22.3.2021   

GA

Iris Oifigiúil an Aontais Eorpaigh

LI 99/13

RIALACHÁN (AE) 2021/479 ÓN gCOMHAIRLE

an 22 Márta 2021

lena leasaítear Rialachán (AE) Uimh. 401/2013 maidir le bearta sriantacha i dtaca le Maenmar/Burma

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 215 de,

Ag féachaint do Chinneadh (CBES) 2021/482 ón gComhairle an 22 Márta 2021 lena leasaítear Cinneadh 2013/184/CBES maidir le bearta sriantacha i gcoinne Mhaenmar/Bhurma (1),

Ag féachaint don togra comhpháirteach ó Ardionadaí an Aontais do Ghnóthaí Eachtracha agus don Bheartas Slándála agus ón gCoimisiún Eorpach,

De bharr an mhéid seo a leanas:

(1)

Le Rialachán (AE) Uimh. 401/2013 ón gComhairle (2), tugtar éifeacht do na bearta dá bhforáiltear i gCinneadh 2013/184/CBES (3).

(2)

An 22 Márta 2021, ghlac an Chomhairle Cinneadh (CBES) 2021/482, inar leasaigh sí Cinneadh 2013/184/CBES, lena n-áirítear a theideal. Leathnaigh sí freisin na critéir ainmniúcháin chun go bhféadfaí bearta sriantacha spriocdhírithe a chur i bhfeidhm i gcoinne daoine nádúrtha agus dlítheanacha, eintitis agus comhlachtaí a mbaineann a ngníomhaíochtaí an bonn den daonlathas agus den smacht reachta i Maenmar/Burma, agus i gcoinne daoine dlítheanacha, eintitis agus comhlachtaí atá faoi úinéireacht nó faoi rialú Fhórsaí Armtha Mhaenmar (Tatmadaw), nó a ghineann ioncam thar a gceann, a chuireann tacaíocht ar fáil dóibh, nó a bhaineann tairbhe astu, agus ar an gcaoi sin a rannchuidíonn le, nó a bhaineann tairbhe as, gníomhaíochtaí lena mbaintear an bonn den daonlathas agus den smacht reachta i Maenmar/Burma nó le sáruithe tromchúiseacha ar chearta an duine.

(3)

Tá gá le gníomhaíocht rialála ar leibhéal an Aontais chun na bearta a leagtar amach i gCinneadh (CBES) 2021/482 a chur chun feidhme, go háirithe d’fhonn a áirithiú go gcuirfidh oibreoirí eacnamaíocha na bearta sin i bhfeidhm go haonfhoirmeach sna Ballstáit uile.

(4)

Ba cheart, dá bhrí sin, Rialachán (AE) Uimh. 401/2013 a leasú dá réir sin,

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán (AE) 401/2013 mar a leanas:

(1)

cuirtear an méid seo a leanas in ionad an teidil:

‘Rialachán (AE) Uimh. 401/2013 ón gComhairle maidir le bearta sriantacha i bhfianaise na staide i Maenmar/Burma agus lena n-aisghairtear Rialachán (CE) Uimh. 194/2008’;

(2)

in Airteagal 4a, cuirtear an méid seo a leanas in ionad mhír 3:

‘3.   Áireofar an méid seo a leanas in Iarscríbhinn IV:

(a)

daoine nádúrtha ó Fhórsaí Armtha Mhaenmar (Tatmadaw), ó Fhórsa Póilíneachta Mhaenmar agus ó Phóilíní an Gharda Teorann atá freagrach as sáruithe tromchúiseacha ar chearta an duine i Maenmar/Burma;

(b)

daoine nádúrtha agus dlítheanacha, eintitis nó comhlachtaí a mbaineann a mbearta, a mbeartais nó a ngníomhaíochtaí an bonn den daonlathas nó den smacht reachta i Maenmar/Burma, nó a bhíonn i mbun bearta, nó a thugann tacaíocht do bhearta, a chuireann síocháin, slándáil nó cobhsaíocht Mhaenmar/Bhurma i mbaol;

(c)

daoine nádúrtha ó Fhórsaí Armtha Mhaenmar (Tatmadaw), ó Fhórsa Póilíneachta Mhaenmar agus ó Phóilíní an Gharda Teorann atá freagrach as bac a chur ar chúnamh daonnúil a sholáthar do shibhialtaigh atá i ngátar;

(d)

daoine nádúrtha ó Fhórsaí Armtha Mhaenmar (Tatmadaw), ó Fhórsa Póilíneachta Mhaenmar agus ó Phóilíní an Gharda Teorann atá freagrach as bac a chur ar imscrúduithe neamhspleácha ar sháruithe nó mí-úsáidí tromchúiseacha a líomhnaítear maidir le cearta an duine;

(e)

daoine dlítheanacha, eintitis agus comhlachtaí atá faoi úinéireacht nó faoi rialú Fhórsaí Armtha Mhaenmar (Tatmadaw), nó a ghineann ioncam thar a gceann, a chuireann tacaíocht ar fáil dóibh, nó a bhaineann tairbhe astu;

(f)

daoine nádúrtha nó dlítheanacha, eintitis nó comhlachtaí a bhaineann leo siúd dá dtagraítear i bpointí (a) go (e).’;

(3)

cuirtear an tAirteagal seo a leanas isteach:

‘Airteagal 4da

1.   De mhaolú ar Airteagal 4a, féadfaidh údaráis inniúla na mBallstát a údarú go scaoilfear cistí nó acmhainní eacnamaíocha reoite áirithe, nó go gcuirfear cistí nó acmhainní eacnamaíocha áirithe ar fáil, faoi cibé coinníollacha a mheasfaidh siad is iomchuí, tar éis dóibh a chinneadh go bhfuil gá le cistí nó acmhainní eacnamaíocha den sórt sin a sholáthar chun críocha daonnúla, amhail cúnamh a chur ar fáil nó cur ar fáil cúnaimh a éascú, lena n-áirítear soláthairtí leighis, agus bia, d'aistriú oibrithe daonnúla agus cúnaimh ghaolmhair nó le haghaidh aslonnaithe ó Mhaenmar/Bhurma.

2.   Cuirfidh an Ballstát lena mbaineann aon údarú arna dheonú faoi mhír 1 in iúl do na Ballstáit eile agus don Choimisiún laistigh de 4 seachtaine ón údarú.’.

Airteagal 2

Tiocfaidh an Rialachán seo i bhfeidhm ar dháta a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 22 Márta 2021.

Thar ceann na Comhairle

An tUachtarán

J. BORRELL FONTELLES

(1)  Féach leathanach37 den Iris Oifigiúil seo.

(2)  Rialachán (AE) Uimh. 401/2013 ón gComhairle an 2 Bealtaine 2013 maidir le bearta sriantacha i dtaca le Maenmar/Burma agus lena n-aisghairtear Rialachán (CE) Uimh. 194/2008 (IO L 121, 3.5.2013, lch. 1).

(3)  Cinneadh 2013/184/CBES ón gComhairle an 22 Aibreán 2013 maidir le bearta sriantacha i gcoinne Mhaenmar/Bhurma agus lena n-aisghairtear Cinneadh 2010/232/CBES (IO L 111, 23.4.2013, lch. 75).