(1)

Ir-Regolament ta’ Implimentazzjoni tal-Kummissjoni (UE) 2022/1194 (2) jistabbilixxi l-miżuri għall-qerda tal-Clavibacter sepedonicus (Spieckermann & Kotthoff 1914) Nouioui et al. 2018 u għall-prevenzjoni tat-tifrix tiegħu fit-territorju tal-Unjoni.

(2)

F’konformità mal-Artikolu 6(1), l-ewwel subparagrafu, tar-Regolament ta’ Implimentazzjoni (UE) 2022/1194, pjanti speċifikati deżinjati bħala infettati mill-pest speċifikat ma għandhomx jitħawlu. L-awtorità kompetenti trid tiżgura li l-pjanti speċifikati infettati jinqerdu jew jintremew b’xi mod ieħor, dment li ma hemm l-ebda riskju identifikabbli li jinfirex il-pest speċifikat.

(3)

Peress li l-awtoritajiet kompetenti ma jistgħux jaċċedu faċilment il-postijiet rispettivi kollha, dawk il-miżuri jistgħu jitwettqu b’mod aktar effettiv mill-operaturi professjonisti, taħt is-superviżjoni tal-awtorità kompetenti, milli mill-awtoritajiet kompetenti nnifishom.

(4)

F’konformità mal-Artikolu 3(3) ta’ dak ir-Regolament, l-Istati Membri jridu jwettqu stħarriġiet annwali bbażat fuq ir-riskju għall-preżenza ta’ dak il-pest u jridu jirrappurtaw kull sena r-riżultati ta’ dawk l-istħarriġiet lill-Kummissjoni u lill-Istati Membri l-oħra. L-Istati Membri jridu jużaw il-mudell stabbilit fl-Anness II ta’ dak ir-Regolament biex jirrappurtaw dawk ir-riżultati.

(5)

Waqt l-applikazzjoni tar-Regolament ta’ Implimentazzjoni (UE) 2022/1194, ġie nnutat li dan il-mudell jenħtieġ li jiġi emendat biex jittejbu l-użu prattiku u l-effikaċja tiegħu.

(6)

B’mod partikolari, ir-rapportar tad-data dwar il-kampjunar tat-tuberi għajr it-tuberi għat-taħwil u għajr il-patata għall-konsum u għall-ipproċessar, ma jipprovdi l-ebda informazzjoni notevoli għall-fini tal-istħarriġ.

(7)

Barra minn hekk, jeħtieġ li jkun ċar jekk l-ittestjar fil-laboratorju sarx mill-kampjunar tat-tuberi maħżuna jew tat-tuberi matul l-ispezzjoni viżivi tal-għelejjel li qed jikbru.

(8)

L-għadd ta’ spezzjonijiet viżivi pożittivi jista’ jiġi rreġistrat biss wara li jinkisbu r-riżultati mill-ittestjar fil-laboratorju. Għalhekk, jenħtieġ li l-kolonna rispettiva tiġi trasferita taħt it-taqsimiet dwar it-testijiet fil-laboratorju.

(9)

Matul l-ispezzjonijiet viżivi jittieħdu kampjuni sintomatiċi u asintomatiċi. L-infezzjonijiet latenti jinstabu fil-kampjuni asintomatiċi. Minħabba l-importanza tal-infezzjonijiet latenti għall-fehim tat-tixrid possibbli tal-marda u għall-miżuri li jridu jittieħdu biex jiġi evitat dan it-tixrid, jenħtieġ li fil-mudell issir distinzjoni bejn ir-riżultati mill-kampjuni sintomatiċi u dawk asintomatiċi.

(10)

L-esperjenza wriet li r-rapportar tad-data dwar il-perjodu tal-kampjunar tat-tuberi għall-ittestjar fil-laboratorju ma jipprovdi l-ebda informazzjoni notevoli għall-fini tal-istħarriġ.

(11)

Ir-rekwiżiti għad-daqs tal-kampjun huma previsti fil-punt 4 tal-Anness I tar-Regolament ta’ Implimentazzjoni (UE) 2022/1194. Għalhekk, ir-rekwiżit għall-indikazzjoni fil-mudelli tad-data dwar id-daqs tal-lottijiet f’tunnellati ma għadhiex aktar meħtieġa u toħloq biss piż amministrattiv żejjed.

(12)

Barra minn hekk, fl-ewwel sentenza tal-Anness II jeħtieġ jiġi ċċarat li l-mudell huwa għall-preżentazzjoni tar-riżultati tal-istħarriġ mill-ħsad tal-patata tas-sena qabel is-sena tar-rapportar sabiex tiġi evitata konfużjoni min-naħa tal-awtoritajiet kompetenti dwar is-sena kkonċernata u biex tiġi ffaċilitata l-preżentazzjoni konsistenti tar-riżultati rispettivi mid-diversi awtoritajiet kompetenti.

(13)

Għalhekk ir-Regolament ta’ Implimentazzjoni (UE) 2022/1194 jenħtieġ li jiġi emendat skont dan.

(14)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

fl-Artikolu 6(1), l-ewwel subparagrafu huwa sostitwit b’dan li ġej:

“Il-pjanti speċifikati deżinjati bħala infettati mill-pest speċifikat skont l-Artikolu 5(5), il-punt (a) ma għandhomx jitħawlu. L-operaturi professjonisti, taħt is-superviżjoni uffiċjali tal-awtorità kompetenti, għandhom jiżguraw li l-pjanti speċifikati infettati jinqerdu jew jintremew b’mod ieħor, f’konformità mal-punt 1 tal-Anness V, dment li jiġi stabbilit li ma hemm l-ebda riskju identifikabbli li l-pest speċifikat jinxtered.”;

(2)

L-Anness II huwa sostitwit bit-test fl-Anness ta’ dan ir-Regolament.