14.9.2010   

MT

Il-Ġurnal Uffiċjali tal-Unjoni Ewropea

L 241/4


REGOLAMENT TAL-KUMMISSJONI (UE) Nru 802/2010

tat-13 ta’ Settembru 2010

li jimplimenta l-Artikolu 10(3) u l-Artikolu 27 tad-Direttiva 2009/16/KE tal-Parlament Ewropew u tal-Kunsill fir-rigward tal-prestazzjoni tal-kumpaniji

(Test b’relevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill Nru 2009/16/KE tal-Parlament Ewropew u tal-Kunsill tat-23 ta’ April 2009 dwar il-kontroll tal-Istat tal-Port (1), u b’mod partikolari l-Artikolu 10(3) u l-Artikolu 27 tagħha,

Billi:

(1)

Il-prestazzjoni tal-kumpanija hija waħda mill-parametri ġeneriċi li tiddetermina l-profil tar-riskju ta’ bastiment.

(2)

Bil-għan li tiġi determinata l-prestazzjoni tal-kumpaniji skont it-tifsira tad-Direttiva Nru 2009/16/KE, hemm bżonn li, meta ssir spezzjoni ta’ bastiment, l-ispetturi jirreġistraw in-numru tal-IMO li jkun ġie assennjat lil kumpanija.

(3)

Sabiex tkun ivvalutata l-prestazzjoni tal-kumpanija, għandhom jitqiesu n-nuqqasijiet u r-rati ta’ detenzjoni tal-bastimenti kollha li jinsabu fil-flotta ta’ kumpanija li jkunu suġġetti għal spezzjoni fil-Komunità u fir-reġjun kopert mill-Memorandum ta’ Ftehim ta’ Pariġi dwar il-kontroll tal-Istat tal-Port (Paris MOU).

(4)

Huwa neċessarju li wieħed jiżviluppa l-għarfien espert miksub mill-applikazzjoni tal-MOU ta’ Pariġi f’dak li jirrigwarda l-metodoloġija użata sabiex tiġi vvalutata l-prestazzjoni tal-kumpanija.

(5)

Il-Kummissjoni għandha toqgħod fuq l-Aġenzija Ewropea għas-Sigurtà Marittima stabbilita bir-Regolament (KE) Nru 1406/2002 tal-Parlament Ewropew u l-Kunsill (2) għall-pubblikazzjoni tal-lista ta’ kumpaniji bi prestazzjoni baxxa jew baxxa ħafna fuq sit tal-Internet pubbliku.

(6)

Il-miżuri previsti f’dan ir-Regolament huma skont l-opinjoni tal-Kumitat dwar Ibħra Sikuri u l-Prevenzjoni ta’ Tniġġis minn Vapuri,

ADOTTAT DAN IR-REGOLAMENT:

Artikolu 1

Identifikazzjoni ta’ kumpaniji

L-Istati Membri għandhom jiżguraw li l-kumpanija kif definita fl-Artikolu 1(18) tad-Direttiva 2209/16/KE tkun identifikata permezz tan-numru IMO meta l-bastimenti għandhom ikunu konformi mal-Kodiċi Internazzjonali dwar l-Amministrazzjoni tas-Sikurezza (ISM) kif imsemmi fil-Kapitolu IX tal-Konvenzjoni Internazzjonali għas-Sikurezza tal-Ħajja fuq il-Baħar, 1974 (il-Konvenzjoni SOLAS).

Artikolu 2

Kriterji għall-valutazzjoni tal-prestazzjoni tal-kumpaniji

1.   Bil-għan li tiġi valutata l-prestazzjoni tal-kumpanija msemmija fil-punt (e) tal-Parti I.1 tal-Anness I, tad-Direttiva Nru 2009/16/KE, għandom jintużaw il-kriterji stabbiliti fl-Anness għal dan ir-Regolament.

2.   Il-livell tal-prestazzjoni tal-kumpanija għandu jiġi aġġornat kuljum u kkalkulat abbażi tas-36 xahar ta’ qabel il-valutazzjoni. Għal dik ir-raġuni l-kalkolu għandu jiġi bbażat fuq dejta miġbura mis-17 ta’ Ġunju 2009. Fil-każ li ma jkunux għaddew 36 xahar mis-17 ta’ Ġunju 2009, il-kalkolu għandu jsir abbażi tad-dejta disponibbli.

3.   Il-kumpaniji għandhom ikunu kklassifikati bħala li għandhom prestazzjoni baxxa ħafna, baxxa, medja jew għolja kif imniżżel fil-punt 3 tal-Anness.

Artikolu 3

Lista ppubblikata ta’ kumpaniji bi prestazzjoni baxxa u baxxa ħafna

1.   Il-Kummissjoni għandha tiġi mgħejjuna mill-Aġenzija Ewropea għas-Sigurtà Marittima (EMSA) bil-għan li jkun hemm pubblikazzjoni regolari tal-lista fuq sit pubbliku tal-informazzjoni dwar il-kumpaniji bi prestazzjoni baxxa u baxxa ħafna skont l-Artikolu 27 tad-Direttiva Nru 2009/16/KE.

2.   EMSA għandha tippubblika u taġġorna l-informazzjoni li ġejja kuljum fuq is-sit pubbliku:

(a)

il-lista tal-kumpaniji li l-prestazzjoni tagħhom waqt is-36 xahar ta’ qabel kienet baxxa ħafna, għal perjodu ta’ għall-anqas tliet xhur fuq bażi kontinwa;

(b)

il-lista tal-kumpaniji li l-prestazzjoni tagħhom waqt is-36 xahar ta’ qabel kienet tvarja bejn baxxa u baxxa ħafna, għal perjodu ta’ għall-anqas tliet xhur fuq bażi kontinwa;

(c)

il-lista tal-kumpaniji li l-prestazzjoni tagħhom waqt is-36 xahar ta’ qabel kienet baxxa ħafna, għal perjodu ta’ għall-anqas sitt xhur fuq bażi kontinwa.

Artikolu 4

Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-publikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 Jannar 2011.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-13 ta’ Settembru 2010.

Għall-Kummissjoni

Il-President

José Manuel BARROSO


(1)   ĠU L 131, 28.5.2009, p. 57.

(2)   ĠU L 208, 5.8.2002, p. 1.


ANNESS

IL-KRITERJI TAL-PRESTAZZJONI TAL-KUMPANIJI

(kif imsemmi fl-Artikolu 10(3) tad-Direttiva 2009/16/KE)

1.   Indiċi ta’ detenzjoni ta’ kumpanija

L-indiċi tad-detenzjoni huwa l-proporzjon bejn l-għadd ta’ detenzjonijiet tal-bastimenti kollha fil-flotta ta’ kumpanija u l-għadd ta’ spezzjonijiet tal-bastimenti kollha fil-flotta tal-kumpanija fis-36 xahar preċedenti, meta mqabbel mal-proporzjon medju ta’ detenzjonijiet għall-bastimenti kollha li saritilhom spezzjoni fir-reġjun kopert mill-MoU ta’ Pariġi fis-36 xahar preċedenti.

L-indiċi tad-detenzjoni għandu jiġi kkunsidrat medju jekk jikkorrispondi mar-rata medja għall-bastimenti kollha spezzjonati fir-reġjun kopert mill-MoU ta’ Pariġi fis-36 xahar preċedenti.

L-indiċi tal-detenzjoni għandu jiġi kkunsidrat ’l fuq mill-medju jekk hi 2 punti ta’ perċentwali iktar mill-indiċi tal-detenzjoni medja għall-bastimenti kollha spezzjonati fir-reġjun kopert mill-MoU ta’ Pariġi fis-36 xahar preċedenti.

L-indiċi tal-detenzjoni għandu jiġi kkunsidrat ’l isfel mill-medju jekk hi 2 punti ta’ perċentwali iktar mill-indiċi tal-detenzjoni medja għall-bastimenti kollha spezzjonati fir-reġjun kopert mill-MoU ta’ Pariġi fis-36 xahar preċedenti.

L-indiċi ta’ detenzjoni ta’ kumpanija għandu ikun fuq il-medja irrispettivament tar-riżultati kollha l-oħra li joħorġu mill-ispezzjoni jekk l-ordni ta’ aċċess skont id-Direttiva Nru 2009/16/KE tiġi rifjutata fis-36 xahar preċedenti għal kwalunkwe bastiment fil-flotta ta’ dik il-kumpanija.

2.   Indiċi tan-nuqqasijiet ta’ kumpanija

L-indiċi tan-nuqqasijiet huwa l-proporzjon bejn l-punti totali ta’ nuqqasijiet tal-bastimenti kollha fil-flotta ta’ kumpanija għall-għadd ta’ spezzjonijiet tal-bastimenti kollha fil-flotta ta’ kumpanija fis-36 xahar preċedenti, meta mqabbel mal-proporzjon medju tan-nuqqasijiet għall-bastimenti kollha li tkun saritilhom spezzjoni fir-reġjun kopert mill-MoU ta’ Pariġi fis-36 xahar preċedenti.

Għall-finjijet tal-ewwel subparagrafu in-nuqqasijiet relatati mal-Kodiċi ISM għandhom jitqiesu daqs 5 punti filwaqt li kwalunkwe nuqqas ieħor għandu jitqies daqs punt (1). Il-proporzjon medju tan-nuqqasijiet fir-reġjun kopert mill-MoU ta’ Pariġi għandu jitqies billi tiġi kkalkulata l-okkorrenza medja tan-nuqqasijiet relatati mal-Kodiċi ISM u kwalunkwe nuqqasijiet oħra għal kull spezzjoni.

L-indiċi tad-detenzjoni għandu jiġi kkunsidrat medju jekk jikkorrispondi mar-rata medja għall-bastimenti kollha spezzjonati fir-reġjun kopert mill-MoU ta’ Pariġi fis-36 xahar preċedenti.

L-indiċi tad-detenzjoni għandu jiġi kkunsidrat ’l fuq mill-medju jekk hi 2 punti ta’ perċentwali iktar mill-indiċi tad-detenzjoni medja għall-bastimenti kollha spezzjonati fir-reġjun kopert mill-MoU ta’ Pariġi fis-36 xahar preċedenti.

L-indiċi tad-detenzjoni għandu jiġi kkunsidrat ’l isfel mill-medju jekk hi 2 punti ta’ perċentwali iktar mill-indiċi tad-detenzjoni medja għall-bastimenti kollha spezzjonati fir-reġjun kopert mill-MoU ta’ Pariġi fis-36 xahar preċedenti.

3.   Il-matriċi tal-prestazzjoni tal-kumpaniji

Il-prestazzjoni tal-kumpanija għandha tiġi kklassifikata kif ġej:

Indiċi ta’ Detenzjoni

Indiċi tan-Nuqqasijiet

Prestazzjoni ta’ Kumpanija

fuq il-medja

fuq il-medja

baxxa ħafna

fuq il-medja

medja

baxxa

fuq il-medja

taħt il-medja

medja

fuq il-medja

taħt il-medja

fuq il-medja

medja

medja

fin-nofs

medja

taħt il-medja

taħt il-medja

medja

taħt il-medja

taħt il-medja

għolja

Madankollu, jekk kumpanija m’għandha ebda rekord preċedenti ta’ ispezzjonijiet magħmula fuq il-flotta tagħha jew mhux meħtieġ li jkollha numru IMO, għandha tiġi kkunsidrata bħala li għandha prestazzjoni medja.