(1)

De bhun Airteagal 65(4) de Rialachán (CE) Uimh. 726/2004, rachaidh téarma oifige chomhaltaí Bhord Bainistíochta na Gníomhaireachta Leigheasra Eorpaí (‘an Bord Bainistíochta’) atá i seilbh oifige faoi láthair in éag an 14 Meitheamh 2025. Tá na comhaltaí den Bhord Bainistíochta a bhfuil a dtéarma oifige le tosú an 15 Meitheamh 2025 le ceapadh i gcomhréir leis an nós imeachta chun comhaltaí a ainmniú agus a cheapadh a leagadh síos i Rialachán (CE) Uimh. 726/2004.

(2)

Ceanglaítear le hAirteagal 65(1), an dara fomhír, de Rialachán (CE) Uimh. 726/2004 go n-áireofar ar an mBord Bainistíochta beirt ionadaithe ó eagraíochtaí othar, ionadaí amháin ó eagraíochtaí dochtúirí agus ionadaí amháin ó eagraíochtaí tréidlianna. Tá an Chomhairle leis na comhaltaí sin a cheapadh i gcomhairle le Parlaimint na hEorpa ar bhonn liosta arna tharraingt suas ag an gCoimisiún ar a bhfuil i bhfad níos mó ainmneacha ná mar atá poist le líonadh. Téarma oifige 3 bliana a bheidh acu agus is féidir é a athnuachan.

(3)

Dhréachtaigh an Coimisiún liosta iarrthóirí agus chuir sé faoi bhráid na Comhairle é an 5 Feabhra 2025. Tar éis glao ar léirithe spéise, roghnaíodh na hiarrthóirí atá ar an liosta sin ar bhonn a saincháilíochtaí, an réimse leathan saineolais ábhartha atá acu chomh maith leis an saineolas ábhartha atá acu ar bhainistíocht, agus an taithí atá acu i réimse na dtáirgí íocshláinte lena n-úsáid ag an duine nó le haghaidh úsáid tréidliachta.

(4)

Scrúdaíodh an liosta a thíolaic an Coimisiún d’fhonn ceathrar comhaltaí den Bhord Bainistíochta a dhéanann ionadaíocht do leasanna na sochaí sibhialta a cheapadh, ar bhonn na doiciméadachta a sholáthair an Coimisiún agus i bhfianaise na dtuairimí a chuir Parlaimint na hEorpa in iúl. Le ceapadh na gcomhaltaí sin trí bhíthin an Chinnidh seo ráthaítear go mbeidh na leibhéil is airde saincháilíochtaí, réimse leathan saineolais ábhartha agus an raon geografach is leithne is féidir san Aontas, chomh maith le saineolas ábhartha ar bhainistíocht agus taithí i réimse na dtáirgí íocshláinte lena n-úsáid ag an duine nó le haghaidh úsáid tréidliachta, ar fáil sa Bhord Bainistíochta,