European flag

Iris Oifigiúil
an Aontais Eorpaigh

GA

Sraith L


2026/753

1.4.2026

CINNEADH CUR CHUN FEIDHME (AE) 2026/753 ÓN gCOIMISIÚN

an 31 Márta 2026

lena n-aithnítear go bhfuil sonraí cruinne sa tuarascáil a chuir an Laitvia isteach faoi Airteagal 31(2) de Threoir (AE) 2018/2001 ó Pharlaimint na hEorpa agus ón gComhairle chun astaíochtaí gás ceaptha teasa a bhaineann le saothrú cruithneachta sa Bhallstát sin a thomhas

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir (AE) 2018/2001 ó Pharlaimint na hEorpa agus ón gComhairle an 11 Nollaig 2018 maidir le húsáid fuinnimh ó fhoinsí in-athnuaite a chur chun cinn (1), agus go háirithe Airteagal 31(4) di,

De bharr an mhéid seo a leanas:

(1)

Tá sé de cheanglas i dTreoir (AE) 2018/2001 go sábháiltear le bithbhreoslaí, bithleachtanna agus breoslaí bithmhaise líon mór astaíochtaí gás ceaptha teasa i gcomparáid le breoslaí iontaise ionas gur féidir iad a áireamh i leith na spriocanna a leagtar amach sa Treoir sin. Chun na críche sin, in Airteagal 29(10) den Treoir sin leagtar síos tairseacha sonracha maidir le laghdú ar astaíochtaí le haghaidh na mbreoslaí sin, agus le hAirteagal 31 rialaítear an bealach a ríomhtar an laghdú ar astaíochtaí gás ceaptha teasa ó úsáid na mbreoslaí sin. Agus na ríomhanna sin á ndéanamh, is féidir úsáid a bhaint as na luachanna réamhshocraithe a leagtar amach in Iarscríbhinní V agus VI a ghabhann le Treoir (AE) 2018/2001. In ionad luachanna réamhshocraithe na n-astaíochtaí gás ceaptha teasa ó shaothrú amhábhar talmhaíochta, is féidir úsáid a bhaint as luachanna tipiciúla faoi roinnt coinníollacha. Maidir leis na luachanna tipiciúla sin, arb éard atá iontu an meánluach i limistéar sonrach, féadfaidh na Ballstáit nó tríú tíortha iad a thuairisciú don Choimisiún. Ní fhéadfar na luachanna tipiciúla a úsáid ach amháin má aithníonn an Coimisiún go bhfuil siad cruinn.

(2)

An 23 Iúil 2025 chuir an Laitvia an tuarascáil chríochnaitheach faoi bhráid an Choimisiúin ina raibh sonraí chun na hastaíochtaí gás ceaptha teasa a thomhas a bhaineann le saothrú cruithneachta a tháirgtear de ghnáth i limistéir ina críoch a aicmítear mar leibhéal 2 in aicmiú comhchoiteann na n-aonad críche maidir le staidreamh. D’iarr an Laitvia go n-aithneofaí na sonraí mar shonraí cruinne i gcomhréir le hAirteagal 31(4) de Threoir (AE) 2018/2001.

(3)

Rinne an Coimisiún measúnú ar an tuarascáil agus chinn sé go bhfuil sonraí cruinne inti chun na hastaíochtaí gás ceaptha teasa a bhaineann le saothrú síl ráibe a tháirgtear de ghnáth i réigiúin NUTS 2 sa Laitvia a thomhas.

(4)

Na bearta dá bhforáiltear sa Chinneadh seo, tá siad i gcomhréir leis an tuairim ón gCoiste um Inbhuanaitheacht Bithbhreoslaí, Bithleachtanna agus Breoslaí Bithmhaise,

TAR ÉIS AN CINNEADH SEO A GHLACADH:

Airteagal 1

Sa tuarascáil a chuir an Laitvia faoi bhráid an Choimisiúin an 23 Iúil 2025 chun aitheantas a fháil ina leith, tá sonraí cruinne chun na hastaíochtaí gás ceaptha teasa a bhaineann le saothrú síl ráibe agus a tháirgtear de ghnáth i réigiúin NUTS 2 sa Laitvia a thomhas. Leagtar amach san Iarscríbhinn achoimre ar shonraí na tuarascála.

Airteagal 2

I gcás ina ndéanfar athrú ar na sonraí sa tuarascáil, mar a cuireadh faoi bhráid an Choimisiúin í chun aitheantas a fháil ina leith an 23 Iúil 2025, arb athrú é a d’fhéadfadh difear a dhéanamh do chruinneas na sonraí agus, dá bhrí sin, don bhunús leis an gCinneadh seo, tabharfaidh an Laitvia fógra don Choimisiún faoi aon athrú den sórt sin láithreach. Déanfaidh an Coimisiún measúnú ar na hathruithe faoina dtugtar fógra chun a chinneadh an soláthraítear na sonraí cruinne fós sa tuarascáil a bhfuil sí aitheanta ina leith.

Airteagal 3

Tiocfaidh an Cinneadh seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Scoirfidh sé d’fheidhm a bheith aige an 21 Aibreán 2031.

Arna dhéanamh sa Bhruiséil, an 31 Marta 2026.

Thar ceann an Choimisiúin

An tUachtarán

Ursula VON DER LEYEN


(1)   IO L 328, 21.12.2018, lch. 82, ELI: http://data.europa.eu/eli/dir/2018/2001/oj.


IARSCRÍBHINN

Astaíochtaí gás ceaptha teasa ó shaothrú síl ráibe sa Laitvia le haghaidh réigiúin NUTS-2 (tonaí CO2eq/tona de shíol ráibe a bhuantar ar bhonn ábhar tirim)

Réigiún NUTS-2 de réir Rialachán (CE) Uimh. 1059/2003

N2O na hithreach

Leabaithe

Úsáid breosla

Síolta

Iomlán

Díreach

Indíreach

Leasachán

Neodrú

Lotnaidicíd

LV000

Latvija

0,332

0,03

0,206

0,037

0,004

0,093

0,001

0,705


ELI: http://data.europa.eu/eli/dec_impl/2026/753/oj

ISSN 1977-0839 (electronic edition)