(1)

Leagtar síos le Rialachán (CE) Uimh. 273/2004 bearta maidir le faireachán ar an trádáil i réamhtheachtaithe drugaí laistigh den Aontas, agus rialaítear le Rialachán (CE) Uimh. 111/2005 an trádáil i réamhtheachtaithe drugaí idir an tAontas agus tríú tíortha. Iarscríbhinn I a ghabhann le Rialachán (CE) Uimh. 273/2004 agus an Iarscríbhinn a ghabhann le Rialachán (CE) Uimh. 111/2005, i ngach ceann de na hIarscríbhinní sin tá liosta de shubstaintí sceidealaithe, substaintí atá faoi réir roinnt beart comhchuibhithe rialaithe agus faireacháin dá bhforáiltear leis na Rialacháin sin.

(2)

Le Cinntí 67/6 agus 67/7 ó Choimisiún na Náisiún Aontaithe um Dhrugaí Támhshuanacha, arna nglacadh ag a 67ú seisiún ón 18 Márta go dtí an 23 Márta 2024, cuireadh na substaintí 4-pipiridón agus 1-boc-4-pipiridón le Tábla I de Choinbhinsiún na Náisiún Aontaithe i gcoinne Gáinneáil Aindleathach Drugaí Támhshuanacha agus Substaintí Síceatrópacha, arna nglacadh in Vín an 19 Nollaig 1988 (‘Coinbhinsiún NA 1988’) agus faomhadh é thar ceann an Aontais le Cinneadh 90/611/CEE ón gComhairle (3).

(3)

Dá réir sin, ba cheart na substaintí 4-pipiriodón agus 1-boc-4-pipiriodón a áireamh in Iarscríbhinn I a ghabhann le Rialachán (CE) Uimh. 273/2004 agus san Iarscríbhinn a ghabhann le Rialachán (CE) Uimh. 111/2005.

(4)

Is réamhtheachtaí luathchéime í an tsubstaint 4-pipiriodón a bhfuil baint aige leis an gcuid is mó de na bealaí sintéiseacha chun feantainil agus roinnt analóg feantainile a dhéanamh. Is féidir é a úsáid chun n-feineitil-4-pipiriodón (NPP), 4-Anailínea-N-feineitilpipiridín (ANPP), n-feinilpipiridín-4-aimín (4-AP) agus noirfeantainil a dhéanamh, ar substaintí iad a liostaítear i dTábla I de Choinbhinsiún NA 1988.

(5)

Is díorthach de 4-pipiriodón í an tsubstaint 1-boc-4-pipiriodón atá faoi chosaint cheimiceach agus is féidir é a úsáid chun 4-anailínipipiridín-1-carbocsaláit treas-búitile (1-boc-4-AP) a dhéanamh agus noirfeantainil a dhéanamh ina dhiaidh sin, ar substaintí iad sin a liostaítear i dTábla I de Choinbhinsiún NA 1988. Is féidir an tsubstaint 1-boc-4-pipiriodón a thiontú ar ais go 4-pipiriodón freisin.

(6)

Is réamhtheachtaithe iad 4-Pipiriodón agus 1-boc-4-pipiriodón atá an-oiriúnach do mhonarú aindleathach feantainile agus analóg feantainile.

(7)

Tá feantainil agus analóga feantainile ina ndrugaí támhshuanacha an-láidir, a bhíonn idir 10 n-oiread agus 100 oiread níos láidre ná hearóin. Dá réir sin, is leor méideanna beaga de 4-pipiriodón agus 1-boc-4-pipiriodón (raon kg) chun na milliúin dáileog de tháirgí deiridh (feantainilí) a mhonarú.

(8)

Dá bhrí sin, ba cheart 4-pipiriodón agus 1-boc-4-pipiriodón a áireamh ar liosta na substaintí sceidealaithe ar leibhéal an Aontais chun an rialú agus an faireachán orthu a threisiú.

(9)

Na substaintí sceidealaithe a liostaítear in Iarscríbhinn I a ghabhann le Rialachán (CE) Uimh. 273/2004 agus san Iarscríbhinn a ghabhann le Rialachán (CE) Uimh. 111/2005, roinntear iad ina gcatagóirí, catagóirí dá gcuirtear bearta éagsúla i bhfeidhm, ionas go mbainfear cothromaíocht chomhréireach amach idir leibhéal na bagartha a bhaineann le gach substaint faoi seach agus an t-ualach ar an trádáil dhleathach. Cuirtear na bearta rialaithe agus faireacháin is doichte i bhfeidhm maidir leis na substaintí i gCatagóir 1.

(10)

Tá monarú agus trádáil dhlisteanach theoranta i 4-pipiriodón agus 1-boc-4-pipiriodón ar eolas. Dá bhrí sin, bheadh ualach riaracháin teoranta breise ar oibreoirí eacnamaíocha agus ar na húdaráis inniúla san Aontas mar thoradh ar sceidealú na substaintí sin i gCatagóir 1.

(11)

Dá bhrí sin, ba cheart Rialacháin (CE) Uimh. 273/2004 agus (CE) Uimh. 111/2005 a leasú dá réir.

(12)

Le Rialachán (CE) Uimh. 273/2004 agus Rialachán (CE) Uimh. 111/2005, déantar forálacha áirithe de Choinbhinsiún NA 1988 a chur chun feidhme go comhpháirteach. I bhfianaise an dlúthcheangail shubstaintigh idir na cumhachtuithe atá sa dá Rialachán sin, is iomchuí na leasuithe a ghlacadh trí bhíthin aon ghnímh tharmligthe amháin,