1.   Rannchuideoidh EUNAVFOR MED IRINI le Feasacht Staide Mhuirí maidir le gníomhaíochtaí aindleathacha, arna leathnú a thuilleadh i dtreo Feasacht Staide Muirí, chun gníomhaíochtaí aindleathacha agus bagairtí ar shlándáil, ar shábháilteacht agus ar leasanna eacnamaíocha an Aontais a bhrath, faireachán a dhéanamh orthu agus iad a thuairisciú. Baileoidh EUNAVFOR MED IRINI faisnéis a bheidh úsáideach don phleanáil theagmhasach freisin.

2.   Rannchuideoidh EUNAVFOR MED IRINI le srian a chur ar “Shadow Fleet” na Rúise, mar a shainmhínítear i Rún A.1192(33) ó Thionól na hEagraíochta Muirí Idirnáisiúnta (EMI) a glacadh an 6 Nollaig 2023, i gcomhréir le Coinbhinsiún na Náisiún Aontaithe maidir le Dlí na Farraige agus le rialacháin idirnáisiúnta, trí chur chuige ar a dtugtar “an bealach iomlán”.

3.   Tacóidh EUNAVFOR MED IRINI le cosaint an Bhonneagair Mhuirí Chriticiúil, d’fhonn feabhas a chur ar fheasacht staide muirí agus ar fheasacht ar réimsí muirí, lena n-áirítear trí thrialacha agus trí réitigh theicneolaíocha don chosaint mhuirí a imscaradh ar bhonn píolótach.

4.   Rannchuideoidh EUNAVFOR MED IRINI le bac a chur ar shamhail ghnó na líonraí smuigleála agus gáinneála ar dhaoine. Chuige sin, cabhróidh EUNAVFOR MED IRINI le brath na líonraí smuigleála agus gáinneála ar dhaoine agus le faireachán a dhéanamh orthu trí bhailiú faisnéise agus patrólú arna ndéanamh le hacmhainní aeir ar an mórmhuir, sa Limistéar Oibríochtaí a comhaontaíodh.

5.   Féadfar an fhaisnéis a bhailítear i gcomhthéacs na gcúraimí a leagtar amach i míreanna 1 go 4 a stóráil agus a scaoileadh chuig údaráis ábhartha na mBallstát agus chuig comhlachtaí inniúla an Aontais, agus, más infheidhme, chuig ECAT, agus i gcomhthéacs cúraim a leagtar amach i mír 4, chuig Painéal Saineolaithe na Náisiún Aontaithe maidir leis an Libia.

6.   Tuairisceoidh EUNAVFOR MED IRINI don Choiste Polaitiúil agus Slándála maidir le gach saincheist agus gach teagmhas a bhaineann le gníomhaíochtaí, amhail cigireachtaí nó cuairteanna chun an bhratach a fhíorú, agus na cúraimí a leagtar amach i míreanna 1 go 4 á ndéanamh aige. Féadfaidh an Coiste Polaitiúil agus Slándála aon bheart ina dhiaidh sin a bhreithniú de réir mar is iomchuí.

1.   Rannchuideoidh EUNAVFOR MED IRINI le cur chun feidhme thrádbhac arm na Náisiún Aontaithe ar an Libia a bunaíodh faoi Rún 1970 (2011) ó Chomhairle Slándála na Náisiún Aontaithe agus faoi Rúin ó Chomhairle Slándála na Náisiún Aontaithe ina dhiaidh sin, trí gháinneáil aindleathach ar airm chuig an Libia nó ón Libia a thuairisciú agus a dhíspreagadh. Chun na críche sin, baileoidh EUNAVFOR MED IRINI faisnéis, le sócmhainní aeir, satailíte, muirí agus sócmhainní eile, maidir le gáinneáil ar airm agus ar ábhar gaolmhar ó gach treo (lena gcuimsítear bealaí farraige, aeir agus talún) agus roinnfidh siad í le comhpháirtithe agus gníomhaireachtaí ábhartha, ar bhonn cás ar chás agus ar bhonn riachtanais eolais, trí na sásraí sna doiciméid phleanála ábhartha agus i gcomhréir le hAirteagal 14.

2.   Rannchuideoidh EUNAVFOR MED IRINI le cur chun feidhme bhearta na Náisiún Aontaithe i gcoinne onnmhairiú aindleathach peitriliam ón Libia. Déanfaidh EUNAVFOR MED IRINI gníomhaíochtaí faireacháin agus faireachais agus baileoidh sé faisnéis ar onnmhairithe aindleathacha peitriliam ón Libia, lena n-áirítear amhola agus táirgí peitriliam scagtha, atá contrártha le Rún 2146 (2014) ó Chomhairle Slándála na Náisiún Aontaithe agus le Rúin ó Chomhairle Slándála na Náisiún Aontaithe ina dhiaidh sin, agus roinnfidh sé í le comhpháirtithe agus gníomhaireachtaí ábhartha ar bhonn cás ar chás agus ar bhonn riachtanais eolais, trí na sásraí sna doiciméid phleanála ábhartha agus i gcomhréir le hAirteagal 14

3.   Féadfar an fhaisnéis a bhailítear i gcomhthéacs na gcúraimí a leagtar amach i míreanna 1 agus 2 a stóráil agus a chur ar fáil d’údaráis ábhartha na mBallstát agus do chomhlachtaí inniúla an Aontais, agus do Phainéal Saineolaithe na Náisiún Aontaithe maidir leis an Libia agus, más infheidhme, d’údaráis ábhartha na Libia.

4.   Tuairisceoidh EUNAVFOR MED IRINI don Choiste Polaitiúil agus Slándála maidir le gach saincheist agus gach teagmhas a bhaineann le gníomhaíochtaí, amhail cigireachtaí nó cuairteanna chun an bhratach a fhíorú, agus na cúraimí a leagtar amach i míreanna 1 agus 2 á ndéanamh aige. Féadfaidh an Coiste Polaitiúil agus Slándála aon bheart a dhéanfar ina dhiaidh sin a bhreithniú de réir mar is iomchuí.

1.   Saothróidh EUNAVFOR MED IRINI gníomhaíochtaí fothaithe acmhainneachta agus oiliúna mar thaca le hinstitiúidí na Libia atá freagrach as forfheidhmiú an dlí mhuirí agus as Cuardach agus Tarrtháil ar muir, agus tionscadail fhadtéarmacha inbhuanaithe á lorg ag an am céanna. Cuirfear an cúram sin i gcrích i Limistéar Oibríochtaí comhaontaithe EUNAVFOR MED IRINI nó i gcríoch Ballstáit, arna iarraidh sin don Bhallstát sin. Ina theannta sin, féadfar an cúram sin a dhéanamh ar chríoch na Libia, lena n-áirítear i bhfarraige theorann na Libia, nó ar chríoch tríú Stát óstach nó i bhfarraige theorann an tríú Stát óstach sin atá comharsanach leis an Libia, i gcás ina gcinnfidh an Coiste Polaitiúil agus Slándála amhlaidh tar éis don Chomhairle measúnú a dhéanamh arna iarraidh sin don Libia nó don stát óstach lena mbaineann, agus i gcomhréir leis an dlí idirnáisiúnta. Chun críche an chúraim sin, bunóidh agus oibreoidh EUNAVFOR MED IRINI sásra faireacháin i ndlúthchomhar le páirtithe leasmhara ábhartha eile, lena n-áirítear sa Libia más gá.

2.   Cuirfidh EUNAVFOR MED IRINI ardán ar fáil don chomhar slándála muirí sa Mheánmhuir agus fiosróidh sé, trí thaidhleoireacht chabhlaigh agus trí ghníomhartha cabhlaigh, deiseanna lasmuigh den Libia chun tríú tíortha leasmhara eile a áireamh sa réigiún, amhail an Éigipt, an Túinéis agus an Liobáin.

3.   I gcás chur i bhfeidhm na gcúraimí dá dtagraítear i míreanna 1 agus 2, féadfaidh EUNAVFOR MED IRINI an fhaisnéis sin, lena n-áirítear sonraí pearsanta, a bailíodh chun críche na nósanna imeachta grinnfhiosrúcháin maidir le hoiliúnaithe féideartha a bhailiú, a stóráil agus a mhalartú le húdaráis ábhartha na mBallstát, le comhlachtaí inniúla an Aontais, le Misean Tacaíochta na Náisiún Aontaithe sa Libia, le INTERPOL, leis an gCúirt Choiriúil Idirnáisiúnta agus le Stáit Aontaithe Mheiriceá, ar choinníoll go mbíonn a dtoiliú tugtha i scríbhinn acu. Thairis sin, féadfaidh EUNAVFOR MED IRINI faisnéis riachtanach leighis agus sonraí bithmhéadracha riachtanacha ar oiliúnaithe a bhailiú agus a stóráil ar choinníoll go mbíonn a dtoiliú tugtha i scríbhinn acu.’