(1)

Fid-29 ta’ Settembru 2020, il-Kummissjoni Ewropea (“il-Kummissjoni”) imponiet dazju anti-dumping definittiv fuq importazzjonijiet fl-Unjoni ta’ ċertu Alkoħol tal-Polivinil (PVA, Polyvinyl Alcohol) li joriġina mir-Repubblika tal-Poplu taċ-Ċina (“il-pajjiż ikkonċernat”) permezz tar-Regolament ta’ Implimentazzjoni tal-Kummissjoni (UE) 2020/1336 (2) (“ir-Regolament oriġinali”).

(2)

Wara l-impożizzjoni tal-miżuri, għaxar partijiet (3) allegaw li seħħet bidla temporanja fil-kundizzjonijiet tas-suq wara l-perjodu ta’ investigazzjoni (“PI”) (mill-1 ta’ Lulju 2018 sat-30 ta’ Ġunju 2019) u sostnew li l-miżuri definittivi jenħtieġ li jiġu sospiżi skont l-Artikolu 14(4) tar-Regolament (UE) 2016/1036 (“ir-Regolament bażiku”), fid-dawl ta’ dawn il-bidliet.

(3)

Fit-3 ta’ Settembru 2021, il-Kummissjoni ddeċidiet li teżamina ulterjorment it-talbiet għal sospensjoni u talbet lill-partijiet interessati fl-Unjoni biex jipprovdu informazzjoni dwar l-hekk imsejjaħ “PI ta’ sospensjoni” (jiġifieri l-perjodu wara l-PI minn Lulju 2020 sa Ġunju 2021) biex jeżaminaw u jivvalutaw l-impatt, jekk hemm, taċ-ċirkostanzi allegatament mibdula fis-suq tal-Unjoni.

(4)

Wara d-divulgazzjoni finali, erba’ partijiet interessati, Carbochem, Far Polymers, Gamma Chimica u Jeniuschem, ikkontestaw l-għażla tal-PI ta’ sospensjoni li saret mill-Kummissjoni.

(5)

Fil-fehma tagħhom, il-PI ta’ sospensjoni kellu jibda minn Ottubru 2020 u kellu jkopri wkoll ix-xhur ta’ Lulju u Awwissu 2021 peress li l-Kummissjoni talbet tali data fil-kwestjonarju.

(6)

Il-Kummissjoni rċeviet l-ewwel talba għal sospensjoni fis-17 ta’ Ġunju 2021 u bdiet l-investigazzjoni ta’ sospensjoni fit-3 ta’ Settembru 2021, billi għażlet il-perjodu ta’ 12-il xahar qabel il-preżentazzjoni tat-talba, meta allegatament seħħew l-allegati bidliet tal-kundizzjoni tas-suq.

(7)

Fir-rigward tax-xhur ta’ Lulju u Awwissu 2021, il-Kummissjoni talbet data dwar dawn ix-xhur sabiex tiġbor informazzjoni dwar l-evoluzzjoni tas-suq anki wara l-PI ta’ sospensjoni. Madankollu, mhux il-partijiet kollha li kkooperaw kellhom tali data disponibbli. Madankollu, meta kienet disponibbli l-Kummissjoni qieset id-data għal Lulju u Awwissu 2021, kif imsemmi fil-premessa (53).

(8)

L-affermazzjoni ġiet għalhekk miċħuda.

(9)

Informazzjoni dwar l-allegata bidla temporanja fiċ-ċirkostanzi fis-suq waslet minn 2 produtturi tal-Unjoni u 10 partijiet interessati inklużi utenti, importaturi u assoċjazzjonijiet. Il-produtturi tal-Unjoni pprovdew ukoll l-informazzjoni mitluba relatata ma’ ċerti indikaturi tad-dannu.

(10)

Fl-20 ta’ Mejju 2022, il-Kummissjoni ddivulgat l-intenzjoni tagħha li ma tissospendix il-miżuri skont l-Artikolu 14(4) tar-Regolament bażiku. Ġie konċess perjodu li fih il-partijiet kollha setgħu jikkummentaw.

(11)

L-Artikolu 14(4) tar-Regolament bażiku, jipprevedi li, fl-interess tal-Unjoni, il-miżuri anti-dumping jistgħu jiġu sospiżi meta l-kundizzjonijiet tas-suq jinbidlu temporanjament sal-punt li jkun improbabbli li d-dannu jerġa’ jokkorri bħala riżultat ta’ tali sospensjoni. Minn dan jirriżulta li l-miżuri anti-dumping jistgħu jiġu sospiżi biss f’sitwazzjoni fejn iċ-ċirkostanzi jkunu nbidlu b’tali mod li l-industrija tal-Unjoni ma tkunx għadha qiegħda ġġarrab dannu materjali, u li jkun improbabbli li tali dannu jerġa’ jokkorri.

(12)

L-investigazzjoni li wasslet għar-Regolament definittiv uriet li, matul il-perjodu kkunsidrat (2016 – Ġunju 2019) l-importazzjonijiet Ċiniżi żdiedu bi 53 %, u laħqu sehem mis-suq ta’ [30 % – 35 %] fil-PI (Lulju 2018 – Ġunju 2019), żieda minn 22 % fl-2016. B’mod parallel, is-sitwazzjoni ekonomika tal-industrija tal-Unjoni marret għall-agħar u wriet xejra negattiva fl-indikaturi ewlenin kollha: Il-produzzjoni (- 12 %), il-bejgħ tal-UE (- 27 %), is-sehem mis-suq (minn [35 % – 40 %] għal [25 % – 30 %]) u l-profittabbiltà (minn [- 0,5 % għal - 5 %] għal [- 10 % għal - 15 %] fil-PI). Abbażi ta’ dan, il-Kummissjoni kkonkludiet li l-industrija tal-Unjoni ġarrbet dannu materjali kkaġunat mill-importazzjonijiet oġġett ta’ dumping miċ-Ċina.

(13)

L-allegati bidliet temporanji tal-kundizzjonijiet tas-suq wara l-PI kienu jikkonsistu fi tfixkil fil-katina tal-provvista tal-materja prima prinċipali tal-monomeru tal-aċetat tal-vinil (VAM, vinyl acetate monomer), flimkien ma’ żieda sinifikanti fil-kostijiet tat-trasport, li wasslu għal skarsezza globali tal-prodott ikkonċernat u għal żidiet sinifikanti fil-prezzijiet.

(14)

Abbażi tal-analiżi tal-kummenti li waslu mid-diversi partijiet wara t-talba tal-Kummissjoni għal informazzjoni ulterjuri, kontroverifikata mad-data miġbura matul l-investigazzjoni, il-Kummissjoni kkonkludiet li tabilħaqq kien hemm tfixkil temporanju fil-katina tal-provvista globali fir-rigward tal-VAM. Dan it-tfixkil kien ikkawżat prinċipalment mill-maltempati tax-xitwa fi Frar 2021 f’Texas. Dan l-avveniment ġiegħel lil kull produttur tal-VAM ewlieni tal-Istati Uniti jwaqqaf temporanjament il-produzzjoni u jinvoka force majeure għall-konsenji tiegħu, u b’hekk joħloq skarsezza globali tal-VAM u għalhekk ta’ PVA fl-ewwel nofs tal-2021. L-analiżi żvelat li l-kwistjoni ewlenija għall-provvista tal-PVA kienet tabilħaqq l-għajbien ta’ sorsi alternattivi ta’ provvista (prinċipalment l-Istati Uniti u l-Ġappun), kif spjegat fit-Taqsima 2.3.2. Madankollu, is-sitwazzjoni sadanittant innormalizzat u huwa mistenni ritorn għall-volumi ta’ produzzjoni normali matul l-2022.

(15)

Wara d-divulgazzjoni finali, Ahlstrom-Munksjö, Carbochem, Cepi, Far Polymers, Gamma Chimica u Jeniuschem ikkontestaw il-konklużjoni tal-Kummissjoni fir-rigward tar-ritorn għall-volumi ta’ produzzjoni normali ta’ VAM.

(16)

Il-partijiet argumentaw li l-iskarsezza tal-VAM għadha tippersisti sal-lum peress li, skont xi pubblikazzjonijiet, il-produtturi tal-Istati Uniti għadhom qegħdin jinvokaw force majeure fir-rigward tal-konsenji tal-VAM u għaldaqstant ma jistax jiġi konkluż li se jkun hemm ritorn għall-volumi normali tal-produzzjoni.

(17)

Dan l-argument kellu jiġi rifjutat. L-ewwel nett, il-Kummissjoni analizzat l-impatt tal-maltempati fix-xitwa f’Texas bħala waħda mir-raġunijiet ewlenin għat-tibdil fil-kundizzjonijiet tas-suq imsemmija fit-talbiet għal sospensjoni. L-investigazzjoni wriet li l-effett tal-maltempati fix-xitwa fl-2021 issa kważi għadda kompletament. Id-data provduta minn wieħed mill-produtturi ewlenin tal-VAM fl-Istati Uniti indikat li l-produzzjoni tiegħu reġgħet lura għal-livell normali fit-tieni trimestru tal-2021 u qabżet il-livell ta’ qabel il-maltempati fit-tielet trimestru tal-2021. It-tieni, id-dikjarazzjoni ta’ force majeure msemmija mill-partijiet tirreferi għal avvenimenti li seħħew wara l-PI ta’ sospensjoni u affettwaw produtturi uniċi għal avvenimenti speċifiċi u ma jikkostitwixxux bidla ġenerali fil-kundizzjonijiet tas-suq.

(18)

L-utenti sostnew ukoll li wara l-impożizzjoni tal-miżuri, iċ-Ċina naqqset il-produzzjoni tal-PVA tagħha. Dan it-tnaqqis kien allegatament minħabba l-iskarsezza fil-provvista tal-VAM fiċ-Ċina minħabba bidliet fil-politika tal-Gvern Ċiniż, inklużi l-politiki ta’ kontroll doppju tal-enerġija u l-minimizzazzjoni tat-tniġġis u l-politiki dwar l-iffrankar tal-enerġija għal-Logħob Olimpiku tax-Xitwa tal-2022. Il-VAM ma jintużax biss għall-produzzjoni tal-PVA, iżda huwa prodott kimiku standard li jintuża f’ħafna applikazzjonijiet. L-utenti sostnew li minħabba l-iskarsezza, il-prezzijiet tal-VAM żdiedu sal-punt li kien aktar profittabbli għall-produtturi Ċiniżi li jiffokaw fuq il-produzzjoni u l-bejgħ tal-VAM aktar milli jikkonvertu l-VAM għall-PVA.

(19)

Madankollu, id-data miġbura fl-investigazzjoni ma kkonfermatx din l-allegazzjoni. Il-prezzijiet tal-esportazzjonijiet Ċiniżi lejn l-UE ma nbidlux b’mod sinifikanti matul il-PI ta’ sospensjoni meta mqabbla mal-PI tal-investigazzjoni oriġinali, kif spjegat fit-Taqsima 2.3.2. Barra minn hekk, meta analizzat il-volumi globali tal-esportazzjonijiet tal-PVA miċ-Ċina, il-Kummissjoni nnutat li l-kwantitajiet esportati baqgħu l-istess matul il-PI ta’ sospensjoni meta mqabbla mal-PI tal-investigazzjoni oriġinali (ara t-Tabella 1). L-esportazzjonijiet lejn l-Unjoni biss naqsu, iżda dan it-tnaqqis ġie kkumpensat mill-istess żieda ta’ esportazzjonijiet lejn il-Korea, il-Malażja, Singapore u l-Vjetnam. Għaldaqstant, l-allegata skarsezza ta’ VAM ma affettwax il-kapaċità tal-produzzjoni tal-PVA tal-produtturi Ċiniżi u l-volumi mnaqqsa tal-esportazzjonijiet lejn l-Unjoni kienu prinċipalment il-konsegwenza tad-dazji anti-dumping fuq l-importazzjonijiet tal-PVA miċ-Ċina.

Tabella 1

Esportazzjonijiet tal-PVA miċ-Ċina (tunnellati)

(20)

L-utenti semmew kwistjonijiet tal-katina tal-provvista marbuta mal-pandemija tal-COVID-19. Tabilħaqq, in-nuqqas ta’ kontejners wassal għal żieda fir-rati għat-trasport, b’mod partikolari miċ-Ċina u minn naħa għal oħra tal-Oċean Atlantiku, li fixkel parzjalment il-ktajjen tat-trasport globali.

(21)

Fl-aħħar nett, l-importaturi u l-utenti argumentaw li l-industrija tal-Unjoni għadha mhijiex f’pożizzjoni li tissodisfa d-domanda kompluta tal-Unjoni għall-PVA. Il-Kummissjoni nnutat li filwaqt li l-industrija tal-Unjoni bdiet iżżid il-produzzjoni tagħha wara l-impożizzjoni tal-miżuri, tabilħaqq ma kinitx f’pożizzjoni li tissodisfa d-domanda kompluta tal-Unjoni matul il-PI ta’ sospensjoni, parzjalment minħabba t-tnaqqis preċedenti tagħha fil-kapaċità u minħabba l-iskarsezza globali tal-VAM. Fi kwalunkwe każ, din mhijiex ċirkostanza ġdida, peress li matul il-PI tal-investigazzjoni oriġinali, l-industrija tal-Unjoni diġà ma kinitx f’pożizzjoni li tissupplixxi għall-konsum kollu tal-PVA fl-Unjoni. Madankollu, il-kapaċità tal-Unjoni li tissupplixxi mhijiex kundizzjoni tas-suq għas-sospensjoni tal-miżuri.

(22)

Wara d-divulgazzjoni definittiva, Ahlstrom-Munksjö, Carbochem, Cepi, Far Polymers, Gamma Chimica u Jeniuschem, argumentaw li l-Kummissjoni rrifjutat li tqis bħala ċirkostanza mibdula, l-inabbiltà tal-industrija tal-Unjoni li tissupplixxi għad-domanda Ewropea, minkejja li l-Kummissjoni aċċettat b’mod espliċitu li din l-inabbiltà li tissupplixxi kienet konsegwenza diretta tal-iskarsezza tal-VAM.

(23)

Kif spjegat fil-premessa (21), l-industrija tal-Unjoni ma kellhiex il-kapaċità li tissupplixxi għad-domanda kompluta tal-Unjoni anki qabel l-iskarsezza tal-VAM u ma naqqsitx b’mod sinifikanti l-livelli ta’ produzzjoni tagħha matul il-PI ta’ sospensjoni, kif spjegat fil-premessi (36) u (37). Kuntrarjament, it-Tabella 2 tindika b’mod ċar li l-provvista mnaqqsa fis-suq tal-Unjoni kienet fil-fatt dovuta għal tnaqqis sostanzjali fl-importazzjonijiet, u mhux minħabba nuqqas ta’ produzzjoni mill-industrija tal-Unjoni. Għalhekk ma tistax titqies bħala bidla fiċ-ċirkostanzi tas-suq li tiġġustifika sospensjoni tal-miżuri eżistenti. Din l-affermazzjoni ġiet għalhekk miċħuda.

(24)

Il-valutazzjoni tas-sitwazzjoni ekonomika tal-industrija tal-Unjoni matul il-PI ta’ sospensjoni kienet tinkludi evalwazzjoni tal-indikaturi ekonomiċi prinċipali li kellhom impatt fuq l-istat tal-industrija tal-Unjoni matul il-perjodu kkunsidrat.

(25)

Fil-kummenti tagħha għad-divulgazzjoni finali, Ahlstrom-Munksjö argumentat li l-Kummissjoni pparagunat is-sitwazzjoni matul il-PI ta’ sospensjoni mas-sitwazzjoni fl-2016, mentri kellha tqabbilha mal-PI tal-investigazzjoni oriġinali.

(26)

Din l-affermazzjoni kellha tiġi rifjutata. Il-Kummissjoni pparagunat b’mod ċar is-sitwazzjoni matul il-PI ta’ sospensjoni mas-sitwazzjoni fil-PI tal-investigazzjoni oriġinali. Barra minn hekk, ipparagunat ukoll xi indikaturi mas-sitwazzjoni tal-industrija tal-Unjoni fl-2016, qabel iż-żieda fl-importazzjonijiet oġġett ta’ dumping dannużi miċ-Ċina.

(27)

Il-konsum fis-suq ħieles kien 52 % inqas matul il-PI ta’ sospensjoni meta mqabbel mal-PI tal-investigazzjoni oriġinali. Dan it-tnaqqis jista’ jiġi attribwit għat-tnaqqis tal-importazzjonijiet peress li, kif spjegat fit-Taqsima 2.3.4, il-bejgħ tal-industrija tal-Unjoni baqa’ stabbli. Il-konsum għall-użu ristrett ma kienx affettwat minn dawn l-iżviluppi u baqa’ stabbli.

(28)

L-importazzjonijiet mill-pajjiżi esportaturi prinċipali, jiġifieri ċ-Ċina, it-Tajwan, il-Ġappun u l-Istati Uniti, naqsu b’mod sinifikanti matul il-PI ta’ sospensjoni meta mqabbla mal-PI tal-investigazzjoni oriġinali. F’termini ta’ volumi, it-tnaqqis fl-importazzjonijiet mill-Istati Uniti kien l-aktar wieħed sinifikanti.

(29)

L-analiżi tas-sitwazzjoni żvelat li dan it-tnaqqis maġġuri fl-importazzjonijiet kien dovut għal taħlita ta’ fatturi. Fuq livell globali, it-tnaqqis fl-importazzjonijiet ħabat fl-istess żmien tal-kwistjonijiet tal-katina tal-provvista globali marbuta mal-pandemija tal-COVID-19. Madankollu, għaċ-Ċina, it-tnaqqis fl-importazzjonijiet ħabat fl-istess żmien tal-impożizzjoni ta’ miżuri fuq l-importazzjonijiet tal-PVA miċ-Ċina, peress li l-volum totali tal-esportazzjonijiet Ċiniżi lejn id-destinazzjonijiet l-oħra kollha baqa’ stabbli, kif spjegat fit-Taqsima 2.2. Fir-rigward tal-Istati Uniti, it-tnaqqis fl-importazzjonijiet kien aggravat mill-iskarsezza ta’ VAM minħabba l-maltempati fix-xitwa.

(30)

Dawn il-fatturi kollha rriżultaw fi produzzjoni limitata tal-PVA disponibbli għall-esportazzjoni, bit-tnaqqis maġġuri jseħħ fit-tieni nofs tal-2020. L-irkupru inizjali tal-ewwel nofs tal-2021 imbagħad reġa’ ġie affettwat mill-maltempati tax-xitwa fl-Istati Uniti. Madankollu, peress li d-dannu mġarrab matul il-maltempata fix-xitwa fl-Istati Uniti fl-2021 kienet ta’ durata limitata ħafna, l-iskarsezza ta’ VAM li rriżultat diġà qiegħda tbatti. Skont l-informazzjoni pprovduta mill-produtturi tal-Unjoni, il-produzzjoni tal-VAM fl-Istati Uniti, wara l-maltempata fix-xitwa, bdiet tirkupra mill-ewwel nofs tal-2022.

(31)

Minkejja t-tnaqqis sinifikanti (bi 62 %), il-kwantitajiet tal-importazzjonijiet miċ-Ċina baqgħu sinifikanti wara l-PI. Barra minn hekk, il-prezzijiet medji tal-importazzjonijiet Ċiniżi kienu biss 2 % ogħla meta mqabbla mal-PI tal-investigazzjoni oriġinali. Bħala medja, dawn għadhom 4 % inqas mill-prezz mhux dannuż tal-industrija tal-Unjoni (5), kif stabbilit fl-investigazzjoni oriġinali. Barra minn hekk, il-prezzijiet medji tal-importazzjonijiet Ċiniżi mingħajr id-dazji anti-dumping huma bħala medja 38 % anqas mill-prezz mhux dannuż.

Tabella 3

Prezzijiet tal-importazzjonijiet Ċiniżi

(32)

Wara d-divulgazzjoni Ahlstrom-Munksjö argumentat li l-importazzjonijiet miċ-Ċina kważi waqfu kompletament wara l-impożizzjoni tal-miżuri, u kien biss meta kien hemm intoppi fil-provvista tal-VAM li kkawżaw skarsezza tal-PVA, li l-utenti tal-PVA tal-Unjoni ġew imġiegħla jixtru prodott li joriġina mir-RPĊ. Għalhekk, fil-fehma tagħha, l-industrija tal-Unjoni ma setgħetx tkun fi stat prekarju minħabba l-importazzjonijiet tal-PVA miċ-Ċina.

(33)

L-ewwel nett, il-Kummissjoni ċċarat li li jiġi stabbilit jekk hemmx kawżalità bejn is-sitwazzjoni dannuża misjuba u l-importazzjonijiet inkwistjoni mhuwiex fattur rilevanti bħala tali fil-proċediment attwali. Jekk l-industrija tal-Unjoni ma tkunx fi stat li tiffaċċja l-okkorrenza mill-ġdid tal-importazzjonijiet bi prezzijiet baxxi, huwa improbabbli li l-miżuri attwali jiġu sospiżi peress li tali sospensjoni tista’ biss taggrava s-sitwazzjoni tal-industrija tal-Unjoni. Għaldaqstant, il-Kummissjoni ma kkonkludietx li l-industrija tal-Unjoni tinsab f’sitwazzjoni prekarja minħabba l-importazzjonijiet attwali miċ-Ċina.

(34)

It-tieni, it-tnaqqis tal-importazzjonijiet miċ-Ċina kien konsegwenza mistennija tad-dazji anti-dumping. Madankollu, il-kapaċità tal-produzzjoni Ċiniża għadha disponibbli u għad hemm domanda fl-Unjoni għall-importazzjonijiet Ċiniżi. L-utenti tal-PVA fl-Unjoni għadhom qegħdin jixtru l-PVA miċ-Ċina fi kwantitajiet sinifikanti, kif enfasizzat fil-premessa (31), iżda bi prezzijiet ġusti. Barra minn hekk, minkejja d-dazji anti-dumping, l-utenti għadhom qegħdin jagħmlu profitt, kif spjegat fil-premessa (66). Dan jissuġġerixxi li d-dazji anti-dumping qegħdin ikollhom l-effett maħsub tagħhom. Din l-affermazzjoni ġiet għalhekk miċħuda.

(35)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-PI ta’ sospensjoni:

Tabella 4

Il-produzzjoni, il-kapaċità tal-produzzjoni u l-użu tal-kapaċità

(36)

Il-volum tal-produzzjoni tal-industrija tal-Unjoni naqas kumplessivament b’5 % fil-PI ta’ sospensjoni meta mqabbel mal-PI tal-investigazzjoni oriġinali, filwaqt li l-kapaċità ma nbidlitx. Madankollu, analiżi trimestrali turi stampa inqas definita.

(37)

Il-volum tal-produzzjoni tal-industrija tal-Unjoni kien għadu qiegħed jonqos fl-ewwel trimestru tal-PI ta’ sospensjoni peress li ħabat fl-istess żmien tal-aħħar trimestru qabel l-impożizzjoni tal-miżuri, u għalhekk l-industrija tal-Unjoni kienet għadha qiegħda ssofri l-pressjoni tal-importazzjonijiet oġġett ta’ dumping miċ-Ċina. Minn Ottubru 2020, wara l-impożizzjoni tad-dazji anti-dumping, il-volumi tal-produzzjoni reġgħu bdew jiżdiedu u laħqu, fit-tieni nofs tal-PI ta’ sospensjoni, livell li kien 8 % ogħla mill-volum matul il-PI tal-investigazzjoni oriġinali.

(38)

Il-volum tal-bejgħ tal-industrija tal-Unjoni żviluppa kif ġej matul il-perjodu ta’ sospensjoni tal-PI.

Tabella 5

Il-volum tal-bejgħ u l-prezzijiet tal-bejgħ

(39)

Il-volum tal-bejgħ fl-UE baqa’ relattivament stabbli fil-livell tal-PI oriġinali. L-istess japplika għall-prezzijiet tal-bejgħ. Il-prezz medju tal-PVA tal-industrija tal-Unjoni matul il-PI ta’ sospensjoni kien 1 % ogħla milli kien fil-PI tal-investigazzjoni oriġinali. Madankollu, kif innutat għall-volum tal-produzzjoni, kemm il-kwantitajiet kif ukoll il-prezzijiet bdew juru t-tendenza li jkunu ferm aktar baxxi milli fil-PI tal-investigazzjoni oriġinali fl-ewwel nofs tal-PI ta’ sospensjoni. Imbagħad għal darb’ oħra, meta d-dazji anti-dumping daħlu fis-seħħ, it-tnejn li huma bdew jiżdiedu u laħqu, fl-aħħar trimestru, livell li kien 18 % u 5 % rispettivament ogħla milli fil-PI tal-investigazzjoni oriġinali.

(40)

Il-kost tal-produzzjoni għall-PVA naqas matul l-ewwel żewġ trimestri tal-PI ta’ sospensjoni, wara t-tendenza globali ta’ tnaqqis tal-prezzijiet tal-VAM. Madankollu, mit-tielet trimestru ’l quddiem, li ġie fl-istess żmien eżatt tal-kwistjonijiet tal-provvista tal-VAM fl-Istati Uniti msemmija fit-Taqsima 2.3.2, il-kost tal-produzzjoni reġa’ beda jiżdied b’14 % meta mqabbel mat-tieni trimestru tal-PI ta’ sospensjoni, wara t-tendenza li l-prezzijiet tal-VAM għolew.

(41)

Wara d-divulgazzjoni finali Ahlstrom-Munksjö, Carbochem, Far Polymers, Gamma Chimica u Jeniuschem ikkontestaw il-konklużjonijiet tal-Kummissjoni fir-rigward tal-prezzijiet tal-bejgħ tal-industrija tal-Unjoni.

(42)

Ahlstrom-Munksjö argumentat li l-prezzijiet tal-esportazzjoni miċ-Ċina żdiedu aktar mill-prezzijiet tal-industrija tal-Unjoni filwaqt li, fl-istess ħin, il-kost unitarju tal-produzzjoni tal-industrija tal-Unjoni naqas b’mod sinifikanti. Dan it-tnaqqis, fil-fehma ta’ Ahlstrom-Munksjö, issarraf f’żieda fil-profittabbiltà tal-industrija tal-Unjoni ta’ 18 %.

(43)

Din l-analiżi hija manifestament żbaljata. L-ewwel nett, il-prezzijiet tal-importazzjonijiet Ċiniżi fil-PI ta’ sospensjoni żdiedu biss b’punt perċentwali aktar mill-prezzijiet tal-industrija tal-Unjoni u, minkejja dan, xorta waqqgħu l-prezz mhux dannuż tal-industrija tal-Unjoni anki bid-dazji anti-dumping inklużi. It-tieni, l-analiżi trimestrali tal-kost unitarju tal-produzzjoni żvelat li wara tnaqqis inizjali fl-ewwel żewġ trimestri tal-PI ta’ sospensjoni, dan beda jerġa’ jiżdied (wara t-tendenza li l-prezzijiet tal-VAM għolew). Il-kost tal-produzzjoni, fl-aħħar trimestru tal-PI ta’ sospensjoni, kien 21 % ogħla milli fl-ewwel trimestru filwaqt li, fl-istess perjodu, il-prezzijiet tal-industrija tal-Unjoni żdiedu b’7 % biss. Dan ippermetta lill-industrija tal-Unjoni terġa’ lura għall-profittabbiltà iżda jikkonferma wkoll li din it-tendenza ’l fuq kienet riċenti ħafna (kienet tikkonċerna biss l-aħħar trimestru) u mhux b’saħħitha biżżejjed biex tilħaq il-profitt fil-mira, kif spjegat fil-premessa (49).

(44)

L-affermazzjoni ġiet għalhekk rifjutata.

(45)

Carbochem, Far Polymers, Gamma Chimica u Jeniuschem, sostnew li l-Kummissjoni bbażat l-evalwazzjoni tagħha fuq id-data pprovduta mill-produtturi tal-Unjoni fit-tweġibiet tagħhom għall-kwestjonarju minn naħa waħda, iżda ma qisitx l-informazzjoni pprovduta mill-utenti li kkooperaw fir-rigward tal-prezz applikat mill-industrija tal-Unjoni min-naħa l-oħra.

(46)

Il-prezz medju tal-bejgħ tal-industrija tal-Unjoni kif stabbilit mill-Kummissjoni jiġi kkalkulat fuq il-bejgħ totali tal-industrija tal-Unjoni matul il-PI ta’ sospensjoni. L-utenti li kkooperaw ipprovdew informazzjoni dwar l-offerti tal-prezzijiet għal gradi speċifiċi tal-PVA biss lil klijenti speċifiċi. Dawn l-offerti ma jistgħux jitqiesu bħala rappreżentattivi tas-suq kollu u għalhekk ma jistgħux jintużaw bħala punti ta’ riferiment għall-prezz medju tal-bejgħ tal-industrija tal-Unjoni jew il-prezz medju tal-importazzjoni miċ-Ċina.

(47)

Għalhekk, din l-affermazzjoni ġiet miċħuda.

(48)

Il-profittabbiltà tal-produtturi tal-Unjoni żviluppat kif ġej matul il-perjodu ta’ sospensjoni tal-PI:

Tabella 6

Il-profittabbiltà

(49)

L-industrija tal-Unjoni għamlet profitt matul il-perjodu tal-PI ta’ sospensjoni. Filwaqt li dan huwa titjib ċar meta mqabbel mal-PI tal-investigazzjoni oriġinali, fejn l-industrija tal-Unjoni ġarrbet telf ta’ [- 10 % sa - 15 %] fuq il-fatturat, il-profittabbiltà tal-Unjoni għadha ferm taħt il-profitt fil-mira (6 %). Iż-żieda fil-prezzijiet tal-bejgħ kienet ikkumpensata, sa ċertu punt, miż-żieda fil-kostijiet tal-produzzjoni minħabba ż-żieda fil-prezz tal-materja prima u dewmien fl-aġġustament tal-prezzijiet, bħala konsegwenza tal-ftehimiet kuntrattwali mal-klijenti.

(50)

Wara d-divulgazzjoni Ahlstrom-Munksjö u Cepi kkontestaw il-konklużjonijiet tal-Kummissjoni fir-rigward tal-profittabbiltà tal-industrija tal-Unjoni.

(51)

Ahlstrom-Munksjö argumenta li, minkejja l-volumi ta’ importazzjonijiet allegatament sinifikanti miċ-Ċina, l-industrija tal-Unjoni kienet kapaċi ttejjeb b’mod sinifikanti l-profittabbiltà tagħha.

(52)

Il-Kummissjoni ma kkontestatx il-fatt li l-industrija tal-Unjoni żiedet il-profittabbiltà tagħha, bħala konsegwenza tad-dazji anti-dumping. Madankollu, kif spjegat fil-premessa (49), il-profitt miksub mill-industrija tal-Unjoni għadu ferm taħt il-profitt fil-mira kif stabbilit fl-investigazzjoni oriġinali.

(53)

L-analiżi trimestrali tal-PI ta’ sospensjoni u l-iżviluppi li segwew ma jindikawx titjib dejjiemi tas-sitwazzjoni tal-industrija tal-Unjoni. Huwa minnu li matul it-tieni semestru tal-PI ta’ sospensjoni, il-volum tal-produzzjoni żdied bi 8 % u l-volum tal-bejgħ żdied bi 18 %, meta mqabbel mal-PI tal-investigazzjoni oriġinali. Madankollu, is-sitwazzjoni ma damitx hekk, billi l-profittabbiltà tal-industrija tal-Unjoni reġgħet bdiet tonqos mir-raba’ trimestru ’l quddiem. Dan jista’ jiġi spjegat miż-żieda sinifikanti fil-prezz tal-VAM u ż-żieda li rriżultat fil-kost tal-produzzjoni għall-PVA filwaqt li l-prezzijiet tal-PVA ma segwewx mal-ewwel iż-żieda fil-kost tal-produzzjoni. Minn data lil hinn mill-PI ta’ sospensjoni miġbura matul l-investigazzjoni, ta’ min jinnota li fil-perjodu minn April 2021 sa Settembru 2021, il-prezzijiet tal-VAM żdiedu b’57 % u l-kost tal-produzzjoni għall-PVA żdied bi 28 %, iżda l-prezzijiet tal-PVA żdiedu biss b’26 %.

(54)

Matul il-PI ta’ sospensjoni, il-bejgħ tal-produtturi tal-Unjoni fl-Unjoni lil partijiet mhux relatati naqas bi ftit b’1 % meta mqabbel mal-PI, filwaqt li l-prezzijiet tal-bejgħ żdiedu b’1 %. Madankollu, meta mqabbel mas-sena ta’ referenza tal-perjodu kkunsidrat (jiġifieri l-2016), il-bejgħ fl-UE kien għadu 28 % inqas. L-użu tal-kapaċità naqas b’5 %, filwaqt li l-kapaċità ma nbidlitx. Madankollu, meta mqabbla mal-2016, il-volumi tal-produzzjoni u l-użu tal-kapaċità matul il-PI ta’ sospensjoni naqsu b’20 %.

(55)

Fl-istess waqt, il-kwantitajiet tal-importazzjonijiet miċ-Ċina baqgħu sinifikanti matul il-PI ta’ sospensjoni. Barra minn hekk, minkejja l-allegazzjoni, kemm il-kapaċità tal-produzzjoni tal-produtturi esportaturi Ċiniżi kif ukoll l-imġiba tal-prezzijiet tagħhom ma nbidlux b’mod sinifikanti meta mqabbla mas-sejbiet tal-investigazzjoni oriġinali.

(56)

Kif spjegat fit-Taqsimiet 2.2 u 2.3, il-volum tal-produzzjoni Ċiniża baqa’ l-istess matul il-PI ta’ sospensjoni meta mqabbel mal-PI tal-investigazzjoni oriġinali, u l-prezzijiet tal-importazzjonijiet Ċiniżi għadhom anqas mill-prezzijiet mhux dannużi tal-industrija tal-Unjoni.

(57)

Abbażi ta’ dan ta’ hawn fuq, il-Kummissjoni kkonkludiet li l-industrija tal-Unjoni bbenefikat mill-impożizzjoni ta’ miżuri fuq l-importazzjonijiet tal-PVA miċ-Ċina li, sa ċertu punt, ippermettew lill-industrija tal-Unjoni żżid il-prezzijiet tal-bejgħ tagħha fis-suq tal-Unjoni matul il-PI ta’ sospensjoni, kif intwera mit-tendenza pożittiva ta’ ċerti indikaturi bħall-volum tal-bejgħ, il-prezzijiet tal-bejgħ u l-profittabbiltà. Madankollu, dawn is-sinjali ta’ rkupru ma kinux b’saħħithom biżżejjed u sa issa damu biss għal ftit taż-żmien. Il-Kummissjoni qieset ukoll l-imġiba tal-ipprezzar tal-produtturi esportaturi Ċiniżi matul il-PI ta’ sospensjoni, kif ukoll il-possibbiltà li jerġgħu jiżdiedu f’daqqa l-importazzjonijiet tal-PVA miċ-Ċina peress li, kif spjegat fit-Taqsima 2.3, l-allegata skarsezza tal-VAM ma affettwax il-kapaċità tal-produzzjoni Ċiniża u l-livelli ta’ esportazzjoni tagħha.

(58)

Għalhekk, ma jistax jiġi konkluż li huwa improbabbli li d-dannu jerġa’ jokkorri fin-nuqqas ta’ miżuri, fl-eventwalità li l-miżuri jiġu sospiżi. Għalhekk, il-Kummissjoni kkonkludiet li l-evidenza ma wrietx li l-kundizzjonijiet tas-suq kienu nbidlu temporanjament sal-punt li jkun improbabbli li d-dannu jerġa’ jokkorri bħala riżultat ta’ sospensjoni.

(59)

B’segwitu għad-divulgazzjoni finali, Ahlstrom-Munksjö argumentat li l-volum tal-bejgħ tal-industrija tal-Unjoni matul il-PI ta’ sospensjoni naqas b’1 % biss meta mqabbel mal-PI oriġinali, filwaqt li żdied bi 18 % fl-ewwel nofs tal-2021 meta mqabbel mal-PI oriġinali. Fil-fehma tagħha dan jikkontradixxi l-konklużjoni tal-Kummissjoni li huwa probabbli li d-dannu jerġa’ jokkorri fin-nuqqas tad-dazji.

(60)

Il-Kummissjoni ma qablitx ma’ din il-fehma. L-ewwel nofs tal-PI ta’ sospensjoni kien affettwat mill-pandemija tal-COVID-19 u l-iskarsezza tal-VAM. Fit-tieni nofs, l-industrija tal-Unjoni, filwaqt li bbenefikat mill-miżuri, setgħet iżżid il-produzzjoni tagħha biex tissodisfa d-domanda tal-Unjoni. Filwaqt li dan huwa sinjal ċar ta’ rkupru, l-investigazzjoni wriet li: (i) il-produtturi esportaturi Ċiniżi għad għandhom kapaċità ta’ riżerva sinifikanti disponibbli u diġà qegħdin jesportaw lejn l-UE fi kwantitajiet sinifikanti anki bid-dazji fis-seħħ, (ii) il-prezzijiet tagħhom għadhom iwaqqgħu l-prezzijiet tal-Unjoni anke bid-dazji anti-dumping inklużi, (iii) is-suq tal-Unjoni huwa attraenti għall-produtturi Ċiniżi għal-livelli tal-prezzijiet tiegħu u d-domanda sinifikanti, u (iv) iż-żieda fil-prezzijiet tal-VAM qiegħda taffettwa b’mod negattiv il-kost tal-produzzjoni tal-industrija tal-Unjoni u l-profittabbiltà tagħha. Filwaqt li qieset dawn l-elementi kollha, il-Kummissjoni kkonkludiet li d-dannu, anki kieku ma kienx jeżisti, huwa probabbli li jerġa’ jokkorri bħala riżultat tas-sospensjoni.

(61)

L-affermazzjoni ġiet għalhekk rifjutata.

(62)

Cepi argumentat li sospensjoni temporanja tad-dazju ma treġġax lura t-tendenza evidentement pożittiva ta’ profittabbiltà tal-industrija tal-Unjoni, anki fid-dawl taż-żidiet fil-prezzijiet wara l-PI ta’ sospensjoni. Il-kumpanija nnutat li anki fil-każ ta’ prodotti tal-aluminju llaminati ċatti, l-industrija tal-Unjoni kienet għadha ma laħqitx il-livell fil-mira ta’ profittabbiltà iżda, madankollu, il-Kummissjoni pproċediet bis-sospensjoni temporanja tad-dazju wara li rrikonoxxiet li huwa improbabbli li tali sospensjoni treġġa’ lura t-tendenzi pożittivi tal-industrija tal-Unjoni (6).

(63)

Il-Kummissjoni ma qablitx ma’ din l-analiżi. Fl-investigazzjoni dwar il-prodotti tal-aluminju llaminati ċatti, is-sitwazzjoni tal-industrija tal-Unjoni tjiebet b’mod sinifikanti wara l-PI sabiex l-istess dannu materjali li nstab matul il-perjodu ta’ investigazzjoni oriġinali ma kienx għadu preżenti fil-perjodu ta’ wara l-PI. Fil-fatt, f’dak il-każ, fl-ewwel semestru tal-2021, il-bejgħ tal-produtturi tal-Unjoni fl-Unjoni lil partijiet mhux relatati żdied b’aktar minn 55 % meta pparagunat mal-perjodu ta’ investigazzjoni u kienet mistennija żieda ulterjuri għall-2022. B’kuntrast ma’ dan, fil-proċediment attwali l-industrija tal-PVA tal-Unjoni mhijiex qiegħda tbati minħabba tnaqqis fil-kwantità tal-bejgħ iżda minn tnaqqis sinifikanti fil-prezzijiet ikkawżat mill-importazzjonijiet oġġett ta’ dumping miċ-Ċina. Kwalunkwe żieda ulterjuri fil-profittabilità tista’ toriġina biss minn tnaqqis tal-kost tal-produzzjoni (li huwa improbabbli minħabba t-tendenza ’l fuq tal-prezzijiet tal-materja prima) jew mill-prezzijiet tal-bejgħ li jerġgħu jirritornaw għal livelli mhux dannużi.

(64)

Barra minn hekk, is-sospensjoni tad-dazji anti-dumping tippermetti lill-PVA Ċiniż jidħol fis-suq tal-Unjoni bi prezzijiet oġġett ta’ dumping li jwaqqgħu b’mod sinifikanti l-prezzijiet tal-industrija tal-Unjoni, kif spjegat fil-premessa (31). Din il-pressjoni fuq il-prezzijiet tkompli tnaqqas il-prezzijiet tal-industrija tal-Unjoni u għalhekk ikollha effett negattiv immedjat fuq il-profittabbiltà tagħha. Din l-affermazzjoni ġiet għalhekk miċħuda.

(65)

L-impożizzjoni tal-miżuri fuq l-importazzjonijiet tal-PVA miċ-Ċina kienet evidentement ta’ benefiċċju għall-industrija tal-PVA tal-Unjoni li tbigħ fis-suq ħieles. Dan ippermetta lill-industrija tal-Unjoni tirkupra, tal-anqas parzjalment, mid-dumping dannuż. Madankollu, is-sitwazzjoni tal-industrija tal-Unjoni għadha fraġli u, kif spjegat hawn fuq, huwa probabbli li d-dannu jerġa’ jokkorri mingħajr il-miżuri matul perjodu potenzjali ta’ sospensjoni tal-miżuri attwali.

(66)

Il-Kummissjoni nnutat ukoll li, minkejja l-allegazzjonijiet ta’ impatti negattivi mġarrba mill-utenti tal-PVA, id-data miġbura matul l-analiżi tas-sospensjoni turi li d-disa’ utenti u l-importaturi kollha li kkooperaw u pprovdew tweġiba għall-kwestjonarju ta’ sospensjoni, ħlief wieħed, baqgħu jagħmlu profitt wara l-impożizzjoni tal-miżuri anti-dumping fuq l-importazzjonijiet tal-PVA miċ-Ċina.

(67)

Fil-kummenti tagħhom għad-divulgazzjoni finali, Ahlstrom-Munksjö, Carbochem, Far Polymers, Gamma Chimica u Jeniuschem ikkontestaw il-konklużjonijiet tal-Kummissjoni dwar l-impatt tad-dazji anti-dumping fuq l-utenti tal-PVA.

(68)

Carbochem, Far Polymers, Gamma Chimica u Jeniuschem argumentaw li l-marġnijiet miksuba mill-importaturi u l-utenti tal-PVA ġejjin mill-bejgħ tal-istokk tal-PVA mixtri qabel id-dħul fis-seħħ tad-dazji anti-dumping.

(69)

Madankollu, l-informazzjoni miġbura fl-investigazzjoni ma tappoġġax din il-konklużjoni. Fl-aħħar trimestru qabel l-impożizzjoni tal-miżuri, il-kwantitajiet tal-importazzjoni miċ-Ċina ma żdidux. Kuntrarjament dawn naqsu b’51 % (ara t-Tabella 2). Barra minn hekk, fis-sottomissjoni tagħhom stess, il-partijiet ikkonfermaw li setgħu jittrasferixxu ż-żieda fil-prezzijiet tal-PVA fuq il-klijenti tagħhom, kif diġà ġie stabbilit fl-investigazzjoni oriġinali u kkonfermat fil-proċediment attwali. L-affermazzjoni ġiet għalhekk miċħuda.

(70)

Ahlstrom-Munksjö argumentat li l-Kummissjoni ma wettqitx analiżi kif suppost tal-interess tal-Unjoni.

(71)

Din l-affermazzjoni kellha tiġi rifjutata. Minn naħa waħda, il-Kummissjoni kkonkludiet li huwa probabbli li d-dannu tal-industrija tal-Unjoni jerġa’ jokkorri kieku l-miżuri kellhom jiġu sospiżi. Min-naħa l-oħra, l-investigazzjoni kkonkludiet li l-produzzjoni tal-VAM (u tal-PVA) qiegħda terġa’ lura għal livelli normali, li l-produtturi esportaturi Ċiniżi għadhom qegħdin jesportaw bi prezzijiet kompetittivi, minkejja d-dazji anti-dumping u li l-utenti tal-Unjoni tal-PVA setgħu jittrasferixxu ż-żieda fil-prezz fuq il-klijenti tagħhom u baqgħu jagħmlu profitt. Għaldaqstant, il-Kummissjoni rriżultalha li ma kien hemm l-ebda raġuni biex jiġi konkluż li kien fl-interess tal-Unjoni li jiġu sospiżi d-dazji anti-dumping.

(72)

Għaldaqstant, il-Kummissjoni kkonkludiet li l-kundizzjonijiet elenkati fl-Artikolu 14(4) tar-Regolament bażiku għas-sospensjoni tal-miżuri anti-dumping attwalment ma kinux issodisfati. Din id-deċiżjoni hija mingħajr preġudizzju għad-dritt tal-Kummissjoni li fil-futur tieħu deċiżjoni skont l-Artikolu 14(4) tar-Regolament bażiku,