(1)

Fit-22 ta' Diċembru 2015, il-Kummissjoni rċeviet applikazzjoni mingħand Progarein France SAS għall-approvazzjoni tal-qatran tal-arżnu ta' Landes bħala sustanza bażika. Dik l-applikazzjoni kellha magħha l-informazzjoni meħtieġa skont it-tieni subparagrafu tal-Artikolu 23(3) tar-Regolament (KE) Nru 1107/2009.

(2)

Il-Kummissjoni talbet lill-Awtorità Ewropea dwar is-Sigurtà fl-Ikel (minn hawn 'il quddiem “l-Awtorità”) għall-assistenza xjentifika. Fit-30 ta' Ottubru 2017, l-Awtorità ppreżentat lill-Kummissjoni b'rapport tekniku dwar il-qatran mill-arżnu ta' Landes (2). Fl-24 ta' Mejju 2018 il-Kummissjoni ppreżentat ir-rapport ta' reviżjoni (3) u l-abbozz ta' dan ir-Regolament dwar in-nonapprovazzjoni tal-qatran mill-arżnu ta' Landes lill-Kumitat Permanenti dwar il-Pjanti, l-Annimali, l-Ikel u l-Għalf, u ffinalizzathom għal-laqgħa ta' dak il-Kumitat fl-20 ta' Lulju 2018.

(3)

Id-dokumentazzjoni ppreżentata mill-applikant ma turix li l-qatran mill-arżnu ta' Landes jissodisfa l-kriterji ta' oġġett tal-ikel kif iddefinit fl-Artikolu 2 tar-Regolament (KE) Nru 178/2002 tal-Parlament Ewropew u tal-Kunsill (4).

(4)

Madankollu fir-rapport tekniku tal-Awtorità ġie identifikat tħassib speċifiku, dwar il-qatran mill-arżnu ta' Landes. Il-qatran mill-arżnu ta' Landes huwa taħlita kumplessa, li l-kompożizzjoni eżatta tagħha mhix magħrufa. Il-qatran mill-arżnu ta' Landes għandu jitqies bħala sustanza ta' tħassib għaliex jista' jkun fih sustanzi ta' tħassib (eż. furfurali, fenoli). Barra minn hekk il-preżenza ta' sustanzi ta' tħassib serju ħafna ma tistax tiġi eskluża (eż. karċinoġeni ġenotossiċi bħal idrokarburi aromatiċi poliċikliċi). Barra minn hekk, il-valutazzjoni tar-riskju għall-operaturi, għall-ħaddiema, għal persuni fil-qrib u għall-konsumaturi ma setgħetx tiġi ffinalizzata abbażi tad-data disponibbli fl-applikazzjoni.

(5)

Ma saret disponibbli ebda evalwazzjoni, imwettqa skont il-leġiżlazzjoni l-oħra tal-Unjoni kif imsemmija fl-Artikolu 23(2) tar-Regolament (KE) Nru 1107/2009.

(6)

Il-Kummissjoni stiednet lill-applikant iressaq il-kummenti tiegħu dwar ir-rapport tekniku tal-Awtorità u dwar l-abbozz tar-rapport ta' reviżjoni. L-applikant ressaq il-kummenti tiegħu, li ġew eżaminati bir-reqqa.

(7)

Madankollu, minkejja l-argumenti mressqa mill-applikant, it-tħassib relatat mas-sustanza ma jistax jiġi eliminat.

(8)

B'riżultat ta' dan, kif stabbilit fir-rapport ta' reviżjoni tal-Kummissjoni, ma ġiex stabbilit li r-rekwiżiti stipulati fl-Artikolu 23 tar-Regolament (KE) Nru 1107/2009 huma ssodisfati. Huwa għalhekk xieraq li l-qatran mill-arżnu ta' Landes ma jiġix approvat bħala sustanza bażika.

(9)

Dan ir-Regolament ma jippreġudikax is-sottomissjoni ta' applikazzjoni oħra għall-approvazzjoni tal-qatran mill-arżnu ta' Landes bħala sustanza bażika skont l-Artikolu 23(3) tar-Regolament (KE) Nru 1107/2009.

(10)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf.