|
Iris Oifigiúil |
GA Sraith L |
|
2025/1044 |
6.8.2025 |
RIALACHÁN TARMLIGTHE (AE) 2025/1044 ÓN gCOIMISIÚN
an 23 Bealtaine 2025
lena bhforlíontar Rialachán (AE) 2018/1139 ó Pharlaimint na hEorpa agus ón gComhairle le rialacha agus nósanna imeachta mionsonraithe maidir le glacadh le ceadúnais agus deimhnithe rialtóra aerthráchta arna n-eisiúint ag tríú tíortha.
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) 2018/1139 ó Pharlaimint na hEorpa agus ón gComhairle an 4 Iúil 2018 maidir le rialacha comhchoiteanna i réimse na heitlíochta sibhialta agus lena mbunaítear Gníomhaireacht Sábháilteachta Eitlíochta de chuid an Aontais Eorpaigh, agus lena leasaítear Rialachán (CE) Uimh. 2111/2005, Rialachán (CE) Uimh. 1008/2008, Rialachán (AE) Uimh. 996/2010, Rialachán (AE) Uimh. 376/2014 agus Treoir 2014/30/AE agus Treoir 2014/53/AE ó Pharlaimint na hEorpa agus ón gComhairle agus lena n-aisghairtear Rialachán (CE) Uimh. 552/2004 agus Rialachán (CE) Uimh. 216/2008 ó Pharlaimint na hEorpa agus ón gComhairle agus Rialachán (CEE) Uimh. 3922/91 ón gComhairle (1), agus go háirithe Airteagal 68(3) de,
De bharr an mhéid seo a leanas:
|
(1) |
Aithníodh infhaighteacht rialtóirí aerthráchta san Aontas, mar aon leis an tsolúbthacht theoranta a bhaineann le húsáid na n-acmhainní rialtóirí aerthráchta atá ar fáil, mar thosca a chuireann srian ar acmhainneacht soláthraithe seirbhísí aerloingseoireachta agus a mbíonn moilleanna aerthráchta san Aontas mar thoradh orthu dá bharr. |
|
(2) |
Leagtar síos le Rialachán (AE) 2015/340 ón gCoimisiún (2) ceanglais theicniúla agus nósanna imeachta riaracháin a bhaineann le ceadúnais agus deimhnithe rialtóirí aerthráchta (‘ATCO’). Mar sin féin, ní dhéantar foráil sa Rialachán sin maidir le glacadh le ceadúnais agus deimhnithe rialtóra aerthráchta tríú tír. |
|
(3) |
Chun freastal ar an éileamh atá ann cheana agus atá ag dul i méid ar acmhainneacht ATCO san Aontas, maidir le rialtóirí aerthráchta oibríochtúla agus rialtóirí aerthráchta i gcáil teagascóirí agus measúnóirí praiticiúla chun oiliúint a chur ar rialtóirí aerthráchta araon, ba cheart do na húdaráis náisiúnta a bheith in ann glacadh le ceadúnais, deimhnithe agus doiciméadacht ábhartha eile lena bhfianaítear go gcomhlíontar rialacha na heitlíochta sibhialta, nithe a eisíodh i gcomhréir le dlí tríú tír. Is é is cuspóir do ghlacadh leis na doiciméid sin eisiúint ceadúnas mic léinn rialtóra aerthráchta a chumasú nó teagasc agus measúnú a sholáthar d’eagraíochtaí um oiliúint ar rialtóirí aerthráchta atá deimhnithe chun oiliúint tosaigh a sholáthar. |
|
(4) |
Is é is aidhm don Rialachán seo leibhéal sábháilteachta a áirithiú atá coibhéiseach leis an leibhéal dá bhforáiltear i Rialachán (AE) 2018/1139 agus i Rialachán (AE) 2015/340. |
|
(5) |
Foráiltear leis an Rialachán seo gur féidir tréimhsí oiliúna níos giorra a chur i gcrích sula n-eiseofar ceadúnas mic léinn rialtóra aerthráchta de chuid an Aontais, chomh maith leis an bhféidearthacht acmhainní breise a leithdháileadh chun oiliúint tosaigh a dhéanamh. Dá bhrí sin, bheadh na roghanna ag soláthraithe seirbhísí aerloingseoireachta cur le hacmhainneacht a soláthair seirbhísí níos tapúla, i gcás ina mbeadh gá leis sin. |
|
(6) |
I gcomhréir le hAirteagal 68(1) de Rialachán (AE) 2018/1139, i gcás ina dtabharfar comhaontuithe idirnáisiúnta maidir le hábhar an Rialacháin seo i gcrích idir an tAontas agus tríú tír, beidh forlámhas ag na comhaontuithe sin; i ngach cás eile, beidh feidhm ag an Rialachán seo, |
TAR ÉIS AN RIALACHÁN SEO A GHLACADH:
Airteagal 1
Ábhar
Leagtar síos leis an Rialachán seo rialacha agus nósanna imeachta mionsonraithe maidir le glacadh le ceadúnais agus deimhnithe rialtóra aerthráchta, lena n-áirítear rátálacha agus formhuinithe bainteacha arna n-eisiúint i gcomhréir le dlíthe tríú tír.
Airteagal 2
Sainmhínithe
Chun críocha an Rialacháin seo, beidh feidhm ag na sainmhínithe seo a leanas:
|
(1) |
ciallaíonn ‘iarratasóir’ sealbhóir deimhnithe, ceadúnais nó doiciméid eile, arna eisiúint i gcomhréir le dlíthe tríú tír agus a bhfuil iarratas á dhéanamh aige ar cheadúnas mic léinn rialtóra aerthráchta a eisiúint i gcomhréir leis an Rialachán seo nó ar dheimhniú a ghlacadh chun treoracha agus measúnú a sholáthar; |
|
(2) |
ciallaíonn ‘deimhniú’ doiciméad a eisítear i gcomhréir le dlíthe tríú tír, lena bhfianaítear go gcomhlíontar rialacha eitlíochta sibhialta; |
|
(3) |
ciallaíonn ‘creidmheas’ an t-aitheantas a thugann an t-údarás inniúil don oiliúint a dhéanann sealbhóir ceadúnais rialtóra aerthráchta arna eisiúint i gcomhréir le dlíthe tríú tír chun críche iarratas a dhéanamh ar cheadúnas mic léinn rialtóra aerthráchta a eiseofar i gcomhréir leis an Rialachán seo. |
Airteagal 3
Glacadh le ceadúnais agus deimhnithe rialtóra aerthráchta tríú tír
Gan dochar do chomhaontuithe idirnáisiúnta arna dtabhairt i gcrích idir an tAontas agus tríú tír i gcomhréir le hAirteagal 68(1), pointe (a), de Rialachán (AE) 2018/1139, féadfaidh na Ballstáit an méid seo a leanas a dhéanamh:
|
(a) |
ceadúnais mic léinn rialtóra aerthráchta a eisiúint, i gcomhréir le hAirteagal 4 den Rialachán seo; |
|
(b) |
glacadh le ceadúnais rialtóra aerthráchta agus leis na rátálacha, na pribhléidí nó na deimhnithe bainteacha, i gcomhréir le hAirteagal 5 den Rialachán seo. |
Airteagal 4
Eisiúint ceadúnas
1. Féadfaidh údarás inniúil Ballstáit ceadúnais mic léinn rialtóra aerthráchta a eisiúint i gcomhréir le pointe ATCO.B.001 d’Iarscríbhinn I (Cuid ATCO), Fochuid B, a ghabhann le Rialachán (AE) 2015/340, ar bhonn deimhnithe arna n-eisiúint i gcomhréir le dlíthe tríú tír, ar choinníoll go gcomhlíonann an t-iarratasóir na coinníollacha uile seo a leanas:
|
(a) |
go bhfuil 18 mbliana d’aois ar a laghad slánaithe aige; |
|
(b) |
go léiríonn sé go gcomhlíonann sé na ceanglais ábhartha a leagtar síos i bhFochuid D, Ranna 1 go 4 d’Iarscríbhinn I (Cuid ATCO) a ghabhann le Rialachán (AE) 2015/340; |
|
(c) |
go bhfuil deimhniú leighis bailí aige arna eisiúint i gcomhréir le hIarscríbhinn IV (Cuid ATCO.MED) a ghabhann le Rialachán (AE) 2015/340; |
|
(d) |
go léiríonn sé leibhéal leordhóthanach oilteachta teanga i gcomhréir leis na ceanglais a leagtar amach i bhFochuid B, pointí ATCO.B.030 go ATCO.B.040, d’Iarscríbhinn I (Cuid ATCO) a ghabhann le Rialachán (AE) 2015/340. |
2. Féadfaidh sealbhóir ceadúnais rialtóra aerthráchta arna eisiúint i gcomhréir le dlíthe tríú tír iarratas a dhéanamh ar údarás inniúil Ballstáit ceadúnas mic léinn rialtóra aerthráchta a eisiúint tar éis don sealbhóir moladh a fháil ó eagraíocht oiliúna a chomhlíonann na ceanglais a leagtar síos in Iarscríbhinn III (Cuid ATCO.OR) a ghabhann le Rialachán (AE) 2015/340 agus atá deimhnithe chun oiliúint tosaigh a sholáthar chun ceadúnais mic léinn rialtóra aerthráchta a eisiúint i gcomhréir leis an Rialachán sin.
3. I gcás ina n-eiseoidh an eagraíocht oiliúna moladh dá dtagraítear i mír 2 den Airteagal seo, arna iarraidh sin don iarratasóir, beidh an méid uile seo a leanas sa mholadh sin:
|
(a) |
tuairisc ar raon feidhme phribhléidí an cheadúnais rialtóra aerthráchta tríú tír dá dtagraítear i mír 2; |
|
(b) |
léiriú na ceanglais d’Iarscríbhinn I (Cuid ATCO) a ghabhann le Rialachán (AE) 2015/340 a bhfuil creidmheas le deonú ina leith; |
|
(c) |
tuairisc ar an oiliúint bhreise, lena n-áirítear na scrúduithe agus na measúnuithe is gá, atá déanta ag an iarratasóir; |
|
(d) |
ráiteas lena ndeimhnítear gur féidir a mheas go bhfuil comhlíontacht an iarratasóra leis na ceanglais oiliúna, scrúdúcháin agus measúnúcháin ar a dtugtar tuairisc sa mholadh coibhéiseach le cur i gcrích rathúil na hoiliúna tosaigh is gá faoi Rialachán (AE) 2015/340 chun críche ceadúnais mic léinn rialtóra aerthráchta a eisiúint; |
|
(e) |
cóipeanna den doiciméadacht tacaíochta ábhartha ar fad, lena n-áirítear cóipeanna de na ceanglais agus na nósanna imeachta tríú tír ábhartha, a léiríonn an chaoi ar bhunaigh an eagraíocht oiliúna na heilimintí a liostaítear i bpointí (a) go (d) den fhomhír seo. |
An oiliúint bhreise dá dtagraítear sa chéad fhomhír, pointe (c), lena n-áirítear na scrúduithe agus measúnuithe is gá, is eagraíocht oiliúna a chomhlíonann na ceanglais a leagtar síos in Iarscríbhinn III (Cuid ATCO.OR) a ghabhann le Rialachán (AE) 2015/340 agus atá deimhnithe chun oiliúint tosaigh a sholáthar chun críche ceadúnais mic léinn rialtóra aerthráchta a eisiúint i gcomhréir leis an Rialachán sin a dhéanfaidh an oiliúint sin.
4. Chun ceadúnais mic léinn rialtóra aerthráchta a eisiúint, cuirfear an moladh dá dtagraítear i mír 2 san áireamh in aon chreidmheas a dheonóidh an t-údarás inniúil.
Airteagal 5
Glacadh le deimhnithe
1. Féadfaidh údarás inniúil Ballstáit glacadh le ceadúnais rialtóra aerthráchta agus leis na rátálacha, formhuinithe nó deimhnithe bainteacha arna n-eisiúint i gcomhréir le dlíthe tríú tír chun críche teagasc agus measúnú a sholáthar, ar choinníoll go gcomhlíonann an t-iarratasóir an dá choinníoll seo a leanas:
|
(a) |
go bhfuil ceadúnas rialtóra aerthráchta acu arna eisiúint ag tríú tír i gcomhréir le hIarscríbhinn 1 a ghabhann leis an gCoinbhinsiún um Eitlíocht Shibhialta Idirnáisiúnta, a síníodh in Chicago an 7 Nollaig 1944 (‘Coinbhinsiún Chicago’) agus a bhfuil rátáil agus, más infheidhme, formhuiniú rátála ag gabháil leis a chomhfhreagraíonn don cheann a bhfuil siad údaraithe teagasc nó measúnú a dhéanamh ina leith; |
|
(b) |
gur léirigh siad don údarás inniúil dá dtagraítear in Airteagal 6 de Rialachán (AE) 2015/340 go bhfuil oiliúint faighte acu agus gur éirigh leo i scrúduithe agus i measúnuithe atá coibhéiseach leis na cinn a cheanglaítear le Fochuid D, Roinn 5, d’Iarscríbhinn I (Cuid ATCO) a ghabhann leis an Rialachán sin. |
2. Beidh na pribhléidí dá dtagraítear i mír 1 teoranta do theagasc agus measúnú a sholáthar d’eagraíochtaí um oiliúint ar rialtóirí aerthráchta atá deimhnithe chun oiliúint tosaigh a chur ar fáil.
Airteagal 6
Teacht i bhfeidhm
Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, an 23 Bealtaine 2025.
Thar ceann an Choimisiúin
An tUachtarán
Ursula VON DER LEYEN
(1) IO L 212, 22.8.2018, lch. 1, ELI: http://data.europa.eu/eli/reg/2018/1139/oj.
(2) Rialachán (AE) Uimh 2015/340 ón gCoimisiún an 20 Feabhra 2015 lena leagtar síos ceanglais theicniúla agus nósanna imeachta riaracháin a bhaineann le ceadúnais agus deimhnithe rialtóirí aerthráchta de bhun Rialachán (CE) Uimh. 216/2008 ó Pharlaimint na hEorpa agus ón gComhairle, lena leasaítear Rialachán Cur Chun Feidhme (AE) Uimh. 923/2012 ón gCoimisiún agus lena n-aisghairtear Rialachán (AE) Uimh. 805/2011 ón gCoimisiún (IO L 63, 6.3.2015, lch. 1, ELI: http://data.europa.eu/eli/reg/2015/340/oj).
ELI: http://data.europa.eu/eli/reg_del/2025/1044/oj
ISSN 1977-0839 (electronic edition)