Eagrán sealadach
BREITHIÚNAS NA CÚIRTE (an Seachtú Dlísheomra)
16 Deireadh Fómhair 2025 (*)
(Tarchur chun réamhrialú – Frithdhumpáil – Dleacht frithdhumpála leathnaithe – Díolúine d’allmhairí páirteanna áirithe rothair ón tSín – Díolúine do chainníochtaí beaga arna n‑allmhairiú ag oibreoirí ar mhionscála – Tairseach 300 aonad de pháirteanna rothair fíor-riachtanach arna ndearbhú lena scaoileadh i saorchúrsaíocht ag páirtí nó arna seachadadh chuige)
I gCás C‑659/24,
IARRAIDH ar réamhrialú faoi Airteagal 267 CFAE, ón Bundesfinanzhof (Cúirt Airgeadais na Cónaidhme, an Ghearmáin), trí bhreith an 14 Bealtaine 2024, a fuarthas ag an gCúirt an 9 Deireadh Fómhair 2024, sna himeachtaí
A-GmbH & Co. KG
v
Hauptzollamt C,
tugann AN CHÚIRT (an Seachtú Dlísheomra),
agus í comhdhéanta mar seo a leanas: F. Schalin (Rapóirtéir), Uachtarán Dlísheomra, M. Gavalec agus Z. Csehi, Breithiúna,
Abhcóide Ginearálta: A. Biondi,
Cláraitheoir: A. Calot Escobar,
ag féachaint don nós imeachta i scríbhinn,
tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:
– A-GmbH & Co. KG, ag U. Reimer, Steuerberater,
– an Coimisiún Eorpach, ag G. Gattinara agus R. Pethke, i gcáil Gníomhairí,
tar éis cinneadh a dhéanamh, i ndiaidh an tAbhcóide Ginearálta a éisteacht, breithiúnas a thabhairt ar an gcás gan Tuairim,
an breithiúnas seo a leanas:
Breithiúnas
1 Baineann an iarraidh ar réamhrialú le léiriú ar Airteagal 14(c) de Rialachán (CE) Uimh. 88/97 ón gCoimisiún an 20 Eanáir 1997 maidir le húdarú a thabhairt d’allmhairí páirteanna áirithe rothair de thionscnamh Dhaon‑Phoblacht na Síne ón leathnú le Rialachán (CE) Uimh. 71/97 ón gComhairle ar an dleacht frithdhumpála a fhorchuirtear le Rialachán (CEE) Uimh. 2474/93 ón gComhairle (IO 1997 L 17, lch. 17), arna leasú le Rialachán (AE) 512/2013 ón gCoimisiún an 4 Meitheamh 2013 (IO 2013 L 152, lch. 1) (‘Rialachán Uimh. 88/97, arna leasú in 2013’).
2 Rinneadh an iarraidh in imeachtaí idir A-GmbH & Co. KG (‘an t‑allmhaireoir’) agus Hauptzollamt C (Príomhoifig Chustaim C, an Ghearmáin) maidir leis na coinníollacha chun páirteanna áirithe rothair de thionscnamh na Síne a allmhairiú isteach san Aontas Eorpach saor ó dhleachtanna frithdhumpála leathnaithe.
An dlí lena mbaineann
Rialachán (CE) Uimh. 71/97
3 Ghlac Comhairle an Aontais Eorpaigh Rialachán (CEE) Uimh. 2474/93 an 8 Meán Fómhair 1993 lena bhforchuirtear dleacht frithdhumpála chinntitheach ar allmhairí rothar de thionscnamh Dhaon‑Phoblacht na Síne isteach sa Chomhphobal agus lena mbailítear go cinntitheach an dleacht frithdhumpála shealadach (IO 1993 L 228, lch. 1).
4 D’fhonn dul timpeall ar na bearta frithdhumpála arna bhforchur le Rialachán Uimh. 2474/93 trí pháirteanna rothair de thionscnamh na Síne a úsáidtear i gcóimeáil rothar san Aontas a allmhairiú a sheachaint, ghlac an Chomhairle Rialachán (CE) Uimh. 71/97 an 10 Eanáir 1997 lena leathnaítear an dleacht frithdhumpála chinntitheach a forchuireadh le Rialachán (CEE) Uimh. 2474/93 ar rothair de thionscnamh Dhaon‑Phoblacht na Síne chun allmhairí páirteanna áirithe rothair ó Dhaon‑Phoblacht na Síne a chumhdach, agus lena dtoibhítear an dleacht leathnaithe ar allmhairí den sórt sin a chláraítear faoi Rialachán (CE) Uimh. 703/96 (IO 1997 L 16, lch. 55).
5 Leagtar an méid seo a leanas amach in aithris 38 de Rialachán Uimh. 71/97:
‘An úsáid deiridh lena dtugtar údar le díolúine ón dleacht frithdhumpála, saineofar í i ndáil le (i) oibríochtaí cóimeála ar cruthaíodh nach rabhthas ag dul timpeall ina leith agus (ii) úsáid páirteanna riachtanacha rothair i gcainníochtaí beaga ag oibreoirí beaga, go háirithe mar athsholáthar, ar dócha nach dul timpeall í. Sa chás deireanach sin, beidh tábhacht eacnamaíoch sách teoranta ag baint le hallmhairí páirteanna riachtanacha rothair agus ní dócha go mbainfidh siad an bonn den dleacht atá ann cheana de réir bhrí Airteagal 13(2)(c) den Bhunrialachán i dtéarmaí na gcainníochtaí rothar a d’fhéadfaí a mhonarú leis na páirteanna allmhairithe sin.
Chun go mbeidh idirghabhálaithe, nach n‑allmhairíonn páirteanna riachtanacha rothair go díreach, in ann na páirteanna sin a cheannach ó allmhaireoirí agus iad a athdhíol le haghaidh hoibríochtaí cóimeála nach dul timpeall iad, ba cheart faireachán a dhéanamh ar idirbhearta den sórt sin freisin faoin gcóras um rialú ar úsáid deiridh.’
[Aistriúchán neamhoifigiúil]
6 Foráiltear leis an dara fleasc d’Airteagal 3(1) agus (2) den Rialachán sin:
‘1. Tar éis dó dul i gcomhairle leis an gCoiste Comhairleach, glacfaidh an Coimisiún, i rialachán, na bearta is gá chun a áirithiú go mbeidh allmhairí páirteanna riachtanacha rothair, nach dul timpeall ar an dleacht frithdhumpála a fhorchuirtear le Rialachán (CEE) Uimh. 2474/93 iad, díolmhaithe ón dleacht leathnaithe dá dtagraítear in Airteagal 2.
2. Déanfar foráil sa rialachán ón gCoimisiún, go háirithe, maidir leis an méid seo a leanas:
[...]
– údarú ar an díolúine agus rialú ar allmhairí páirteanna riachtanacha rothair, go háirithe ag idirghabhálaithe nó, i bhfianaise a n‑úsáide i gcainníochtaí beaga, ag oibreoirí ar mhionscála’.
[Aistriúchán neamhoifigiúil]
Rialachán Uimh. 88/97, arna leasú in 2013
7 Sonraítear an méid seo a leanas in aithrisí 3 agus 4 de Rialachán Uimh. 88/97:
‘(3) Leis an Rialachán seo, ba cheart treoir shoiléir a thabhairt do na páirtithe leasmhara maidir le feidhmiú an chórais díolúine. Go háirithe, ní mór forálacha soiléire a bheith ann maidir leis an gcaoi ar féidir allmhairí áirithe páirteanna riachtanacha rothair a dhíolmhú ón dleacht leathnaithe agus maidir leis an gcaoi ar féidir an t‑údarú ar an díolúine a fháil.
(4) [...]
[...] díolmhófar allmhairí díreacha páirteanna riachtanacha rothair ón dleacht leathnaithe i gcás ina ndearbhaíonn an cóimeálaí atá díolmhaithe ag an gCoimisiún lena scaoileadh i saorchúrsaíocht iad nó i gcás ina ndearbhófar thar a cheann iad.
[...] beidh allmhairí páirteanna riachtanacha rothair díolmhaithe ón dleacht leathnaithe freisin i gcás ina gceadaítear iad faoin rialú ar úsáid deiridh agus nuair a sheachadtar iad go críochnaitheach chuig cóimeálaí díolmhaithe, nó i gcás ina ndearbhaítear iad lena scaoileadh i saorchúrsaíocht nó nuair a sheachadtar chuig páirtí iad i gcainníochtaí teoranta. Is iomchuí, mutatis mutandis, an sásra um rialú ar úsáid deiridh atá ann cheana a chur i bhfeidhm i ndáil leis sin [...]. I gcás ina ndéanfaidh páirtí níos lú ná 300 aonad in aghaidh na míosa d’aon chineál páirteanna riachtanacha rothair a dhearbhú lena scaoileadh i saorchúrsaíocht, nó a sheachadadh chuig páirtí, beidh tábhacht eacnamaíoch theoranta ag baint le hallmhairí páirteanna riachtanacha rothair den sórt sin, agus ní dócha go mbainfidh siad an bonn d’éifeacht na dleachta a fhorchuirtear le Rialachán (CEE) Uimh. 2474/93. Ba cheart a mheas dá bhrí sin nach bhfuil dul timpeall i gceist leo.
[...]’
[Aistriúchán neamhoifigiúil]
8 Foráiltear mar seo a leanas le hAirteagal 14 de Rialachán Uimh. 88/97, arna leasú in 2013, dar teideal ‘Díolúine faoi réir rialú ar úsáid deiridh’:
‘I gcás ina ndéanfaidh duine seachas páirtí díolmhaithe allmhairí páirteanna riachtanacha rothair lena scaoileadh i saorchúrsaíocht a dhearbhú, ó dháta theacht i bhfeidhm an Rialacháin Thagartha, díolmhófar iad ó chur i bhfeidhm na dleachta leathnaithe má dhearbhaítear iad i gcomhréir le struchtúr Taric in Iarscríbhinn III agus faoi réir na gcoinníollacha a leagtar síos in Airteagal 82 de Rialachán (CEE) Uimh. 2913/92 [ón gComhairle an 12 Deireadh Fómhair 1992 lena leagtar síos Cód Custaim an Aontais (IO 1992 L 302, lch. 1)] agus Airteagail 291 go 304 de Rialachán (CEE) Uimh. 2454/93, atá infheidhme mutatis mutandis, agus:
(a) i gcás ina ndéanfar na páirteanna riachtanacha rothair a sheachadadh chuig páirtí atá díolmhaithe faoi Airteagail 7 nó 12 nó
(b) i gcás ina ndéantar na páirteanna riachtanacha rothair a sheachadadh chuig sealbhóir eile údaraithe de réir bhrí Airteagal 291 de Rialachán (CEE) Uimh. 2454/93 nó
(c) nuair, ar bhonn míosúil, a dhearbhaíonn páirtí níos lú ná 300 aonad in aghaidh an chineáil de pháirteanna riachtanacha rothair lena scaoileadh i saorchúrsaíocht nó a sheachadfar chuig an bpáirtí sin iad. Ríomhfar líon na bpáirteanna arna ndearbhú ag aon pháirtí nó ana seachadadh chuig aon pháirtí trí thagairt a dhéanamh do líon na bpáirteanna arna ndearbhú nó arna seachadadh chuig na páirtithe uile atá i gcomhlachas leis an bpáirtí sin nó a bhfuil socruithe cúitimh acu leis an bpáirtí sin; nó
(d) i gcás ina bhfuil na páirteanna riachtanacha rothair beartaithe chun rothair leictreacha atá feistithe le mótar cúnta (cód breise TARIC 8835) a chóimeáil.’
[Aistriúchán neamhoifigiúil]
Rialachán Uimh. 88/97, arna leasú le Rialachán Cur Chun Feidhme (AE) Uimh. 2023/611
9 Foráiltear le hAirteagal 15(2) de Rialachán Uimh. 88/97, arna leasú le Rialachán Cur Chun Feidhme (AE) 2023/611 ón gCoimisiún an 17 Márta 2023 (IO 2023 L 80, lch. 67):
‘I gcás ina bhfaighfear amach gur dhearbhaigh na páirtithe dá dtagraítear i mír 1 páirteanna riachtanacha rothar le haghaidh saorchúrsaíochta nó go bhfuair siad seachadtaí de chainníochtaí de pháirteanna riachtanacha rothar os cionn na tairsí a leagtar amach in Airteagal 14(c), nó i gcás nach gcomhoibreoidh siad leis an scrúdú, ní mheasfar a thuilleadh go bhfuil siad lasmuigh de raon feidhme Airteagal 13(2) de Rialachán (AE) 2016/1036 [ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (IO 2016 L 176, lch. 21)], agus déanfar aon údarú díolúine arna dheonú do na páirtithe sin a chúlghairm go cúlghabhálach. [...]’
Rialachán Cur Chun Feidhme 2023/611
10 Sonraítear an méid seo a leanas in aithrisí 23 agus 25 de Rialachán Cur Chun Feidhme 2023/611:
‘(23) Ba cheart díolúine a chúlghairm freisin nuair a fhaightear amach go bhfuil páirtí díolmhaithe páirteach i gcleachtais a théann timpeall ar an dleacht leathnaithe, inter alia tríd an mbonn a bhaint d’éifeachtaí ceartaitheacha na dleachta trí chainníochtaí suntasacha a allmhairiú. Tugann Airteagal 14(c) [de Rialachán Uimh. 88/97, arna leasú in 2013] le tuiscint go mbainfear an bonn d’éifeachtaí ceartaitheacha na dleachta nuair a dhearbhaíonn páirtí 300 aonad nó níos mó in aghaidh gach cineál páirteanna riachtanacha rothair le haghaidh saorchúrsaíochta nó nuair a sheachadtar don pháirtí iad.
(24) Chun deimhneacht dhlíthiúil agus trédhearcacht a áirithiú, ba cheart an tairseach [dá bhforáiltear in Airteagal 14(c) de Rialachán Uimh. 88/97, arna leasú in 2013,] sin a shoiléiriú [i Rialachán Uimh. 88/97].
(25) Thairis sin measann an Coimisiún gurb iomchuí léirmhíniú na tairsí a bhunaítear in Airteagal 14(c) a shoiléiriú. I ndáil leis sin, leis an tairseach de níos lú ná 300 aonad de réir chineál na gcodanna riachtanacha rothar ar bhonn míosúil ba cheart tagairt a dhéanamh don mheán míosúil aonad de chodanna riachtanacha rothar le linn tréimhsí 12 mhí dar tús dáta theacht i bhfeidhm an údaraithe úsáide deiridh ábhartha. In aon chás, ní féidir iomlán tréimhse amháin nó níos mó tréimhsí a bheith níos faide ná tréimhse bhailíochta an údaraithe úsáide deiridh ábhartha.’
Cód Custaim an Aontais
11 Foráiltear in Airteagal 211(1)(a) de Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (IO 2013 L 269, lch. 1) (‘Cód Custaim an Aontais’), dar teideal ‘Údarú’:
‘Ceanglófar údarú ó na húdaráis chustaim don mhéid seo a leanas:
(a) an nós imeachta próiseála isteach nó amach, an nós imeachta um chead isteach sealadach nó an nós imeachta úsáide deiridh a úsáid’.
12 Foráiltear don mhéid seo a leanas in Airteagal 254(1) de Chód Custaim an Aontais, dar teideal ‘Nós imeachta úsáide deiridh’:
‘Faoin nós imeachta úsáide deiridh, féadfar earraí a scaoileadh i saorchúrsaíocht faoi dhíolúine ó dhleacht nó faoi ráta laghdaithe dleachta de bharr a n‑úsáide sonraí.’
An díospóid sna príomhimeachtaí agus na ceisteanna a tharchuirtear le haghaidh réamhrialú
13 Mar chuid dá ghnó, allmhairíonn an t‑allmhaireoir páirteanna éagsúla rothair ón tSín. Ar an mbonn sin, bhí sé ina shealbhóir ar feadh na mblianta ar údarú úsáide deiridh, arna eisiúint ag Príomh-Oifig Chustaim C. Leis an údarú sin, arna dheonú ar bhonn Airteagal 254 de Chód Custaim an Aontais, ceadaítear dó, i gcomhréir le mír 1 den Airteagal sin, earraí a scaoileadh i saorchúrsaíocht san Aontas faoi dhíolúine iomlán nó pháirteach ó dhleacht mar gheall ar a n‑úsáid shonrach.
14 Cumhdaíodh leis an údarú i dtosach:
– páirteanna riachtanacha rothair arna seachadadh chuig páirtí atá díolmhaithe i gcomhréir le Rialachán Uimh. 88/97, arna leasú in 2013 [Airteagal 14(a)],
– seachadtaí chuig sealbhóirí eile údaraithe le haghaidh an chórais úsáide deiridh, de réir bhrí Airteagal 254 de Chód Custaim an Aontais agus Airteagal 291 de Rialachán Uimh. 2454/93 ón gCoimisiún an 2 Iúil 1993 lena leagtar síos forálacha áirithe maidir le cur chun feidhme Rialachán (CEE) Uimh. 2913/92 ón gComhairle lena leagtar síos Cód Custaim an Chomhphobail (IO 1993 L 253, lch. 1), nach ndéanann na foirmiúlachtaí allmhairithe iad féin (Airteagal 14(b) de Rialachán Uimh. 88/97, arna leasú in 2013),
– agus na hallmhairí, ar bhonn míosúil, de níos lú ná 300 aonad in aghaidh an chineáil de pháirteanna riachtanacha rothair, a dhearbhaíonn páirtí lena scaoileadh i saorchúrsaíocht, nó a sheachadtar chuig an bpáirtí sin (Airteagal 14(c) de Rialachán Uimh. 88/97, arna leasú in 2013).
15 Sonraíodh san údarú sin go bhféadfaí, gach mí, níos lú ná 300 aonad in aghaidh an chineáil de pháirteanna riachtanacha rothair a dhearbhú d’úsáid féin páirtí nó go bhféadfadh páirtí amháin iad a aistriú chuig páirtithe eile (custaiméirí deiridh). Tar éis leasuithe i ndiaidh a chéile a rinne na húdaráis chustaim, áfach, scoir an t‑údarú de bheith ag cumhdach na díolúine a chomhfhreagraíonn don díolúine dá dtagraítear in Airteagal 14(c) de Rialachán Uimh. 88/97, arna leasú in 2013.
16 In 2018, d’iarr an t‑allmhaireoir ar na húdaráis chustaim, ar bhonn Airteagal 211(1)(a) de Chód Custaim an Aontais, leathnú a dhéanamh ar an údarú céanna, le héifeacht chúlghabhálach ón 1 Eanáir 2018, chun an díolúine dá bhforáiltear in Airteagal 14(c) de Rialachán Uimh. 88/97, arna leasú in 2013, a chumhdach.
17 I ndáil leis sin, d’áitigh sé gur ceadaíodh leis an bhforáil sin díolúine ón dleacht frithdhumpála leathnaithe inter alia i gcás ina ndéantar, ar bhonn míosúil, níos lú ná 300 aonad in aghaidh an chineáil de pháirteanna riachtanacha rothair a ‘sheachadadh’ chuig páirtí. Dar leis an allmhaireoir, ba cheart an hipitéis díolúine sin a thuiscint sa chaoi, i gcomhthéacs ghníomhaíocht allmhaireora a allmhairíonn páirteanna rothair chun iad a sheachadadh dá gcustaiméirí éagsúla, go bhfuil an t‑allmhaireoir sin údaraithe 299 aonad in aghaidh an chineáil de pháirteanna riachtanacha rothair a allmhairiú go míosúil agus in aghaidh an chustaiméara, agus é díolmhaithe ó dhleachtanna frithdhumpála.
18 Ós rud é gur dhiúltaigh na húdaráis chustaim don iarratas sin, thionscain an t‑allmhaireoir caingean i gcoinne chinneadh diúltaithe an údaráis sin os comhair an Finanzgericht (an Chúirt Airgeadais, an Ghearmáin), a dhiúltaigh don chaingean sin agus a sheas leis an diúltú leathnú a dhéanamh ar an údarú úsáide deiridh a bhí i seilbh an allmhaireora.
19 Mheas an chúirt sin nár foráladh don díolúine dá dtagraítear in Airteagal 14(c) de Rialachán Uimh. 88/97, arna leasú in 2013, ach amháin d’oibreoirí ar mhionscála agus gur cheart, dá bhrí sin, í a theorannú do chásanna ina seachadtar níos lú ná 300 aonad san iomlán chuig custaiméirí uile an allmhaireora atá i gceist. Comhthacaítear leis an léiriú sin leis an dara fleasc d’Airteagal 3(2) de Rialachán Uimh. 71/97, ar dá réir, go bunúsach, nach mór don rialachán díolúine a ghlacfaidh an Coimisiún foráil a dhéanamh maidir le ‘údarú ar an díolúine agus rialú ar allmhairí páirteanna riachtanacha rothair, go háirithe ag idirghabhálaithe nó, i bhfianaise a n‑úsáide i gcainníochtaí beaga, ag oibreoirí ar mhionscála’. [Aistriúchán neamhoifigiúil]
20 Rinne an t‑allmhaireoir achomharc ar phointe dlí i gcoinne chinneadh an Finanzgericht (an Chúirt Airgeadais) os comhair an Bundesfinanzhof (Cúirt Airgeadais na Cónaidhme, an Ghearmáin), arb í an chúirt a rinne an tarchur í.
21 I ndáil leis sin, d’áitigh sé nach sainmhínítear an coincheap ‘oibreoirí ar mhionscála’, de réir bhrí na forála deiridh sin, leis an reachtaíocht atá i bhfeidhm agus nach é cuspóir Rialachán Uimh. 88/97 ach chun cosc a chur ar dhul timpeall na dleachta frithdhumpála i gcás ina seachadann roinnt gnóthas a dhearbhaíonn earraí cainníochtaí de na hearraí sin, do chustaiméir, a sháraíonn, ina n‑iomláine, an tairseach arna leagan síos. Mar sin, chun críocha na díolúine ón dleacht frithdhumpála, tá sé tábhachtach ní an méid páirteanna riachtanacha rothair a dhíolann na gnóthais idirghabhálacha le hoibreoirí eile a chinneadh, ach an chainníocht mhíosúil a sheachadtar ar deireadh chuig gach custaiméir deiridh a chinneadh. Ina theannta sin, is éard atá sa tairseach ‘níos lú ná 300 aonad in aghaidh an chineáil de pháirteanna riachtanacha rothair’, ar bhonn míosúil, lamháltas as a n‑eascraíonn díolúine de 299 de na haonaid sin fiú má sháraítear an tairseach sin, seachas teorainnluach a d’fhágfadh nach gcuirfí aon díolúine i bhfeidhm má dhearbhaíonn agus seachadaíonn páirtí, ar bhonn míosúil, níos mó ná 299 de na haonaid sin.
22 Measann an chúirt a rinne an tarchur go mbraitheann toradh na díospóide atá os a comhair ar cé na hallmhairí de pháirteanna riachtanacha rothair atá díolmhaithe ón dleacht frithdhumpála leathnaithe agus, i ndáil leis sin, cuireann sí a hamhras in iúl maidir le léiriú Airteagal 14(c) de Rialachán Uimh. 88/97, arna leasú in 2013.
23 Ar an gcéad dul síos, fiafraíonn sí an féidir an díolúine dá dtagraítear san fhoráil sin a chomhcheangal le díolúine eile, de réir bhrí Airteagal 14(a) agus/nó (b) den Rialachán sin. I ndáil leis sin, measann an chúirt a rinne an tarchur, cé gur féidir na díolúintí ón dleacht frithdhumpála leathnaithe dá bhforáiltear in Airteagal 14(a) agus (b) den Rialachán sin a chomhcheangal leis an díolúine dá dtagraítear i bpointe (d) den Airteagal sin, gurb é sin ós rud é go mbaineann siad le gach duine de sheolaithe táirgí agus le hoibríochtaí cóimeála difriúla agus nach féidir, dá bhrí sin, forluí a bheith eatarthu. I gcodarsnacht leis sin, d’fhéadfadh páirtí neamhaird a dhéanamh ar chuspóir Rialachán Uimh. 88/97 arb é atá ann allmhairí íosta ó thaobh na heacnamaíochta de a dhíolmhú, agus na hallmhairí sin amháin, a mhéid, trí dhul ar iontaoibh na ndíolúintí de bhun Airteagal 14(a) agus/nó (b) de Rialachán Uimh. 88/97, arna leasú in 2013, arna gcomhcheangal leis an díolúine dá dtagraítear in Airteagal 14(c) den Rialachán céanna, arna leasú, a d’fhéadfadh sé líon aonad níos mó ná 299 aonad de pháirteanna riachtanacha rothair a allmhairiú gach mí, saor ón dleacht frithdhumpála.
24 Ar an dara dul síos, fiafraíonn an chúirt a rinne an tarchur, i bhfianaise Airteagal 14(c) de Rialachán Uimh. 88/97, arna leasú in 2013, an féidir foráil a dhéanamh leis an údarú úsáide deiridh do dhíolúine ón dleacht frithdhumpála leathnaithe do níos lú ná 300 aonad de réir an chineáil de pháirteanna riachtanacha rothair, in aghaidh an chustaiméara agus in aghaidh na míosa, nó an bhfuil feidhm ag an tairseach sin i leith na gcustaiméirí go léir. Tugann sí faoi deara nach dtugtar aon treoir i ndáil leis sin le foclaíocht na forála sin agus go bhféadfadh dul timpeall ar an dleacht frithdhumpála a bheith mar thoradh ar léiriú leathan ar an bhforáil sin. Luaitear ann freisin gur cheart an bealach ina ndéanann páirtí a ghnó nó ina ndéanann sé idirghabháil ar an margadh a bheith neamhábhartha don scrúdú ar an gceist sin.
25 Ar an tríú dul síos, fiafraíonn an chúirt a rinne an tarchur an ionann an tairseach ‘níos lú ná 300 aonad in aghaidh an chineáil de pháirteanna riachtanacha rothair’ ar bhonn míosúil, de réir bhrí Airteagal 14(c) de Rialachán Uimh. 88/97, arna leasú in 2013, agus teorainnluach, agus, mar thoradh air sin, go n‑imíonn an díolúine ón dleacht frithdhumpála leathnaithe go hiomlán i gcás ina ndearbhaíonn agus ina seachadann páirtí níos mó ná 299 aonad in aghaidh na míosa. Tacaítear leis an léiriú sin le rún reachtas an Aontais cead a thabhairt d’allmhaireoirí beaga nó d’fhaighteoirí beaga táirgí tairbhe a bhaint as an díolúine dá bhforáiltear san fhoráil sin.
26 Sna himthosca sin, chinn an Bundesfinanzhof (Cúirt Airgeadais na Cónaidhme) bac a chur ar na himeachtaí agus na ceisteanna seo a leanas a tharchur chuig an gCúirt le haghaidh réamhrialú:
‘(1) An bhfuil Airteagal 14(c) de [Rialachán Uimh. 88/97, arna leasú in 2013] le léiriú sa chaoi go bhféadfadh an díolúine ón dleacht frithdhumpála leathnaithe a chomhcheangal leis na díolúintí eile faoi Airteagal 14(a) agus/nó (b) de Rialachán Uimh. 88/97[, arna leasú in 2013] san údarú céanna d’úsáid deiridh laistigh de bhrí Airteagal 254 de Chód Custaim an Aontais?
(2) An féidir Airteagal 14(c) de Rialachán Uimh. 88/97[, arna leasú in 2013] a léiriú sa chaoi go bhféadfar níos lú ná 300 aonad de pháirt rothair fíor-riachtanach ar leith in aghaidh an chustaiméara a dhíolmhú ón dleacht frithdhumpála leathnaithe in aghaidh na míosa san údarú?
(3) An ionann méid de níos lú ná 300 aonad in aghaidh na míosa dá dtagraítear in Airteagal 14(c) de Rialachán Uimh. 88/97[, arna leasú in 2013] agus tairseach díolúine, ionas go scoirfidh an díolúine ón dleacht frithdhumpála leathnaithe ina hiomlán d’fheidhm a bheith aici, i gcás ina dhearbhaíonn páirtí níos mó ná 299 n‑aonad in aghaidh na míosa nó má athdhíolann sé iad, nó an ionann é agus lamháltas agus sa chás sin, an leanfaidh 299 n‑aonad de bheith díolmhaithe in aon chás, gan beann ar an mbreis atá i gceist?’
Na ceisteanna a tharchuirtear le haghaidh réamhrialú
An chéad cheist
27 Lena céad cheist, fiafraíonn an chúirt a rinne an tarchur, go bunúsach, an gcaithfear Airteagal 14(c) de Rialachán (CE) Uimh. 88/97, arna leasú in 2013, a léiriú sa chaoi go bhféadfadh an díolúine ón dleacht frithdhumpála leathnaithe dá bhforáiltear leis a chomhcheangal le díolúine eile faoi Airteagal 14(a) agus/nó (b) de Rialachán Uimh. 88/97, arna leasú in 2013, san údarú céanna úsáide deiridh, de bhrí Airteagal 254 de Chód Custaim an Aontais?
28 De réir chásdlí socair na Cúirte, agus foráil de dhlí an Aontais á léiriú, is gá machnamh a dhéanamh ní hamháin ar a foclaíocht ach ar an gcomhthéacs ina bhfuil sí agus ar na cuspóirí a shaothraítear leis na rialacha a bhfuil sí mar chuid díobh (breithiúnas an 14 Márta 2024, VR Bank Ravensburg-Weingarten, C‑536/22, EU:C:2024:234, mír 35 agus an cásdlí dá dtagraítear).
29 Sa chéad áit, maidir le foclaíocht na bhforálacha atá i gceist, ba cheart a thabhairt faoi deara nach gcuireann Airteagal 254 de Chód Custaim an Aontais, dá dtagraítear go sainráite sa chéad cheist, ná Airteagal 211 den Chód sin, a bhaineann le húdarú úsáide deiridh araon, cosc ar údarú úsáide deiridh foráil a dhéanamh maidir le cineálacha éagsúla díolúintí ón dleacht frithdhumpála a chomhcheangal.
30 Ar an gcaoi chéanna, ós rud é go luaitear na cineálacha éagsúla díolúine dá dtagraítear in Airteagal 14(a) go (c) de Rialachán Uimh. 88/97, arna leasú in 2013, i ndiaidh a chéile, agus iad nasctha leis an gcónasc ‘nó’, ní féidir a thuiscint ó úsáid an chónaisc sin go n‑eisiatar cineál amháin díolúine le díolúine eile go riachtanach. Cé go bhféadfadh foras le haghaidh díolúine ann féin údar a thabhairt le tairbhe an chórais díolúine ó dhleachtanna frithdhumpála leathnaithe, ní féidir leis sin a chur as an áireamh go bhféadfaí roinnt foras le díolúine a chumhdach leis an údarú úsáide deiridh céanna de bhun Airteagail 211 agus 254 de Chód Custaim an Aontais.
31 Sa dara háit, ba cheart a thabhairt faoi deara, i bhfianaise aithris 38 de Rialachán Uimh. 71/97, ina leagtar amach na cúiseanna lena dtugtar údar le díolúintí ó dhleachtanna frithdhumpála leathnaithe a chur chun feidhme, agus aithris 4 de Rialachán Uimh. 88/97, gur cosúil go bhfuil scéim ghinearálta Airteagal 14(a) go (c) de Rialachán Uimh. 88/97, arna leasú in 2013, nasctha le cuspóir an Rialacháin sin, arb é sin allmhairiú páirteanna riachtanacha rothair a údarú, saor ó dhleachtanna frithdhumpála leathnaithe, a bhfuil tábhacht eacnamaíoch sách teoranta acu.
32 Dá bhrí sin, ní dócha go mbainfeadh cur chun feidhme comhcheangailte na ndíolúintí sin an bonn den chuspóir a shaothraítear le forchur dleachtanna frithdhumpála, i bhfianaise na gcainníochtaí rothar a d’fhéadfaí a mhonarú ag úsáid na bpáirteanna riachtanacha sin arna n‑allmhairiú agus i bhfianaise chineál teoranta eacnamaíoch na n‑allmhairí a dhéantar trí bheith díolmhaithe ó na dleachtanna sin.
33 I bhfianaise na mbreithnithe thuas, ba cheart a thabhairt mar fhreagra ar an gcéad cheist nach mór Airteagal 14(c) de Rialachán Uimh. 88/97, arna leasú in 2013, a léiriú sa chaoi go bhféadfar an díolúine ón dleacht frithdhumpála leathnaithe dá bhforáiltear leis a chomhcheangal, san údarú úsáide deiridh céanna, de réir bhrí Airteagal 254 de Chód Custaim an Aontais, le díolúine eile, de bhun Airteagal 14(a) agus/nó (b) den Rialachán sin, arna leasú.
An dara ceist
34 Lena dara ceist, fiafraíonn an chúirt a rinne an tarchur, go bunúsach, an gcaithfear Airteagal 14(c) de Rialachán Uimh. 88/97, arna leasú in 2013, a léiriú sa chaoi go bhféadfar foráil a dhéanamh leis an údarú úsáide deiridh, de réir bhrí Airteagal 254 de Chód Custaim an Aontais, maidir le díolúine ón dleacht frithdhumpála leathnaithe do níos lú ná 300 aonad de pháirteanna riachtanacha rothair in aghaidh an chustaiméara agus in aghaidh na míosa nó an mbaineann an tairseach sin leis na custaiméirí go léir ar sealbhóirí an údaraithe sin iad.
35 Ar dtús, ba cheart a thabhairt chun cuimhne, i mbreithiúnas an 29 Iúil 2010, Isaac International (C‑371/09, EU:C:2010:458, míreanna 33 agus 34), gur chinn an Chúirt cheana féin go leagtar síos le hAirteagal 14(c) de Rialachán Uimh. 88/97, arna leasú in 2013, lena mbunaítear díolúine de minimis d’oibreoirí áirithe, ‘teorainn chainníochtúil mhíosúil agus go sonraítear ann go bhfuil líon na n‑aonad le ríomh agus na páirtithe go léir atá i gcomhlachas leis an allmhaireoir nó an dearbhóir nó a bhfuil socruithe cúiteacha acu leo sin á gcur san áireamh’.
36 Mar sin, measadh, go bunúsach, gur socraíodh leis an eisceacht de minimis sin líon uasta aonad in aghaidh an chineáil de pháirteanna riachtanacha rothair, eadhon níos lú ná 300 aonad, a fhéadfaidh allmhaireoir neamhdhíolmhaithe a allmhairiú gach mí faoi Airteagal 14(c) de Rialachán Uimh. 88/97, arna leasú in 2013, gan beann ar líon na ngnóthas/na ndaoine chuig a seachadaíonn sé na haonaid sin ina dhiaidh sin.
37 Tá léiriú den sórt sin comhoiriúnach le cuspóir Rialachán Uimh. 88/97, arb é atá ann díolúintí ó dhleachtanna frithdhumpála leathnaithe a údarú chomh fada is nach mbaineann siad an bonn de na cuspóirí a shaothraítear le forchur na ndleachtanna sin. Le húdarú allmhairí saor ó dhleachtanna den sórt sin, atá teoranta do níos lú ná 300 aonad in aghaidh an chineáil de pháirteanna riachtanacha rothair, in aghaidh na míosa agus in aghaidh an chustaiméara, a d’fhéadfaí a sheachadadh chuig líon custaiméirí a d’fhéadfadh a bheith neamhtheoranta, d’fhéadfaí an bonn a bhaint de na cuspóirí sin.
38 I bhfianaise na mbreithnithe thuas, ba cheart a thabhairt mar fhreagra ar an dara ceist nach mór Airteagal 14(c) de Rialachán Uimh. 88/97, arna leasú in 2013, a léiriú sa chaoi go bhféadfar foráil a dhéanamh leis an údarú úsáide deiridh, de réir bhrí Airteagal 254 de Chód Custaim an Aontais, maidir le díolúine ón dleacht frithdhumpála leathnaithe do níos lú ná 300 aonad de pháirteanna riachtanacha rothair in aghaidh na míosa agus do chustaiméirí uile shealbhóir an údaraithe sin.
An tríú ceist
39 Lena tríú ceist, fiafraíonn an chúirt a rinne an tarchur, go bunúsach, an gcaithfear Airteagal 14(c) de Rialachán Uimh. 88/97, arna leasú in 2013, a léiriú sa chaoi nach bhfuil, i gcás ina sáraítear tairseach ‘níos lú ná 300 aonad de pháirteanna riachtanacha rothair’ in aghaidh na míosa, páirtí a dhearbhaíonn agus a sheachadann níos mó ná 299 aonad in aghaidh na míosa i dteideal aon díolúine ón dleacht frithdhumpála leathnaithe faoin bhforáil sin.
40 I dtús báire, ní léir ó fhoclaíocht Airteagal 14(c) de Rialachán Uimh. 88/97, arna leasú in 2013, gurb ionann an tairseach de ‘níos lú ná 300 aonad in aghaidh an chineáil de pháirteanna riachtanacha rothair’, ar bhonn míosúil, agus lamháltas as a n‑eascródh, dá sárófaí í, suas go dtí an tairseach sin, díolúine ó na dleachtanna frithdhumpála leathnaithe.
41 Os a choinne sin, is léir ó Airteagal 15(2) de Rialachán Uimh. 88/97, arna leasú le Rialachán Cur Chun Feidhme 2023/611, inter alia, i gcás ina bhfuil sé dearbhaithe ag na páirtithe go scaoilfear i saorchúrsaíocht iad nó ina bhfuair siad seachadtaí de chainníochtaí de pháirteanna riachtanacha rothair a sháraíonn an tairseach dá bhforáiltear le hAirteagal 14(c), go gcúlghairtear aon údarú le haghaidh díolúine arna deonú do na páirtithe sin go cúlghabhálach. Dá bhrí sin, is ionann an tairseach sin agus luach a gceileann a shárú díolúine den sórt sin go hiomlán ar na páirtithe sin.
42 Cinnte, mar a shonraíonn an Coimisiún ina bharúlacha i scríbhinn, ceadaíodh leis an bhforbairt sin ar reachtaíocht an Aontais soiléiriú a thabhairt maidir le cleachtais éagsúla na n‑údarás custaim náisiúnta. Is léir, áfach, ó aithris 23 de Rialachán Cur Chun Feidhme Uimh. 2023/611 nach mór a mheas gur luach í an tairseach chéanna, a luaithe a shocraítear í le Rialachán Uimh. 88/97, ina leagan tosach, a bhfuil cúlghairm na díolúine mar thoradh ar a sárú. Ina theannta sin, comhthacaítear leis sin le haithris 24 den Rialachán Cur Chun Feidhme sin, ina luaitear nach mór an ‘tairseach [de minimis] a shoiléiriú [i Rialachán Uimh. 88/97]’, agus sin ‘[c]hun deimhneacht dhlíthiúil agus trédhearcacht a áirithiú’, agus le haithris 25 den Rialachán Cur Chun Feidhme sin.
43 Ina dhiaidh sin, mar a chuireann an chúirt a rinne an tarchur in iúl agus mar is léir ó aithris 4 de Rialachán Uimh. 88/97, tugadh isteach an díolúine faoin scéim úsáide deiridh chun allmhairí nó seachadtaí i gcainníochtaí beaga, a bhfuil tábhacht eacnamaíoch theoranta ag baint leo, a cheadú. Dá gceadófaí d’oibreoirí eacnamaíocha a dhéanann allmhairí nó athdhíolacháin shuntasacha tairbhe a bhaint go huathoibríoch as lamháltas, go páirteach ar a laghad, i leith na n‑idirbheart sin, bhainfí an bonn den chuspóir atá á shaothrú leis an reachtaíocht frithdhumpála.
44 Ar deireadh, tagraíonn an chúirt a rinne an tarchur do bhreithiúnas an 12 Bealtaine 2021, Hauptzollamt B (Caibheár bradáin fearna) (C‑87/20, EU:C:2021:382). Sa bhreithiúnas sin, chinn an Chúirt gurb ionann cainníocht 125 gram de chaibheár bradáin fearna in aghaidh an duine, nach bhfuil a thabhairt isteach faoi réir cead allmhairiúcháin a thíolacadh, agus teorainnluach, ag brath go háirithe ar an bhfíoras nach mór an fhoráil atá i gceist a mheas mar mhaolú nach mór, dá réir sin, a léiriú go docht.
45 Tá difríocht idir fíorais an cháis sna príomhimeachtaí agus fíorais an cháis as ar eascair an breithiúnas sin, a bhain le speicis fauna agus flora fiáine a chosaint, atá faoi bhagairt a ndíothaithe, trí thrádáil iontu a rialáil, de bhun Rialachán (CE) Uimh. 338/97 ón gComhairle an 9 Nollaig 1996 maidir le speicis fauna agus flora fiáine a chosaint trí thrádáil iontu a rialáil (IO 1997 L 61, lch. 1).
46 Is amhlaidh is mó, sa chás seo, go bhféachtar leis an reachtaíocht frithdhumpála le tionscal na hEorpa a chosaint in earnáil na rothar agus nach ndeonaítear na díolúintí leathnaithe ó dhleachtanna frithdhumpála faoi Rialachán Uimh. 88/97 ach amháin i leith oibríochtaí nach bhfuil dul timpeall i gceist leo, go háirithe iad siúd atá i bhfabhar oibreoirí eacnamaíocha beaga. Mar sin, ní mór Airteagal 14(c) de Rialachán Uimh. 88/97, arna leasú in 2013, a mheas mar fhoráil mhaolaithe i bhfabhar oibreoirí eacnamaíocha beaga nach dtagann a ngníomhaíocht, i bhfianaise a tionchair eacnamaíoch ísil, faoi raon feidhme na bhforálacha atá beartaithe chun dul timpeall ar dhleachtanna frithdhumpála leathnaithe a sheachaint.
47 I bhfianaise an mhéid thuas, ba cheart a thabhairt mar fhreagra ar an tríú ceist nach mór Airteagal 14(c) de Rialachán Uimh. 88/97, arna leasú in 2013, a léiriú sa chaoi nach bhfuil, i gcás ina sáraítear tairseach ‘níos lú ná 300 aonad de pháirteanna riachtanacha rothair’ in aghaidh na míosa, páirtí a dhearbhaíonn agus a sheachadann níos mó ná 299 aonad in aghaidh na míosa i dteideal aon díolúine ón dleacht frithdhumpála leathnaithe faoin bhforáil sin.
Costais
48 Ós rud é, a mhéid a bhaineann leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais arna dtabhú trí bharúlacha a chur faoi bhráid na Cúirte, seachas costais na bpáirtithe sin, inghnóthaithe.
Ar na forais sin, rialaíonn an Chúirt (an Seachtú Dlísheomra) mar seo a leanas:
1. Ní mór Airteagal 14(c) de Rialachán (CE) Uimh. 88/97 ón gCoimisiún an 20 Eanáir 1997 maidir le húdarú a thabhairt i gcás allmhairí páirteanna áirithe rothar de thionscnamh Dhaon‑Phoblacht na Síne ón leathnú le Rialachán (CE) Uimh. 71/97 ón gComhairle ar an dleacht frithdhumpála a fhorchuirtear le Rialachán (CEE) Uimh. 2474/93 ón gComhairle, arna leasú le Rialachán (AE) Uimh. 512/2013 ón gCoimisiún an 4 Meitheamh 2013 a léiriú sa chaoi go bhféadfadh an díolúine ón dleacht frithdhumpála leathnaithe dá bhforáiltear ann a chomhcheangal le díolúintí eile faoi Airteagal 14(a) agus/nó (b) de Rialachán Uimh. 88/97 san údarú úsáide deiridh céanna laistigh de bhrí Airteagal 254 de Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais.
2. Ní mór Airteagal 14(c) de Rialachán Uimh. 88/97, arna leasú le Rialachán Uimh. 512/2013, a léiriú sa chaoi go bhféadfar foráil a dhéanamh leis an údarú úsáide deiridh, de réir bhrí Airteagal 254 de Rialachán Uimh. 952/2013, maidir le díolúine ón dleacht frithdhumpála leathnaithe do níos lú ná 300 aonad de pháirteanna rothair fíor-riachtanach in aghaidh na míosa agus do gach custaiméir de chuid shealbhóir an údaraithe sin.
3. Ní mór Airteagal 14(c) de Rialachán Uimh. 88/97, arna leasú le Rialachán Uimh. 512/2013, a léiriú sa chaoi nach bhfuil, i gcás ina sáraítear tairseach ‘níos lú ná 300 aonad de pháirteanna rothair fíor-riachtanach’ in aghaidh na míosa, páirtí a dhearbhaíonn agus a sheachadann níos mó ná 299 n‑aonad in aghaidh na míosa i dteideal aon díolúine ón dleacht frithdhumpála leathnaithe faoin bhforáil sin.
[Sínithe]
* Teanga an cháis: an Ghearmáinis.