L_202501308GA.000101.fmx.xml

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 31 agus Airteagal 207(4), an chéad fhomhír, i gcomhar le hAirteagal 218(9) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)	An Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí (‘Coinbhinsiún CC’thug an tAontas i gcrích é le Cinneadh 87/369/CEE ón gComhairle (1) agus tháinig sé i bhfeidhm an 1 Eanáir 1988.

(2)

De bhun Airteagal 7 de Choinbhinsiún CC, féadfaidh an Coiste um an gCóras Comhchuibhithe tograí a mholadh do Chomhairle na hEagraíochta Domhanda Custaim (EDC) le haghaidh leasuithe ar Ainmníocht an Chórais Chomhchuibhithe (‘Ainmníocht CC’). De bhun Airteagal 16 de Choinbhinsiún CC, féadfaidh Comhairle EDC leasuithe a mholadh do na Páirtithe Conarthacha.

(3)

Meastar go ndéanfaidh Comhairle EDC cinneadh maidir le dréachtmholadh do na Páirtithe Conarthacha le haghaidh leasú ar Ainmníocht CC ag na seisiúin a bheidh aici i mí an Mheithimh 2025 (‘an dréachtmholadh’). Tá an dréachtmholadh le glacadh ar bhonn togra a d’ullmhaigh an Coiste um an gCóras Comhchuibhithe agus tá bailchríoch le cur air le linn an 75ú cruinniú a bheidh aige an 10-21 Márta 2025. Tá sé le teacht i bhfeidhm an 1 Eanáir 2028.

(4)

Tá sé ríthábhachtach go gcoinneofar Ainmníocht CC cothrom le dáta agus i gcomhréir le teacht chun cinn na bpatrún trádála agus le forbairt teicneolaíochtaí nua, agus go léireofaí léi, a mhéid is féidir, riachtanais na n-úsáideoirí. Áirítear sa dréachtmholadh atá beartaithe go leor sraitheanna leasuithe lena gcuirtear san áireamh an gá atá le hAinmníocht CC a nuachóiriú nó a chur in oiriúint dá timpeallacht.

(5)

Is iomchuí an seasamh atá le glacadh thar ceann an Aontais i gComhairle EDC i ndáil leis an dréachtmholadh a bhunú, ós rud é, a luaithe a ghlacfar leis faoi Airteagal 16 de Choinbhinsiún CC, go mbeidh an Moladh ina cheangal ar an Aontas agus go mbeidh sé in ann tionchar cinntitheach a imirt ar ábhar dhlí an Aontais, go háirithe Iarscríbhinn I a ghabhann le Rialachán (CEE) Uimh. 2658/87 ón gComhairle (2).

(6)	Ba cheart gurb é seasamh an Aontais i gComhairle EDC tacú leis an dréachtmholadh, chomh maith le haon mhionathrú eagarthóireachta a d’fhéadfaí a mheas a bheith riachtanach,

TAR ÉIS AN CINNEADH SEO A GHLACADH:

Airteagal 1

1. Is é an seasamh atá le glacadh thar ceann an Aontais i gComhairle na hEagraíochta Domhanda Custaim (EDC) ag na seisiúin a bheidh aici i mí an Mheithimh 2025 glacadh leis an Dréachtmholadh faoi Airteagal 16 den Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí (‘Coinbhinsiún CC’) a bhaineann leis an leasú ar an gCóras Comhchuibhithe mar a leagtar amach in Iarscríbhinn Q a ghabhann le Doiciméad NC3358Ba (Tuarascáil HSC/75/Márta 2025).

2. Féadfaidh ionadaithe an Aontais i gComhairle na hEagraíochta Domhanda Custaim (EDC) teacht ar chomhaontú maidir le mionathruithe eagarthóireachta ar an Dréachtmholadh faoi Airteagal 16 de Choinbhinsiún CC i bhfianaise forbairtí ag seisiúin Chomhairle EDC atá ar na bacáin, i gcomhairle leis na Ballstáit le linn cruinnithe comhordaithe ar an láthair, gan cinneadh eile ón gComhairle.

Airteagal 2

Tiocfaidh an Cinneadh seo i bhfeidhm ar dháta a ghlactha.

Arna dhéanamh i Lucsamburg, an 23 Meitheamh 2025.

Thar ceann na Comhairle

An tUachtarán

C. SIEKIERSKI

(1) Cinneadh 87/369/CEE ón gComhairle an 7 Aibreán 1987 maidir leis an gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus an Prótacal lena ndéantar leasú air, a thabhairt i gcrích (IO L 198, 20.7.1987, lch. 1, ELI: http://data.europa.eu/eli/dec/1987/369/oj).