(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú. Le hAirteagal 10(2) den Rialachán sin foráiltear maidir le hathmheastóireacht a dhéanamh ar bhreiseáin a údaraíodh de bhun Threoir 70/524/CEE ón gComhairle (2).

(2)

Rinneadh an tsubstaint bláthola an chrainn tae ó Melaleuca alternifolia (Maiden & Betche) Cheel a údarú gan teorainn ama, i gcomhréir le Treoir 70/524/CEE, mar bhreiseán beathaithe le haghaidh gach speicis ainmhíoch. Ina dhiaidh sin cuireadh an tsubstaint sin isteach i gClár na mBreiseán Beathaithe mar tháirge a bhí ann cheana, i gcomhréir le hAirteagal 10(1), pointe (b), de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh isteach iarratas chun bláthola an chrainn tae ó Melaleuca alternifolia (Maiden & Betche) Cheel a údarú mar bhreiseán beathaithe le haghaidh gach speicis ainmhíoch, agus iarradh ann go n-aicmeofaí an breiseán sin i gcatagóir na mbreiseán ‘breiseáin chéadfacha’ agus san fheidhmghrúpa ‘comhdhúile blaistithe’. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(4)

D’iarr an t-iarratasóir go n-údarófaí an breiseán lena úsáid in uisce óil freisin. Mar sin féin, le Rialachán (CE) Uimh. 1831/2003 ní cheadaítear ‘comhdhúile blaistithe’ a údarú lena n-úsáid in uisce óil. Dá bhrí sin, níor cheart úsáid an bhreiseáin seo in uisce óil a cheadú.

(5)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 18 Meán Fómhair 2024 (3) nach bhfuil aon ábhar imní ag baint le bláthola an chrainn tae ó Melaleuca alternifolia (Maiden & Betche) Cheel maidir le spriocspeicis lena ramhrú agus nach dócha go mbeidh sé ina ábhar imní sábháilteachta d’aon speiceas eile ná d’ainmhithe fadsaolacha agus atáirgthe ar uastiúchaintí áirithe a shonraítear a thuilleadh le haghaidh gach speicis. Thairis sin, tháinig sé ar an gconclúid nár sainaithníodh aon ábhar imní do thomhaltóirí tar éis bláthola an chrainn tae ó Melaleuca alternifolia (Maiden & Betche) Cheel a úsáid faoi na coinníollacha atá beartaithe, agus nach meastar go mbeidh a húsáid ina riosca don chomhshaol faoi na coinníollacha atá beartaithe. Tháinig an tÚdarás ar an gconclúid gur cheart bláthola an chrainn tae ó Melaleuca alternifolia (Maiden & Betche) Cheel a mheas mar ghreannaitheoir craicinn agus súl, mar íogróir deirmeach agus riospráide, agus mar shubstaint atá tocsaineach i leith an atáirgthe. Thug an tÚdarás le fios go bhféadfadh úsáideoirí neamhchosanta a bheith nochta do meitileoigeanól agus an breiseán á láimhseáil agus, dá bhrí sin, chun an riosca a laghdú, gur cheart nochtadh na n-úsáideoirí a íoslaghdú. Ós rud é go n-aithnítear go gcuireann bláthola an chrainn tae ó Melaleuca alternifolia (Maiden & Betche) Cheel blas ar bhia agus go mbeadh an fheidhm chéanna aici i mbeatha, go bunúsach, is atá aici i mbia, tháinig an tÚdarás ar an gconclúid go meastar nach gá le héifeachtúlacht a léiriú a thuilleadh. D’fhíoraigh sé freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(6)

I bhfianaise an mhéid thuas, measann an Coimisiún go gcomhlíonann bláthola an chrainn tae ó Melaleuca alternifolia (Maiden & Betche) Cheel na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substainte sin a údarú mar a shonraítear san Iarscríbhinn a ghabhann leis an Rialachán seo. Measann an Coimisiún gur gá uaschion a shocrú i mbeatha iomlán mar gheall ar láithreacht na substainte ar ábhar imní iad, is é sin meitileoigeanól, agus measann sé freisin go bhfuil meascán de bhláthola an chrainn tae ó Melaleuca alternifolia (Maiden & Betche) Cheel le breiseáin luibheolaíocha eile ceadaithe, ar choinníoll go bhfuil méideanna na substainte céanna ar ábhar imní í in ábhair bheatha agus i mbeatha chumaisc níos ísle ná an méid a eascraíonn as breiseán aonair a úsáid ar an leibhéal uasta nó ar an leibhéal molta le haghaidh an speicis nó na catagóire ainmhithe. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Ós rud é nach gá na modhnuithe ar choinníollacha údaraithe na substainte lena mbaineann a chur i bhfeidhm láithreach ar chúiseanna sábháilteachta, is iomchuí idirthréimhse foráil a dhéanamh maidir le páirtithe leasmhara ionas gur féidir leo iad féin a ullmhú chun na ceanglais nua a eascraíonn as an údarú a chomhlíonadh.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,