(1)

An 17 Iúil 1995, síníodh an Comhaontú Eora-Mheánmhara lena mbunaítear comhlachas idir na Comhphobail Eorpacha agus a mBallstáit, de pháirt amháin, agus Poblacht na Túinéise, den pháirt eile (1), (“an Comhaontú”). Tháinig an Comhaontú i bhfeidhm an 1 Márta 1998.

(2)

Tá Poblacht na Cróite ina Ballstát den Aontas Eorpach ón 1 Iúil 2013.

(3)

I gcomhréir le hAirteagal 6(2) d’Ionstraim Aontachais Phoblacht na Cróite, tá aontachas Phoblacht na Cróite leis an gComhaontú le comhaontú trí phrótacal a ghabhann leis an gComhaontú (“an Prótacal”). Faoi nós imeachta simplithe, tá prótacal le tabhairt i gcrích idir an Chomhairle, ag gníomhú di d’aon toil thar ceann na mBallstát, agus an tríú tír lena mbaineann.

(4)

An 14 Meán Fómhair 2012, d’údaraigh an Chomhairle don Choimisiún tús a chur le caibidlíocht leis na tríú tíortha lena mbaineann i bhfianaise aontachas Phoblacht na Cróite leis an Aontas. Tugadh an chaibidlíocht le Poblacht na Túinéise i gcrích go rathúil an 11 Bealtaine 2018.

(5)

I gcomhréir le Cinneadh (AE) 2020/1420 ón gComhairle (2), síníodh an Prótacal thar ceann an Aontais agus a Bhallstát sa Bhruiséil an 27 Iúil 2020 faoi réir a thabhairt i gcrích ar dháta níos déanaí.

(6)

Ba cheart an Prótacal a fhormheas thar ceann an Aontais agus a Bhallstát,