Eagrán sealadach

BREITHIÚNAS NA CÚIRTE (an Naoú Dlísheomra)

22 Deireadh Fómhair 2026 (*)

(Tarchur chun réamhrialú – Margadh inmheánach leictreachais – Rialachán (AE) 2022/1854 – Idirghabháil éigeandála chun aghaidh a thabhairt ar phraghsanna arda fuinnimh – Airteagal 6(1) – Airteagal 8(1)(a), agus (2) – Caidhp ar ioncam margaidh a fhaigheann táirgeoirí leictreachais a úsaideann foinsí fuinnimh áirithe – Caidhp náisiúnta faoi bhun EUR 180 in aghaidh na huaire meigeavata [MWh] leictreachais a tháirgtear – Inghlacthacht – Caidhp atá difreáilte ag brath ar cé acu a bhí nó nach raibh conradh cúitimh le préimheanna ann, an 8 Deireadh Fómhair 2022, a bhí ina gceangal ar an táirgeoir lena mbaineann – Comhréireacht agus neamh-idirdhealú – Easpa sonraí leordhóthanacha – Do-ghlacthacht)

I gCás C‑187/25,

IARRAIDH ar réamhrialú faoi Airteagal 267 CFAE, ó Administrativen sad Plovdiv (an Chúirt Riaracháin, Plovdiv, an Bhulgáir), trí bhreith an 7 Márta 2025, a fuarthas ag an gCúirt an 7 Márta 2025, sna himeachtaí

‘EVN Bulgaria Renewables’ EOOD

v

Direktor na Teritorialna direktsia Plovdiv na Natsionalnata agentsia za prihodite

idiragraithe:

Okrazhna prokuratura gr. Plovdiv,

tugann AN CHÚIRT (an Naoú Dlísheomra),

agus í comhdhéanta mar seo a leanas: I. Jarukaitis, (Rapóirtéir), Uachtarán an Ceathrú Dlísheomra (Rapóirtéir), ag feidhmiú mar Uachtarán an Naoú Dlísheomra, N. Jääskinen agus M. Condinanzi, Breithiúna,

Abhcóide Ginearálta: A. Biondi,

Cláraitheoir: V. Di Bucci,

ag féachaint don nós imeachta i scríbhinn,

tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:

–        ‘EVN Bulgaria Renewables’ EOOD, ag G. Petkova, advokat,

–        Direktor na Teritorialna direktsia Plovdiv na Natsionalnata agentsia za prihodite, ag P. Georgiev,

–        Rialtas na hÉireann, ag M. Browne, Príomh-Aturnae Stáit, S. Finnegan agus A. Joyce, i gcáil Gníomhairí, le cúnamh ó C. Donnelly, Abhcóide Sinsir, agus S. Brittain, Abhcóide,

–        an Coimisiún Eorpach, ag O. Beynet, T. Scharf agus I. Zaloguin, i gcáil Gníomhairí,

tar éis cinneadh a dhéanamh, i ndiaidh an tAbhcóide Ginearálta a éisteacht, breith a thabhairt ar an gcás gan Tuairim,

an Breithiúnas seo a leanas:

Breithiúnas

1        Baineann an iarraidh ar réamhrialú le léiriú Airteagal 6(1) agus Airteagal 8(1)(a) agus (2) de Rialachán (AE) 2022/1854 ón gComhairle an 6 Deireadh Fómhair 2022 maidir le hidirghabháil éigeandála chun aghaidh a thabhairt ar phraghsanna arda fuinnimh (IO 2022 L 261, lch. 1).

2        Rinneadh an iarraidh seo in imeachtaí idir ‘EVN Bulgaria Renewables’ EOOD (‘EVN’ agus Direktor na Teritorialna direktsia Plovdiv na Natsionalnata agentsia za prihodite (Stiúrthóir Stiúrthóireacht Chríochach Plovdiv de chuid na Gníomhaireachta Náisiúnta Ioncaim, an Bhulgáir) (‘an t‑údarás cánach’) maidir le dlíthiúlacht fhógra measúnaithe cánach.

 An dlí lena mbaineann

 Dlí an Aontais Eorpaigh

3        Leagtar amach an méid seo a leanas le haithrisí 12, 25, agus 46 de Rialachán 2022/1854:

‘(12)      [...] Le hoibleagáid aonfhoirmeach maidir leis an mbarrachas ioncaim a chur ar aghaidh chuig tomhaltóirí, d'fhágfaí gur féidir leis na Ballstáit uile a gcuid tomhaltóirí a chosaint. Bheadh tionchar dearfach ag an dea-éifeacht ar phraghsanna fuinnimh ar mhargadh idirnasctha an Aontais [Eorpaigh] agus chuideofaí freisin leis an ráta boilscithe a mhaolú.[...]

[...]

(25)      I gcás ina bhfuil tomhaltóirí neamhchosanta ar phraghsanna an‑ard a dhéanann dochar do gheilleagar an Aontais freisin, is gá teorainn a chur, ar bhonn sealadach, le hioncam margaidh urghnách táirgeoirí a bhfuil costais imeallacha níos ísle acu tríd an gcaidhp a chur i bhfeidhm ar ioncam margaidh a bhaintear amach trí leictreachas a dhíol laistigh den Aontas.

[...]

(46)      Ba cheart do na Ballstáit a áirithiú go gcuirfear an barrachas ioncaim a eascraíonn as cur i bhfeidhm na caidhpe ar ioncam margaidh i réimse an leictreachais ar aghaidh chuig na custaiméirí deiridh leictreachais chun tionchar na bpraghsanna eisceachtúla arda leictreachais a mhaolú. Ba cheart an barrachas ioncaim a dhíriú ar chustaiméirí, lena n‑áirítear teaghlaigh agus cuideachtaí araon, a mbíonn tionchar mór ag praghsanna arda leictreachais orthu. [...]’

4        De bhun Airteagal 1 den Rialachán sin, dar teideal ‘Ábhar agus raon feidhme’:

‘Leis an Rialachán seo bunaítear idirghabháil éigeandála chun maolú a dhéanamh ar éifeachtaí praghsanna arda fuinnimh trí bhearta atá eisceachtúla, spriocdhírithe agus lena mbaineann teorainn ama. Is é is cuspóir do na bearta sin [...] caidhp a thabhairt isteach ar ioncaim mhargaidh a fhaigheann táirgeoirí áirithe ó ghiniúint leictreachais agus iad a athdháileadh ar chustaiméirí deiridh leictreachais ar bhealach spriocdhírithe [...] chun rannchuidiú le hinacmhainneacht an fhuinnimh do theaghlaigh agus cuideachtaí.’

5        Foráiltear mar seo a leanas le hAirteagal 6 den Rialachán sin, dar teideal ‘Caidhp shainordaitheach ar ioncaim mhargaidh’, i mír 1 de:

‘Maidir leis na hioncaim mhargaidh de chuid táirgeoirí a fhaightear ó ghiniúint leictreachais ó na foinsí dá dtagraítear in Airteagal 7(1), cuirfear caidhp orthu ar leibhéal uasta EUR 180 in aghaidh [na huaire meigeavata (Mwh)] leictreachais a tháirgtear.’

6        Sonraíodh an méid seo a leanas le hAirteagal 7 den Rialachán sin, dar teideal ‘An chaidhp ar na hioncaim mhargaidh a chur i bhfeidhm maidir le táirgeoirí leictreachais’:

‘1.      Beidh feidhm ag an gcaidhp ar ioncam margaidh dá bhforáiltear in Airteagal 6 maidir leis an ioncam margaidh a fhaightear ó dhíol leictreachais a tháirgtear ó na foinsí seo a leanas:

(a)      fuinneamh gaoithe;

[...]

2.      Ní bheidh feidhm ag an gcaidhp ar ioncam margaidh dá bhforáiltear in Airteagal 6(1) maidir le [...] táirgeoirí a bhfuil caidhp cheana, mar thoradh ar bhearta Stáit nó poiblí nár glacadh faoi Airteagal 8, ar a n‑ioncaim in aghaidh gach MWh leictreachais a tháirgtear.

[...]

4.      Féadfaidh na Ballstáit a chinneadh nach mbeidh feidhm ag an gcaidhp ar ioncam margaidh maidir leis na hioncaim a fhaightear ó dhíolachán leictreachais i margadh an fhuinnimh don chothromú [...]

[...] ’

7        Foráiltear mar a leanas le hAirteagal 8 de Rialachán 2022/1854, dar teideal ‘Bearta náisiúnta géarchéime’:

‘1.      Féadfaidh na Ballstáit:

(a)      bearta a choinneáil ar bun nó a thabhairt isteach lena gcuirtear teorainn bhreise le hioncam margaidh na dtáirgeoirí a ghineann leictreachas ó na foinsí a liostaítear in Airteagal 7(1), [...];

(b)      caidhp níos airde ar ioncam margaidh a shocrú do tháirgeoirí a ghineann leictreachas ó na foinsí a liostaítear in Airteagal 7(1) ar choinníoll go sáraíonn a n‑infheistíochtaí agus a gcostais oibriúcháin an t‑uasmhéid a shocraítear in Airteagal 6(1);

[...]

(d)      caidhp shonrach a shocrú ar an ioncam margaidh a fhaightear ó dhíol leictreachais a tháirgtear ó antraicít;

[...]

2.      Maidir leis na bearta dá dtagraítear i mír 1, i gcomhréir leis an Rialachán seo:

(a)      beidh siad comhréireach agus neamh-idirdhealaitheach;

(b)      ní chuirfear comharthaí infheistíochta i mbaol leo;

(c)      áireofar leo go gcumhdófar na costais infheistíochta agus oibriúcháin;

(d)      ní dhéanfaidh siad feidhmiú na margaí mórdhíola leictreachais a shaobhadh, agus go háirithe, ní dhéanfaidh siad difear don ordú fiúntais ná do shocrú na bpraghsanna ar an margadh mórdhíola;

(e)      beidh siad ag luí le dlí an Aontais.’

8        De bhun Airteagal 22 den Rialachán sin, dar teideal ‘Teacht i bhfeidhm agus cur i bhfeidhm’:

‘1.      Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

2.      Gan dochar don oibleagáid atá ann dáileadh an bharrachais ioncaim a áirithiú i gcomhréir le hAirteagal 10 [...], beidh feidhm ag an Rialachán seo go dtí an 31 Nollaig 2023 faoi réir an mhéid seo a leanas:

[...]

(c)      Beidh feidhm ag Airteagail 6, 7 agus 8 ón 1 Nollaig 2022 go dtí an 30 Meitheamh 2023;

[...] ’

 Dlí na Bulgáire

 An Dlí maidir le Fuinneamh a Tháirgtear ó Fhoinsí In‑athnuaite

9        Foráiltear mar a leanas le hAirteagal 31 den Zakon za energiyata ot vazobnovyaemi iztochnitsi (an Dlí maidir le Fuinneamh a tháirgtear ó Fhoinsí In-athnuaite (DV Uimh. 35, an 3 Bealtaine 2011), sa leagan is infheidhme maidir leis na príomhimeachtaí (DV Uimh. 29, an 10 Aibreán 2012):

‘(1)      Ceannóidh an soláthróir poiblí nó na soláthróirí deiridh leictreachas a tháirgtear ó fhoinsí in‑athnuaite ar an bpraghas fabhrach arna shocrú ag an Darzhavna Komisia za energiyno i vodno regulirane [(an Coimisiún Stáit um Rialáil Fuinnimh agus Uisce, an Bhulgáir), dá ngairtear Komisia za energiyno i vodno regulirane (an Coimisiún um Rialáil Fuinnimh agus Uisce, an Bhulgáir) (‘KEVR’)], le héifeacht ón [...] dáta a chuirfear an gléasra giniúna leictreachais i mbun seirbhíse [...]

(2)      Déanfar leictreachas a tháirgtear ó fhoinsí in‑athnuaite dá dtagraítear i mír 1 a cheannach ar bhonn comhaontuithe ceannaigh fadtéarmacha ar feadh na tréimhse seo a leanas:

[...]

2.      12 bliana, le haghaidh leictreachas a tháirgtear ó chumhacht ghaoithe;

[...]’

 An Dlí maidir le Fuinneamh agus an Dlí lena leasaítear agus lena bhforlíontar an Dlí maidir le Fuinneamh

10      Rinneadh an Zakon za energetikata (an Dlí maidir le Fuinneamh) (DV Uimh. 107, an 9 Nollaig 2003) a leasú roinnt uaireanta, go háirithe le Zakon za izmenenie i dopalnenie na zakona za energetikata (an Dlí lena leasaítear agus lena bhforlíontar an Dlí maidir le Fuinneamh) (DV Uimh.38, an 8 Bealtaine 2018). Foráiltear mar a leanas le mír 68 dá fhorálacha idirthréimhseacha agus críochnaitheacha:

‘(1)      Faoin 31 Deireadh Fómhair ar a dhéanaí, déanfaidh táirgeoirí leictreachais ó fhoinsí in‑athnuaite i ngléasraí cumhachta ag a bhfuil acmhainneacht shuiteáilte iomlán 4 [mheigeavata (MW)] agus os cionn 4 MW conradh cúitimh le ‘Sigurnost na elektroenergiynata sistema’ (an Ciste um Shlándáil an Chórais Fuinnimh Leictrigh, an Bhulgáir; ‘FSES’) ina mbeidh préimheanna le haghaidh na gcainníochtaí leictreachais a tháirgeann siad suas lena nglanaschur sonrach arna chinneadh, ar ar a mbonn a bhfuil a bpraghas fabhrach socraithe. Tiocfaidh na conarthaí maidir le híocaíochtaí cúitimh le préimheanna i bhfeidhm faoin 1 Eanáir 2019.

(2)      Déanfaidh [KEVR] an phréimh a chinneadh ar bhonn bliantúil, faoin 30 Meitheamh ar a dhéanaí, arb ionann é agus an difríocht idir an praghas fabhrach nó praghas fabhrach nuashonraithe de chuid an stáisiúin, arna chinneadh roimh theacht i bhfeidhm an Dlí seo, agus an margadhphraghas measta le haghaidh leictreachas a tháirgtear ó fhoinsí fuinnimh in‑athnuaite, arna chinneadh don tréimhse sin ar bhonn na príomhfhoinse fuinnimh.

[...]

(4)      Íocfar an phréimh go dtí dul in éag an chonartha ceannaigh fadtéarmaigh lena mbaineann [...], arna thabhairt i gcrích roimh theacht i bhfeidhm an Dlí seo.

[...]

(8)      Ó dháta theacht i bhfeidhm an chonartha dá dtagraítear i bpointe 1, measfar go bhfuil deireadh tagtha le conradh ceannaigh an táirgeora lena mbaineann, dá dtagraítear i bpointe 1, a tugadh i gcrích roimh theacht i bhfeidhm an Dlí seo, agus ní cheannóidh an soláthróir poiblí, nó na soláthróirí deiridh, an leictreachas arna tháirgeadh ag an táirgeoir sin ar phraghas fabhrach.

(9)      Ón 1 Iúil 2018 agus go dtí go dtiocfaidh an conradh dá dtagraítear i bpointe 1 i bhfeidhm, ceannóidh an soláthróir poiblí leictreachas ar phraghsanna fabhracha ó na táirgeoirí dá dtagraítear i bpointe 1 atá nasctha leis an gcóras tarchurtha leictreachais.

[...] ’

11      Foráiltear mar a leanas le mír 1, pointe 42 d’fhorálacha forlíontacha an Dlí maidir le Fuinneamh, sa leagan is infheidhme maidir leis an díospóid sna príomhimeachtaí:

‘Chun críocha an Dlí seo:

[...]

42.      Is éard a bheidh sa “mhargadhphraghas measta in aghaidh an ghrúpa táirgeoirí de réir na príomhfhoinse fuinnimh” an meánphraghas bliantúil ualaithe arna chinneadh ag [KEVR] i gcomhréir leis na modúlachtaí le haghaidh leictreachas a tháirgtear ó ghrianfhuinneamh, ó fhuinneamh gaoithe, ó ghléasraí hidreachumhachta a bhfuil cumhacht shuiteáilte 10 MWh nó níos lú acu, ó bhithmhais, ó chineálacha eile foinsí in‑athnuaite agus, i gcás comhghuiniúint ardéifeachtach teasa agus leictreachais, ó ghás nádúrtha agus ó ghual.’

 An Dlí maidir le Cur i bhFeidhm Fhorálacha an Dlí Buiséid 2022

12      Foráiltear mar a leanas le Zakon za prilagane na razporedbi na Zakona za darzhavnia byudzhet na Republika Bulgaria za 2022 g., Zakona za byudzheta na darzhavnoto obshtestveno osiguryavane za 2022 g. i Zakona za byudzheta na Natsionalnata zdravnoosiguritelna kasa za 2022 g. (An Dlí maidir le cur i bhfeidhm fhorálacha Dhlí Airgeadais Phoblacht na Bulgáire le haghaidh 2022, an Dlí maidir le buiséad árachais shóisialta an Stáit le haghaidh 2022 agus an Dlí maidir le buiséad an Chiste Náisiúnta Árachais Sláinte le haghaidh 2022) (DV Uimh. 104, an 30 Nollaig 2022), sa leagan is infheidhme maidir leis na príomhimeachtaí (‘Dlí maidir le Cur i bhFeidhm Fhorálacha an Dlí Buiséid’), i mír 8 dá fhorálacha idirthréimhseacha agus críochnaitheacha:

‘(1)      Maidir le táirgeoirí leictreachais ag a bhfuil gléasraí giniúna leictreachais suiteáilte ag a bhfuil cumhacht shuiteáilte is mó ná 1 MWh, a n‑eascraíonn a n‑ioncaim mhargaidh as leictreachas a tháirgtear ó na foinsí dá dtagraítear in Airteagal 7(1) de [Rialachán 2022/1854] a dhíol, íocfaidh siad ranníocaíochtaí sannta arb ionann iad agus an difríocht dhearfach idir an ioncam margaidh, glan ó cháin bhreisluacha [(CBL)], agus an chaidhp ioncaim a socraíodh, arna ríomh trí na luachanna le haghaidh an chineáil táirgeora lena mbaineann a chur i bhfeidhm, le tréimhse sheachadta ón 1 Nollaig 2022 go dtí an 30 Meitheamh 2023, cé is moite d’idirbhearta fuinnimh don chothromú is gá chun riachtanais chothromúcháin an chórais leictreachais ag ESO (Elektroenergien sistemen operator [oibreoir an chórais leictreachais]) EAD a chumhdach. Déanfar méid na ranníocaíochta arna cur in áirithe a ríomh le haghaidh gach idirbhirt.

(2)      Is le cinneadh ón Ministerski savet [Comhairle na nAirí, an Bhulgáir] a chinnfear na luachanna a úsáidfear chun an chaidhp ioncaim don chineál táirgeora lena mbaineann a ríomh, de réir bhrí phointe 1.

(3)      Maidir le táirgeoirí a bhfuil gléasraí giniúna leictreachais acu ag a bhfuil cumhacht shuiteáilte is mó ná 1 MWh agus a bhfuil conradh cúitimh acu le préimheanna a bhí i bhfeidhm an 8 Deireadh Fómhair 2022, a n‑eascraíonn a n‑ioncam margaidh as díolacháin leictreachais a tháirgtear ó fhoinsí dá dtagraítear in Airteagal 7(1) de [Rialachán 2022/1854], íocfaidh siad le [FSES] ranníocaíochtaí sannta ar an ioncam margaidh le haghaidh gach idirbhirt a thugtar i gcrích ar phraghsanna a chaibidlítear go neamhshrianta, gan [CBL] a áireamh, a bhfuil tréimhse sheachadta ón 1 Nollaig 2022 go dtí an 30 Meitheamh 2023 acu, cé is moite d’idirbhearta maidir le fuinneamh don chothromú. Is mar seo a leanas a dhéanfar méid na ranníocaíochta leithdháilte do gach idirbheart a ríomh:

1.      an difríocht dhearfach idir an t‑ioncam margaidh ar phraghasanna arna gcaibidliú go neamhshrianta (an praghas margaidh a fhaightear) ón idirbheart lena mbaineann, gan [CBL] a áireamh, agus an chaidhp ioncaim a socraíodh, arna ríomh tríd an bpraghas margaidh a mheastar de bhun an chinnidh praghais arna eisiúint ag [KEVR] a chur i bhfeidhm, lena socraítear an phréimh atá i bhfeidhm don táirgeoir lena mbaineann, do tháirgeoirí a bhfuil méid na préimhe sin éagsúil le BGN 0.00 in aghaidh gach MWh glan ó [CBL], agus

2.      90% den difríocht dhearfach idir ioncam margaidh ar phraghsanna arna gcaibidliú go neamhshrianta (an praghas margaidh a fhaightear) ón idirbheart lena mbaineann, glan ó [CBL], agus an chaidhp ioncaim a socraíodh, arna ríomh tríd an bpraghas fabhrach arna chinneadh le cinneadh [KEVR] a chur i bhfeidhm i gcomhréir leis an gconradh cúitimh le préimheanna, le haghaidh táirgeoirí arb é BGN 0.00 in aghaidh gach MWh, glan ó [CBL], méid socraithe na préimhe atá i bhfeidhm ina leith.

[...] ’

 An díospóid sna príomhimeachtaí agus na ceisteanna a tharchuirtear le haghaidh réamhrialú

13      Is táirgeoir leictreachais é EVN a bhfuil a cheanncheathrú sa Bhulgáir. Is úinéir é ar ghléasra cumhachta gaoithe in Kavarna (an Bhulgáir), ag a bhfuil cumhacht shuiteáilte iomlán de 16 (MW), a cuireadh tús leis an 8 Meitheamh 2012. I gcomhréir le hAirteagal 31 den Dlí maidir le Fuinneamh a Tháirgtear ó Fhoinsí In‑athnuaite, sa leagan is infheidhme maidir leis na príomhimeachtaí, rinne EVN conradh a thabhairt i gcrích, an 28 Meitheamh 2012 chun an leictreachas arna tháirgeadh ag an ngléasra sin le Natsionalna elektricheska kompaniya AD (‘an conradh um leictreachas a cheannach’), ón tréimhse go dtí an 28 Meitheamh 2024, ar phraghas fabhrach BGN 191 (thar tar EUR 98) in aghaidh gach MWh.

14      Tar éis leasuithe reachtacha a rinneadh ar an scéim chun leictreachas a tháirgtear ó fhoinsí in‑athnuaite cheannach, cuireadh conradh cúitimh le préimheanna in ionad an chonartha sin, a tugadh i gcrích an 28 Meán Fómhair 2018, agus foirceannadh an chonartha um leictreachas a cheannach, de bhun mhír 68, pointe 8, d’fhorálacha idirthréimhseacha agus críochnaitheacha an Dlí lena leasaítear agus lena bhforlíontar an Dlí maidir le Fuinneamh. I gcomhréir leis an gconradh maidir le híocaíochtaí cúitimh le préimheanna, ceanglaítear ar FSES préimh a íoc le EVN as an méid leictreachais arna tháirgeadh ag stáisiún cumhachta gaoithe Kavarna a ndearna EVN idirbhearta ina leith ar an margadh fuinnimh don chothromú. Is éard atá sa phréimh in aghaidh gach MWh leictreachais an difríocht idir an praghas fabhrach faoin gcomhaontú ceannaigh cumhachta agus an praghas measta, a shocraítear le haghaidh na tréimhse a chumhdaítear le cinneadh KEVR.

15      Íocadh an phréimh dheireanach faoin gconradh cúitimh sin le préimheanna le EVN le haghaidh mhí Dheireadh Fómhair 2021. Tar éis na míosa sin, sáraíodh an praghas fabhrach dá bhforáiltear sa chomhaontú ceannaigh cumhachta leis an bpraghas measta a shocraigh KEVR. Dá bhrí sin, socraíodh an phréimh don leictreachas a tháirgeann an gléasra cumhachta sin ag BGN 0 in aghaidh gach MWh.

16      Agus é den tuairim gur tháinig deireadh leis an gconradh cúitimh le préimheanna an 30 Samhain 2021, d’íoc EVN ranníocaíochtaí sannta i gcomhréir le mír 8 d’fhorálacha idirthréimhseacha agus críochnaitheacha an Dlí maidir le Cur i bhFeidhm Fhorálacha an Dlí Buiséid 2022, do ghléasra cumhachta Kavarna, don tréimhse ón 1 Nollaig 2022 go dtí an 30 Meitheamh 2023, arna ríomh tríd an chaidhp ioncaim BGN 350 (thart ar EUR 180) a socraíodh de bhun mhír 8, pointí 1 agus 2, a chur i bhfeidhm.

17      Le fógra measúnaithe cánach an 27 Meitheamh 2024, bunaíodh méideanna éagsúla ranníocaíochtaí a cuireadh in áirithe, a bhí iníoctha ag EVN, don tréimhse chéanna sin, agus praghas fabhrach BGN 191 in aghaidh gach MWh leictreachais a tháirgtear á úsáid mar chaidhp. Faoin bhfógra measúnaithe cánach sin, ceanglaítear ar EVN ranníocaíochtaí arna gcur in áirithe de mhéid BGN 1 818 884.99 (thart ar EUR 929 980) agus ús mainneachtana de mhéid BGN 320 462 (thart ar EUR 163 850) a íoc.

18      Rinne EVN agóid i gcoinne an fhógra measúnaithe cánach sin trí mhodhanna riaracháin os comhair an údaráis cánach, ag maíomh, inter alia, go raibh sé contrártha d’Airteagal 6(1) agus d’Airteagal 8(2)(a) de Rialachán 2022/1854. Le cinneadh an 12 Meán Fómhair 2024, dheimhnigh an t‑údarás sin an fógra measúnaithe cánach sin. Thug EVN caingean os comhair Administrativen sad Plovdiv (an Chúirt Riaracháin, Plovdiv, an Bhulgáir), arb í an chúirt a rinne an tarchur í, ag iarraidh go ndéanfaí an cinneadh sin a chur ar ceal.

19      Tugann an chúirt a rinne an tarchur dá haire, sa chéad háit, go dtugann an t‑údarás cánach údar le cur i bhfeidhm chaidhp ar ioncam margaidh, a leagtar síos faoi mhír 8 d’fhorálacha idirthréimhseacha agus críochnaitheacha an Dlí maidir le Cur i bhFeidhm Fhorálacha an Dlí Buiséid 2022, ar an bhforas go gcuirtear Airteagal 6(1) de Rialachán 2022/1854 chun feidhme leis an bhforáil náisiúnta sin. Cuireann sé in iúl freisin go ndéanann an t‑údarás sin léiriú ar an bhforáil dheireanach sin sa chaoi nach leagtar síos ach uasteorainn ar an gcaidhp léi agus, dá bhrí sin, go bhfágtar faoi na Ballstáit caidhp faoi bhun EUR 180 in aghaidh gach MWh a shocrú gan ceanglais Airteagal 8(2) den Rialachán sin a chur san áireamh. Cuireann EVN i gcoinne an léirithe sin.

20      Sonraíonn an chúirt sin, ar an dara dul síos, go dtugtar isteach le mír 8 d’fhorálacha idirthréimhseacha agus críochnaitheacha an Dlí maidir le Cur i bhFeidhm Fhorálacha an Dlí Buiséid, san iarratas a rinne an t‑údarás cánach, luachanna éagsúla do chaidhpeanna ioncaim táirgeoirí leictreachais a tháirgtear ó fhoinsí in‑athnuaite ag brath ar cé acu a bhí nó nach raibh conradh cúitimh le préimheanna ann, an 8 Deireadh Fómhair 2022, a tugadh i gcrích le FSES.

21      I ndáil leis sin, sonraíonn sí, i gcás táirgeoirí nach bhfuil conradh acu nó a bhfuil deireadh tagtha lena gconarthaí cheana féin faoin dáta sin, gurb ionann an chaidhp ioncaim agus BGN 350 in aghaidh gach MWh leictreachais a tháirgtear, i gcomhréir le mír 8 de phointe 1, arna léamh i gcomhar le pointe 2 de agus le cinneadh ó Chomhairle na nAirí. Mar sin féin, i gcomhréir le mír 8, pointe 3, Uimh. 2, le haghaidh na táirgeoirí is páirtithe i gconarthaí cúitimh le préimheanna atá fós ar siúl an 8 Deireadh Fómhair 2022 agus arb é BGN 0 in aghaidh gach MWh méid na préimhe atá dlite faoin gconradh, comhfhreagraíonn an chaidhp ioncaim don phraghas fabhrach a shonraítear sa chonradh ceannaigh leictreachais, arb ionann an ranníocaíocht sannta agus 90% den difríocht dhearfach idir ioncam margaidh ar phraghsanna a ndéantar a chaibidliú go saor don idirbheart lena mbaineann, gan CBL san áireamh, agus an chaidhp arna cinneadh amhlaidh.

22      Ag tabhairt dá haire go n‑íslítear leis an reachtaíocht sin an chaidhp phraghais a tugadh isteach le hAirteagal 6(1) de Rialachán 2022/1854, sonraíonn an chúirt a rinne an tarchur go n‑eascraíonn an cheist an bhfuil an reachtaíocht sin contrártha do phrionsabail na comhréireachta agus an neamh-idirdhealaithe, a mhéid a bhraitheann an chaidhp ar ioncam ó tháirgeadh leictreachais ó fhoinsí in‑athnuaite, a chomhfhreagraíonn don phraghas fabhrach faoin gcomhaontú ceannaigh cumhachta atá tagtha chun deiridh, ar an bhfíoras go bhfuil conradh cúitimh le préimheanna fós reatha an 8 Deireadh Fómhair 2022 ar dá réir, in aon chás, nach bhfuil aon phréimh iníoctha.

23      Sna himthosca sin, chinn Sofiyski rayonen sad (an Chúirt Riaracháin, Sóifia) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:

‘(1)      An bhfuil Airteagal 6(1) de [Rialachán (AE) 2022/1854] le léiriú sa chaoi gurb ionann an caidhp shainordaitheach, arna tabhairt isteach leis an bhforáil sin, ar ioncaim mhargaidh ó tháirgeadh leictreachais ó na foinsí a luaitear in Airteagal 7(1) [de Rialachán 2022/1854], de luach EUR 180 in aghaidh MWh, agus caidhp aonfhoirmeach ar ioncaim mhargaidh ar fud an Aontais, atá le cur i bhfeidhm i ngach Ballstát, agus go bhféadfaidh na Ballstáit bearta breise a choinneáil ar bun nó a thabhairt isteach lena ndéanfaí ioncaim mhargaidh a theorannú a thuilleadh, inter alia, , trí chaidhp níos ísle a shocrú sna cásanna dá dtagraítear le hAirteagal 8(1)(a), agus ceanglais Airteagal 8(2) den Rialachán sin á gcur san áireamh?

(2)      An gcomhlíontar na ceanglais a leagtar síos in Airteagal [8(2)(a) [de Rialachán 2022/1854], go háirithe ceanglais na comhréireachta agus an neamh-idirdhealaithe i bpointe (a), leis an bhforáil a leagtar síos i bpointe 2 de [mhír] 8(3) d’Fhorálacha Idirthréimhseacha agus Críochnaitheacha den [Dlí maidir le Cur i bhFeidhm Fhorálacha an Dlí Buiséid], i gcás ioncaim mhargaidh ó tháirgeadh leictreachais ó na foinsí a liostaítear in Airteagal 7(1) de Rialachán [2022/1854], ag táirgeoirí nach ndearnadh a gconarthaí maidir le híocaíochtaí cúitimh de bhun [mhír] 68(1) i gcomhar le mír [68(9)] [de na Forálacha Idirthréimhseacha agus Críochnaitheacha] den Dlí lena leasaítear agus lena bhforlíontar an Dlí um Fhuinneamh a bhaineann leis an suiteáil ábhartha a fhoirceannadh ón 8 Deireadh Fómhair 2022, ar dá réir a bhfuil an t‑uasleibhéal ioncaim cothrom le leibhéal an phraghais fhabhrach faoin gcomhaontú díola leictreachais de bhun [Airteagal] 31 den [Dlí maidir le Fuinneamh a Tháirgtear ó Fhoinsí In‑athnuaite, sa leagan is infheidhme maidir leis na príomhimeachtaí]? ’

 Inghlacthacht na hiarrata ar réamhrialú

24      Maíonn an t‑údarás cánach go bhfuil an iarraidh ar réamhrialú gan cuspóir ar an bhforas amháin go bhfuil feidhm dhocht ag na rialacha náisiúnta is infheidhme maidir leis na ranníocaíochtaí arna gcur in áirithe dá bhforáiltear le Dlí maidir le Cur i bhFeidhm Fhorálacha an Dlí Buiséid 2022 agus nach féidir léiriú a dhéanamh orthu. Go bunúsach, cuireann sí i gcoinne inghlacthacht na hiarrata seo.

25      Ní mór a mheabhrú gur faoin gcúirt náisiúnta atá sé, seachas faoi na páirtithe sna príomhimeachtaí, ceist a tharchur chuig an gCúirt, de bhun Airteagal 267 CFAE. Os rud é gur don chúirt náisiúnta amháin a thugtar an chumhacht chun na ceisteanna atá le tarchur chuig an gCúirt a chinneadh agus ní féidir leis na páirtithe a n‑ábhar a athrú (breithiúnas an 9 Nollaig 1965, Singer, 44/65, EU:C:1965:122, lch. 1198).

26      Thairis sin, ba cheart a mheabhrú go bhfuil toimhde ábharthachta ag baint leis na ceisteanna maidir le léiriú dhlí an Aontais arna dtarchur ag an gcúirt náisiúnta sa chomhthéacs fíorasach agus reachtach a bhfuil an chúirt sin freagrach as a shainiú, agus nach faoin gCúirt atá sé a chruinneas a chinneadh. Ní fhéadfaidh an Chúirt diúltú rialú a thabhairt ar cheist arna tarchur chun réamhrialú ag cúirt náisiúnta seachas má dhealraíonn sé go follasach nach bhfuil baint ar bith ag an léiriú arna iarraidh ar dhlí an Aontais Eorpaigh le fíorais nó le cuspóir na díospóide sna príomhimeachtaí féin, más fadhb hipitéiseach atá inti nó mura bhfuil an t‑ábhar fíorasach nó dlí is gá ag an gCúirt Bhreithiúnais chun freagra fóinteach a thabhairt ar na ceisteanna a cuireadh uirthi (breithiúnais an 24 Meitheamh 2008, Commune de Mesquer, C‑188/07, EU:C:2008:359, mír 30, agus an 4 Meitheamh 2026, Darashev, C‑312/24, EU:C:2026:449, mír 53 agus an cásdlí dá dtagraítear).

27      Dá bhrí sin, ní féidir leis an bhforas do-ghlacthachta a d’ardaigh an t‑údarás cánach a bheith ina chúis le do-ghlacthacht na hiarrata ar réamhrialú agus, dá bhrí sin, ní mór diúltú dó.

 Breithniú ar na ceisteanna a tharchuirtear le haghaidh réamhrialú

 An chéad cheist

28      De réir cásdlí socair, faoin nós imeachta a leagtar síos in Airteagal 267 CFAE, lena bhforáiltear do chomhar idir na cúirteanna náisiúnta agus an Chúirt Bhreithiúnais, is faoin gCúirt Bhreithiúnais atá sé freagra a thabhairt ar an gcúirt a rinne an tarchur a bheidh úsáideach di agus lena gcuirfear ar a cumas cinneadh a dhéanamh sa díospóid atá roimpi. Fágann sé sin gur faoin gCúirt Bhreithiúnais atá sé, i gcás inarb iomchuí, an cheist a chuirtear faoina bráid a athscríobh. (féach breithiúnais an 17 Iúil 1997, Krüger, C‑334/95, EU:C:1997:378, míreanna 22 agus 23; an 28 Samhain 2000, Roquette Frères, C‑88/99, EU:C:2000:652, mír 18, agus an 21 Bealtaine 2026, Utiledulci, C‑545/24, EU:C:2026:412, mír 16).

29      Sa chás seo, is léir ón ordú tarchuir go ndearnadh an beart lena gcuirtear caidhp le hioncam táirgeoirí leictreachais áirithe, dá bhforáiltear i mír 8 d’fhorálacha idirthréimhseacha agus críochnaitheacha an Dlí maidir le Cur i bhFeidhm Fhorálacha an Dlí Buiséid agus ar eascair an díospóid sna príomhimeachtaí as a chur i bhfeidhm ar EVN, a chur i bhfeidhm, i gcomhréir leis an bhforáil sin, maidir leis an soláthar leictreachais a rinneadh le linn na tréimhse ón 1 Nollaig 2022 go dtí an 30 Meitheamh 2023.

30      Ina theannta sin, de réir fhoclaíocht Airteagal 22(2)(c) de Rialachán 2022/1854, bhí feidhm ag forálacha an Rialacháin sin, a bhfuil léiriú á lorg ag an gcúirt a rinne an tarchur ina céad cheist, ón 1 Nollaig 2022 go dtí an 30 Meitheamh 2023. Thairis sin, chinn an Chúirt cheana féin nach léir ó aon fhoráil den Rialachán sin go bhfuil feidhm ag an Rialachán sin maidir le beart lena gcuirtear caidhp ar ioncaim a bhunaítear leis an reachtaíocht náisiúnta ar feadh tréimhse roimh theacht i bhfeidhm an Rialacháin sin nó, a fortiori, nach mór don reachtaíocht sin na coinníollacha a leagtar síos leis an Rialachán sin a chomhlíonadh (breithiúnas an 18 Nollaig 2025, Electrabel agus páirtithe eile, C‑633/23, EU:C:2025:991, mír 58). I bhfianaise fhoclaíocht aonchiallach Airteagal 22(2)(c), is gá gurb amhlaidh atá i gcás beart caidhpeála ioncaim arna thabhairt isteach le reachtaíocht náisiúnta ar feadh tréimhse tar éis dháta deiridh chur i bhfeidhm na bhforálacha sin.

31      Sna himthosca sin, ní mór an chéad cheist a tharchuirtear a athfhoirmliú agus a mheas go n‑iarrann an chúirt, leis an gceist sin, go bunúsach, an bhfuil Airteagal 6(1) agus Airteagal 8(1)(a) de Rialachán 2022/1854 le léiriú sa chaoi go gcuirtear cosc leo ar Bhallstát caidhp a shocrú, don tréimhse ón 1 Nollaig 2022 go dtí an 30 Meitheamh 2023, ar ioncaim mhargaidh a fhaigheann táirgeoirí leictreachais ó na foinsí dá dtagraítear in Airteagal 7(1) den Rialachán sin, ar leibhéal níos ísle ná an chaidhp EUR 180 in aghaidh gach MWh den leictreachas a tháirgtear dá bhforáiltear sa chéad cheann de na forálacha sin, faoi réir chomhlíonadh na gceanglas a leagtar síos in Airteagal 8(2) den Rialachán sin.

32      I gcomhréir le cásdlí socair, caithfear, agus foráil de dhlí an Aontais á léiriú, machnamh a dhéanamh ní hamháin ar fhoclaíocht na forála sin, ach ar a comhthéacs agus ar chuspóirí na rialacha ar cuid díobh í chomh maith (féach breithiúnais an 17 Samhain 1983, Merck, 292/82, EU:C:1983:335, mír 12, agus an 4 Meitheamh 2026, Landkreis Schweinfurt, C‑621/24, EU:C:2026:450, mír 56).

33      Maidir le foclaíocht na bhforálacha sin, a bhfuil a léiriú á lorg, ní mór a thabhairt faoi deara go bhforáiltear le hAirteagal 6(1) de Rialacháin 2022/1854, maidir leis na hioncaim mhargaidh de chuid táirgeoirí a fhaightear ó ghiniúint leictreachais ó na foinsí dá dtagraítear in Airteagal 7(1) de, go gcuirfear caidhp orthu ar leibhéal uasta EUR 180 in aghaidh gach MWh leictreachais a tháirgtear. Maidir le hAirteagal 8(1)(a) den Rialachán sin, sonraítear leis go bhféadfaidh na Ballstáit bearta a choinneáil ar bun nó a thabhairt isteach lena gcuirtear teorainn bhreise le, inter alia, hioncam margaidh táirgeoirí a ghineann leictreachas ó na foinsí a liostaítear in Airteagal 7(1). Liostaítear in Airteagal 8(2) den Rialachán sin na coinníollacha nach mór a chomhlíonadh leis na bearta dá dtagraítear in Airteagal 8(1).

34      Ní mór a mheas, dá bhrí sin, gur léir ó fhoclaíocht na bhforálacha sin go bhféadfaidh na Ballstáit, i gcomhréir leis na coinníollacha a leagtar amach in Airteagal 8(2) de Rialachán 2022/1854, inter alia, bearta a ghlacadh lena gcuirfear teorainn bhreise leis an ioncam margaidh a fhaigheann na táirgeoirí sin. Thairis sin, níl aon rud san fhoclaíocht sin a thabharfadh le fios nach féidir le beart den sórt sin a bheith i bhfoirm caidhp ar ioncam margaidh a shocraítear ag méid níos ísle ná an méid a leagtar síos in Airteagal 6(1) den Rialachán sin, ar choinníoll go gcomhlíontar na coinníollacha a liostaítear in Airteagal 8(2). Os a choinne sin, ós rud é go gceadaítear le hAirteagal 8(1)(a) den Rialachán sin bearta a ghlacadh ‘lena gcuirtear teorainn bhreise’ le hioncam margaidh na dtáirgeoirí lena mbaineann, leanann sé ón bhfoclaíocht sin go bhféadfar foráil a dhéanamh leis na bearta caidhpeála ioncaim arna nglacadh faoi Airteagal 8(1)(a) do chaidhp atá níos ísle ná an chaidhp dá bhforáiltear in Airteagal 6(1) den Rialachán sin. (féach, chuige sin, breithiúnais an 18 Nollaig 2025, Electrabel agus páirtithe eile, C‑633/23, EU:C:2025:991, míreanna 29 agus 30, agus an 22 Eanáir 2026, Secab, C‑423/23, EU:C:2026:32, mír 42).

35      Tacaítear leis an léiriú litriúil sin le comhthéacs Airteagal 6(1) agus Airteagal 8(1)(a) de Rialachán 2022/1854. Go deimhin, ar thaobh amháin, foráiltear le hAirteagal 8(1)(b)den Rialachán sin go bhféadfaidh na Ballstáit caidhp níos airde ar ioncam margaidh a shocrú do tháirgeoirí a ghineann leictreachas ó na foinsí a liostaítear in Airteagal 7(1) den Rialachán sin ar choinníoll go sáraíonn na hinfheistíochtaí agus na costais oibriúcháin an t‑uasmhéid a shocraítear in Airteagal 6(1) den Rialachán sin. Ar an taobh eile, foráiltear le hAirteagal 8(1)(d) den Rialachán sin go bhféadfaidh na Ballstáit caidhp shonrach a shocrú ar an ioncam margaidh a fhaightear ó dhíol leictreachais a tháirgtear ó antraicít.

36      Deimhnítear leis na heilimintí sin, dá bhrí sin, go n‑áirítear sna bearta a fhéadfaidh na Ballstáit a ghlacadh faoi Airteagal 8(1) de Rialachán 2022/1854 bearta lena gcuirtear caidhp le hioncam margaidh a shocraítear ar leibhéil atá éagsúil leis an leibhéal dá bhforáiltear in Airteagal 6(1) den Rialachán sin.

37      Tacaítear leis an léiriú a glacadh i mír 34 den bhreithiúnas seo freisin leis an gcuspóir a shaothraítear le Rialachán 2022/1854, mar a chuirtear in iúl in Airteagal 1 de, ar dá réir a fhéachtar leis an Rialachán sin, inter alia, le caidhp a thabhairt isteach ar ioncam margaidh a dhíorthaíonn táirgeoirí áirithe ó tháirgeadh leictreachais agus iad a athdháileadh ar chustaiméirí deiridh leictreachais ar bhealach spriocdhírithe, mar a luaitear in aithris 12 den Rialachán sin, chun tomhaltóirí a chosaint, tríd an ráta boilscithe a mhaolú. I ndáil leis sin, sonraítear le haithris 25 den Rialachán sin, i gcás ina bhfuil tomhaltóirí neamhchosanta ar phraghsanna an‑ard a dhéanann dochar do gheilleagar an Aontais freisin, is gá teorainn a chur, ar bhonn sealadach, le hioncam margaidh urghnách táirgeoirí a bhfuil costais imeallacha níos ísle acu tríd an gcaidhp a chur i bhfeidhm ar ioncam margaidh a bhaintear amach trí leictreachas a dhíol laistigh den Aontas. Sa chaoi sin freisin, leagtar amach le haithris 46 de Rialachán 2022/1854 gur cheart do na Ballstáit a áirithiú go gcuirfear an barrachas ioncaim a eascraíonn as cur i bhfeidhm na caidhpe ar ioncam margaidh i réimse an leictreachais ar aghaidh chuig na custaiméirí deiridh leictreachais chun tionchar na bpraghsanna eisceachtúla arda leictreachais a mhaolú.

38      Mura n‑áirítear sna bearta lena gcuirtear teorainn bhreise le hioncam margaidh a d’fhéadfadh na Ballstáit a ghlacadh faoi Airteagal 8(1)(a) de Rialachán 2022/1854 bearta chun ioncam a uasteorannú ar leibhéal atá faoi bhun na caidhpe dá bhforáiltear in Airteagal 6(1) den Rialachán sin, cé gur mheas reachtóir an Aontais, i bprionsabal, go bhfuil beart caidhpeála den sórt sin an‑oiriúnach chun an cuspóir sin a bhaint amach, bhainfí an bonn d’éifeachtacht iomlán an Rialacháin sin. Sna himthosca sin, bhainfí uirlis de na Ballstáit a mheas reachtóir an Aontais, mar sin féin, a bheith an‑oiriúnach chun an cuspóir sin a bhaint amach.

39      Dá bhrí sin, ní chuirtear cosc le hAirteagal 6(1) agus Airteagal 8(1) (a) de Rialachán 2022/1854 ar Bhallstát beart a ghlacadh, faoin dara ceann de na forálacha sin, lena gcuirtear caidhp ar ioncam margaidh táirgeoirí leictreachais ó na foinsí a liostaítear in Airteagal 7(1) den Rialachán sin, a socraítear a mhéid ar leibhéal níos ísle ná an leibhéal dá bhforáiltear sa chéad cheann de na forálacha sin, ar choinníoll go gcomhlíontar na coinníollacha a leagtar amach in Airteagal 8(2) den Rialachán sin.

40      Ina theannta sin, ar an gcéad dul síos, ós rud é go léirítear leis an ordú tarchuir go bhfuil na ranníocaíochtaí sannta atá i gceist sna príomhimeachtaí dlite d’idirbhearta a dhéantar ar an margadh fuinnimh don chothromú, ní mór a thabhairt faoi deara, i gcomhréir le hAirteagal 7(4) de Rialachán 2022/1854, go bhféadfaidh na Ballstáit a chinneadh nach bhfuil feidhm ag an gcaidhp ar ioncam margaidh maidir le hioncam a fhaightear, go háirithe, ó dhíolacháin leictreachais ar an margadh fuinnimh don chothromú. Dá bhrí sin, mura bhfeidhmíonn an Ballstát lena mbaineann an rogha sin, tá feidhm ag an gcaidhp ioncaim dá bhforáiltear le hAirteagal 6(1) den Rialachán sin nó, de réir mar a bheidh, arna cur i bhfeidhm ag Ballstát de bhun Airteagal 8(1)(a) den Rialachán sin, i bprionsabal, maidir leis an ioncam a fhaightear ó dhíol leictreachais a dhéantar ar an margadh sin. Dá bhrí sin, fiú dá ndearbhódh an chúirt a rinne an tarchur an imthoisc sin, ní bheadh aon tionchar aige ar an léiriú a dhéantar i míreanna 33 go 39 den bhreithiúnas seo.

41      Ar an taobh eile, i gcomhréir le hAirteagal 7(2) de Rialachán 2022/1854, ní bheidh feidhm ag an gcaidhp ar ioncam margaidh dá bhforáiltear leis an Rialachán sin maidir le táirgeoirí a bhfuil caidhp cheana, mar thoradh ar bhearta Stáit nó poiblí nár glacadh faoi Airteagal 8 den Rialachán sin, ar a n‑ioncaim in aghaidh gach MWh leictreachais a tháirgtear. Mar sin féin, ní léir ón ordú tarchuir gurb amhlaidh atá sna príomhimeachtaí.

42      I bhfianaise na mbreithnithe uile roimhe seo, ní mór an chéad cheist a fhreagairt sa chaoi go bhfuil Airteagal 6(1) agus Airteagal 8(1)(a) de Rialachán 2022/1854 le léiriú sa chaoi nach gcuirtear cosc leo ar Bhallstát caidhp a shocrú, don tréimhse ón 1 Nollaig 2022 go dtí an 30 Meitheamh 2023, ar ioncaim mhargaidh a fhaigheann táirgeoirí leictreachais ó na foinsí dá dtagraítear in Airteagal 7(1) den Rialachán sin, ar leibhéal níos ísle ná an chaidhp EUR 180 in aghaidh gach MWh den leictreachas a tháirgtear dá bhforáiltear sa chéad cheann de na forálacha sin, faoi réir chomhlíonadh na gceanglas a leagtar síos in Airteagal 8(2) den Rialachán sin.

 An dara ceist

43      Ba cheart a thabhairt faoi deara go n‑iarrtar le foclaíocht litriúil an dara ceist a tharchuir an chúirt a rinne an tarchur ar an gCúirt rialú a thabhairt ar chomhoiriúnacht forála den dlí náisiúnta le dlí an Aontais. I gcomhthéacs an chórais comhair a bunaíodh le hAirteagal 267 CFAE, ní faoin gCúirt atá sé rialú a thabhairt ar chomhoiriúnacht fhorálacha an dlí náisiúnta le forálacha dhlí an Aontais, agus mar thoradh air sin ní féidir leis an gCúirt freagra a thabhairt ar an gceist sin, mar a ceapadh í. Os a choinne sin, tá an Chúirt inniúil chun na heilimintí léirithe ar fad faoi dhlí an Aontais a sholáthar don chúirt náisiúnta lena gceadaítear di measúnú a dhéanamh ar chomhréireacht rialacha an dlí inmheánaigh le reachtaíocht an Aontais (féach, chuige sin, breithiúnais an 6 Márta 2007, Placanica agus páirtithe eile, C‑338/04, C‑359/04 agus C‑360/04, EU:C:2007:133, míreanna 36 agus 37 agus an cásdlí dá dtagraítear, agus an 12 Márta 2026, Zirvatta, C‑597/24, EU:C:2026:198, mír 37).

44      Mar sin féin, leanann sé ó Airteagal 94 de Rialacha Nós Imeachta na Cúirte Breithiúnais agus ó chásdlí socair, d’fhonn léiriú ar dhlí an Aontais a bhaint amach a bheidh úsáideach don chúirt náisiúnta, nach mór, ar an gcéad dul síos, achoimre ar ábhar na díospóide sna príomhimeachtaí a bheith san iarraidh ar réamhrialú, chomh maith leis na fíorais ábhartha, mar a chinn an chúirt a rinne an tarchur, nó, ar a laghad, cuntas ar na fíorais ar a bhfuil na ceisteanna bunaithe. Ní mór go gcumhdófaí leis, ar an dara dul síos, ábhar na bhforálacha náisiúnta a bhféadfadh feidhm a bheith acu sna príomhimeachtaí agus, más infheidhme, an cásdlí náisiúnta ábhartha. Ar an tríú dul síos, ní mór don chúirt a rinne an tarchur na cúiseanna a thug uirthi fiosrú a dhéanamh maidir le léiriú nó bailíocht forálacha áirithe de dhlí an Aontais, agus an gaol a bhunaíonn sí idir na forálacha sin agus an reachtaíocht náisiúnta is infheidhme maidir leis an díospóid sna príomhimeachtaí a leagan amach (féach Ordú Uachtarán na Cúirte an 12 Meitheamh 2014, Municipiul Piatra Neamț, C‑13/14, EU:C:2014:2000, mír 10 agus an cásdlí dá dtagraítear, agus breithiúnas an 4 Meitheamh 2026, Darashev, C‑312/24, EU:C:2026:449, mír 56).

45      Sa chás seo, is fíor gur leag an chúirt a rinne an tarchur amach ábhar na bhforálacha náisiúnta is infheidhme maidir leis an díospóid sna príomhimeachtaí agus achoimre ar ábhar na díospóide sin. Mar sin féin, mar a thug an Coimisiún Eorpach dá aire freisin, ní thugtar aon mhíniú san iarraidh ar réamhrialú ar na cúiseanna leis an gcóir éagsúil a chuirtear ar tháirgeoirí leictreachais a bhí faoi réir na caidhpe ioncaim atá i gceist sna príomhimeachtaí ag brath ar cé acu a bhí nó nach raibh siad faoi cheangal, an 8 Deireadh Fómhair 2022, ag conradh cúitimh le préimheanna. Go háirithe, ní mhíníonn an chúirt a rinne an tarchur conas a d’fhéadfaí nó nach bhféadfaí idirdhealú a dhéanamh idir staid na dtáirgeoirí sin, a bhí faoi cheangal ag conradh den sórt sin ar an dáta sin, agus iad siúd nach raibh. Ní leagtar amach ann ach oiread na cuspóirí a d’fhéadfadh a bheith á saothrú ag an reachtóir náisiúnta agus an t‑idirdhealú sin á dhéanamh aige, ná na cúiseanna a bhfuil amhras ann maidir le léiriú Airteagal 8(2)(a) de Rialachán 2022/1854, ná an gaol a bhunaítear leis idir an fhoráil sin agus an reachtaíocht náisiúnta is infheidhme maidir leis an díospóid sna príomhimeachtaí.

46      Dá bhrí sin, fiú dá measfaí, lena dara ceist, go n‑iarrann an chúirt a rinne an tarchur, go bunúsach, an bhfuil Airteagal 8(2)(a) de Rialachán 2022/1854 le léiriú sa chaoi go gcuirtear cosc leis ar reachtaíocht náisiúnta amhail an reachtaíocht a thuairiscítear i bhfoclaíocht an dara ceist sin, ní mór a mheas nach bhfuil an fhaisnéis is gá ag an gCúirt chun freagra úsáideach a thabhairt uirthi.

47      Dá thoradh sin, ní mór a dhearbhú go bhfuil an dara ceist do-ghlactha.

 Costais

48      Os rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe.

Ar na forais sin, rialaíonn an Chúirt (an Naoú Dlísheomra) mar seo a leanas:

Maidir le hAirteagal 6(1) agus Airteagal 8(1)(a) de Rialachán (AE) 2022/1854 ón gComhairle an 6 Deireadh Fómhair 2022 maidir le hidirghabháil éigeandála chun aghaidh a thabhairt ar phraghsanna arda fuinnimh,

ní mór léiriú a dhéanamh mar seo a leanas:

ní chuirtear cosc leo ar Bhallstát caidhp a shocrú, don tréimhse ón 1 Nollaig 2022 go dtí an 30 Meitheamh 2023, ar ioncaim mhargaidh a fhaigheann táirgeoirí leictreachais ó na foinsí dá dtagraítear in Airteagal 7(1) den Rialachán sin, ar leibhéal níos ísle ná an chaidhp EUR 180 in aghaidh na huaire meigeavata (MWh) den leictreachas a tháirgtear dá bhforáiltear sa chéad cheann de na forálacha sin, faoi réir chomhlíonadh na gceanglas a leagtar síos in Airteagal 8(2) den Rialachán sin.

Sínithe


*      Teanga an cháis: an Bhulgáiris.