(1)

Għad hemm il-ħtieġa li jittaffew id-disparitajiet ekonomiċi u soċjali fiż-Żona Ekonomika Ewropea, u għalhekk jenħtieġ li jiġu stabbiliti mekkaniżmu ġdid għall-kontribuzzjonijiet finanzjarji tal-Istati taż-ŻEE-EFTA u mekkaniżmu finanzjarju Norveġiż ġdid.

(2)

Fl-20 ta’ Mejju 2021, il-Kunsill awtorizza lill-Kummissjoni tiftaħ negozjati mal-Iżlanda, mal-Prinċipat tal-Liechtenstein u mar-Renju tan-Norveġja rigward ftehim dwar il-kontribuzzjonijiet finanzjarji futuri tal-Istati taż-ŻEE-EFTA għall-koeżjoni ekonomika u soċjali fiż-Żona Ekonomika Ewropea. Il-Kummissjoni nnegozjat, f’isem l-Unjoni, Ftehim bejn l-Unjoni Ewropea, l-Iżlanda, il-Prinċipat tal-Liechtenstein u r-Renju tan-Norveġja dwar Mekkaniżmu Finanzjarju taż-ŻEE għall-perjodu bejn Mejju 2021 u April 2028. Dan ser jieħu l-forma tal-Protokoll 38d tal-Ftehim ŻEE. Il-Kummissjoni nnegozjat ukoll, f’isem l-Unjoni, Ftehim bejn ir-Renju tan-Norveġja u l-Unjoni Ewropea dwar Mekkaniżmu Finanzjarju Norveġiż għall-perjodu bejn Mejju 2021 u April 2028.

(3)

Il-Mekkaniżmu Finanzjarju taż-ŻEE għall-perjodu bejn Mejju 2021 u April 2028 (“il-Mekkaniżmu Finanzjarju taż-“ŻEE”) u l-Mekkaniżmu Finanzjarju Norveġiż għall-perjodu bejn Mejju 2021 u April 2028 (“il-Mekkaniżmu Finanzjarju Norveġiż”) ser jikkontribwixxu għat-tnaqqis tad-disparitajiet ekonomiċi u soċjali fiż-Żona Ekonomika Ewropea u għat-tisħiħ tar-relazzjonijiet bejn l-Istati taż-ŻEE-EFTA u l-Istati Benefiċjarji.

(4)

Il-Mekkaniżmu Finanzjarju taż-ŻEE jirrifletti l-benefiċċji meħuda mill-Istati taż-ŻEE-EFTA mill-parteċipazzjoni tagħhom fis-suq intern u jqis l-għan li jippromwovi t-tisħiħ kontinwu u bbilanċjat tar-relazzjonijiet kummerċjali u ekonomiċi bejn il-Partijiet Kontraenti kollha għall-Ftehim ŻEE f’konformità mal-Artikolu 115 tal-Ftehim taż-ŻEE.

(5)

Il-Mekkaniżmu Finanzjarju taż-ŻEE u l-Mekkaniżmu Finanzjarju Norveġiż jistabbilixxu proċeduri speċjali li jżidu l-effiċjenza tal-implimentazzjoni u l-konsultazzjoni tal-Istati Benefiċjarji. B’mod partikolari, kemm il-Mekkaniżmu Finanzjarju taż-ŻEE kif ukoll il-Mekkaniżmu Finanzjarju Norveġiż jipprevedu li tiġi kkonsultata l-Kummissjoni fuq livell strateġiku matul in-negozjati għall-Memoranda ta’ Qbil bejn l-Istati Donaturi u l-Istati Benefiċjarji. Huma jinkludu wkoll arranġamenti sabiex il-Kummissjoni tipprovdi assistenza lill-Istati Benefiċjarji fil-konsultazzjonijiet dwar id-dispożizzjonijiet għall-implimentazzjoni tal-mekkaniżmi. Dawn is-salvagwardji ser jikkontribwixxu għall-implimentazzjoni effiċjenti u f’waqtha tal-mekkaniżmi, filwaqt li jqisu bis-sħiħ il-ħtiġijiet tal-Istati Benefiċjarji u d-diffikultajiet sostanzjali li jistgħu jesperjenzaw fl-implimentazzjoni tal-mekkaniżmi finanzjarji, inkluż fir-rigward tal-valuri u l-prinċipji komuni tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem. F’dan ir-rigward, jenħtieġ li tingħata attenzjoni lid-dritt ta’ Stat Benefiċjarju li jinstema’ fejn huma kkonċernati miżuri bħas-sospensjoni tal-pagamenti u l-irkupru tal-fondi.

(6)

Meta jitqies li l-Mekkaniżmu Finanzjarju taż-ŻEE ser jiżdied bħala protokoll addizzjonali għall-Ftehim taż-ŻEE, l-Unjoni tista’, f’konformità mal-proċeduri rilevanti skont it-Trattati, tressaq tilwim dwar l-interpretazzjoni jew l-applikazzjoni tal-protokoll addizzjonali quddiem il-Kumitat Konġunt, skont l-Artikolu 111 tal-Ftehim ŻEE. Il-Kunsill taż-ŻEE jista’ jqis kwalunkwe kwistjoni li twassal għal diffikultà, skont l-Artikolu 89 tal-Ftehim ŻEE.

(7)

Id-dispożizzjonijiet speċjali dwar l-importazzjonijiet fl-Unjoni ta’ ċertu ħut u prodotti tas-sajd li joriġinaw mill-Iżlanda u min-Norveġja, stabbiliti fil-Protokolli Addizzjonali tal-Ftehimiet rispettivi tagħhom ta’ Kummerċ Ħieles mal-Komunità Ekonomika Ewropea (1), skadew fit-30 ta’ April 2021 u jenħtieġ li jiġu riveduti f’konformità mal-Artikolu 1 ta’ dawk il-Protokolli Addizzjonali. Għalhekk il-Kunsill, flimkien man-negozjati ta’ kontribuzzjoni finanzjarja futura u bħala parti minn ftehim ta’ pakkett komprensiv, fl-20 ta’ Mejju 2021, awtorizza lill-Kummissjoni biex tiftaħ negozjati dwar ftehim dwar l-aċċess għas-suq għall-ħut u l-prodotti tas-sajd li joriġinaw mill-Iżlanda u min-Norveġja.

(8)

Is-sostituzzjoni tal-mekkaniżmi finanzjarji eżistenti b’mekkaniżmi finanzjarji ġodda, li jipprovdu għall-proċeduri speċjali, jirrigwardaw perjodi differenti ta’ żmien, ammonti differenti ta’ fondi u dispożizzjonijiet differenti ta’ implimentazzjoni, kif ukoll it-tiġdid u l-estensjoni ta’ konċessjonijiet li jirrigwardaw ċerti prodotti ta’ ħut u prodotti tal-baħar, li kienu parti mill-pakkett komprensiv ta’ negozjati, ikkunsidrati komplessivament jikkostitwixxu żvilupp importanti tal-assoċjazzjoni mal-Istati taż-ŻEE-EFTA, li jiġġustifika l-użu tal-Artikolu 217 tat-Trattat dwar il-Funzjonament tal-Unjoni Ewropea.

(9)

Kull wieħed mill-Ftehimiet u l-Protokolli Addizzjonali msemmi hawn fuq jipprevedi l-applikazzjoni proviżorja tiegħu stess qabel id-dħul fis-seħħ tiegħu.

(10)

Kull wieħed mill-Ftehimiet u l-Protokolli Addizzjonali jenħtieġ li jiġi ffirmat f’isem l-Unjoni Ewropea, soġġett għall-konklużjoni tiegħu f’data aktar tard, u applikat fuq bażi proviżorja.

(11)

F’konformità mat-Trattati, jenħtieġ li l-Kummissjoni tiżgura l-iffirmar tal-Ftehimiet u l-Protokolli Addizzjonali, soġġett għall-konklużjoni tagħhom,