Partijiet
Motivi tas-sentenza
Parti operattiva
Fil-kawża C-312/02,
li għandha bħala suġġett rikors għal annullament skond l-Artikolu 230 KE, ippreżentat fl-4 ta' Settembru 2002,
Ir-Renju ta' l-Iżvezja , irrappreżentat minn K. Renman, bħala aġent, b'indirizz għan-notifika fil-Lussemburgu,
rikorrent,
vs
Il-Kummissjoni tal-Komunitajiet Ewropej , irrappreżentata minn K. Simonsson, bħala aġent, b'indirizz għan-notifika fil-Lussemburgu,
konvenuta,
IL-QORTI TAL-ĠUSTIZZJA (It-Tieni Awla),
komposta minn C. W. A. Timmermans, President ta' l-Awla, C. Gulmann u R. Schingten, F. Macken u J. N. Cunha Rodrigues (Relatur), Imħallfin,
Avukat Ġenerali: F. G. Jacobs,
Reġistratur: M. R. Grass,
wara li rat il-proċedura bil-miktub,
wara li semgħet il-konklużjonijiet ta' l-Avukat Ġenerali, ippreżentati fis-seduta tas-17 ta' Ġunju 2004,
tagħti l-preżenti
Sentenza
1. Permezz tar-rikors tiegħu, ir-Renju ta' l-Iżvezja jitlob l-annullament parzjali tad-Deċiżjoni tal-Kummissjoni 2002/524/KE, tas-26 ta' Ġunju 2002, li teskludi mill-finanzjament Komunitarju ċertu nfiq effettwat mill-Istati Membri skond il-Fond Agrikolu Ewropew ta' Gwida u Garanzija (FAEGG), Taqsima Garanzija (ĠU L 170, p. 77, iktar 'il quddiem id-"deċiżjoni kkontestata"), inkwantu teskludi mill-finanzjament Komunitarju, fil-parti li tirrigwarda dan l-Istat Membru, nefqa għall-ammont ta' SEK 18 555 850.
Il-kuntest ġuridiku
Il-leġiżlazzjoni Komunitarja
2. Ir-Regolament tal-Kunsill (KEE) Nru 729/70, tal-21 ta' April 1970, dwar il-finanzjament tal-politika agrikola komuni (ĠU L 94, p. 13), kif emendat permezz tar-Regolament tal-Kunsill (KE) Nru 1287/95, tat-22 ta' Mejju 1995 (ĠU L 125, p. 1, iktar 'il quddiem ir-"Regolament Nru 729/70"), jipprovdi fl-Artikolu 5(2)(c) tiegħu:
"[Il-Kummissjoni] għandha tiddeċiedi dwar in-nefqa li trid tiġi eskluża mill-finanzjament Komunitarju msemmi fl-Artikoli 2 u 3, fejn issib illi n-nefqa ma tkunx ġiet effettwata skond ir-regoli Komunitarji.
Qabel kull deċiżjoni ta' rifjut ta' finanzjament, ir-riżultati tal-verifiki tal-Kummissjoni kif ukoll ir-risposti ta' l-Istat Membru kkonċernat għandhom ikunu nnotifikati bil-miktub, u sussegwentement iż-żewġ partijiet għandhom jippruvaw jaslu għal ftehim fuq l-azzjoni li għandha tittieħed.
Fin-nuqqas ta' ftehim, l-Istat Membru jista' jitlob il-ftuħ ta' proċedura intiża sabiex tirrikonċilja l-pożizzjonijiet rispettivi tagħhom fi żmien erba' xhur, u r-riżultati ta' din il-proċedura għandhom jitniżżlu f'rapport ikkomunikat lill-Kummissjoni u eżaminat minnha qabel ma tittieħed deċiżjoni ta' rifjut ta' finanzjament.
[…]" [traduzzjoni mhux uffiċjali]
3. Skond l-Artikolu 8(1) tar-Regolament tal-Kummissjoni (KE) Nru 1663/95, tas-7 ta' Lulju 1995, li jistabbilixxi regoli ddettaljati sabiex jiġi applikat ir-Regolament tal-Kunsill (KEE) Nru 729/70 li jirrigwarda l-proċedura għall-verifikar tal-kontijiet tat-Taqsima Garanzija tal-FAEGG (ĠU L 158, p. 6), kif emendat permezz tar-Regolament tal-Kummissjoni (KE) Nru 2245/1999, tat-22 ta' Ottubru 1999 (ĠU L 273, p. 5, iktar 'il quddiem ir-"Regolament Nru 1663/95"):
"Jekk, bħala riżultat ta' inkjesta, il-Kummissjoni tikkunsidra illi n-nefqa ma ġietx effettwata skond ir-regoli Komunitarji, għandha tinnotifika lill-Istati Membri fil-kwistjoni bir-riżultati tal-kontrolli tagħha u tindika l-miżuri korrettivi li għandhom jittieħdu sabiex tiġi żgurata l-konformità fil-futur. […]"
4. L-Artikolu 15(3) tar-Regolament tal-Kunsill (KEE) Nru 1765/92, tat-30 ta' Ġunju 1992 li jistabbilixxi sistema ta' sostenn għall-produtturi ta' ċerti wċuh tar-raba' maħrut (ĠU L 181, p. 12), jipprovdi:
"Il-ħlasijiet imsemmija f'dan ir-Regolament għandhom jitħallsu kollha lill-benefiċċjarji."
5. L-Artikolu 30a tar-Regolament tal-Kunsill (KEE) Nru 805/68, tas-27 ta' Ġunju 1968, dwar l-organizzazzjoni komuni tas-swieq fis-settur tal-laħam taċ-ċanga u l-vitella (ĠU L 148, p. 24), li ddaħħal f'dan ir-Regolament permezz ta' l-Artikolu 1(5) tar-Regolament tal-Kunsill (KEE) Nru 2066/92, tat-30 ta' Ġunju 1992, (ĠU L 215, p. 49, iktar 'il quddiem ir-"Regolament Nru 805/68"), jiddisponi kif ġej:
"L-ammonti li għandhom jitħallsu skond dan ir-Regolament jitħallsu kollha lill-benefiċċjarji."
Il-leġiżlazzjoni nazzjonali
6. Il-Förordningen (1997:183) om kartavgift i ärenden om jordbruksstöd (regolament tas-17 ta' April 1997 li jistabbilixxi taxxa fuq il-mapep ipprovduti fil-kuntest ta' l-għajnuna agrikola) kien jimponi fuq kull applikant għal għajnuna Komunitarja għal ċertu żona l-ħlas ta' imposta sabiex jirċievi l-mappa li tiddeskrivi din iż-żona. Din il-mappa kellha bilfors tiġi mehmuża ma' l-applikazzjoni għal għajnuna.
7. Peress li dan ir-Regolament ġie mħassar fl-1 ta' Lulju 2000, kien ġie applikat biss fl-1998 u fl-1999.
Il-kuntest fattwali
8. Fl-24 ta' Ottubru 2000, ir-Renju ta' l-Iżvezja rċieva komunikazzjoni bil-miktub mill-Kummissjoni skond l-Artikolu 8(1) tar-Regolament Nru 1663/95, fejn informatu li l-imposti fuq il-mapep ma kinux jikkostitwixxu tnaqqis awtorizzat fil-kuntest ta' l-għajnuna għall-uċuh tar-raba' maħrut u li parti min-nefqa li kienet ġiet iddikjarata kellha tiġi eskluża minn kull finanzjament Komunitarju.
9. Fis-26 ta' Ġunju 2002, sussegwentement għall-proċedura ta' rikonċiljazzjoni prevista fl-Artikolu 5(2)(c) tar-Regolament Nru 729/70, il-Kummissjoni adottat id-Deċiżjoni kkontestata. Permezz ta' din id-Deċiżjoni, hija eskludiet mill-finanzjament Komunitajru n-nefqa ddikjarata mir-Renju ta' l-Iżvezja għall-ammont ta' SEK 18 555 850, għar-raġuni tan-nuqqas ta' osservanza minn dan l-Istat Membru ta' l-Artikolu 15(3), tar-Regolament Nru 1765/92 u l-Artikolu 30a tar-Regolament Nru 805/68.
Ir-rikors
10. Fil-kuntest ta' dan ir-rikors, ir-Renju ta' l-Iżvezja jitlob lill-Qorti tal-Ġustizzja sabiex:
– prinċipalment, tannulla d-deċiżjoni kkontestata, inkwantu hija teskludi mill-finanzjament Komunitarju nefqa għall-ammont ta' SEK 18 555 850 li saret mill-Iżvezja
– sussidjarjament, tnaqqas l-ammont li jrid jiġi eskluż mill-finanzjament Komunitarju għal SEK 11 817 748;
– sussidjarjament għal dan, tnaqqas l-ammont li jrid jiġi eskluż mill-finanazjament Komunitarju għal SEK 12 436 094;
– tordna lill-Kummissjoni tbati l-ispejjeż.
11. Il-Kummissjoni titlob li r-rikors jiġi miċħud u li r-rikorrent jiġi ordnat ibati l-ispejjeż.
Fuq it-talba prinċipali
12. Il-Gvern Żvediż jinvoka żewġ motivi in sostenn tat-talba prinċipali tiegħu, ibbażati, l-ewwel wieħed fuq il-ksur ta' l-Artikolu 5(2)(c) tar-Regolament Nru 729/70 u l-Artikolu 8(1) tar-Regolament Nru 1663/95, u t-tieni wieħed, fuq l-applikazzjoni żbaljata ta' l-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68.
Fuq l-ewwel motiv
13. Permezz ta' l-ewwel motiv tiegħu, il-Gvern Żvediż isostni li d-deċiżjoni kkontestata tikser l-Artikolu 5(2)(c) tar-Regolament Nru 729/70 u l-Artikolu 8(1) tar-Regolament Nru 1663/95, peress illi l-komunikazzjoni bil-miktub imsemmija fl-Artikolu 8(1) tar-Regolament Nru 1663/95, li l-awtoritajiet Żvediżi kienu rċevew fl-24 ta' Ottubru 2000, ma kien fiha ebda evalwazzjoni tan-nefqa li kellha tiġi eskluża mill-finanzjament Komunitarju.
14. Madankollu huwa biżżejjed li jiġi kkonstatat li, kif il-Gvern Żvediż stess ammetta fir-risposta għall-oġġezzjoni mqajma mill-Kummissjoni fid-difiża tagħha, il-kliem użat fl-Artikolu 8(1) tar-Regolament Nru 1663/95, emendat permezz tar-Regolament Nru 2245/99, li daħal fis-seħħ fit-30 ta' Ottubru 1999 u li b'hekk kien applikabbli fiż-żmien tal-fatti, ma jirrikjedix aktar li l-Kummissjoni tagħmel evalwazzjoni tan-nefqa li trid li tiġi eskluża fil-komunikazzjoni tagħha lill-Istati Membri.
15. Konsegwentement, l-ewwel motiv għandu jiġi respint bħala mhux fondat.
Fuq it-tieni motiv
16. Permezz tat-tieni motiv tiegħu, il-Gvern Żvediż isostni li l-ġbir ta' imposti għall-għoti tal-mapep ma jikkostitwixxix ksur ta' l-Artikolu 15(3) tar-Regolament Nru 1765/92 jew ta' l-Artikolu 30a tar-Regolament Nru 805/68 peress illi dawn l-imposti ma jistgħux jiġu kkunsidrati bħala taxxi amministrattivi għall-ipproċessar ta' l-applikazzjonijiet għal għajnuna.
17. Skond l-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68, il-ħlasijiet imsemmija għandhom jitħallsu "kollha" lill-benefiċċjarji.
18. Minn dan isegwi li dawn ir-Regolamenti ma jawtorizzaw ebda tnaqqis mill-ammonti li għandhom jitħallsu lill-bdiewa.
19. F'dan ir-rigward, il-Qorti tal-Ġustizzja diġà ddeċidiet li l-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68 jipprojbixxu li l-awtoritajiet nazzjonali japplikaw tnaqqis fuq il-ħlasijiet effettwati jew li huma jirrikjedu l-ħlas ta' l-ispejjeż amministrattivi relatati ma' l-applikazzjonijiet li jkollhom bħala effett li jnaqqsu l-ammont ta' l-għajnuna (sentenza tat-22 ta' Ottubru 1998, Kellinghusen u Ketelsen, C-36/97 u C-37/97, Ġabra p. I-6337, punt 21).
20. Madankollu l-Gvern Żvediż isostni li l-imposti miġbura għall-għoti tal-mapep ma kellhomx bħala skop li jkopru l-ispejjeż amministrattivi sostnuti mill-awtoritajiet ikkonċernati. Kuntrarjament għal dak li kien ġie osservat fil-kawżi Kellinghusen u Ketelsen, iċċitati iktar 'il fuq, l-ipproċessar ta' l-applikazzjonijiet u l-adozzjoni ta' l-għajnuna ma kinux jiddependu mill-ħlas ta' dawn l-imposti, peress illi dawn ta' l-aħħar kellhom jiġu mitluba separatament.
21. Tali argument ma jistax jiġi akkolt.
22. Fil-fatt, kif osserva ġustament l-Avukat Ġenerali fil-punt 17 tal-konklużjonijiet tiegħu, biex il-projbizzjoni tat-tnaqqis tkun effettiva, hija ma tistax tiġi intepretata b'mod purament formali fis-sens li tapplika biss għat-tnaqqis realment effettwat meta jsiru l-ħlasijiet. Għaldaqstant, il-projbizzjoni ta' kull tnaqqis bilfors għandha tiġi estiża għall-imposti kollha li għandhom relazzjoni diretta u intrinsika ma' l-ammonti mħallsa.
23. Fl-ittra li l-Gvern Żvediż indirizza lill-Kummissjoni fit-2 ta' Frar 1998, huwa ammetta li kien ikkunsidra diversi possibbiltajiet sabiex jiffinanzja l-għoti tal-mapep u li kien għażel il-ġbir ta' taxxa imposta fuqhom.
24. Minbarra dan, għandu jiġi mfakkar li, skond il-leġiżlazzjoni nazzjonali, ma setgħet tiġi ppreżentata ebda applikazzjoni għal għajnuna mingħajr ma tiġi mehmuża mal-fajl mappa pprovduta mill-awtoritajiet nazzjonali.
25. F'dawn iċ-ċirkustanzi, għandu jiġi kkonstatat, minn naħa, li kien hemm relazzjoni diretta bejn l-applikazzjonijiet għal għajnuna ppreżentati mill-bdiewa u l-ġbir tat-taxxa fuq il-mapep u, min-naħa l-oħra, li din kellha bħala effett li tnaqqas l-ammont ta' għajnuna effettivament miġbura mill-benefiċċjarji.
26. Barra minn hekk, il-Gvern Żvediż josserva li l-Kummissjoni ma kinitx effettwat rettifika finanzjarja għal dak li jikkonċerna s-sena tas-suq 1998, għaliex hija kienet aċċettat li l-bdiewa setgħu wkoll jużaw il-mapep għal finijiet differenti mill-applikazzjonijiet għal għajnuna. Huwa jallega li din iċ-ċirkustanza jmissha ġġustifikat li, fl-evalwazzjoni tar-rettifika finanzjara relattiva għas-sena tas-suq 1999, il-Kummissjoni tikkunsidra l-wasla ta' applikazzjonijiet ġodda kif ukoll il-fatt li l-mapap kellhom jiġu aġġornati kull sena.
27. Il-Kummissjoni tirrispondi li kemm l-imposti fuq il-mapep miġbura fl-1998 kif ukoll dawk miġbura fl-1999 kienu jikkostitwixxu spejjeż amministrattivi inkompatibbli mal-leġiżlazzjoni Komunitarja. Madankollu, hija rrikonoxxiet li l-imposti miġbura fl-1998 setgħu, għalkemm b'mod relattivament dgħajjef, jiġu kkunsidrati bħala l-korrispettiv għal servizz mogħti lill-bdiewa permezz ta' l-għoti ta' mappa li setgħet tkun utli għall-ġestjoni ta' l-attività tagħhom. L-istess raġunament ma japplikax għall-imposti fuq il-mapep miġbura fl-1999.
28. Skond ġurisprudenza kostanti, jekk il-Kummissjoni ma tkunx għamlet ir-rettifika meħtieġa matul sena ta' referenza preċedenti imma tkun ittollerat l-irregolaritajiet għal raġunijiet ta' ekwità, l-Istat Membru kkonċernat ma jakkwista ebda dritt sabiex jirrikjedi l-istess attitudni lejn l-irregolaritajiet tas-sena ta' referenza segwenti fuq il-bażi tal-prinċipju ta' ċertezza legali jew ta' l-aspettattivi leġittimi (ara s-sentenzi tas-6 ta' Ottubru 1993, L-Italja vs Il-Kummissjoni, C-55/91, Ġabra p. I-4813, punt 67, u tas-6 ta' Diċembru 2001, Il-Greċja vs Il-Kummissjoni, C-373/93, Ġabra p. I-9619, punt 56).
29. Fid-dawl tal-kunsiderazzjonijiet preċedenti, it-tieni motiv għandu jiġi respint.
Fuq it-talbiet sussidjarji
30. Il-Gvern Żvediż jinvoka żewġ motivi in sostenn ta' l-ewwel talba sussidjarja tiegħu, ibbażati rispettivament fuq il-ksur ta' l-Artikolu 5(2)(c) tar-Regolament Nru 729/70 u l-Artikolu 8(1) tar-Regolament Nru 1663/95, u fuq l-applikazzjoni żbaljata ta' l-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68.
Fuq l-ewwel motiv
31. Permezz ta' l-ewwel motiv tiegħu, il-Gvern Żvediż isostni li d-deċiżjoni kkontestata ġiet adottata bi ksur l-Artikolu 5(2)(c) tar-Regolament Nru 729/70 u l-Artikolu 8(1) tar-Regolament Nru 1663/92, inkwantu l-komunikazzjoni bil-miktub imsemmija fl-Artikolu 8(1) tar-Regolament Nru 1663/95 tirreferi biss għall-finanzjament ta' l-għajnuna għall-uċuh tar-raba maħrut.
32. Fil-fatt, fl-opinjoni ta' dan il-Gvern, ma saret ebda referenza għall-mapep li jikkonċernaw iż-żoni għall-għalf f'din il-komunikazzjoni. Skond id-dispożizzjonijiet ta' l-Artikolu 8(1) tar-Regolament Nru 1663/95, il-Kummissjoni kellha tindika b'mod ċar f'dan id-dokument, li l-awtoritajiet Żvediżi kienu rċevew fl-24 ta' Ottubru 2000, il-miżuri koperti mill-azzjoni tagħha.
33. Kif osserva l-Avukat Ġenerali fil-punt 21 tal-konklużjonijiet tiegħu, minn naħa, kien biss permezz ta' nota tat-18 ta' Mejju 2001 li l-Gvern Żvediż ikkomunika lill-Kummissjoni, fuq talba tagħha, informazzjoni ddettaljata fuq l-għajnuna mogħtija għaż-żoni għall-għalf. Sussegwentement għal din in-nota, il-Kummissjoni bagħtet it-tieni komunikazzjoni formali lill-Gvern Żvediż fl-1 ta' Awwissu 2001, skond l-Artikolu 8(1) tar-Regolament Nru 1663/95. Min-naħa l-oħra, dan il-Gvern ma jistax jargumenta, fuq il-bażi tal-fatt li fil-komunikazzjoni ta' l-24 ta' Ottubru 2000 il-Kummissjoni kienet irreferiet biss għall-mapep li jikkonċernaw l-uċuh tar-raba maħrut, li kien impossibbli għalih li jiddetermina l-miżuri korrettivi li kellu jieħu, peress illi l-Iżvezja kienet aboliet l-imposta fuq il-mapep għaż-żoni kemm għall-ħrit kif ukoll għall-għalf sa mill-1 ta' Lulju 2000.
34. Minn dan jirriżulta li l-ewwel motiv għandu jiġi respint.
Fuq it-tieni motiv
35. Permzz tat-tieni motiv tiegħu, il-Gvern Żvediż isostni li l-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68 ma jippermettux li tiġi ġġustifikata d-deċiżjoni li permezz tagħha l-Kummissjoni eskludiet mill-finanzjament ammont korrispondenti għall-imposti mħallsa għall-għoti ta' mapep li jikkonċernaw iż-żoni li fir-rigward tagħhom kienet ukoll intalbet għajnuna agro-ambjentali jew reġjonali.
36. Skond il-Gvern Żvediż, il-Kummissjoni aċċettat l-imposti fuq il-mapep imħallsa mill-bdiewa li kienu talbu dawn iż-żewġ tipi ta' għajnuna imma, fil-kalkolu ta' l-ammont li kellu jiġi eskluż mill-finanzjament Komunitarju, hija ma kinitx ikkunsidrat iż-żoni li fir-rigward tagħhom kienu ġew mitluba kemm għajnuna għall-uċuh tar-raba maħrut jew żoni għall-għalf kif ukoll għajnuna agro-ambjentali jew reġjonali.
37. Għandu jiġi mfakkar li, kif il-Qorti tal-Ġustizzja ddeċidiet fil-punt 19 ta' din is-sentenza, l-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68 jipprojbixxu lill-awtoritajiet nazzjonali milli japplikaw tnaqqis fuq il-ħlasijiet effettwati jew li jirrikjedu l-ħlas ta' spejjeż amministrattivi relatati ma' l-applikazzjonijiet li jkollhom bħala effett li jnaqqsu l-ammont ta' l-għajnuna.
38. Il-fatt li għall-istess żona xi bdiewa talbu kemm għajnuna skond ir-Regolament Nru 1765/92 jew ir-Regolament Nru 805/67 kif ukoll għajnuna agro-ambjentali jew reġjonali m'għandha ebda effett fuq il-projbizzjoni magħmula lill-Istati Membri li jeffettwaw tnaqqis fuq l-ammonti miġbura mill-benefiċċjarji fil-kuntest ta' l-għajnuna għall-uċuh tar-raba maħrut jew għaż-żoni għall-għalf.
39. Fil-fatt, jirriżulta espressament mit-tieni premessa tar-Regolament Nru 1765/92 li l-ħlasijiet kumpensatorji għandhom bħala skop li jinnewtralizzaw it-telf ta' dħul li jirriżulta mit-tnaqqis tal-prezzijiet istituzzjonali fil-kuntest tas-sistema ġdida ta' sostenn għall-produtturi ta' ċerti wċuh tar-raba maħrut. Minbarra dan, skond it-tielet premessa tar-Regolament Nru 2066/92, li ddaħħal l-Artikolu 30a fir-Regolament Nru 805/68, l-iskop tas-sistema ta' primjum huwa li jagħti lill-produtturi kkonċernati kumpens sostanzjali għall-konsegwenzi li jirriżultaw, fir-rigward tagħhom, mit-tnaqqis tal-prezz ta' intervent fis-settur tal-laħam taċ-ċanga u l-vitella.
40. Huwa paċifiku li dawn l-objettivi jistgħu jintlaħqu biss jekk l-għajnuna kumpensatorja tiġi mħallsa kollha kemm hi lill-bdiewa milquta mit-tnaqqis fil-prezzijiet (ara s-sentenza Kellinghusen u Ketelsen, iċċitata iktar 'il fuq, punt 19).
41. L-interpetazzjoni tal-Gvern Żvediż iċċaħħad lill-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68 mill-effett utli tagħhom billi toffri lill-Istati Membri l-possibbiltà li jevitaw l-obbligi li joħorġu minn dawn l-Artikoli u b'hekk, ikunu f'pożizzjoni li jikkompromettu l-kisba ta' l-objettivi msemmija iktar 'il fuq.
42. Għaldaqstant, il-motiv ibbażat fuq applikazzjoni żbaljata ta' l-Artikolu 15(3) tar-Regolament Nru 1765/92 u l-Artikolu 30a tar-Regolament Nru 805/68 għandu jiġi respint.
43. Il-Gvern Żvediż isostni, sussidjarjament għal dan, li, f'każ li l-Qorti tal-Ġustizzja tiddeċiedi li ż-żoni għall-għalf għandhom jiġu inklużi fil-kalkolu ta' l-ammont li jrid jiġi eskluż mill-finanzjament Komunitarju, għandhom jiġu esklużi minn dan il-kalkolu l-imposti fuq il-mapep li jikkonċernaw iż-żoni li fir-rigward tagħhom kienet ukoll ġiet mitluba għajnuna agro-ambjentali u reġjonali.
44. In sostenn ta' din it-talba, l-imsemmi Gvern jirriproduċi l-argumenti invokati fil-kuntest tat-tieni motiv ta' l-ewwel talba sussidjarja tiegħu. Għar-raġunijiet indikati fil-punti 39 sa 41 ta' din is-sentenza, dawn l-argumenti ma jistgħux jiġu aċċettati.
45. Peress illi ebda wieħed mill-motivi ippreżentati mir-Renju ta' l-Iżvezja ma ġie akkolt, dan ir-rikors għandu jiġi miċħud kollu kemm hu.
Fuq l-ispejjeż
46. Skond l-Artikolu 69(2) tar-Regoli tal-Proċeudra, il-parti li titlef il-kawża għandha tbati l-ispejjeż, jekk dawn ikunu ġew mitluba. Peress li r-Renju ta' l-Iżvezja tilef, hemm lok li huwa jiġi ordnat ibati l-ispejjeż kif mitlub mill-Kummissjoni.
Għal dawn il-motivi, il-Qorti tal-Ġustizzja (It-Tieni Awla) taqta’ u tiddeċiedi:
1) Ir-rikors huwa miċħud.
2) Ir-Renju ta' l-Iżvezja għandu jbati l-ispejjeż.