|
30.1.2008 |
MT |
Il-Ġurnal Uffiċjali ta’ l-Unjoni Ewropea |
L 25/10 |
DEĊIŻJONI 1/2007 TAL-KUNSILL TA’ STABBILIZZAZZJONI U ASSOĊJAZZJONI TAL-KE U TA’ L-EX REPUBBLIKA JUGOSLAVA TAL-MAĊEDONJA
ta’ l-20 ta’ Diċembru 2007
li temenda l-Protokoll 2 (dwar prodotti ta’ l-azzar) tal-Ftehim ta’ Stabbilizzazzjoni u Assoċjazzjoni bejn il-KE u l-ex Repubblika Jugoslava tal-Maċedonja
(2008/82/KE)
IL-KUNSILL TA’ STABBILIZZAZZJONI U ASSOĊJAZZJONI,
Wara li kkunsidra l-Ftehim ta’ Stabbilizzazzjoni u Assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u l-ex Repubblika Jugoslava tal-Maċedonja, min-naħa l-oħra,
Billi:
|
(1) |
L-Artikolu 7 tal-Protokoll 2 tal-Ftehim ta’ Stabbilizzazzjoni u Assoċjazzjoni jistabbilixxi sistema ta’ kontroll doppju, mingħajr limiti kwantitattivi, għall-importazzjoni fil-Komunità ta’ prodotti ta’ l-azzar li joriġinaw mill-Ex Repubblika Jugoslava tal-Maċedonja. |
|
(2) |
Sar progress sinifikanti fil-programm meħtieġ ta’ ristrutturar u konverżjoni għall-industrija ta’ l-azzar fl-Ex Repubblika Jugoslava tal-Maċedonja. |
|
(3) |
Il-ħtieġa għal proċedura amministrattiva għall-għoti rapidu ta’ informazzjoni dwar ix-xejriet fil-flussi kummerċjali sabiex tiżdied it-trasparenza u sabiex tkun evitata kull devjazzjoni tal-kummerċ ma għadhiex teżisti. |
|
(4) |
Konsegwentement, ma għadx hemm bżonn ta’ sistema ta’ kontroll doppju, mingħajr limiti kwantitattivi, għall-importazzjoni fil-Komunità ta’ prodotti ta’ l-azzar li joriġinaw mill-Ex Repubblika Jugoslava tal-Maċedonja. |
|
(5) |
Il-Protokoll 2 għandu għalhekk jiġi emendat kif meħtieġ, |
IDDEĊIEDA KIF ĠEJ:
Artikolu Uniku
L-Artikolu 7 tal-Protokoll 2 għall-Ftehim ta’ Stabbilizzazzjoni u Assoċjazzzjoni u l-Anness I ma’ l-imsemmi Protokoll 2 għandhom jitħassru.
Din id-Deċiżjoni għandha tidħol fis-seħħ fl-1 ta’ Jannar 2008.
Magħmula fi Brussell, 20 ta’ Diċembru 2007.
Għall-Kunsill ta’ Stabbilizzazzjoni u Assoċjazzjoni
Il-President
Antonio MILOŠOSKI