ANNESS

DOKUMENT TA' PROĠETT

Konsorzju tal-UE għan-Nonproliferazzjoni u d-Diżarm (Fażi IV) – RGħ(2022) 34

17 ta' Jannar 2022

Il-Konsorzju tal-UE għan-Nonproliferazzjoni u d-Diżarm (EUNPDC) inħoloq mill-Kunsill tal-Unjoni Ewropea bil-għan li jiġi stabbilit Network Ewropew ta' gruppi ta' riflessjoni indipendenti biex jinkoraġġixxu d-djalogu politiku u relatat mas-sigurtà u d-diskussjoni fit-tul ta' miżuri għall-ġlieda kontra l-proliferazzjoni ta' armi ta' qerda massiva (AQM) u s-sistemi ta' kunsinna tagħhom. Tali djalogu jkopri wkoll kwistjonijiet relatati ma' armi konvenzjonali, inkluż armi ħfief u ta' kalibru żgħir (SALW). Imniedi fl-2010 bid-Deċiżjoni tal-Kunsill 2010/430/PESK, l-appoġġ imġedded tal-UE għall-proġett għal żewġ fażijiet oħra fl-2014 (bid-Deċiżjoni tal-Kunsill 2014/129/PESK tal-UE) u fl-2018 (bid-Deċiżjoni tal-Kunsill 2018/299/PESK tal-UE). L-implimentazzjoni tal-Fażi III ser tiġi konkluża f'Mejju 2022.

Bħalissa l-EUNPDC jikkonsisti fil-Fondation pour la Recherche Stratégique (FRS), l-Istituto Affari Internazionali (IAI), l-Istitut Internazzjonali għall-Istudji Strateġiċi (IISS), l-Istitut ta' Riċerka dwar il-Paċi ta' Frankfurt (HSFK/PRIF), l-Istitut Internazzjonali ta' Riċerka dwar il-Paċi ta' Stokkolma (SIPRI) u ċ-Ċentru ta' Vjenna għad-Diżarm u n-Nonproliferazzjoni (VCDNP). Matul is-snin in-Network espanda biex jinkludi 104 membri fost il-gruppi ta' riflessjoni, iċ-ċentri ta' riċerka u d-dipartimenti universitarji bbażati fl-Istati Membri kollha tal-UE u f'sitt pajjiżi oħra (in-Norveġja, is-Serbja, l-Iżvizzera, it-Turkija, l-Ukrajna, ir-Renju Unit).

Ir-rwol tal-Konsorzju huwa li jikkoordina u jippromwovi n-Network u jagħmel l-għarfien espert tiegħu disponibbli għall-UE, bil-ħsieb li jinforma d-diskussjoni tal-korpi rilevanti tiegħu dwar politiki ta' nonproliferazzjoni, kontroll tal-armi u diżarm u jipprovdi ideat, analiżi u rakkomandazzjonijiet. Il-Konsorzju wettaq dan il-kompitu permezz ta' firxa varjata ta' attivitajiet, inkluż konferenzi u laqgħat internazzjonali, attivitajiet edukattivi, pubblikazzjonijiet u ħidma biex jintlaħqu n-nies. Matul il-Fażi III tal-proġett, l-ambitu tal-ħidma tal-Konsorzju twessa' progressivament biex iwieġeb għall-ħtieġa li jinbnew aktar kapaċità, sensibilizzazzjoni, u opportunitajiet fil-qasam tad-diżarm, in-nonproliferazzjoni, u l-kontroll tal-armi fost il-ġenerazzjoni li jmiss ta' prattikanti u akkademiċi kif ukoll fost il-professjonisti fil-qasam tax-xjenzi naturali. Ingħatat ukoll attenzjoni partikolari għall-ħtieġa li jiġu involuti aktar nisa f'dan il-qasam.

L-iżviluppi u l-isfidi kontinwi fil-qasam tad-diżarm, in-nonproliferazzjoni u l-kontroll tal-armi jagħmlu l-ħidma ta' tlaqqigħ, riċerka u komunikazzjoni tal-Konsorzju u n-Network partikolarment rilevanti għall-UE u l-Istati Membri tagħha. Filwaqt li tibni fuq il-ħidma mwettqa fil-fażijiet preċedenti tal-proġett, il-Fażi IV tal-EUNPDC, kif ippreżentata f'dan id-dokument, tirrifletti kif l-attivitajiet tagħha jistgħu jkomplu jippermettu lill-Konsorzju u lin-Network jinfurmaw il-ħidma tal-UE f'dan il-qasam importanti.

1.   Ġestjoni ġenerali

Bħala parti mill-Ġestjoni Ġenerali, SIPRI ser ikompli jissorvelja u jikkoordina l-attivitajiet tal-Konsorzju u n-Network Ewropew ta' gruppi ta' riflessjoni indipendenti dwar in-nonproliferazzjoni u d-diżarm (in-Network), inkluż permezz tal-organizzazzjoni ta' laqgħat tal-Kumitat ta' Tmexxija bejn ir-rappreżentanti tas-Servizz Ewropew għall-Azzjoni Esterna (SEAE), il-Kummissjoni Ewropea u l-Konsorzju u t-twettiq tal-obbligi ta' rapportar. Dan jinkludi wkoll il-kompitu li jkompli jespandi d-diversità tan-Network f'termini ta' dixxiplini akkademiċi, ġeografija, ġeneru u età. Il-ġestjoni ġenerali tinkludi wkoll żmien għall-membri kollha tal-Konsorzju biex iwettqu kompiti ġenerali ta' ġestjoni (eż. jattendu laqgħat ta' koordinazzjoni, jippreżentaw kontributi lill-koordinatur) u biex ikompru l-ispejjeż ta' viżibbiltà.

Il-Fażi IV (2022-2025) ser tinkludi wkoll:

—

Il-ħolqien ta' Kumitat tal-Programm EUNPDC magħmul minn rappreżentanti tal-membri tal-Konsorzju, is-SEAE u l-Kummissjoni Ewropea biex jipprovdi kontribut dwar il-kontenut u l-organizzazzjoni tal-Konferenza Annwali u proġetti oħra (eż. il-Laqgħa konsultattiva, is-serje ta' pubblikazzjonijiet u seminars ad hoc).

—	Sitt sessjonijiet ta' informazzjoni bil-fomm (virtwalment jew fiżikament) lil CONOP, COARM u korpi oħra tal-UE, kif xieraq, minn esperti affiljati mal-membri tan-Network jew tal-Konsorzju u fuq talba tas-SEAE (preċedentement mogħtija permezz tal-proġett Help Desk).

2.   Deskrizzjoni tal-proġetti

L-għanijiet li ġejjin huma trażversali għall-proġetti kollha:

—	L-iżgurar tad-diversità f'termini ta' ġeneru u ġeografija fl-attivitajiet kollha

—	Appoġġ għall-ġenerazzjoni li jmiss ta' esperti tan-nonproliferazzjoni u d-diżarm

2.1   Organizzazzjoni ta' Konferenza annwali dwar in-nonproliferazzjoni u d-diżarm (tmexxija: IAI)

Għan u deskrizzjoni tal-proġett

Il-Konferenza Annwali, bil-parteċipazzjoni ta' esperti governattivi u gruppi ta' riflessjoni indipendenti u esperti akkademiċi oħra mill-UE u stati assoċjati kif ukoll pajjiżi terzi, ser tiddiskuti u tidentifika aktar miżuri għall-ġlieda kontra l-proliferazzjoni tal-AQM u s-sistemi ta' kunsinna tagħhom u objettivi marbuta ta' diżarm, kif ukoll tindirizza l-isfidi marbuta mal-armi konvenzjonali, inkluż il-ġlieda kontra l-kummerċ illeċitu u l-akkumulazzjoni eċċessiva tas-SALW u l-munizzjon tagħhom, kif ukoll riskji u opportunitajiet relatati ta' teknoloġiji emerġenti.

Fil-Fażi IV (2022-2025) din l-attività tkopri l-organizzazzjoni ta' Konferenza Annwali waħda fis-sena. Il-Konsorzju għandu l-għan li jorganizza l-Konferenza personalment iżda bil-possibbiltà li jxandar dirett l-avveniment kollu, jew parti minnu. Jekk ikomplu japplikaw ir-restrizzjonijiet fuq l-ivvjaġġar u l-laqgħat relatati mal-pandemija tal-COVID-19, il-Konsorzju jinsab lest li jaġġusta l-format tal-avveniment kif diġà għamel matul il-Fażi III. Barra minn hekk:

—	Ser issir laqgħa tan-Network personalment eżatt wara l-Konferenza Annwali. Matul is-sena ser isiru laqgħat virtwali addizzjonali tan-Network.

—	Il-laqgħa tal-Ġenerazzjoni li Jmiss ser tiġi organizzata eżatt wara l-Konferenza Annwali iżda ser tkun marbuta ma' attivitajiet oħra li jinvolvu esperti żgħażagħ (ara l-intestatura 2.6 ta' dan id-dokument).

—	Il-mentees tal-Programm ta' Mentoraġġ tal-EUNPDC ser jiġu mistiedna jipparteċipaw fil-konferenza.

Riżultati tal-proġett

—

Iż-żamma ta' konferenza prinċipali mmexxija mill-Ewropa dwar in-nonproliferazzjoni u d-diżarm li tkompli tkun il-post ewlieni għall-promozzjoni ta' diskussjoni strateġika dwar miżuri fil-ġlieda kontra l-proliferazzjoni tal-AQM u s-sistemi ta' kunsinna tagħhom u objettivi relatati ta' diżarm biex tindirizza l-isfidi relatati mal-armi konvenzjonali, fosthom il-ġlieda kontra l-kummerċ illeċitu u l-akkumulazzjoni eċċessiva tas-SALW u l-munizzjon tagħhom.

—	Iż-żieda fil-viżibbiltà u s-sensibilizzazzjoni fil-politika tal-Unjoni fil-qasam tan-nonproliferazzjoni tal-AQM u s-SALW u fil-qasam tal-azzjoni fil-qasam kimiku, bijoloġiku, radjoloġiku jew nukleari (CBRN) fost l-uffiċjali tal-gvern, l-akkademiċi u s-soċjetà ċivili ta' pajjiżi terzi.

—	Il-promozzjoni tar-rwol u l-koeżjoni tan-Network u r-rwol tal-Unjoni f'dan il-qasam.

—	Il-bini ta' għarfien espert dwar in-nonproliferazzjoni u d-diżarm f'pajjiżi fejn dan mhuwiex biżżejjed, inkluż pajjiżi terzi, b'enfasi partikolari fuq l-appoġġ għall-ġenerazzjoni li jmiss.

—

Il-preżentazzjoni ta' rakkomandazzjonijiet orjentati lejn l-azzjoni li jtejbu l-implimentazzjoni tal-Istrateġiji tal-UE dwar in-nonproliferazzjoni tal-AQM u s-SALW u jiffurmaw pass 'il quddiem utli dwar in-nonproliferazzjoni u l-azzjoni relatata mal-armi konvenzjonali mill-Unjoni u l-komunità internazzjonali.

—	Iż-żieda fis-sensibilizzazzjoni u l-għarfien tal-istituzzjonijiet tal-Unjoni, tal-Istati Membri, is-soċjetà ċivili u l-pajjiżi terzi dwar it-theddid relatat mal-AQM u l-mezzi ta' kunsinna tagħhom, li jippermettulhom jantiċipaw aħjar.

2.2   Organizzazzjoni ta' Laqgħa Konsultattiva annwali dwar in-nonproliferazzjoni u d-diżarm (tmexxija: FRS)

Għan u deskrizzjoni tal-proġett

Il-Laqgħat Konsultattivi, bil-parteċipazzjoni ta' rappreżentanti tal-UE, tal-Istati Membri u ta' gruppi ta' riflessjoni, jindirizzaw sfidi kemm għal żmien qasir kif ukoll medju għall-Unjoni fl-oqsma tan-nonproliferazzjoni u d-diżarm, b'mod partikolari l-AQM u l-mezzi ta' kunsinna tagħhom, armi konvenzjonali fosthom is-SALW, tipi ġodda ta' armi u sistemi ta' kunsinna.

Fil-Fażi IV tal-proġett din l-attività tkopri l-organizzazzjoni ta' Laqgħa Konsultattiva waħda fis-sena, maqsuma f'żewġ partijiet, kull waħda minnhom tkopri kwistjonijiet relatati mal-CONOP u l-COARM, u t-tħejjija ta' rapporti u/jew rakkomandazzjonijiet assoċjati. L-aġendi ta' dawn l-avvenimenti ser jitħejjew f'kooperazzjoni mill-qrib mas-SEAE u l-gruppi ta' ħidma tal-PESK tal-Kunsill fl-oqsma tan-nonproliferazzjoni u d-diżarm (CONOP) u l-esportazzjoni ta' armi konvenzjonali (COARM). Meta jkun rilevanti ser jiġu kkonsultati korpi addizzjonali (eż. it-Task Force Spazjali tas-SEAE). B'mod speċifiku:

—

Il-Laqgħa Konsultattiva annwali ser tkun magħmula minn mhux aktar minn jumejn maqsuma bejn il-laqgħat CONOP u COARM. Ser tipprevedi l-parteċipazzjoni fiżikament ta' massimu ta' 50 individwu minn gruppi ta' riflessjoni Ewropej, l-Istati Membri tal-UE u l-istituzzjonijiet tal-UE speċjalizzati fid-diżarm tal-AQM u kwistjonijiet ta' nonproliferazzjoni u armi konvenzjonali, inkluż is-SALW, kif ukoll teknoloġiji emerġenti għal kull waħda minn dawn iż-żewġ sessjonijiet orjentati lejn il-CONOP u l-COARM.

—	Il-Laqgħa Konsultattiva ser issir f'format bi preżenza fiżika fuq jumejn biex jiżdiedu kemm jista' jkun l-iskambji bejn il-parteċipanti.

Riżultati tal-proġett

—	Skambju ta' informazzjoni u analiżi dwar ix-xejriet attwali ta' nonproliferazzjoni fost dawk li jipprattikaw il-politika u l-esperti akkademiċi mill-Istati Membri, kif ukoll persunal speċjalizzat mis-SEAE u istituzzjonijiet oħra tal-Unjoni.

—	Diskussjoni dwar l-aħjar modi u mezzi biex jiġu implimentati l-politiki tal-Unjoni kontra l-proliferazzjoni.

—	L-għoti ta' reazzjonijiet kostruttivi lill-Unjoni dwar l-istrateġiji tagħha kontra l-proliferazzjoni tal-AQM u s-SALW minn gruppi ta' riflessjoni Ewropej indipendenti, u suġġerimenti minn prattikanti lir-riċerkaturidwar l-aktar suġġetti rilevanti għall-politika għal aktar riċerka.

—	L-identifikazzjoni ta' kwistjonijiet rilevanti fil-qasam tan-nonproliferazzjoni u d-diżarm għal rapporti orjentati lejn il-politika.

—	Il-produzzjoni ta' rapporti orjentati lejn il-politika flimkien ma' grupp ta' rakkomandazzjonijiet orjentati lejn l-azzjoni lir-rappreżentanti tar-RGħ.

2.3   Organizzazzjoni ta' 9 Seminars Ad Hoc dwar in-nonproliferazzjoni u d-diżarm

Għan u deskrizzjoni tal-proġett

Is-seminars Ad Hoc jaqdu għan konsultattiv bejn in-Network, l-Unjoni u l-Istati Membri tagħha, fuq bażi ad hoc, sabiex jiġu indirizzati avvenimenti importanti u għażliet ta' politika għall-UE, kif ukoll joffru opportunità għan-Network, l-Istati Membri u l-istituzzjonijiet tal-UE li jilħqu udjenzi fil-mira ġewwa u barra mill-Unjoni.

Il-proġett jipprevedi l-organizzazzjoni ta' mhux aktar minn disa' seminars ad hoc tal-esperti bit-tħejjija ta' dokument ta' informazzjoni assoċjat. Għal Fażi IV:

—	Ser jiġu organizzati tliet seminars personalment u sitta f'format virtwali.

—

Bħala parti mill-organizzazzjoni tas-seminars, ser jiġi kkummissjonat dokument ta' informazzjoni ad hoc lill-esperti rilevanti affiljati man-Network, il-Konsorzju jew, jekk meħtieġ, istituti oħra li jiffoka fuq is-suġġett tas-seminar. Dawn id-dokumenti ta' informazzjoni ser jiġu ċċirkolati qabel is-seminar bħala dokument ta' sfond jew wara biex jagħtu ħarsa ġenerali tal-punti ewlenin. Id-dokumenti ta' informazzjoni ad hoc ser jiġu ppubblikati fuq is-sit web tal-Konsorzju.

—	Is-SEAE jista' jitlob ukoll dokumenti ta' informazzjoni awtonomi (preċedentement Dokumenti Help Desk) minflok dokument ta' informazzjoni li jiffoka fuq is-suġġett ta' seminar Ad Hoc.

Riżultati tal-proġett

—	Skambju ta' informazzjoni u analiżi dwar ix-xejriet attwali ta' nonproliferazzjoni fost dawk li jipprattikaw il-politika u l-esperti akkademiċi mill-Istati Membri, kif ukoll persunal speċjalizzat mis-SEAE u istituzzjonijiet oħra tal-Unjoni.

—	Diskussjoni dwar l-aħjar modi u mezzi biex jiġu implimentati l-politiki tal-Unjoni kontra l-proliferazzjoni.

—	L-għoti ta' reazzjonijiet kostruttivi lill-Unjoni dwar l-istrateġiji tagħha kontra l-proliferazzjoni tal-AQM u s-SALW minn gruppi ta' riflessjoni indipendenti tal-Unjoni, u suġġerimenti minn prattikanti lill-gruppi ta' riflessjoni dwar l-aktar suġġetti rilevanti għall-politika għal aktar riċerka.

—	L-identifikazzjoni ta' kwistjonijiet rilevanti fil-qasam tan-nonproliferazzjoni u d-diżarm għal rapporti orjentati lejn il-politika.

—	Il-produzzjoni ta' rapporti orjentati lejn il-politika flimkien ma' grupp ta' rakkomandazzjonijiet orjentati lejn l-azzjoni lir-rappreżentanti tar-RGħ. Dawn ir-rapporti ser ikunu mxerrda fl-istituzzjonijiet rilevanti tal-Unjoni u l-Istati Membri.

2.4   Pubblikazzjoni ta' 15-il Dokument ta' Politika tal-UE dwar in-Nonproliferazzjoni u d-Diżarm (tmexxija: SIPRI)

Għan u deskrizzjoni tal-proġett

Il-proġett jipprevedi t-tħejjija u l-pubblikazzjoni ta' mhux aktar minn 15-il dokument ta' politika. Id-dokumenti ta' politika ser jiġu kkummissjonati mill-Konsorzju u mħejjija, primarjament, mill-Konsorzju jew min-Network, bil-ħsieb li tiġi żgurata rappreżentazzjoni bilanċjata u diversa ta' fehmiet f'termini ta' ġeneru u ta' għarfien espert tematiku u reġjonali. Fejn possibbli, is-serje ta' dokumenti ta' politika ser tistieden kontributi minn speċjalisti tal-"ġenerazzjoni li jmiss" biex jikkontribwixxu għall-iżvilupp professjonali tagħhom. Id-dokumenti ser ikopru s-suġġetti fil-mandat tal-Konsorzju. Kull dokument ser jipproponi rakkomandazzjonijiet/għażliet ta' politika. Id-dokumenti ta' politika kollha ser jiġu ppubblikati fuq is-sit web tal-Konsorzju.

Riżultati tal-proġett

—	Djalogu politiku msaħħaħ u marbut mas-sigurtà dwar miżuri għall-ġlieda kontra l-proliferazzjoni tal-AQM u s-sistemi ta' kunsinna tagħhom, il-kontroll tal-armi u d-diżarm, l-iktar permezz ta' esperti, riċerkaturi u akkademiċi.

—	Aktar sensibilizzazzjoni, għarfien u fehim fis-soċjetà ċivili, in-netweork Ewropew ta' gruppi ta' riflessjoni indipendenti dwar in-nonproliferazzjoni, u l-gvernijiet ta' kwistjonijiet marbuta ma' politiki tal-Unjoni dwar in-nonproliferazzjoni, il-kontroll tal-armi u d-diżarm.

—	Għażliet politiċi u/jew ta' politika operazzjonali lir-RGħ, lill-istituzzjonijiet tal-Unjoni u lill-Istati Membri.

—	L-ivilupp tal-azzjonijiet tan-nonproliferazzjoni, il-kontroll tal-armi u d-diżarm fil-livell tal-Unjoni megħjuna permezz ta' ideat, informazzjoni u analiżi.

2.5   Promozzjoni u tisħiħ tal-edukazzjoni dwar in-nonproliferazzjoni u d-diżarm

Il-proġett jikkonsisti fl-attivitajiet li ġejjin:

2.5.1    Aġġornament tal-infrastruttura u l-korsijiet tal-apprendiment elettroniku tal-EUNPD (tmexxija: PRIF)

Għan u deskrizzjoni tal-proġett

Din l-attività ser tiffoka fuq it-tixrid u l-użu fuq livell globali ta' għodda ta' apprendiment elettroniku, li ġiet żviluppata taħt il-Fażi II u III. Il-kors bħalissa jikkonsisti minn 20 unità ta' tagħlim dwar il-kwistjonijiet rilevanti kollha rigward in-nonproliferazzjoni u d-diżarm. Fil-Fażi IV, l-20 unità ser jiġu aġġornati regolarment biex jipprovdu lill-istudenti bil-fatti u ċ-ċifri l-aktar reċenti. Minħabba t-taqlib sinifikanti li seħħ fis-snin reċenti fil-qasam tan-nonproliferazzjoni u d-diżarm, din il-fażi tiffoka fuq l-aġġornament sinifikanti tal-15-il unità ta' tagħlim oriġinali żviluppati bejn l-2014 u l-2017: f'termini ta' kontenut; il-faċilità tal-użu u l-interfaċċa għall-utent; u d-disinn grafiku u tal-vidjo. Dawn il-bidliet ser jagħmluha aktar faċli biex l-unitajiet ta' tagħlim jinżammu aġġornati.

Għal darb'oħra ser tingħata attenzjoni speċjali lill-aċċessibbiltà, jiġifieri t-titjib għall-utenti b'insuffiċjenza fil-vista jew fis-smigħ. L-intelliġibbiltà tal-kors sħiħ ser tissaħħaħ permezz ta' reviżjoni tal-lingwi minn kelliema nattivi Ingliżi speċjalizzati. It-tkomplija tas-sensibilizzazzjoni u l-appoġġ għal istituzzjonijiet edukattivi ser tippermetti integrazzjoni faċli tal-apprendiment elettroniku fi Programmi ta' Masters Universitarji u offerti edukattivi oħrajn, u jħeġġu l-użu globali tal-kors tat-tagħlim elettroniku.

Riżultati tal-proġett

—	Il-manutenzjoni, l-ottimizzazzjoni u l-aġġornament ta' kors ta' apprendiment elettroniku eżistenti tal-EUNPD li jkopri l-aspetti rilevanti kollha tan-nonproliferazzjoni u d-diżarm.

—	Is-sensibilizzazzjoni u l-assistenza lil edukaturi uħarrieġa ta' letturi biex jużaw ir-riżorsi edukattivi tal-UE dwar in-nonproliferazzjoni u d-diżarm.

—	Is-sensibilizzazzjoni u l-assistenza lil ġurnalisti u diplomatiċi żgħażagħ biex jużaw ir-riżorsi edukattivi tal-UE dwar in-nonproliferazzjoni u d-diżarm.

—	L-għoti ta' appoġġ għat-tagħlim dwar il-kontroll tal-armi, in-nonproliferazzjoni u d-diżarm f'seminars universitarji.

—	L-għoti ta' appoġġ biex jiġi kkombinat l-apprendiment elettroniku u t-taħriġ fil-klassijiet ("tagħlim imħallat").

—	Iż-żieda fl-għarfien fil-fond dwar il-politika tal-UE dwar in-nonproliferazzjoni u d-diżarm fl-Unjoni u f'pajjiżi terzi.

—	Il-forniment ta' riżors edukattiv miftuħ li jkun aġġornat kontinwament għall-partijiet ikkonċernati kollha involuti fir-riċerka u l-programmazzjoni tan-nonproliferazzjoni.

—	L-għoti ta' għarfien kritiku ta' appoġġ lil prattikanti u akkademiċi tan-nonproliferazzjoni.

2.5.2    "Klinika tat-tagħlim" (ċentru tar-riżorsi tat-tagħlim) (tmexxija: PRIF)

Għan u deskrizzjoni tal-proġett

Din l-attività ser tkompli l-ħidma mibdija fl-2021/22, biex tissaħħaħ l-edukazzjoni dwar id-diżarm, il-kontroll tal-armi u n-nonproliferazzjoni fl-UE. S'issa, permezz ta' tfittxija estensiva online, ġew identifikati 59 kors rilevanti mgħallma dan l-aħħar fl-universitajiet fl-UE. Il-letturi rispettivi ġew ikkuntattjati individwalment. Bi tweġiba għal dan, saru disponibbli 24 sillabu. Evalwazzjoni preliminari rriżultat f'żewġ sillabi ewlenin u sommarji qosra ta' testi ewlenin. Fil-Fażi IV, il-proġett ser jiġbor korsijiet fl-universitajiet Ewropej u tal-Amerka ta' Fuq u jespandi t-tfittxija għal pajjiżi mhux tal-Punent. L-analiżi statistika ser tiġi kontinwament irfinuta u aġġornata. Ser jiġi propost materjal addizzjonali għal-letturi u l-għalliema.

Riżultati tal-proġett

—	Firxa estensiva ta' kurrikuli ta' avvenimenti ta' tagħlim bħala eżempji u ispirazzjoni pprovduti fuq is-sit web tal-Konsorzju.

—	Evalwazzjoni statistika ta' korsijiet eżistenti dwar, eż. suġġetti mgħallma, approċċi teoretiċi jew diversità tal-ġeneru, ser tiġi ppubblikata fuq is-sit web tal-Konsorzju u ppreżentata f'konferenzi jew sessjonijiet ta' ħidma.

—	Il-ħolqien u l-aġġornament ta' żewġ "sillabi ta' master" għal għalliema għall-ewwel darba.

—	Sommarji qosra ta' letteratura rilevanti jew nieqsa ppubblikati fuq is-sit web tal-Konsorzju.

2.5.3    Kors ta' taħriġ dwar l-għarfien dwar il-proliferazzjoni (tmexxija: SIPRI)

Għan u deskrizzjoni tal-proġett

Din l-attività ser tkopri l-organizzazzjoni ta' sitt korsijiet ta' taħriġ biex titqajjem kuxjenza dwar ir-riskji tal-proliferazzjoni għal studenti gradwati u postuniversitarji tax-xjenzi naturali u oqsma oħra rilevanti. Ser toħloq ukoll pont bejn ix-xjenzi soċjali u naturali, li ġie identifikat bħala ħtieġa urġenti fl-aħħar fażi. Dan ser jinkludi l-iżvilupp ta' kurrikulu apposta għaludjenzi distinti (bħalma huma dawk tal-bijomedika, l-inġinerija jew nukleari) u t-twettiq ta' żewġ korsijiet fis-sena. Fil-Fażi IV, tlieta minn dawn il-korsijiet ser jiġu organizzati personalment fi Stokkolma; tlieta ser isiru virtwalment.

Riżultati tal-proġett

—	It-tisħiħ tal-ħiliet fil-ġenerazzjoni li jmiss ta' akkademiċi tax-xjenzi naturali u oqsma rilevanti oħrajn fi strumenti u politiki ta' nonproliferazzjoni.

—

Kontribut għall-mira tal-politika ta' nonproliferazzjoni tal-Unjoni permezz ta' aktar sensibilizzazzjoni dwar ir-riskji tal-proliferazzjoni fost id-dixxiplini li jippreżentaw riskjikbar ta' proliferazzjoni u soġġetti għal żviluppi teknoloġiċi importanti; kif ukoll ta' opportunitajiet biex jiġu indirizzati r-riskji ta' proliferazzjoni permezz ta' żviluppi teknoloġiċi.

—	Kombinazzjoni ta' apprendiment mill-bogħod (apprendiment elettroniku) u taħriġ fuq il-post ("tagħlim imħallat").

2.6   Promozzjoni ta' kwistjonijiet relatati man-nonproliferazzjoni u d-diżarm għan-nisa żgħażagħ u l-ġenerazzjoni li jmiss

Il-proġett jikkonsisti fl-attivitajiet li ġejjin:

2.6.1    Programm ta' Internship (tmexxija: PRIF)

Għan u deskrizzjoni tal-proġett

Din l-attività tipprevedi internships Ewropej dwar in-nonproliferazzjoni u d-diżarm għal mhux aktar minn 30 student gradwat jew diplomatiku żagħżugħ, kull wieħed għal perijodu ta' mhux aktar minn tliet xhur. L-internships ser jiġu stabbiliti u dokumentati mill-Konsorzju, u ser jikkombinaw il-parteċipazzjoni f'avvenimenti u f'sessjonijiet ta' ħidma, assenjazzjonijiet tal-qari u tal-kitba, u l-integrazzjoni ta' proġetti. L-istituzzjonijiet kollha li jappartjenu għan-Network huma eliġibbli bħala istituti ospitanti. 24 minn 30 internship għandhom ikunu riżervati għal kandidati Ewropej, filwaqt li s-sitt internships li jifdal huma riżervati għal kandidati mhux Ewropej. L-interns kollha ser jiġu mistiedna — sa fejn possibbli — għall-konferenzi u s-seminars organizzati mill-Konsorzju li jkunu qed isiru matul l-internship tagħhom.

Riżultati tal-proġett

—	Iż-żieda fil-ħila fil-ġenerazzjoni li jmiss ta' akkademiċi u prattikanti fil-politika u l-programmazzjoni tan-nonproliferazzjoni.

—	Iż-żieda fl-għarfien fil-fond dwar il-politika tal-Unjoni dwar in-nonproliferazzjoni u d-diżarm fl-Unjoni.

—	Fehim aħjar tal-istrateġiji tal-Unjoni, il-politiki u l-approċċi dwar in-nonproliferazzjoni f'pajjiżi terzi.

—	Il-ħolqien ta' networks ta' prattikanti u akkademiċi żgħażagħ u l-faċilitazzjoni ta' kooperazzjoni prattika.

—	It-titjib tat-tisħiħ tal-kapaċitajiet dwar il-politiki tal-Unjoni fl-oqsma tal-AQM u s-SALW fi ħdan in-Network.

2.6.2    L-attivitajiet tal-Ġenerazzjoni li Jmiss u n-Nisa Żgħażagħ u l-Programm ta' Mentoraġġ (tmexxija: VCDNP)

Għan u deskrizzjoni tal-proġett

Ispirat mill-iżbilanċi perċepiti b'mod wiesa' fl-età u bejn il-ġeneri fost l-esperti u l-prattikanti fil-qasam tan-nonproliferazzjoni, id-diżarm u l-kontroll tal-armi, il-proġett għandu l-għan li jesponi lill-istudenti fil-livell universitarju, universitarju u postgradwatorju għal kwistjonijiet ta' nonproliferazzjoni, diżarm u kontroll tal-armi, iżid is-sensibilizzazzjoni tagħhom dwarhom, u jinkoraġġixxi l-involviment tagħhom f'avvenimenti u sessjonijiet ta' ħidma dwar suġġetti rilevanti. Fil-Fażi IV, l-attività ser tara żewġ żjarat ta' sensibilizzazzjoni fiżikament kull sena fl-universitajiet fl-Ewropa biex tissaħħaħ il-viżibbiltà tal-qasam u l-opportunitajiet għall-akkademiċi żgħażagħ. L-attività ser tkompli torganizza webinars dwar suġġetti tematiċi, li dejjem jinkludu informazzjoni dwar opportunitajiet ta' karriera jew perkorsi għaż-żgħażagħ.

Biex tiżdied il-preżenza tan-nisa fil-qasam, fil-Fażi IV, il-proġett ser iwettaq ukoll programm formali ta' mentoraġġ kull sena (li jdum sena) biex 20 żagħżugħa jiġu akkoppjati ma' 20 mentor sabiex jgħinu fit-titjib tan-networks tal-individwi, iżidu l-fehim tal-qasam u jfittxu parir dwar il-karriera. Il-programm ta' mentoraġġ ser ikun akkumpanjat minn sessjonijiet ta' esperti, attivitajiet soċjali u sessjonijiet ta' ħidma għat-tisħiħ tal-kapaċitajiet.

Riżultati tal-proġett

—	Ħila mtejba fil-ġenerazzjoni li jmiss ta' akkademiċi u prattikanti fil-qasam tan-nonproliferazzjoni, id-diżarm u l-kontroll tal-armi.

—	Fehim aħjar tal-qasam u l-politiki rilevanti tal-UE.

—	Aktar sensibilizzazzjoni dwar l-opportunitajiet għall-akkademiċi żgħażagħ, speċjalment nisa, biex isiru aktar involuti fil-qasam tan-nonproliferazzjoni, id-diżarm u l-kontroll tal-armi.

—	Networks imsaħħa fost il-prattikanti żgħażagħ u bejn prattikanti żgħażagħ u esperti stabbiliti.

—	Involviment imtejjeb ma' akkademiċi żgħażagħ interessati li jitgħallmu aktar dwar il-qasam u li jidħlu f'dan il-qasam.

2.7   Żjara tal-parteċipanti fil-programm ta' Boroż ta' Studju tan-NU dwar id-Diżarm fi Brussell (tmexxija: VCDNP)

Għan u deskrizzjoni tal-proġett

Il-proġett, fil-qafas tal-programm ta' Boroż ta' Studju tan-NU dwar id-Diżarm, jipprovdi żjara ta' studju ta' bejn jumejn u tlett ijiem fi Brussell, il-Belġju, biex il-parteċipanti ikunu jistgħu jitgħallmu aktar dwar l-UE, il-politiki, il-funzjonament u l-istituzzjonijiet tagħha. Iż-żjara ser tiġi skedata bħala parti mill-komponent Ewropew tal-programm ta' boroż ta' studju. Il-programm għandu l-għan li jipprovdi ħarsa ġenerali komprensiva tal-istituzzjonijiet ewlenin tal-UE u l-korpi li jfasslu l-politika, speċjalment dawk relatati man-nonproliferazzjoni u d-diżarm, u jipprovdi preżentazzjonijiet tematiċi dwar il-ħidma tal-UE fil-qasam, inkluż programmi ta' appoġġ offruti lil pajjiżi terzi.

Riżultati tal-proġett

—	Aktar għarfien u viżibbiltà tal-funzjonament u l-istituzzjonijiet fl-UE u l-politiki tagħha kif ukoll programmi ta' appoġġ dwar in-nonproliferazzjoni u d-diżarm f'pajjiżi terzi.

—	Għarfien espert imtejjeb dwar kwistjonijiet tal-AQM u s-SALW f'pajjiżi sħab u dawk terzi.

—	Aktar kollaborazzjoni mal-Uffiċċju tan-NU għall-Affarijiet ta' Diżarm u kontribut għall-isforzi edukattivi fil-qafas tal-Programm ta' Boroż ta' Studju tan-NU dwar id-Diżarm.

2.8   Sensibilizzazzjoni u komunikazzjoni (tmexxija: FRS)

Il-proġett jikkonsisti fl-attivitajiet li ġejjin:

Sit web, pjattaforma tan-Network u sensibilizzazzjoni (tmexxija: FRS)

Għan u deskrizzjoni tal-proġett

Din l-attività tipprovdi l-mezzi għall-web hosting, id-disinn tal-web u l-manutenzjoni teknika tas-sit web u tan-networks soċjali tal-Konsorzju (Twitter, LinkedIn, Youtube). Wara l-ħolqien ta' pjattaforma diġitali kollaborattiva fil-Fażi preċedenti biex jiġu ffaċilitati l-komunikazzjoni, il-kooperazzjoni u l-kondiviżjoni tal-aħjar prattiki fi ħdan in-Network, din l-attività ser tkopri l-ġestjoni tal-komunità, l-aġġornamenti, u l-manutenzjoni teknika tal-pjattaforma. Il-membri tan-Network ser ikunu involuti b'mod aktar dirett permezz ta' din il-pjattaforma kollaborattiva diġitali, billi jinteraġixxu fil-forum, jaqsmu r-riżorsi tagħhom u l-avvenimenti li ġejjin, kif ukoll jipprovdu aġġornamenti dwar l-esperti tagħhom u l-istitut tagħhom. Permezz ta' kull riċerka individwali wieħed ser ikun jista' joħloq profil dedikat fuq il-pjattaforma, isib informazzjoni dwar l-EUNPDC u n-Network, u jinteraġixxi ma' utenti oħra. Barra minn hekk:

—	Pubblikazzjonijiet, avvenimenti u opportunitajiet ta' xogħol tal-Konsorzju u membri oħra tan-Network ser ikomplu jiġu promossi u appoġġati fuq id-diversi pjattaformi.

—	Konferenzi organizzati mill-Konsorzju ser ikomplu jiġu promossi u dokumentati fuq is-sit web (dokumenti ta' sfond, aġenda, preżentazzjonijiet, filmati ta' laqgħat miftuħa fejn xieraq).

—	L-opportunitajiet edukattivi fil-Konsorzju, inkluż il-kors tat-apprendiment elettroniku, ir-riżorsi tat-tagħlim, l-Inizjattiva Nisa Żgħażagħ u l-Ġenerazzjoni li Jmiss, l-opportunitajiet ta' boroż ta' studju u internships ser ikomplu jiġu promossi f'taqsima apposta tas-sit web.

—	Ser jinħolqu links bejn is-sit web u l-pjattaforma biex jiġu żgurati l-integrazzjoni u l-aġġornament regolari tal-għodod kollha ta' sensibilizzazzjoni u komunikazzjoni li jintużaw mill-Konsorzju.

—

Il-bullettin ser ikompli jiġi ppubblikat kull xahar. Kull ħarġa ser tinkludi: 1) forum li jippermetti lir-rappreżentanti tan-Network jippromwovu l-attivitajiet ta' riċerka tagħhom b'enfasi fuq dawk li nbdew l-aktar reċentement; b) informazzjoni aġġornata dwar l-attivitajiet tal-Konsorzju; c) aħbarijiet dwar l-attivitajiet tal-membri tan-Network; d) artiklu editorjali li jiddiskuti suġġetti ta' nonproliferazzjoni u diżarm ta' rilevanza għall-politika tal-UE.

2.8.1    Produzzjoni ta' podcast tal-EUNPDC (tmexxija: IISS-Europe)

Għan u deskrizzjoni tal-proġett

Din l-attività tipprevedi t-tnedija ta' podcast tal-EUNPDC li jindirizza kwistjonijiet tematiċi fi ħdan il-mandat tal-Konsorzju. Fil-Fażi IV tal-proġett, is-serje tal-podcast, ospitata mill-IISS-Europe, ser tipproduċi sa 36 episodju.

Riżultati tal-attivitajiet tal-proġett

—	Sensibilizzazzjoni u għarfien akbar tal-istituzzjonijiet tal-Unjoni, l-Istati Membri, is-soċjetà ċivili u l-pajjiżi terzi dwar it-theddid relatat mal-armi konvenzjonali, l-AQM u l-mezzi ta' kunsinna tagħhom, li jippermettulhom jantiċipaw aħjar.

—	Il-promozzjoni ta' fehim aħjar tal-istrateġiji tal-UE għan-Nonproliferazzjoni tal-AQM u s-SALW fis-soċjetà ċivili.

—	L-iżgurar ta' interfaċċa bejn l-Unjoni u n-network tal-gruppi ta' riflessjoni.

—	Il-ġestjoni ta' pjattaforma fejn il-gruppi ta' riflessjoni dwar in-nonproliferazzjoni jistgħu jikkondividu kontinwament il-fehmiet u l-analiżi indipendenti tagħhom dwar il-proliferazzjoni tal-AQM u kwistjonijiet tal-armi konvenzjonali, inkluż is-SALW.

—	L-espansjoni, il-ġestjoni u l-aġġornament tan-network eżistenti ta' gruppi ta' riflessjoni indipendenti.

—	It-tniżżil permanenti u b'xejn ta' dokumenti mil-laqgħat tan-Network u mill-gruppi ta' riflessjoni indipendenti li jkunu jixtiequ jikkondividu r-riżultati tar-riċerka tagħhom mingħajr kumpens finanzjarju.