(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear ar liosta an Aontais a chur ar an margadh laistigh den Aontas. Is bia núíosach é bia traidisiúnta ó thríú tír faoi mar a shainmhínítear in Airteagal 3(2)(c) de Rialachán (AE) 2015/2283.

(2)

Le Rialachán Cur Chun Feidhme (AE) 2017/2468 ón gCoimisiún (2) leagtar síos ceanglais riaracháin agus eolaíoch maidir le bianna traidisiúnta ó thríú tíortha.

(3)

De bhun Airteagal 8 de Rialachán (AE) 2015/2283, glacadh Rialachán Cur Chun Feidhme (AE) 2017/2470 ón gCoimisiún (3) lena mbunaítear liosta an Aontais de bhianna núíosacha údaraithe.

(4)

An 7 Meán Fómhar 2020, chuir an chuideachta GreenOnyx Ltd. (“an t-iarratasóir”) fógra faoi bhráid an Choimisiúin go raibh rún aici plandaí úra Wolffia arrhiza agus Wolffia globosa a chur ar mhargadh an Aontais mar bhia traidisiúnta ó thríú tír i gcomhréir le hAirteagal 14 de Rialachán (AE) 2015/2283. D’iarr an t-iarratasóir go n-úsáidfeadh an pobal i gcoitinne plandaí úra Wolffia arrhiza agus Wolffia globosa sa riocht sin.

(5)

De bhun Airteagal 7(2) de Rialachán Cur Chun Feidhme (AE) 2017/2468, d’iarr an Coimisiún faisnéis bhreise ar an iarratasóir maidir leis na ceanglais a bhain le bailíocht an fhógra. An fhaisnéis a iarradh, cuireadh an fhaisnéis sin isteach an 16 Deireadh Fómhair 2020.

(6)

Léiríonn na sonraí a chuir an t-iarratasóir i láthair go bhfuil stair úsáid an bhia shláin ag plandaí úra Wolffia arrhiza agus/nó Wolffia globosa san Áise Thoir Theas, go háirithe i Laos, i Maenmar/Burma agus sa Téalainn.

(7)

De bhun Airteagal 15(1) de Rialachán (AE) 2015/2283, an 20 Eanáir 2021, chuir an Coimisiún an fógra bailí ar aghaidh chuig na Ballstáit agus chuig an Údarás Eorpach um Shábháilteacht Bia (“an tÚdarás”).

(8)

Maidir le plandaí úra Wolffia arrhiza agus Wolffia globosa a chur ar an margadh laistigh den Aontas, níor cuireadh aon agóidí cuí-réasúnaithe i dtaobh sábháilteachta faoi bhráid an Choimisiúin ó na Ballstáit nó ón Údarás laistigh den tréimhse 4 mhí a leagtar síos in Airteagal 15(2) de Rialachán (AE) 2015/2283.

(9)

An 30 Meitheamh 2021, d’fhoilsigh an tÚdarás a ‘Technical Report on the notification of fresh plants of Wolffia arrhiza and Wolffia globosa as a traditional food from a third country pursuant to Article 14 of Regulation (EU) 2015/2283’ (“Tuarascáil Theicniúil maidir le fógra a thabhairt i leith plandaí úra Wolffia arrhiza agus Wolffia globosa mar bhia traidisiúnta ó thríú tír de bhun Airteagal 14 de Rialachán (AE) 2015/2283”] (4). Chinn an tÚdarás nach bhfuil ábhar imní sábháilteachta sna sonraí atá ar fáil maidir le comhdhéanamh agus stair úsáide phlandaí úra Wolffia arrhiza agus Wolffia globosa ná sna sonraí a cuireadh ar fáil maidir leis an mbia traidisiúnta a shaothraítear faoi dhálaí na feirmeoireachta ingearaí de réir mar a thuairiscítear san fhógra iad.

(10)

Sa tuarascáil sin, thug an tÚdarás dá aire go bhfuil tionchar láidir ag dálaí comhshaoil na n-uiscí ina bhfástar plandaí Wolffia arrhiza agus Wolffia globosa ar shábháilteacht na bplandaí úra sin. Dá bhrí sin, ní féidir a chur as an áireamh go bhféadfadh miotail throma agus micricistíní a bheith sna plandaí úra sin. Ina theannta sin, na leibhéil áirithe riandúl atá sna plandaí, amhail copar, molaibdéineam, sinc, bórón agus mangainéis, a d’fhéadfadh a bheith iontu de bharr úsáid leasachán i saothrú plandaí úra Wolffia arrhiza agus Wolffia globosa, d’fhéadfadh na riandúile sin a bheith ina n-ábhar imní sábháilteachta ó thaobh sláinte an duine de. Is iomchuí, dá bhrí sin, uasleibhéil a bhunú maidir le miotail throma, micricistíní, copar, molaibdéineam, sinc, bórón agus mangainéis i sonraíochtaí an bhia thraidisiúnta sin i liosta an Aontais de bhianna núíosacha údaraithe.

(11)

Dá bhrí sin, ba cheart don Choimisiún údarú a thabhairt chun plandaí úra Wolffia arrhiza agus/nó Wolffia globosa a chur ar an margadh laistigh den Aontas sa riocht sin, agus liosta an Aontais de bhianna núíosacha údaraithe a nuashonrú dá réir sin.

(12)

Dá bhrí sin, ba cheart Rialachán Cur Chun Feidhme (AE) 2017/2470 a leasú dá réir sin,