(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú L-vailín arna tháirgeadh le Corynebacterium glutamicum KCCM 80365. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú L-vailín arna tháirgeadh le Corynebacterium glutamicum KCCM 80365 mar bhreiseán beathaithe lena úsáid i mbeatha agus in uisce óil le haghaidh gach speicis ainmhíoch, iarratas ina n-iarrtar an breiseán a aicmiú sa chatagóir breiseán ‘breiseáin chothaitheacha’ agus san fheidhmghrúpa ‘aimíonaigéid, a salainn agus analóga’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 18 Márta 2025 (2) go bhfuil L-vailín arna tháirgeadh le Corynebacterium glutamicum KCCM 80365 sábháilte do na spriocspeicis, agus aistí bia á bhforlíonadh le méideanna iomchuí de i gcomhréir lena riachtanais chothaitheacha. Mar sin féin, mar gheall ar an riosca go mbeadh míchothromaíochtaí cothaitheacha ann nó ar chúiseanna sláinteachais, tá imní ar an Údarás maidir le húsáid l-vailín in uisce óil. Tháinig an tÚdarás ar an gconclúid go bhfuil úsáid L-vailín arna tháirgeadh le Corynebacterium glutamicum KCCM 80365 i gcothú ainmhithe sábháilte do thomhaltóirí agus don chomhshaol. Tháinig sé ar an gconclúid freisin nach greannaitheoir súl ná craicinn é an breiseán agus nach meastar gur íogróir craicinn é. Tháinig an tÚdarás ar an gconclúid thairis sin gur foinse éifeachtúil den aimíonaigéad riachtanach L-vailín í an tsubstaint le haghaidh ainmhithe neamh-athchogantacha, agus gur cheart an L-vailín a chosaint ar dhíghrádú sa chogansach ionas go mbeadh sé lán-éifeachtúil i gcás na n-athchogantach. Níor mheas an tÚdarás go bhfuil gá le ceanglais shonracha maidir le faireachán iarmhargaidh. D’fhíoraigh sé freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann L-vailín arna tháirgeadh le Corynebacterium glutamicum KCCM 80365 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substainte sin mar bhreiseán beathaithe a údarú. Measann an Coimisiún go bhfuil úsáid shábháilte an aimíonaigéid sin in uisce óil, maidir le rioscaí sláinteachais a d’fhéadfadh a bheith ann, le breithniú faoi raon feidhme Rialachán (CE) Uimh. 183/2005 lena leagtar síos ceanglais maidir le sláinteachas beatha ainmhithe (3). Nuair a thugtar é d’athchogantaigh, ní mór L-vailín arna tháirgeadh le Corynebacterium glutamicum KCCM 80365 a chosaint ar dhíghrádú sa chogansach. Is iomchuí an t-úsáideoir a chur ar an eolas chun go gcuirfidh sé an soláthar cothaithe san áireamh le gach aimíonaigéad atá riachtanach agus gach aimíonaigéad atá riachtanach go coinníollach, go háirithe i gcás ina mbaintear úsáid as L-vailín mar fhorlíonadh in uisce óil.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,