(1)

Permezz tar-Regolament (KE) Nru 969/2000 ( 3 ) il-Kunsill emenda u estenda l-miżuri u imposti mir-Regolament (KE) Nru 3068/92 ( 4 ), kif emendat mir-Regolamenti (KE) Nri 643/94 ( 5 ) u (KE) 449/98 ( 6 ), fuq l-importazzjonijiet fil-Komunità tal-kloridu tal-potassju (“il-prodott kkonċernat”) li joriġina fir-Repubblika tal-Belarus (Belarus), il-Federazzjoni Russa (Russja) u l-Ukraina. Bis-saħħa tar-Regolament (KE) Nru XXXX ( 7 ) il-Kunsill emenda r-Regolament (KE) Nru 969/2000.

(2)

Il-miżuri huma ammonti fissi ta’ dazju, stabbiliti skond il-kategorija u grad tal-prodott, li jvarjaw minn 19.51 EUR/tunellata sa 48.19 EUR/tunnellata fil-każ tal-Belarus, 19.61 EUR/tunnellata sa 40.63 EUR/tunnellata fil-każ tar-Russja u 19.61 EUR/tunnellata sa 48.19 EUR/tunnellata fil-każ ta’ l-Ukraina.

(3)

Fl-20 ta’ Marzu 2004 il-Kummissjoni ħabbret permezz tal-pubblikazzjoni ta’ avviż fil-Ġurnal Uffuċjali ta’ l-Unjoni Ewropea ( 8 ) l-bidu ta’ reviżjoni parzjali temporanja tal-miżuri fis-seħħ (“il-miżuri”) in segwitu ta’ l-Artikoli 11 (3) u 22 (c) tar-Regolament bażiku.

(4)

Ir-reviżjoni nbdiet fuq inizjattiva tal-Kummissjoni sabiex teżamina jekk, b’ konsegwenza tat-tkabbir ta’ l-Unjoni Ewropea fl-1 ta’ Mejju 2004 (“It-tkabbir”) u, jekk wieħed jiffoka fuq l-aspett ta’ l-interess Komunitarju, hemm ħtieġa li l-miżuri jiġu adottati sabiex jiġi evitat effett mhux mistenni u eċċessivament negattiv fuq il-partijiet kollha interessati inklużi dawk li jużaw, distributuri u konsumaturi.

(5)

Il-partijiet kollha interessati li l-Kummissjoni taf bihom, inklużi l-industrija tal-Komunità, l-assoċjazzjonijiet tal-produtturi jew persuni fil-Komunità li jagħmlu użu, esportaturi/produtturi fil-pajjiżi kkonċernati, importaturi u l-assoċjazzjonijiet tagħhom u l-awtoritajiet rilevanti tal-pajjiżi kkonċernati kif ukoll partijiet interessati fl-għaxar Stati Membri ġodda li ssieħbu fl-Unjoni Ewropea fl-1 ta’ Mejju 2004 (“l-UE10”) ġew infurmati dwar il-bidu ta’ l-investigazzjoni u ngħataw l-opportunità li jikkomunikaw il-ħsieb tagħhom bil-miktub, li jissottomettu informazzjoni u jippovdu evidenza ulterjuri fiż-żmien stabbilit fl-avviz ta’ inizjazzjoni. Il-partijiet kollha interessati li għamlu rikjesta u wrew li kien hemm raġunijiet ’il għaliex għandhom jinstemgħu ngħataw smigħ.

(6)

Kif jirriżulta mir-regolament tal-Kummissjoni (KE) Nru 992/2004, l-investigazzjoni kkonkludiet li huwa fl-interess Komunitarju li jiġu adattati l-miżuri eżistenti, jekk tali adattazzjoni ma tnaqasx b’mod sinjifikanti l-livell mixtieq ta’ difiża tal-kummerċ.

(7)

(1) F’ konformità mal-konklużjonijiet tar-Regolament (KE) Nru 992/2004, il-Kummissjoni, f’konformità ma’ l-Artikolu 8 (2) tar-regolament bażiku, issuġġeriet garanziji lill-kumpaniji kkonċernati. B’riżultat ta’ dan, sussegwentement ġew offruti garanziji minn (i) produttur wieħed li jesporta l-prodott ikkonċernat fil-Belarus (Republican Unitary Enterprise Production Amalgamantion Belaruskali) flimkien mal-kumpaniji relatati tagħha fir-Russja (JSC International Potash Company), fl-Awstrija (Belurs Handelsgesellchaft m.b.H.) u fil-Litwanja (UAB Baltkalis), (ii) produttur-esportatur fir-Russja (JSC Silvinit) li jesporta flimkien ma’ kumpaniji relatati tiegħu fir-Russja (JSC International Potash Company) u fl-Awstrija (Belurs Handelsgesellschaft m.b.H.) u (iii) produttur-esportatur fir-Russja (JSC Uralkali) flimkien ma’ kumpanija f’ Ċipru (Fertexim Ltd).

(8)

Wieħed għandu jiftakar li, b’ riżultat ta’ l-applikazzjoni ta’ l-Artikolu 22 (c) tar-Regolament bażiku, dawn il-garanziji huma kkunsidrati bħala miżuri speċjali peress li skond il-konklużjonijiet tar-Regolament (KE) Nru 992/2004, m’humiex direttament ekwivalenti għal dazju kontra d-dumping.

(9)

Minkejja dan, f’ konformità mar-Regolament (KE) Nru 992/2004, il-garanziji jobbligaw lil kull produttur individwali li jesporta sabiex jirrispetta l-prezzijiet minimi ta’ importazzjoni fil-qafas tal-kwoti ta’ importazzjoni u, sabiex il-garanziji jkunu jistgħu jiġu mmonitorati, il-produtturi kkonċernati li jesportaw qablu li jirrispettaw b’ mod wiesa’ l-prezzijiet tradizzjonali tagħhom tal-bejgħ lil klijienti individwali fl-UE10. Il-produtturi li jesportaw huma wkoll konxji li jekk jinstab li dawn il-bixriet tradizzjonali ta’ bejgħ jinbiddlu b’ mod sinjifikanti, jew jekk isir aktar diffiċli jew impossibbli sabiex jiġu mmonitorati dawn il-garanziji, il-Kummissjoni għandha d-dritt li tirrevoka l-aċċettazzjoni tal-garanzija tal-kumpanija li tirriżulta f’ dazji definittivi kontra d-dumping li jiġu imposti minflokha, jew tista’ taġġusta l-livell tal-kwota, jew tista’ tieħu azzjoni oħra ta’ rimedju.

(10)

Hija wkoll kundizzjoni għall-garanziji li jekk dawn jinkisru fi kwalunkwe mod, il-Kummissjoni tkun intitolata li tirrevoka l-aċċettazzjoni tagħha li tirriżulta f’ dazji definittivi kontra d-dumping li qed jiġu imposti minflokhom.

(11)

Il-kumpaniji jridu jipprovdu wkoll lill-Kummissjoni b’ informazzjoni regolari u dettaljata dwar l-esportazzjonijiet tagħhom fil-Komunità, jiġifieri li l-garanziji jistgħu jiġu monitorati b’ mod effettiv mill-Kummissjoni.

(12)

Sabiex il-Kummissjoni tkun tista’ timmonitorja b’ mod effettiv il-konformità tal-kumpanija mal-garanziji, meta tiġi ppreżentata lill-awtoritajiet doganali rilevanti rikjesta għar-rilaxx taċ-ċirkolazzjoni ħielsa in segwitu ta’ garanzija, eżenzjoni mid-dazju tkun kondizzjonali fuq il-preżentazzjoni ta’ fattura li tikkontjeni għall-inqas l-oġġetti ta’ informazzjoni elenkata fl-Anness għar-Regolament tal-Kunsill (KE) Nru 992/2004. Dan il-livell ta’ informazzjoni huwa wkoll neċessarju sabiex jagħmilha possibbli għall-awtoritajiet doganali sabiex jistabbilixxu b’ preċiżjoni suffiċjenti li l-kunsinna tikkorrispondi mad-dokumenti kummerċjali. Fejn l-ebda fattura ta’ dan it-tip ma tiġi ppreżentata, jew meta ma tikkorispondiex mal-prodott ippreżentat lid-dwana, minflok tkun pagabbli d-dwana ta’ kontra d-dumping.

(13)

In vista ta’ dak li ssemma hawn fuq, l-offerti għall-garanziji huma kkunsidrati aċċettabli.

(14)

L-aċċettazzjoni tal-garanziji hija limitata għall-perjodu inizzjali ta’ tnax-il xahar mingħajr preġudizzju għat-tul tal-miżuri. Iżda, sitt xhur wara l-aċċettazzjoni tal-garanziji, l-aċċettazzjoni kontinwa tagħhom tkun suġġetta għal evalwazzjoni mill-Kummissjoni sabiex tivverifika jekk għadhomx jeżistu l-kundizzjonijiet eċċezzjonali u negattivi għall-persuni li jagħmlu użu minnha fl-UE10 li wasslu għall-aċċettazzjoni tal-garanziji.

(15)

In vista taċ-ċirkostanzi mhux tas-soltu ta’ dan il-każ u r-riskju probabbli tal-ksur tal-garanziji kkawżati mid-differenzi fil-prezz bejn il-UE10 u l-UE15 u n-natura tagħhom ta’ żmien qasir, huwa meqjus li hemm raġunijiet biżżejjed sabiex ċerti importazzjonjiet tal-prodott ikkonċernat ikun soġġett għal reġistrazzjoni għal perjodu massimu ta’ disa’ xuhur skond l-Artikolu 14 (5) tar-Regolament bażiku.

(16)

Għalhekk l-awtoritajiet doganali huma mitluba li jieħdu l-passi xierqa sabiex jirreġistraw importazzjonijiet fil-Komunità tal-prodott ikkonċernat li joriġinaw mill-Belarus u mir-Russja esportati mill-kumpaniji li offrew garanziji aċċettabli u li qed jippruvaw jibbenifikaw mill-eżenzjoni ta’ kontra d-dumping mid-dazji ta’ l-anti-dumping.

(17)

Fil-każ li jinstab ksur tal-garanziji, jistgħu jiġu imposti retroattivament dazji fuq oġġetti li jkunu f’ ċirkolazzjoni libera fil-Komunità mid-data tal-ksur tal-garanzija.