(1)

L-Artikolu 12(4) tar-Regolament (UE) 2019/787 jistabbilixxi regoli dwar kif jidhru l-allużjonijiet għall-isem ġuridiku ta’ kategoriji ta’ xorb spirituż jew ta’ Indikazzjonijiet Ġeografiċi ta’ xorb spirituż fil-preżentazzjoni u fit-tikkettar ta’ xorb alkoħoliku.

(2)

L-Artikolu 12(4) tar-Regolament (UE) 2019/787 ma jirrikjedix li l-isem tax-xarba alkoħolika li tirriżulta jidher fl-istess kamp viżiv tal-allużjoni. Fejn l-isem tax-xarba alkoħolika jidher f’kamp viżiv differenti mill-allużjoni, il-konsumaturi jistgħu madankollu jaslu biex jemmnu li l-allużjoni hija parti mill-isem tax-xarba alkoħolika, partikolarment fil-każijiet fejn ix-xarba alkoħolika li tirriżulta tkun xarba spirituża.

(3)

Barra minn hekk, f’ċerti każijiet, din l-allużjoni tista’ tapprofitta bla bżonn mir-reputazzjoni ta’ kategoriji ta’ xorb spirituż jew ta’ Indikazzjonijiet Ġeografiċi, li, meta kkombinati ma’ oġġetti tal-ikel oħra li mhumiex meħtieġa jew permessi fil-produzzjoni tagħhom, jitilfu n-natura tagħhom u ma jkunux jistgħu jibqgħu jiġu ttikkettati bħala tali. Għaldaqstant, il-wiri ta’ dawk l-ismijiet b’mod prominenti fil-preżentazzjoni u fit-tikkettar tax-xarba spirituża li tagħmel allużjoni għalihom, jista’ jirriżulta effettivament f’miżapproprjazzjoni tar-reputazzjoni tagħhom.

(4)

L-Artikolu 7(1), il-punt (a) tar-Regolament (UE) Nru 1169/2011 tal-Parlament Ewropew u tal-Kunsill (2) jirrikjedi li l-informazzjoni dwar l-ikel m’għandhiex tiżgwida, partikolarment fin-natura u l-identità tal-ikel. L-Artikolu 9 ta’ dak ir-Regolament jipprevedi li l-informazzjoni obbligatorja dwar l-ikel, inkluż l-isem tal-oġġett tal-ikel, għandha tiġi pprovduta u l-Artikolu 13 ta’ dak ir-Regolament jirrikjedi li l-informazzjoni obbligatorja tiġi mmarkata f’post li jidher b’tali mod li tkun tidher faċilment, tinqara sew u, fejn adegwat, ma titħassarx.

(5)

F’konformità mal-Artikolu 9 tar-Regolament (UE) 2019/787, ir-rekwiżiti tal-preżentazzjoni u t-tikkettar stabbiliti fir-Regolament (UE) Nru 1169/2011 japplikaw għax-xorb alkoħoliku li jirriżulta mill-kombinazzjoni ta’ xorb spirituż ma’ oġġetti tal-ikel oħra. Sabiex jiġi żgurat li dawk ir-rekwiżiti jiġu ssodisfati bl-aħjar mod, partikolarment għax-xorb spirituż li jagħmel allużjoni għal xorb spirituż ieħor, huwa xieraq li jkun rikjest li l-isem ġuridiku tax-xorb spirituż li jirriżulta, jidher fl-istess kamp viżiv tal-allużjoni ta’ xorb spirituż. Jenħtieġ li dan isir kull darba li l-allużjoni tiġi indikata fid-deskrizzjoni, fil-preżentazzjoni jew fit-tikkettar ta’ xarba spirituża. Dan jevita prattiki li jiżgwidaw u jiġi żgurat li l-konsumaturi jkunu infurmati kif xieraq rigward in-natura attwali tax-xarba spirituża li tirriżulta mill-kombinazzjoni ta’ xorb spirituż ma’ oġġetti tal-ikel oħra.

(6)

Għaldaqstant, jenħtieġ li r-Regolament (UE) 2019/787 jiġi emendat kif xieraq.

(7)

Jenħtieġ li jiġi previst perjodu tranżitorju għall-applikazzjoni tad-dispożizzjonijiet dwar it-tikkettar stabbiliti f’dan ir-Regolament biex jippermetti lix-xorb spirituż ittikkettat qabel il-31 ta’ Diċembru 2022 f’konformità mad-dispożizzjonijiet tar-Regolament (KE) Nru 110/2008 tal-Parlament Ewropew u tal-Kunsill (3) jibqa’ jitqiegħed fis-suq mingħajr il-ħtieġa li jiġi ttikkettat mill-ġdid.

(8)

F’konformità mal-Artikolu 51(3) tar-Regolament (UE) 2019/787 u sabiex jiġi evitat kwalunkwe tip ta’ vojt regolatorju, jenħtieġ li dan ir-Regolament jibda japplika retroattivament mill-25 ta’ Mejju 2021,