|
8.7.2010 |
MT |
Il-Ġurnal Uffiċjali tal-Unjoni Ewropea |
L 173/73 |
DEĊIŻJONI TAL-KUMMISSJONI
tas-7 ta’ Lulju 2010
li teħles lill-Estonja minn ċerti obbligi biex tapplika d-Direttivi tal-Kunsill 66/402/KEE u 2002/57/KE fir-rigward ta’ Avena strigosa Schreb., Brassica nigra (L.) Koch u Helianthus annuus L.
(notifikata bid-dokument numru C(2010) 4526)
(It-test bl-Estonjan biss huwa awtentiku)
(Test b’relevanza għaż-ŻEE)
(2010/377/UE)
IL-KUMMISSJONI EWROPEA,
Wara li kkunsidrat t-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 66/402/KEE tal-14 ta’ Ġunju 1966 dwar il-marketing taż-żerriegħa tal-ġwież (1), u b’mod partikolari l-Artikolu 23a tagħha,
Wara li kkunsidrat id-Direttiva tal-Kunsill 2002/57/KE tat-13 ta’ Ġunju 2002 fuq il-marketing taż-żerriegħa ta’ pjanti taż-żejt u tal-fibra (2), u b’mod partikolari l-Artikolu 28 tagħha,
Wara li kkunsidrat l-applikazzjoni mressqa mill-Estonja,
Billi:
|
(1) |
Id-Direttivi 66/402/KEE u 2002/57/KE stipulaw ċerti dispożizzjonijiet għall-kummerċjalizzazzjoni ta’ żerriegħa tal-ġwież u żerriegħa ta’ pjanti taż-żejt u tal-fibra. Dawk id-Direttivi jistipulaw ukoll li, skont ċerti kundizzjonijiet, xi Stati Membri jistgħu jinħelsu għal kollox jew parzjalment mill-obbligu li japplikaw id-dispożizzjonijiet ta’ dawk id-Direttivi fir-rigward ta’ ċerti speċi. |
|
(2) |
L-Estonja applikat għall-ħelsien mill-obbligi tagħha fir-rigward ta’ Avena strigosa Schreb., Brassica nigra (L.) Koch u Helianthus annuus L. |
|
(3) |
Iż-żerriegħa ta’ Avena strigosa Schreb, Brassica nigra (L.) Koch and Helianthus annuus L. normalment ma tiġix riprodotta jew ikkumerċjalizzata fl-Estonja. Barra minn hekk, l-importanza ekonomika ta’ din iż-żerriegħa mhijiex sinifikattiva f’dan l-Istat Membru. |
|
(4) |
Għalhekk, sakemm jibqgħu fis-seħħ dawk il-kundizzjonijiet, dan l-Istat Membru għandu jinħeles mill-obbligu li japplika d-dispożizzjonijiet tad-Direttivi 66/402/KEE u 2002/57/KE għall-ispeċi kkonċernati. |
|
(5) |
Il-miżuri stipulati f’din id-Deċiżjoni huma skont l-opinjoni tal-Kumitat Permanenti għaż-Żrieragħ u l-Materjal ta’ Propagazzjoni għall-Agrikultura, l-Ortikultura u l-Foresterija, |
ADOTTAT DIN ID-DEĊIŻJONI:
Artikolu 1
L-Estonja nħelset mill-obbligu li tapplika d-Direttiva 66/402/KEE, bl-eċċezzjoni tal-Artikolu 14(1), għall-ispeċi Avena strigosa Schreb.
Artikolu 2
L-Estonja nħelset mill-obbligu li tapplika d-Direttiva 2002/57/KE, bl-eċċezzjoni tal-Artikolu 17, għall-ispeċi Brassica nigra (L.) Koch u Helianthus annus L.
Artikolu 3
Din id-Deċiżjoni hija indirizzata lir-Repubblika tal-Estonja.
Magħmul fi Brussell, is-7 ta’ Lulju 2010.
Għall-Kummissjoni
John DALLI
Membru tal-Kummissjoni