(1)

Skont l-Artikolu 65(4) tar-Regolament (KE) Nru 726/2004, il-mandat tal-membri tal-Bord Amministrattiv tal-Aġenzija Ewropea għall-Mediċini (“Bord Amministrattiv”) attwalment fil-kariga ser jiskadi fl-14 ta' Ġunju 2025. Il-membri tal-Bord Amministrattiv li l-mandat tagħhom jibda fil-15 ta' Ġunju 2025 għandhom jinħatru f'konformità mal-proċedura għan-nomina u l-ħatra stabbilita fir-Regolament (KE) Nru 726/2004.

(2)

L-Artikolu 65(1), it-tieni subparagrafu, tar-Regolament (KE) Nru 726/2004 jirrikjedi li l-Bord Amministrattiv jinkludi wkoll żewġ rappreżentanti ta' organizzazzjonijiet tal-pazjenti, rappreżentant ta' organizzazzjonijiet tat-tobba u rappreżentant ta' organizzazzjonijiet tal-veterinarji. Dawk il-membri għandhom jinħatru mill-Kunsill f'konsultazzjoni mal-Parlament Ewropew abbażi ta' lista mfassla mill-Kummissjoni li b'mod sensibbli tinkludi aktar ismijiet minn kemm hemm karigi li għandhom jimtlew. Il-mandat tagħhom għandu jkun ta' tliet snin u jista' jiġġedded.

(3)

Il-Kummissjoni fasslet lista ta' kandidati u ppreżentata lill-Kunsill fil-5 ta' Frar 2025. Wara sejħa għal espressjonijiet ta’ interess, il-kandidati inklużi f’dik il-lista ntgħażlu abbażi tal-kwalifiki speċjalizzati tagħhom, il-firxa wiesgħa ta' għarfien espert rilevanti tagħhom kif ukoll l-għarfien espert rilevanti tagħhom fit-tmexxija, u l-esperjenza tagħhom fil-qasam tal-prodotti mediċinali għall-użu mill-bniedem jew veterinarju.

(4)

Il-lista ppreżentata mill-Kummissjoni ġiet eżaminata bil-ħsieb li jinħatru l-erba' membri tal-Bord Amministrattiv li jirrappreżentaw is-soċjetà ċivili abbażi tad-dokumentazzjoni pprovduta mill-Kummissjoni u fid-dawl tal-fehmiet espressi mill-Parlament Ewropew. Il-ħatra ta' dawk il-membri permezz ta' din id-Deċiżjoni tiggarantixxi li fi ħdan il-Bord Amministrattiv ikunu disponibbli l-ogħla livelli ta' kwalifiki speċjalizzati, firxa wiesgħa ta' għarfien espert rilevanti u l-aktar firxa ġeografika wiesgħa possibbli fl-Unjoni, kif ukoll għarfien espert rilevanti fit-tmexxija u l-esperjenza fil-qasam tal-prodotti mediċinali għall-użu mill-bniedem jew veterinarju,