(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach dhá iarratas maidir le húdarú sulfáite L-lisín agus monaihidreaclóiríde L-lisín arna dtáirgeadh le Corynebacterium glutamicum CGMCC 7.453 faoi seach. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis na hiarratais sin.

(3)

Baineann na hiarratais le húdarú sulfáite L-lísín agus monaihidreaclóiríde L-lísín arna dtáirgeadh le Corynebacterium glutamicum CGMCC 7.453 mar bhreiseáin bheathaithe lena n-úsáid i mbeatha agus in uisce óil le haghaidh gach speicis ainmhíoch, iarratais ina n-iarrtar na breiseáin sin a aicmiú sa chatagóir breiseán ‘breiseáin chothaitheacha’ agus san fheidhmghrúpa ‘aimíonaigéid, a salainn agus analóga’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 18 Márta 2025 (2) go bhfuil sulfáit L-lísín agus monaihidreaclóiríd L-lisín arna dtáirgeadh le Corynebacterium glutamicum CGMCC 7.453 sábháilte don spriocspeiceas nuair a thugtar trí bheatha iad. Ní bheidh úsáid lísín ‘per se’ ina cúis imní sábháilteachta do na spriocainmhithe ar choinníoll go ndéantar é a fhorlíonadh i méideanna iomchuí leis na haistí bia. Tá imní ar an Údarás maidir le húsáid sulfáite L-lísín agus monaihidreaclóiríde L-lísín in uisce óil. Maidir leis an gcion ard intreach sulfáite i sulfáit L-lísín, measann an tÚdarás, agus an breiseán á úsáid aige, gur cheart uasleibhéal inghlactha an tsulfair iomláin a chur san áireamh go cúramach i bhfoirmliú na beatha iomláine. Ba cheart a chur san áireamh an méid a chuireann an sulfar/an tsulfáit atá in uisce óil leis an iontógáil iomlán sulfair. Tháinig an tÚdarás ar an gconclúid go bhfuil úsáid sulfáite L-lísín agus monaihidreaclóiríde L-lísín arna dtáirgeadh le Corynebacterium glutamicum CGMCC 7.453 i gcothú ainmhithe sábháilte do thomhaltóirí agus don chomhshaol. Tháinig sé ar an gconclúid freisin gur cheart na breiseáin a mheas mar ghreannaitheoirí don chraiceann, do na súile agus don chonair riospráide. Tháinig an tÚdarás ar an gconclúid thairis sin gur foinse éifeachtúil den aimíonaigéad riachtanach L-lísín iad na substaintí le haghaidh speicis ainmhíocha neamh-athchogantacha, agus gur cheart an L-lísín forlíontach a chosaint ar dhíghrádú sa chogansach ionas go mbeadh sé chomh héifeachtúil céanna i gcás na n-athchogantach agus atá i gcás na speiceas neamh-athchogantach. Níor mheas an tÚdarás go bhfuil gá le ceanglais shonracha maidir le faireachán iarmhargaidh. D’fhíoraigh sé freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann sulfáit L-lísín agus monaihidreaclóiríd L-lísín arna dtáirgeadh le Corynebacterium glutamicum CGMCC 7.453 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substaintí sin mar bhreiseáin bheathaithe a údarú. Measann an Coimisiún go bhfuil úsáid shábháilte na n-aimíonaigéad sin in uisce óil, maidir le rioscaí sláinteachais a d’fhéadfadh a bheith ann, le breithniú faoi raon feidhme Rialachán (CE) Uimh. 183/2005 ó Pharlaimint na hEorpa agus ón gComhairle (3) lena leagtar síos ceanglais maidir le sláinteachas beatha ainmhithe . Is iomchuí an t-úsáideoir a chur ar an eolas chun go gcuirfidh sé an soláthar cothaithe san áireamh le gach aimíonaigéad atá riachtanach agus gach aimíonaigéad atá riachtanach go coinníollach, go háirithe i gcás ina mbaintear úsáid as sulfáit L-lísín agus monaihidreaclóiríd L-lísín mar fhorlíonadh in uisce óil. Nuair a thugtar iad d’athchogantaigh, ní mór sulfáit L-lísín agus monaihidreaclóiríd L-lísín arna dtáirgeadh le Corynebacterium glutamicum CGMCC 7,453 a chosaint ar dhíghrádú sa chogansach. Ina theannta sin, measann an Coimisiún gur cheart uasleibhéal a bhunú le haghaidh sulfáit L-lísín mar gheall ar na héifeachtaí díobhálacha a d’fhéadfadh a bheith ann ón gcion ard intreach sulfáite sa bhreiseán. Measadh go raibh an leibhéal 10 000 mg/kg d’ábhar beatha iomlán sábháilte de réir na tuairime ón Údarás an 16 Meitheamh 2015 (4) a eisíodh maidir le sulfáit L-lísín eile. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,