(1)

Ir-Regolament (UE) 2016/429 jistabbilixxi regoli speċifiċi għall-mard elenkat f’konformità mal-Artikolu 5(1) tiegħu, u kif dawk ir-regoli għandhom jiġu applikati għal kategoriji differenti ta’ mard elenkat. Dak ir-Regolament jipprevedi li l-Istati Membri jistabbilixxu programmi ta’ eradikazzjoni obbligatorji għall-mard elenkat imsemmi fl-Artikolu 9(1), il-punt (b), u għall-programmi ta’ eradikazzjoni fakultattivi għall-mard elenkat imsemmi fl-Artikolu 9(1), il-punt (c), u għall-approvazzjoni ta’ tali programmi mill-Kummissjoni. Ir-Regolament (UE) 2016/429 jipprevedi wkoll li l-Kummissjoni tapprova jew tirtira l-istatus ta’ ħelsien mill-mard tal-Istati Membri jew taż-żoni jew tal-kompartimenti tagħhom rigward ċertu mard elenkat imsemmi fl-Artikolu 9(1), il-punti (b) u (c), tiegħu.

(2)

Ir-Regolament Delegat tal-Kummissjoni (UE) 2020/689 (2) jissupplimenta r-Regolament (UE) 2016/429 u jistabbilixxi l-kriterji għall-għoti, għaż-żamma, għas-sospensjoni u għall-irtirar tal-istatus ta’ ħelsien mill-mard għall-Istati Membri jew għaż-żoni jew għall-kompartimenti tagħhom, u r-rekwiżiti għall-approvazzjoni tal-programmi ta’ eradikazzjoni obbligatorji jew fakultattivi għall-Istati Membri jew għaż-żoni jew għall-kompartimenti tagħhom.

(3)

Ir-Regolament ta’ Implimentazzjoni tal-Kummissjoni (UE) 2021/620 (3) jistabbilixxi r-regoli ta’ implimentazzjoni għall-mard elenkat, imsemmi fl-Artikolu 9(1), il-punti (a), (b) u (c) tar-Regolament (UE) 2016/429, tal-annimali, fir-rigward tal-istatus ta’ ħelsien mill-mard u tal-istatus ta’ mingħajr tilqim ta’ ċerti Stati Membri jew taż-żoni jew tal-kompartimenti tagħhom, u l-approvazzjoni ta’ programmi ta’ eradikazzjoni għal dak il-mard elenkat. B’mod aktar partikolari, jelenka fl-Annessi tiegħu, l-Istati Membri jew iż-żoni jew il-kompartimenti tagħhom bi status ta’ ħelsien mill-mard, u jelenka wkoll il-programmi ta’ eradikazzjoni obbligatorji jew fakultattivi approvati eżistenti. Is-sitwazzjoni epidemjoloġika li qed tinbidel ta’ ċertu mard teħtieġ l-emenda ta’ ċerti Annessi tar-Regolament ta’ Implimentazzjoni (UE) 2021/620, sabiex jiġi approvat l-istatus ta’ ħelsien mill-mard ta’ ċerti Stati Membri jew taż-żoni tagħhom u tiġi rtirata l-approvazzjoni għal ċerti żoni tal-Istati Membri fejn ġew ikkonfermati tifqigħat ta’ mard jew fejn il-kondizzjonijiet għaż-żamma tal-istatus ta’ ħelsien mill-mard ma għadhomx jiġu ssodisfati, u sabiex jiġu approvati ċerti programmi ta’ eradikazzjoni obbligatorji jew fakultattivi ppreżentati lill-Kummissjoni.

(4)

Għall-infezzjoni bil-Brucella abortus, bil-B. melitensis u bil-B. Suis, bid-dijarea virali bovina (BVD), għall-infezzjoni bil-virus tal-ilsien blu (serotipi 1-24) (BTV), bis-septiċemija emorraġika virali (VHS) u bin-nekrożi emopojetika infettiva (IHN), diversi Stati Membri reċentement applikaw lill-Kummissjoni biex ikollhom status ta’ ħelsien mill-mard jew għal emendi għall-programmi ta’ eradikazzjoni approvati għal ċerti żoni tat-territorju tagħhom. Barra minn hekk Stat Membru nnotifika tifqigħat ta’ infezzjoni bil-BTV u dan jeħtieġ li jiġi rifless ukoll fl-Anness rilevanti tar-Regolament ta’ Implimentazzjoni (UE) 2021/620.

(5)

Għall-infezzjoni bil-Brucella abortus, bil-B. melitensis u bil-B. Suis fl-annimali bovini, l-Italja ressqet informazzjoni lill-Kummissjoni li turi li l-kondizzjonijiet għar-rikonoxximent tal-istatus ta’ ħelsien mill-mard stipulati fir-Regolament Delegat (UE) 2020/689 huma ssodisfati fil-Provinċja ta’ Agrigento fir-reġjun ta’ Sqallija. Wara l-valutazzjoni mill-Kummissjoni, intwera li l-applikazzjoni kienet tikkonforma mal-kriterji stipulati fil-Parti II, il-Kapitolu 4, tar-Regolament Delegat (UE) 2020/689 għall-approvazzjoni tal-istatus ta’ ħelsien mill-mard. Għalhekk, jenħtieġ li dik il-provinċja tiġi elenkata bħala żona ħielsa mill-Brucella abortus, mill-B. melitensis u mill-B. suis fl-annimali bovini fil-Parti I, il-Kapitolu 1, tal-Anness I tar-Regolament ta’ Implimentazzjoni (UE) 2021/620.

(6)

Għall-BVD, il-Ġermanja ressqet informazzjoni lill-Kummissjoni li turi li l-kondizzjonijiet għar-rikonoxximent tal-istatus ta’ ħelsien mill-mard għall-BVD stipulati fir-Regolament Delegat (UE) 2020/689 huma ssodisfati fir-reġjuni ta’ Göttingen, Northeim u Stade fl-istat tas-Sassonja t’Isfel u fir-reġjun ta’ Kleve fl-istat ta’ Nordrhein-Westfalen. Wara l-valutazzjoni mill-Kummissjoni, intwera li dawn l-applikazzjonijiet kienu jikkonformaw mal-kriterji stipulati fil-Parti II, il-Kapitolu 4, tar-Regolament Delegat (UE) 2020/689 għall-għoti tal-istatus ta’ ħelsien mill-mard għall-BVD. Għalhekk, jenħtieġ li dawk iż-żoni jiġu elenkati fil-Parti I tal-Anness VII tar-Regolament ta’ Implimentazzjoni (UE) 2021/620, li għandhom status ta’ ħelsien mill-mard għall-BVD.

(7)

Fir-rigward tal-infezzjoni bil-BTV, Spanja nnotifikat lill-Kummissjoni dwar tifqigħa tal-infezzjoni bis-serotip 4 tal-BTV fil-provinċja ta’ Alicante fil-komunità awtonoma ta’ Valenzja. Peress li din il-provinċja għandha status ta’ ħelsien mill-mard u hija elenkata fil-Parti I tal-Anness VIII tar-Regolament ta’ Implimentazzjoni (UE) 2021/620, jenħtieġ li l-approvazzjoni tal-istatus ta’ ħelsien mill-mard għall-infezzjoni bil-BTV tiġi rtirata, u jenħtieġ li l-entrata għal Spanja f’dik il-lista tiġi emendata skont dan.

(8)

Spanja infurmat ukoll lill-Kummissjoni li estendiet il-kamp ta’ applikazzjoni territorjali tal-programm ta’ eradikazzjoni fakultattiv għall-infezzjoni bil-BTV diġà approvat għaż-żona elenkata fil-Parti II tal-Anness VIII tar-Regolament ta’ Implimentazzjoni (UE) 2021/620 biż-żieda ta’ żona waħda li tinkludi l-provinċja ta’ Alicante fil-komunità awtonoma ta’ Valenzja. Għalhekk, jenħtieġ li dik iż-żona tiżdied mal-entrata għal Spanja fil-Parti II tal-Anness VIII tar-Regolament ta’ Implimentazzjoni (UE) 2021/620, u li l-emenda proposta għall-programm ta’ eradikazzjoni għall-infezzjoni bil-BTV tiġi approvata.

(9)

Għall-infezzjoni bil-VHS, id-Danimarka u l-Estonja ressqu informazzjoni lill-Kummissjoni li turi li l-kondizzjonijiet għar-rikonoxximent tal-istatus ta’ ħelsien mill-mard mill-VHS stipulati fir-Regolament Delegat (UE) 2020/689 huma ssodisfati għat-territorji rispettivi tagħhom kollha. Wara l-valutazzjoni mill-Kummissjoni, intwera li dawk l-applikazzjonijiet kienu jikkonformaw mal-kriterji stipulati fil-Parti II, il-Kapitolu 4, tar-Regolament Delegat (UE) 2020/689 għall-għoti tal-istatus ta’ ħelsien mill-mard għall-VHS. Għalhekk, jenħtieġ li jiġi elenkat it-territorju kollu ta’ dawk l-Istati Membri fil-Parti I tal-Anness XII tar-Regolament ta’ Implimentazzjoni (UE) 2021/620, li għandhom status ta’ ħelsien mill-mard għall-VHS.

(10)

Għall-infezzjoni bil-IHN, l-Estonja u l-Finlandja ressqu informazzjoni lill-Kummissjoni li turi li l-kondizzjonijiet għall-approvazzjoni tal-istatus ta’ ħelsien mill-mard mill-IHN stipulati fir-Regolament Delegat (UE) 2020/689 huma ssodisfati għat-territorju kollu u għal kompartiment wieħed rispettivament. Wara l-valutazzjoni mill-Kummissjoni, intwera li dik l-applikazzjoni kienet tikkonforma mal-kriterji stipulati fil-Parti II, il-Kapitolu 4, tar-Regolament Delegat (UE) 2020/689 għall-għoti tal-istatus ta’ ħelsien mill-mard għall-IHN. Għalhekk, jenħtieġ li t-territorju kollu tal-Estonja u kompartiment wieħed fil-Finlandja jiġu elenkati fil-Parti I tal-Anness XIII tar-Regolament ta’ Implimentazzjoni (UE) 2021/620, li għandhom status ta’ ħelsien mill-mard għall-IHN.

(11)

Il-miżuri previsti f’dan ir-Regolament huma f’konformita mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,