(1)

An 20 Iúil 2023, ghlac an Chomhairle Rialachán (AE) 2023/1529.

(2)

Sna conclúidí uaithi an 21 agus an 22 Márta 2024, chuir an Chomhairle Eorpach in iúl nach mór an rochtain atá ag an Rúis ar mhíreanna agus teicneolaíochtaí íogaire atá ábhartha don láthair chatha a shrianadh a mhéid is féidir, lena n-áirítear trí dhíriú ar eintitis i dtríú tíortha lena gcumasaítear teacht timpeall ar smachtbhannaí trí thríú tíortha. D’iarr an Chomhairle Eorpach ar Ardionadaí an Aontais do Ghnóthaí Eachtracha agus don Bheartas Slándála agus ar an gCoimisiún smachtbhannaí breise a ullmhú, lena n-áirítear smachtbhannaí i gcoinne na hIaráine. Thairis sin, chuir an Chomhairle Eorpach in iúl go leanfadh an tAontas de bheith ag obair go dian le comhpháirtithe réigiúnacha agus idirnáisiúnta chun aon ghéarú breise a chosc, go háirithe sa Liobáin agus sa Mhuir Rua. D’iarr an Chomhairle Eorpach ar na gníomhaithe uile, go háirithe an Iaráin, staonadh ó ghníomhartha géaraitheacha.

(3)

Sna conclúidí uaithi an 17 Aibreán 2024, cháin an Chomhairle Eorpach go láidir agus go neamhbhalbh, an t-ionsaí a rinne an Iaráin ar Iosrael agus d’athdhearbhaigh sí a dlúthpháirtíocht iomlán le muintir Iosrael agus a tiomantas do shlándáil Iosrael agus do chobhsaíocht an réigiúin. D’iarr an Chomhairle Eorpach ar an Iaráin agus ar a seachfhórsaí deireadh a chur leis na hionsaithe uile agus thathantaigh sí ar na páirtithe uile an-ghuaim a chur orthu féin agus staonadh ó aon ghníomhaíocht a d’fhéadfadh cur leis an teannas sa réigiún. Anuas air sin, luaigh an Chomhairle Eorpach go nglacfadh an tAontas bearta sriantacha breise i gcoinne na hIaráine, go háirithe i ndáil le haerárthaí gan foireann agus diúracáin. Ar deireadh, d’athdhearbhaigh an Chomhairle Eorpach go raibh an tAontas tiomanta i gcónaí rannchuidiú leis an díghéarú agus leis an tslándáil sa réigiún.

(4)

Tá aerárthaí gan foireann a tháirgtear san Iaráin á n-úsáid ag an Rúis chun tacú lena cogadh foghach i coinne na hÚcráine, rud a sháraíonn ceannasacht, neamhspleáchas agus iomláine chríochach na tíre sin, lena n-áirítear i gcoinne sibhialtach agus in aghaidh an bhonneagair shibhialtaigh. Dá bhrí sin, trí chlár Státurraithe na hIaráine chun aerárthaí gan foireann a fhorbairt agus a tháirgeadh, rannchuidítear le sáruithe ar Chairt na Náisiún Aontaithe agus ar bhunphrionsabail an dlí idirnáisiúnta.

(5)

I bhfianaise a thromchúisí atá an staid, ba cheart eintiteas amháin a áireamh ar liosta na ndaoine nádúrtha agus dlítheanacha, na n-eintiteas agus na gcomhlachtaí atá faoi réir na mbeart sriantach a leagtar amach in Iarscríbhinn III a ghabhann le Rialachán (AE) 2023/1529.

(6)

Dá bhrí sin, ba cheart Rialachán (AE) 2023/1529 a leasú dá réir sin,