(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, tressqu żewġ applikazzjonijiet għall-awtorizzazzjoni tas-sulfat tal-L-liżina u tal-monoidroklorur tal-L-liżina prodotti b’Corynebacterium glutamicum CGMCC 7.453 rispettivament. Ma’ dawk l-applikazzjonijiet intbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

L-applikazzjonijiet jikkonċernaw l-awtorizzazzjoni tas-sulfat tal-L-liżina u tal-monoidroklorur tal-L-liżina prodotti b’Corynebacterium glutamicum CGMCC 7.453 bħala addittivi tal-għalf għall-użu fl-għalf u fl-ilma tax-xorb għall-ispeċijiet kollha tal-annimali, bit-talba li dawk l-addittivi jiġu kklassifikati fil-kategorija tal-addittivi “addittivi nutrittivi” u fil-grupp funzjonali “aċidi amminiċi, l-imlieħ u l-analogi tagħhom”.

(4)

Fl-opinjonijiet tagħha tat-18 ta’ Marzu 2025 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li s-sulfat tal-L-liżina u l-monoidroklorur tal-L-liżina prodotti b’Corynebacterium glutamicum CGMCC 7.453 huma sikuri għall-ispeċijiet fil-mira meta jingħataw permezz tal-għalf. L-użu tal-liżina “per se” mhux se joħloq tħassib dwar is-sikurezza għall-annimali fil-mira sakemm din tiġi ssupplimentata f’ammonti xierqa għad-dieti. L-Awtorità għandha tħassib dwar l-użu tas-sulfat tal-L-liżina u tal-monoidroklorur tal-L-liżina fl-ilma tax-xorb. Fir-rigward tal-kontenut intrinsiku għoli ta’ sulfat fis-sulfat tal-L-liżina, l-Awtorità tqis li, meta jintuża l-addittiv, il-formulazzjoni tal-għalf komplet jenħtieġ li tqis bir-reqqa l-livell massimu tollerabbli ta’ kubrit totali. Il-kontribut tal-kubrit/sulfat preżenti fl-ilma tax-xorb għall-konsum totali tal-kubrit jenħtieġ li jiġi kkunsidrat ukoll. L-Awtorità kkonkludiet li l-użu tas-sulfat tal-L-liżina u tal-monoidroklorur tal-L-liżina prodotti b’Corynebacterium glutamicum CGMCC 7.453 fin-nutrizzjoni tal-annimali huwa sikur għall-konsumaturi u għall-ambjent. Ikkonkludiet ukoll li l-addittivi jenħtieġ li jitqiesu bħala irritanti għall-ġilda, għall-għajnejn u għas-sistema respiratorja. Barra minn hekk, l-Awtorità kkonkludiet li s-sustanzi jitqiesu bħala sors effikaċi tal-aċidu amminiku essenzjali L-liżina għall-ispeċijiet tal-annimali mhux ruminanti u li biex l-L-liżina supplimentali tkun effikaċi fir-ruminanti daqs kemm hi fl-ispeċijiet mhux ruminanti, jenħtieġ li tiġi protetta mid-degradazzjoni fil-kirxa. L-Awtorità ma dehrilhiex li hemm bżonn ta’ rekwiżiti speċifiċi ta’ monitoraġġ ta’ wara l-introduzzjoni fis-suq. Ivverifikat ukoll ir-rapport dwar il-metodu ta’ analiżi tal-addittiv tal-għalf fl-għalf, li tressaq mil-Laboratorju ta’ Referenza stabbilit bir-Regolament (KE) Nru 1831/2003.

(5)

Fid-dawl ta’ dan ta’ hawn fuq, il-Kummissjoni tqis li s-sulfat tal-L-liżina u l-monoidroklorur tal-L-liżina prodotti b’Corynebacterium glutamicum CGMCC 7.453 jissodisfaw il-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-użu ta’ dawk is-sustanzi bħala addittivi tal-għalf jiġi awtorizzat. Il-Kummissjoni tqis li l-użu sikur ta’ dawn l-aċidi amminiċi fl-ilma tax-xorb, fir-rigward tar-riskji iġeniċi possibbli, għandu jitqies fl-ambitu tar-Regolament (KE) Nru 183/2005 tal-Parlament Ewropew u tal-Kunsill (3) li jistipula r-rekwiżiti għall-iġene tal-għalf. Jixraq li l-utent jiġi mwissi biex iqis il-provvista djetetika bl-aċidi amminiċi essenzjali u kundizzjonalment essenzjali kollha, b’mod partikolari fil-każ tas-supplimentazzjoni bis-sulfat tal-L-liżina u bil-monoidroklorur tal-L-liżina permezz tal-ilma għax-xorb. Meta jiġu mitmugħa lir-ruminanti, is-sulfat tal-L-liżina u l-monoidroklorur tal-L-liżina prodotti b’Corynebacterium glutamicum CGMCC 7.453 jeħtieġ li jiġu protetti mid-degradazzjoni fil-kirxa. Barra minn hekk, il-Kummissjoni tqis li jenħtieġ li jiġi stabbilit livell massimu għas-sulfat tal-L-liżina minħabba l-effetti negattivi potenzjali mill-kontenut intrinsiku għoli ta’ sulfat fl-addittiv. Il-livell ta’ 10 000 mg/kg ta’ għalf komplet tqies bħala sikur skont l-opinjoni tal-Awtorità tas-16 ta’ Ġunju 2015 (4) maħruġa għal sulfat tal-L-liżina ieħor. Barra minn hekk, il-Kummissjoni tqis li jenħtieġ li jittieħdu miżuri protettivi xierqa biex jiġu evitati l-effetti negattivi fuq is-saħħa tal-utenti tal-addittiv.

(6)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,