(1)

D’aontaigh an tAontas don Choinbhinsiún maidir le hIompar Idirnáisiúnta d’Iarnród an 9 Bealtaine 1980, arna leasú le Prótacal Vilnias an 3 Meitheamh 1999 (‘COTIF’), de bhun Chinneadh 2013/103/AE ón gComhairle (1) agus leis an gComhaontú idir an tAontas Eorpach agus an Eagraíocht Idir-rialtasach um Iompar Idirnáisiúnta d’Iarnród (OTIF) maidir le hAontachas an Aontais Eorpaigh leis an gCoinbhinsiún (‘an Comhaontú maidir le hAontachas leis an gCoinbhinsiún’).

(2)

Cuireadh Comhthionól Ginearálta OTIF ar bun i gcomhréir le hAirteagal 13 mír 1, litir a) de COTIF (‘an Comhthionól Ginearálta’). De bhun Airteagal 14, mír 2, de COTIF, bunaíonn an Comhthionól Ginearálta, i measc nithe eile, a rialacha nós imeachta, toghann sé an tArdrúnaí, cinneann sé, más gá, coistí eile a bhunú go sealadach le haghaidh cúraimí sonracha, agus déanann sé cinntí maidir le tograí arb é is aidhm dóibh COTIF a mhodhnú.

(3)

Bíonn an tAontas rannpháirteach sa Chomhthionól Ginearálta i gcomhréir le COTIF, Rialacha Nós Imeachta an Chomhthionóil Ghinearálta, agus an Comhaontú maidir le hAontachas leis an gCoinbhinsiún.

(4)

Ag an 16ú seisiún dá chuid atá le bheith ar siúl ón 25 go dtí an 26 Meán Fómhair 2024, meastar go ndéanfaidh an Comhthionól Ginearálta roinnt cinntí. Is iomchuí an seasamh atá le glacadh thar ceann an Aontais a bhunú, ós rud é go mbeidh tionchar ag na cinntí sin ar fheidhmiú OTIF agus ar fhorbairt straitéis na heagraíochta, nó go nglacfar gníomhartha mar thoradh orthu atá ceangailteach faoin dlí idirnáisiúnta agus a d’fhéadfadh tionchar cinntitheach a imirt ar ábhar reachtaíocht an Aontais, agus, dá bhrí sin, is ‘gníomh a bhfuil éifeachtaí dlíthiúla leis’ iad chun críocha Airteagal 218(9) CFAE.

(5)

Go háirithe, faoi mhír 5 ar an gclár oibre, meastar go ndéanfaidh an 16ú seisiún den Chomhthionól Ginearálta cinneadh maidir le hiarratas Dhaon-Phoblacht na Síne (dá ngairtear ‘an tSín’ anseo feasta) a bheith ina Comhalta Comhlach de OTIF. Go deimhin, i gcomhréir le hAirteagal 37, míreanna 2 go 5, de COTIF, rinne an Coimisiún agóid i gcoinne an iarratais sin thar ceann an Aontais, agus bhí an líon vótaí cothrom le líon vótaí a chomhaltaí ar Ballstáit OTIF iad freisin. Dá bhrí sin, mar a d’fhógair Ardrúnaí OTIF sa togra uaidh an 28 Lúnasa 2024, cuirfear iarratas na Síne faoi bhráid an 16ú Comhthionól Ginearálta le haghaidh cinnidh, i gcomhréir le hAirteagal 37, mír 4, de COTIF. An 19 Lúnasa 2024, mar fhreagairt ar agóid a chuir an Coimisiún isteach thar ceann an Aontais agus a Bhallstát atá ina mBallstáit OTIF freisin, thug roinn caidrimh sheachtraigh Riarachán Náisiúnta Iarnróid na Síne mínithe breise agus údar lena hiarraidh ar bhallraíocht chomhlachaithe OTIF. Bheadh gá le heilimintí breise faisnéise, áfach, chun seasamh an Aontais a fhoirmliú. Dá bhrí sin, ag an 16ú Comhthionól Ginearálta, ba cheart gurb é seasamh an Aontais an cinneadh maidir le hiarratas na Síne ar aontachas mar Chomhalta Comhlach de OTIF a chur siar go dtí seisiún ina dhiaidh sin de Chomhthionól Ginearálta OTIF, agus treoir a thabhairt d’Ardrúnaí OTIF comhairliúcháin a eagrú le páirtithe leasmhara maidir le hiarratas na Síne.

(6)

Faoi mhír 7 ar an gclár oibre, d’fhéadfadh glacadh na straitéise fadtéarmaí le haghaidh OTIF tionchar a imirt ar bheartas agus ar obair shubstainteach OTIF, agus ar an gcinnteoireacht laistigh de OTIF. Pléadh agus comhaontaíodh an straitéis fhadtéarmach athbhreithnithe atá beartaithe mar a cuireadh faoi bhráid an Chomhthionóil Ghinearálta í ag seisiúin ábhartha an Choiste ad hoc um Ghnóthaí Dlíthiúla agus um Chomhar Idirnáisiúnta (dá ngairtear ‘an Coiste ad hoc’ anseo feasta), i gcomhréir le seasaimh an Aontais a bunaíodh maidir leis na hábhair sin. Dá bhrí sin, ba cheart gurb é seasamh an Aontais tacú le glacadh na straitéise fadtéarmaí athbhreithnithe sin.

(7)

Faoi mhír 13 ar an gclár oibre, iarrfar ar an gComhthionól Ginearálta na ‘Treoirlínte maidir le cur i bhfeidhm nósanna imeachta chun COTIF a mhodhnú’ a fhormhuiniú, a mholadh go ndéanfar na treoirlínte sin a leanúint agus modhnuithe ar COTIF á n-ullmhú faoi inniúlacht an Chomhthionóil Ghinearálta, agus treoir a thabhairt don Choiste ad hoc faireachán agus measúnú a dhéanamh ar chur i bhfeidhm na dtreoirlínte agus athbhreithniú a dhéanamh orthu de réir mar is gá. Cé nach bhfuil na Treoirlínte sin ceangailteach iontu féin, tá siad in ann tionchar cinntitheach a imirt ar na nósanna imeachta chun COTIF a mhodhnú. Pléadh agus comhaontaíodh na Treoirlínte mar a cuireadh faoi bhráid an Chomhthionóil Ghinearálta iad ag seisiúin ábhartha an Choiste ad hoc, i gcomhréir le seasaimh an Aontais a bunaíodh maidir leis na hábhair sin. Dá bhrí sin, ba cheart gurb é seasamh an Aontais na Treoirlínte sin a fhormhuiniú.

(8)

Faoi mhír 13 ar an gclár oibre, iarrfar ar an gComhthionól Ginearálta na bunphrionsabail rialála a fhormheas, mar a leagtar amach i dtuarascáil an Choiste ad hoc agus mar léiriú ar sheasamh an Aontais a leagtar amach i gCinneadh (AE) 2023/2582 ón gComhairle (2), chun treoir a thabhairt don Choiste ad hoc agus don Choiste Athbhreithnithe maidir le modhnuithe a ullmhú chun COTIF agus nótaí comhfhreagracha sa Tuarascáil Mhíniúcháin ar COTIF a mhodhnú, agus é d’aidhm aige sin oibleagáid a thabhairt isteach ar na Ballstáit de OTIF sláine fhisiceach agus fheidhmiúil bhonneagar iarnróid na mBallstát de OTIF eile a urramú (gan dochar a dhéanamh di), chomh maith le forálacha substainteacha agus nós imeachta maidir le smachtbhannaí chun comhlíonadh na n-oibleagáidí faoi COTIF a áirithiú, ar oibleagáidí iad atá fíor-riachtanach chun aidhm OTIF a bhaint amach. Baineann na bunphrionsabail rialála sin le heagrú agus le feidhmiú na heagraíochta ar Páirtí Conarthach é an tAontas inti, agus d’fhéadfadh sé go n-eascródh as sin tograí chun COTIF a leasú; baineann an tsaincheist reatha seo le raon feidhme iomlán ghníomhaíochtaí OTIF, lena n-áirítear réimsí a bhfuil inniúlacht eisiach ag an Aontas ina leith a mhéid a bhaineann le Ballstáit an Aontais. Beidh na tograí gaolmhara chun COTIF a mhodhnú ceangailteach faoin dlí idirnáisiúnta agus beidh siad in ann tionchar cinntitheach a imirt ar ábhar reachtaíocht an Aontais agus ar léirmhíniú agus cur i bhfeidhm COTIF. Pléadh agus comhaontaíodh na bunphrionsabail rialála mar a cuireadh faoi bhráid an Chomhthionóil Ghinearálta iad ag seisiúin ábhartha an Choiste ad hoc, i gcomhréir le seasaimh an Aontais a bunaíodh maidir leis na hábhair sin. Dá bhrí sin, ba cheart gurb é seasamh an Aontais na bunphrionsabail rialála sin a fhormheas.

(9)

Faoi mhír 13 ar an gclár oibre, iarrfar ar an gComhthionól Ginearálta an ‘Moladh maidir le sínithe leictreonacha a úsáid i gcumarsáid oifigiúil idir OTIF agus a chomhaltaí’ a fhormhuiniú. Mar a shonraítear i seasamh an Aontais de bhun Chinneadh (AE) 2023/2582 ón gComhairle, chun cumarsáid leictreonach a fhorbairt, is gá nuashonruithe áirithe riaracháin a dhéanamh chun a áirithiú go n-úsáidfear sínithe leictreonacha go sábháilte agus go hiontaofa i gcumarsáid oifigiúil idir OTIF agus a chomhaltaí. Tá sé tábhachtach tacú le moladh a ullmhú i ndáil leis sin, moladh ina gcuirtear san áireamh na leibhéil éagsúla taithí atá ag comhaltaí OTIF agus atá i gcomhréir leis na rialacha a leagtar síos ar leibhéal an Aontais, go háirithe Rialachán (AE) Uimh. 910/2014 ó Pharlaimint na hEorpa agus ón gComhairle. (3) Cé nach bhfuil an Moladh seo ceangailteach ann féin, beidh impleachtaí aige do na ‘Treoirlínte maidir le gníomhartha conartha faoi COTIF’ agus do na nótaí míniúcháin a ghabhann le ‘Rialacha Nós Imeachta an Chomhthionóil Ghinearálta’, don ‘Rialachán maidir le toghadh agus coinníollacha seirbhíse an Ardrúnaí’ agus don ‘Cinneadh maidir le buanionadaithe’, ar gá iad go léir a leasú dá réir. Dá bhrí sin, d’fhéadfadh an Moladh seo tionchar cinntitheach a imirt ar na nósanna imeachta chun COTIF a mhodhnú. Pléadh agus comhaontaíodh na tograí le haghaidh cinnidh mar a cuireadh faoi bhráid an Chomhthionóil Ghinearálta iad ag seisiúin ábhartha an Choiste ad hoc, i gcomhréir le seasaimh an Aontais a bunaíodh maidir leis na hábhair sin. Dá bhrí sin, ba cheart gurb é seasamh an Aontais an moladh a fhormhuiniú.

(10)

Faoi mhír 13 ar an gclár oibre, iarrfar ar an gComhthionól Ginearálta an ‘Cinneadh maidir le siombailí, ainm agus giorrúchán na hEagraíochta Idir-rialtasaí um Iompar Idirnáisiúnta d’Iarnród’ agus an ‘Cinneadh maidir le cóipcheart agus rochtain oscailte’ a ghlacadh, agus na ‘Nótaí Míniúcháin’ gaolmhara a fhormheas le haghaidh gach cinnidh. Mar a shonraítear i seasamh an Aontais de bhun Chinneadh (AE) 2023/2582 ón gComhairle, beartas a dheartar chun athúsáid faisnéise agus doiciméad ar le OTIF iad a éascú, ba cheart é a dhearadh i gcomhréir leis na rialacha a leagtar amach i dTreoir (AE) 2019/1024 ó Pharlaimint na hEorpa agus ón gComhairle (4) agus i gCinneadh 2011/833/AE ón gCoimisiún (5). Dá bhrí sin, d’fhéadfadh na gníomhartha atá beartaithe sa réimse sin tionchar cinntitheach a imirt ar ábhar reachtaíocht an Aontais. Pléadh agus comhaontaíodh na tograí le haghaidh cinnidh mar a cuireadh faoi bhráid an Chomhthionóil Ghinearálta iad ag seisiúin ábhartha an Choiste ad hoc, i gcomhréir le seasaimh an Aontais a bunaíodh maidir leis na hábhair sin. Dá bhrí sin, ba cheart gurb é seasamh an Aontais na Cinntí sin a ghlacadh agus na Nótaí Míniúcháin gaolmhara a fhormheas.

(11)

Faoi mhíreanna 14 agus 15 ar an gclár oibre, baineann na cinntí atá beartaithe ag an gComhthionól Ginearálta le glacadh leaganacha athbhreithnithe, faoi seach, dá Rialacha Nós Imeachta agus den Rialachán maidir le toghadh agus coinníollacha seirbhíse an Ardrúnaí, agus maidir le formheas na Nótaí Míniúcháin a bhaineann leis na gníomhartha sin, agus iad uile oiriúnaithe i gcomhréir leis na treoirlínte nua maidir le teanga inscne-neodrach a úsáid. Ionchorpraítear freisin sna nótaí míniúcháin sin an togra ón gCoiste ad hoc a rinneadh sa ‘Moladh maidir le sínithe leictreonacha a úsáid i gcumarsáid oifigiúil idir OTIF agus a chomhaltaí’. Is gníomhartha atá ceangailteach ó thaobh dlí iad Rialacha Nós Imeachta an Chomhthionóil Ghinearálta agus an Rialachán maidir le toghadh agus coinníollacha seirbhíse an Ardrúnaí faoi COTIF, agus d’fhéadfadh a nótaí míniúcháin tionchar cinntitheach a imirt ar léirmhíniú agus ar chur i bhfeidhm COTIF. Rinneadh na leaganacha athbhreithnithe de Rialacha Nós Imeachta an Chomhthionóil Ghinearálta agus den Rialachán maidir le toghadh agus coinníollacha seirbhíse an Ardrúnaí, agus na Nótaí Míniúcháin gaolmhara, a phlé agus a chomhaontú i seisiúin ábhartha an Choiste ad hoc, i gcomhréir le seasaimh an Aontais a bunaíodh maidir leis na hábhair sin. Dá bhrí sin, ba cheart don Aontas tacú le glacadh na leasuithe sin.

(12)

Tá na cinntí atá molta i gcomhréir le dlí agus cuspóirí straitéiseacha an Aontais, agus ba cheart don Aontas tacú leo dá réir.

(13)

I gcomhréir le hIarscríbhinn III a ghabhann le Cinneadh 2013/103/AE, cuirtear comhordú ar an láthair san áireamh agus cruinnithe OTIF á n-ullmhú. Féadfar mionathruithe ar an seasamh seo ón Aontas a aontú le linn an chomhordaithe ar an láthair gan gá le cinneadh breise ón gComhairle, go háirithe chun go mbeifear in ann freagairt ar thograí agus ar fhorbairtí nár cuireadh san áireamh tráth an Chinnidh seo,