(1)

Le Rialachán (CE) Uimh. 1831/2003 déantar foráil maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta i leith an t-údarú sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh iarratas isteach ar údarú ullmhóide in-1,4-béite-xiolanáise arna táirgeadh ag Trichoderma longibrachiatum CBS 139997 agus alfa-galachtóisíodáise arna táirgeadh ag Aspergillus tubingensis ATCC SD 6740. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide in-1,4-béite-xiolanáise arna táirgeadh ag Trichoderma longibrachiatum CBS 139997 agus alfa-galachtóisíodáise arna táirgeadh ag Aspergillus tubingensis ATCC SD 6740 mar bhreiseán beathaithe le haghaidh sicíní lena ramhrú, sicíní a thógtar le bheith ina mbéaróga, mionspeicis éanlaithe clóis lena ramhrú agus a thógtar le bheith ina mbéaróga, agus éin ornáideacha, breiseán atá le haicmiú sa chatagóir breiseán “breiseáin zóiteicniúla” agus san fheidhmghrúpa “méadaitheoirí díleáiteachta”.

(4)

I dtuairimí an 19 Márta 2020 (2) agus an 10 Samhain 2021 (3) ón Údarás Eorpach um Shábháilteacht Bia (“an tÚdarás”), is é an chonclúid ar ar thángthas nach bhfuil éifeacht dhíobhálach ag an ullmhóid in-1,4-béite-xiolanáise arna táirgeadh ag Trichoderma longibrachiatum CBS 139997 agus alfa-galachtóisíodáise arna táirgeadh ag Aspergillus tubingensis ATCC SD 6740 ar shláinte ainmhithe, ar shábháilteacht tomhaltóirí ná ar an gcomhshaol faoi na coinníollacha úsáide atá beartaithe. Mar gheall ar an easpa sonraí, ní raibh an tÚdarás in ann teacht ar chonclúid maidir leis an ngreannú craicinn ná súl a d’fhéadfadh an ullmhóid a dhéanamh ná maidir leis an íogrú craicinn a d’fhéadfadh sí a dhéanamh. Mar gheall ar nádúr próitéineach na hullmhóide, ba cheart í a mheas mar íogróir riospráide féideartha, ach glactar go bhfuil an nochtadh teoranta mar gheall ar an acmhainneacht íseal atá aici deannach a tháirgeadh. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe a mhéid a bhaineann le húsáideoirí an bhreiseáin.

(5)

Thairis sin tháinig an tÚdarás ar an gconclúid go bhféadfadh an ullmhóid a bheith éifeachtúil mar bhreiseán zóiteicniúil le haghaidh na spriocspeiceas a iarraidh. Ní mheasann an tÚdarás go bhfuil gá le ceanglais shonracha maidir le faireachán iarmhargaidh. D’fhíoraigh sé freisin an tuarascáil ar an modh a úsáidtear chun anailís a dhéanamh ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(6)

Léirítear leis an measúnú ar an ullmhóid in-1,4-béite-xiolanáise arna táirgeadh ag Trichoderma longibrachiatum CBS 139997 agus alfa-galachtóisíodáise arna táirgeadh ag Aspergillus tubingensis ATCC SD 6740 go gcomhlíontar na coinníollacha maidir le húdarú, dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú faoi mar a shonraítear san Iarscríbhinn a ghabhann leis an Rialachán seo.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,