2004 agus (CE) Uimh. 882/2004 ó Pharlaimint na hEorpa agus ón gComhairle, Treoracha 89/608/CEE, 89/662/CEE, 90/425/CEE, 91/496/CEE, 96/23/CE, 96/93/CE agus 97/78/CE ón gComhairle agus Cinneadh 92/438/CEE ón gComhairle (Rialachán maidir le Rialuithe Oifigiúla) (IO L 95, 7.4.2017, lch. 1).


IARSCRÍBHINN

Foirm shamplach an lipéid sláinte plandaí do phlandaí le haghaidh plandú seachas prátaí síl, agus innealra agus feithiclí a oibríodh chun críocha talmhaíochta nó foraoiseachta sular tháinig siad isteach i dTuaisceart Éireann, dá dtagraítear in Airteagal 2

(Bratach na Ríochta Aontaithe)

NI plant health label

A.

xxx

B.

xxx

C.

xxx

D.

xxx

For use in the United Kingdom only