Eagrán sealadach

BREITHIÚNAS NA CÚIRTE GINEARÁLTA (an Cúigiú Dlísheomra ina bhfuil cúigear breithiúna ina suí)

7 Deireadh Fómhair 2026 (*)

(Tarchur chun réamhrialú – Aontas custaim – Comhtharaif Chustaim – Aicmiú earraí – Ainmníocht chomhcheangailte – Airteagal arna chur i láthair i riocht díchóimeáilte nó neamhchóimeáilte – Riail 2(a) de na Rialacha Ginearálta maidir le léirmhíniú na hAinmníochta Comhcheangailte – Páirteanna atá beartaithe le bheith ina rothair leictreacha, tar éis iad a chóimeáil – Páirteanna arna dtíolacadh i gcoinsíneachtaí deighilte – Aicmiú mar airteagal iomlán)

I gCás T‑529/25,

IARRAIDH ar réamhrialú faoi Airteagal 267 CFAE, ó hof van beroep Antwerpen (an Chúirt Achomhairc, Antuairp, an Bheilg), trí bhreith an 26 Meitheamh 2025, a fuarthas ag an gCúirt Bhreithiúnais an 18 Iúil 2025 sna himeachtaí

Oifig an Ionchúisitheora Phoiblí Eorpaigh (‘OIPE’),

Belgische Staat, Federale Overheidsdienst Financiën, Algemene Administratie van de Douane en Accijnzen (AAD&A)

v

Prestige Rijwielen NV,

Logwin Air + Ocean Belgium NV,

ZG,

idiragraithe:

Belgische Staat, Federale Overheidsdienst Financiën, Algemene Administratie van de Bijzondere Belastinginspectie (AABBI),

tugann AN CHÚIRT GHINEARÁLTA (an Cúigiú Dlísheomra ina bhfuil cúigear breithiúna ina suí),

agus í comhdhéanta mar seo a leanas: M. Sampol Pucurull, Uachtarán, T. Pynnä (Rapóirtéir), J. Laitenberger, M. Stancu agus W. Valasidis, Breithiúna,

Abhcóide Ginearálta: J. Martín y Pérez de Nanclares,

Cláraitheoir: L. Ramette, Riarthóir,

ag féachaint do tharchur na hiarrata ar réamhrialú ón gCúirt Bhreithiúnais chuig an gCúirt Ghinearálta an 1 Lúnasa 2025, de bhun an tríú mír d’Airteagal 50b de Reacht Chúirt Bhreithiúnais an Aontais Eorpaigh,

ag féachaint don ábhar dá dtagraítear i bpointe (d) den chéad mhír d’Airteagal 50b de Reacht Chúirt Bhreithiúnais an Aontais Eorpaigh agus d’éagmais aon cheiste neamhspleáiche maidir le léiriú de réir bhrí an dara mír d’Airteagal 50b den Reacht sin,

ag féachaint don nós imeachta i scríbhinn,

agus tar éis éisteacht an 23 Aibreán 2026,

tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:

–        OIPE, ag J. Castillo García, L. De Matteis, T. Gut, M. Simonato agus J. Vanderputten, i gcáil Gníomhairí,

–        Prestige Rijwielen, ag T. Dujardin agus K. Francken, Dlíodóirí,

–        Logwin Air + Ocean Belgium, ag J. De Bruyn, Y. Melin agus V. Van Opdenbosch, Dlíodóirí,

–        ZG, ag T. Dujardin agus K. Francken, Dlíodóirí,

–        Rialtas na Beilge, ag S. Baeyens, M. Jacobs agus C. Pochet, i gcáil Gníomhairí,

–        an Coimisiún Eorpach, ag A. Baeckelmans, A. Demeneix, F. Moro agus W. Roels, i gcáil Gníomhairí,

tar éis éisteacht le Tuairim an Abhcóide Ghinearálta ag éisteacht an 10 Meitheamh 2026,

an Breithiúnas seo a leanas:

Breithiúnas

1        Baineann an iarraidh ar réamhrialú le léiriú Riail 2(a) de na Rialacha Ginearálta maidir le léirmhíniú na hAinmníochta Comhcheangailte a leagtar amach in Iarscríbhinn I a ghabhann le Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO 1987 L 256, lch. 1), sna leaganacha a eascraíonn, i ndiaidh a chéile, as Rialachán Cur Chun Feidhme (AE) 2018/1602 ón gCoimisiún an 11 Deireadh Fómhair 2018 (IO 2018 L 273, lch. 1), Rialachán Cur Chun Feidhme (AE) 2019/1776 ón gCoimisiún an 9 Deireadh Fómhair 2019 (IO 2019 L 280, lch. 1) agus Rialachán Cur Chun Feidhme (AE) 2020/1577 ón gCoimisiún an 21 Meán Fómhair 2020 (IO 2020 L 361, lch. 1) (‘AC’).

2        Rinneadh an iarraidh seo in imeachtaí idir Oifig an Ionchúisitheora Phoiblí Eorpaigh agus Belgische Staat, Federale Overheidsdienst Financiën, Algemene Administratie van de Douane en Accijnzen (AAD & A) (Stát na Beilge, Seirbhís Phoiblí Cónaidhme um Airgeadas, Riarachán Ginearálta Custaim agus Máil (AGDA)) (‘an Riarachán Custaim’), ar thaobh amháin, agus dhá chuideachta atá faoi rialú dhlí na Beilge, Logwin Air + Ocean Belgium NV agus Prestige Rijwielen NV, agus ZG, [faoi rún] (1) ar an taobh eile, maidir le himeachtaí coiriúla agus éilimh chánach a bhaineann le sraith allmhairí de pháirteanna leictreacha rothar isteach san Aontas Eorpach.

 An dlí lena mbaineann

 An dlí idirnáisiúnta

 CC

3        Ba í an Chomhairle um Chomhar Custaim, arb í an Eagraíocht Dhomhanda Chustaim (‘EDC’) anois í, a bunaíodh leis an gCoinbhinsiún lena mbunaítear Comhairle um Chomhar Custaim, a tugadh i gcrích sa Bhruiséil an 15 Nollaig 1950, a dhréachtaigh an Córas Comhchuibhithe um Thuairisciú agus um Chódú Tráchtearraí (‘CC’). Bunaíodh CC leis an gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, a tugadh i gcrích sa Bhruiséil an 14 Meitheamh 1983 (IO 1987 L 198, lch. 3), a formheasadh, lena phrótacal leasaitheach an 24 Meitheamh 1986, thar ceann Chomhphobal Eacnamaíochta na hEorpa, le Cinneadh 87/369/CEE ón gComhairle an 7 Aibreán 1987 (IO 1987 L 198, lch. 1).

4        Faoi Airteagal 3(1)(a)(2) den Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, gabhann gach Páirtí Conarthach air féin na rialacha ginearálta maidir le léiriú an Chórais Chomhchuibhithe agus nótaí roinne, caibidle agus fo-cheannteidil uile an Chórais Chomhchuibhithe a chur i bhfeidhm agus gan raon feidhme na ranna, na gcaibidlí agus na bhfo-cheannteideal sin a mhodhnú.

5        Foráiltear le Riail 2(a) de na Rialacha Ginearálta maidir le Léirmhíniú CC, ina céad chuid, go dtuigfear le haon tagairt d’airteagal i gceannteideal don airteagal sin fiú má tá sé neamhiomlán nó neamhchríochnaithe, ar choinníoll, mar a chuirtear i láthair é, go bhfuil saintréithe fíor-riachtanacha an airteagail iomláin nó chríochnaithe ag an airteagal sin, agus, ina dara cuid, go n‑áirítear le tagairt den sórt sin freisin tagairt don airteagal iomlán nó críochnaithe, nó go n‑aicmeofar é mar airteagal iomlán nó críochnaithe de bhua na bhforálacha roimhe seo, nuair a chuirtear i láthair é i riocht díchóimeáilte nó neamhchóimeáilte.

 Nótaí Míniúcháin CC

6        Déantar na Nótaí Míniúcháin a ghabhann le CC a tharraingt suas ag EDC i gcomhréir le forálacha an Choinbhinsiúin Idirnáisiúnta ar an gCóras Comhchuibhithe um Thuairisciú agus um Chódú Tráchtearraí.

7        Foráiltear mar a leanas ag pointí V agus VII sa nóta míniúcháin a ghabhann le riail 2(a) de na Rialacha Ginearálta maidir le léiriú CC:

‘(V) Aicmítear sa dara cuid de Riail 2(a) faoin gceannteideal céanna ina bhfuil an t-airteagal iomlán nó críochnaithe, an t‑airteagal arna chur i láthair agus é díchóimeáilte nó neamhchóimeáilte. Tráth a chuirtear earraí i láthair amhlaidh is iondúil gur ar chúiseanna amhail ceanglais nó áisiúlacht pacála, láimhseála nó iompair a dhéantar é.

[...]

(VII) Chun críocha na Rialach seo, ciallaíonn “díchóimeáilte nó neamhchóimeáilte” aon airteagal a mbeartaítear a chomhpháirteanna a chóimeáil trí scriúnna, boltaí, cnónna, etc. nó trí sheamú nó trí tháthú, mar shampla, ar choinníoll nach bhfuil i gceist leo ach oibríochtaí cóimeála.

I ndáil leis sin, níl castacht an mhodha cóimeála le cur san áireamh. Mar sin féin, ní bheidh na comhpháirteanna faoi réir aon phróiseáil bhreise chun go mbeidh siad sa staid chríochnaithe.

Comhpháirteanna neamhchóimeáilte d’airteagal ar mó iad ná an líon is gá don airteagal sin agus é comhlánaithe, tá siad le haicmiú go leithleach.’

 Dlí an Aontais

 AC

8        Is iad na leaganacha éagsúla de AC is infheidhme maidir leis na fíorais atá i gceist sna príomhimeachtaí, a tharla le linn na tréimhse ón 22 Eanáir 2019 go dtí an 27 Aibreán 2021, le haghaidh 2019, an leagan a eascraíonn as Rialachán Cur Chun Feidhme 2018/1602, le haghaidh 2020, an leagan a eascraíonn as Rialachán Cur Chun Feidhme 2019/1776 agus, le haghaidh 2021, an leagan a eascraíonn as Rialachán Cur Chun Feidhme 2020/1577. Níl aon difríocht idir foclaíocht na rialacha ginearálta maidir le léirmhíniú AC agus na nótaí breise, a luaitear i míreanna 11 agus 12 thíos, ná na ceannteidil taraife agus fo-cheannteidil 8711, 8711 60, 8711 60 10 agus 8714 de AC de réir na leaganacha éagsúla sin.

9        Foráiltear mar a leanas leis na Rialacha Ginearálta maidir le Léirmhíniú AC, a leagtar amach i Roinn A de Theideal I de Chuid a hAon de AC:

‘Rialófar aicmiú earraí san Ainmníocht Chomhcheangailte leis na prionsabail seo a leanas:

1.      Ní sholáthraítear ceannteidil ranna, caibidlí agus fochaibidlí ach amháin chun tagairt dóibh a éascú; chun críocha dleathacha, déanfar aicmiú a chinneadh de réir théarmaí na gceannteideal agus aon roinn ábhartha nó aon nóta caibidle ábhartha agus, ar choinníoll nach gceanglaítear a mhalairt leis na ceannteidil nó leis na nótaí sin, de réir na bhforálacha seo a leanas.

2.      (a)      Tuigfear le haon tagairt i gceannteideal d’airteagal go n‑áireofar léi tagairt don airteagal sin agus é neamhiomlán nó neamhchríochnaithe, ar choinníoll, mar a chuirtear i láthair é, go mbeidh saintréithe fíor-riachtanacha an airteagail iomláin nó an airteagail chríochnaithe ag an airteagal neamhiomlán nó neamhchríochnaithe. Tuigfear freisin go n‑áireofar léi tagairt don airteagal iomlán nó don airteagal críochnaithe sin (nó d’airteagal a bheidh le haicmiú mar airteagal iomlán nó airteagal críochnaithe de bhua na rialach sin), agus é á chur láthair ina airteagal neamhchóimeáilte nó díchóimeáilte.

[...]’

10      Áirítear i gCuid a Dó de AC, dar teideal ‘Sceideal na nDleachtanna Custaim’, Roinn XVII, dar teideal ‘Feithiclí, aerárthaí, soithí agus trealamh iompair gaolmhar’. I gCaibidil 87 den Roinn sin, dar teideal ‘Feithiclí seachas rothstoc iarnróid nó trambhealaigh, agus páirteanna díobh agus gabhálais dóibh’, áirítear, inter alia, na ceannteidil agus na fo-cheannteidil seo a leanas:

Cód AC

Tuairisc

[...]


8711

Gluaisrothair (lena n‑áirítear móipéidí) agus rothair a bhfuil mótar cúnta feistithe orthu, bíodh carranna cliathánacha orthu nó ná bíodh; carranna cliathánacha:

[…]


8711 60

— Ina bhfuil mótar leictreach le haghaidh tiomána

8711 60 10

— — Rothair, trírothaigh agus cuadrothair, a bhfuil troitheáil chuidithe orthu agus ar a bhfuil mótar cúnta leictreach feistithe ag a bhfuil uas-chumhacht rátaithe leantach nach mó ná 250 W

[...]


8714

Páirteanna agus gabhálais de na feithiclí atá faoi cheannteidil 8711 go 8713;

[...]



11      Faoi Nóta Breise 3 a ghabhann le Roinn XVI de AC, a bhaineann le ‘innealra agus fearais mheicniúla, trealamh leictreach, páirteanna díobh; taifeadáin agus atáirgeoirí fuaime, taifeadáin agus atáirgeoirí íomhánna agus fuaime teilifíse, agus páirteanna agus gabhálais d’earraí den sórt sin’:

‘Is infheidhme forálacha riail ghinearálta 2(a) freisin, arna iarraidh sin ag an dearbhóir agus faoi réir coinníollacha a shonróidh na húdaráis inniúla, maidir le meaisíní a allmhairítear i gcoinsíneachtaí deighilte.’

12      Faoi Nóta Breise 2 a ghabhann le Roinn XVII de AC:

‘Is infheidhme forálacha riail ghinearálta 2(a) freisin, arna iarraidh sin don dearfóir agus faoi réir coinníollacha arna sonrú ag na húdaráis inniúla, maidir le hearraí atá faoi cheannteidil 8608, 8805, 8905 agus 8907 a allmhairítear i gcoinsíneachtaí deighilte.’

 Nótaí míniúcháin a ghabhann le AC

13      A mhéid a bhaineann le Nóta Breise 3 a ghabhann le Roinn XVI de AC, luaitear an méid seo a leanas sna Nótaí Míniúcháin a ghabhann le hAinmníocht Chomhcheangailte an Aontais Eorpaigh (IO 2019 C 119, lch. 1) (‘na Nótaí Míniúcháin a ghabhann le AC’):

‘Féadfar innealra neamhchóimeáilte nó díchóimeáilte, ag brath ar cheanglais na trádála nó an mhodha iompair, a chur i láthair i roinnt coinsíneachtaí agus iad scaipthe thar thréimhse ama.

Chun bheith in ann na comheilimintí éagsúla a dhearbhú faoin gceannteideal nó faoin bhfo-cheannteideal lena mbaineann an t‑innealra cóimeáilte, ní mór don dearbhóir custaim, tráth na chéad choinsíneachta ar a dhéanaí, iarraidh i scríbhinn a dhéanamh chuig an tseirbhís custaim [...]

Ní fhéadfar glacadh leis an iarraidh ach amháin i gcomhlíonadh conartha le meaisín a sholáthar ar féidir a mheas gur meaisín iomlán é chun críocha na hAinmníochta Comhcheangailte.

Ní mór na comhpháirteanna uile a allmhairiú tríd an bpointe iontrála céanna laistigh den am ceadaithe. I gcásanna speisialta, áfach, féadfaidh na húdaráis inniúla an t‑allmhairiú a údarú trí roinnt pointí iontrála. Ní fhéadfar an teorainn ama sin a shárú ach amháin má dhéantar iarraidh a bhfuil údar cuí léi ar shíneadh chuig na húdaráis inniúla.

Agus gach cuid den allmhairiú á déanamh, ní mór liosta a sholáthar de na páirteanna atá sa choinsíneacht mar aon le tagairtí don fhardal ginearálta thuasluaite. Ní mór tuairiscí ar an bpáirt nó ar na páirteanna atá sa choinsíneacht agus ar an meaisín iomlán a bheith sa dearbhú custaim maidir le gach coinsíneacht.’ [Aistriúchán neamhoifigiúil]

14      A mhéid a bhaineann le Nóta Breise 2 a ghabhann le Roinn XVII de AC, foráiltear leis na Nótaí Míniúcháin a ghabhann le AC ‘go bhfuil feidhm mutatis mutandis ag an Nóta Míniúcháin a ghabhann le Nóta Breise 3 de Roinn XVI’.

 An díospóid sna príomhimeachtaí agus na ceisteanna a tharchuirtear le haghaidh réamhrialú

15      An 19 Eanáir 2019, tháinig Rialacháin Cur Chun Feidhme ón gCoimisiún Eorpach i bhfeidhm lenar forchuireadh dleacht frithdhumpála chinntitheach agus dleacht frithchúitimh chinntitheach ar allmhairí rothar leictreach de thionscnamh na Síne. Tá feidhm ag na dleachtanna sin maidir le rothair leictreacha a thagann faoi fho-cheannteideal 8711 60 10 de AC, ach ní bhaineann siad le páirteanna agus gabhálais rothar leictreach a thagann faoi cheannteideal 8714 de AC.

16      Idir an 22 Eanáir 2019 agus an 27 Aibreán 2021, chuir Logwin Air + Ocean Belgium, isteach, ina cháil mar ionadaí Prestige Rijwielen, 27 ndearbhú allmhairiúcháin maidir le frámaí, foirc, mótair agus páirteanna eile de rothair leictreacha (‘na páirteanna atá i gceist’) a cheannaigh Prestige Rijwielen ó dhá chuideachta atá bunaithe sa tSín. Luadh sna dearbhuithe sin, a taisceadh go léir ag an oifig custaim chéanna, gur de thionscnamh na Síne na páirteanna atá i gceist agus gurbh é Prestige Rijwielen an coinsíní. Dearbhaíodh na páirteanna atá i gceist mar chodanna agus mar ghabhálais rothar leictreach faoi cheannteideal 8714 de AC.

17      Tar éis cigireachta, shainaithin an riarachán custaim, i dtuarascáil an 9 Lúnasa 2022, i measc na 27 dearbhú allmhairiúcháin a thaisc Logwin Air + Ocean Belgium, 6 ‘ghrúpa’ dearbhuithe, ar chomhfhreagair gach ceann acu do shraith frámaí, foirc, mótair agus páirteanna eile de rothair leictreacha, rud a d’fhág, nuair a cuireadh le chéile iad, go bhféadfaí rothair leictreacha iomlána a chóimeáil. De réir an riaracháin custaim, bhí nasc idir na dearbhuithe allmhairiúcháin a bhain leis an ngrúpa céanna ós rud é go raibh an uimhir thagartha chéanna ag na sonraisc a ghabh leis na dearbhuithe sin.

18      Thug Oifig an Ionchúisitheora Phoiblí Eorpaigh agus an Riarachán Custaim caingne coiriúla agus dhá chaingean shibhialta i gcoinne Prestige Rijwielen, [faoi rún] ZG agus Logwin Air + Ocean Belgium, faoi seach. Measann siad gur dhearbhaigh siad go neamhdhleathach na páirteanna atá i gceist mar chodanna agus gabhálais rothar leictreach, cé gur cheart iad a dhearbhú mar rothair leictreacha iomlána, agus dá bhrí sin gur sheachain siad íocaíocht na ndleachtanna frithdhumpála agus frithchúitimh uile agus cuid de na dleachtanna allmhairiúcháin a raibh siad faoi dhliteanas ina leith. Bheadh na méideanna arna n‑imghabháil níos mó ná EUR 2.9 milliún.

19      Le breithiúnas an 28 Meitheamh 2024, ghearr rechtbank van eerste aanleg Antwerpen, afdeling Antwerpen (an Chúirt Chéadchéime, Antuairp, Rannán Antuairp, an Bheilg) a mhéid a bhain leis na himeachtaí coiriúla, fíneáil ar Prestige Rijwielen agus téarma príosúnachta chomh maith le fíneáil ar ZG. D’ordaigh sí freisin go ndéanfaí na páirteanna atá i gceist a choigistiú. Maidir leis na caingne sibhialta, d’ordaigh sé do Prestige Rijwielen agus ZG i gcomhpháirt agus go leithleach luach na bpáirteanna sin chomh maith leis na dleachtanna frithdhumpála agus frithchúitimh agus na dleachtanna allmhairiúcháin a seachnaíodh a íoc. Chinn Rechtbank van eerste aanleg Antwerpen, afdeling Antwerpen (an Chúirt Chéadchéime, Rannán Antuairp) gur ordaíodh na páirteanna atá i gceist ina n‑iomláine sa tSín mar rothair leictreacha dhíchóimeáilte agus gur díoladh iad ina dhiaidh sin le tomhaltóirí mar rothair leictreacha iomlána, agus mar thoradh air sin, i gcomhréir le Riail 2(a) de na Rialacha Ginearálta maidir le Léirmhíniú AC, nár mhór a dhearbhú gur rothair leictreacha iomlána iad na páirteanna sin.

20      Rinne Oifig an Ionchúisitheora Phoiblí Eorpaigh agus an Riarachán Custaim, ar thaobh amháin, Prestige Rijwielen agus ZG, ar an taobh eile, achomharc i gcoinne bhreithiúnas rechtbank van eerste aanleg Antwerpen, afdeling Antwerpen (an Chúirt Chéadchéime, Antuairp, Rannán Antuairp) os comhair an hof van beroep Antwerpen (an Chúirt Achomhairc, Antuairp, an Bheilg), arb í an chúirt a rinne an tarchur í, maidir leis an gcaingean choiriúil agus na caingne sibhialta araon.

21      Sa chomhthéacs sin, tugann an chúirt a rinne an tarchur dá haire, sa chéad áit, i mbreithiúnas an 27 Aibreán 2023, X agus Inspecteur van de Belastingdienst Douane (C‑107/22, EU:C:2023:346), go dtagraíonn an Chúirt, maidir le Riail 2(a) de na Rialacha Ginearálta maidir le Léirmhíniú AC, do na tosca oibiachtúla lena léirítear nó nach léirítear gur aonad iomlán atá sna páirteanna agus go n‑áirítear iontu comhpháirteanna uile gairis. Tugann sí dá haire freisin, de réir na Cúirte, nár cheart an riail sin a léiriú mar riail lena gceadaítear d’allmhaireoirí iad féin an t‑aicmiú taraife is fabhraí de na hearraí allmhairithe a roghnú, trí bhíthin ionramháil réasúnta simplí, trí iad a mheas ina n‑iomláine nó ar leithligh.

22      Tugann an chúirt a rinne an tarchur dá haire, sa dara háit, i mbreithiúnas an 27 Aibreán 2023, X agus Inspecteur van de Belastingdienst Douane (C‑107/22, EU:C:2023:346), gur shonraigh an Chúirt, chun páirteanna a mheas mar earra a chuirtear i láthair i riocht díchóimeáilte nó neamhchóimeáilte, nach mór iad a chur i láthair ag an am céanna le haghaidh imréiteach custaim. Sna príomhimeachtaí, cé is moite den chéad ghrúpa dearbhuithe, bhí idir mí amháin agus roinnt míonna caite idir an chéad dearbhú allmhairiúcháin agus an dearbhú allmhairiúcháin deireanach.

23      Tugann an chúirt a rinne an tarchur dá haire, sa tríú háit, gur cosúil, i gceann dá tuairimí, nach dtagraíonn an Oifig Eorpach Frith-Chalaoise do chur i bhfeidhm Riail 2(a) de na Rialacha Ginearálta maidir le léirmhíniú AC i gcás nár cuireadh na hearraí i láthair an lá céanna.

24      Sna himthosca sin, chinn hof van beroep Antwerpen (Cúirt Achomhairc Antuairp) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:

‘ An bhfuil Riail Ghinearálta 2(a) de na Rialacha Ginearálta maidir le [Léirmhíniú] AC, mar a leagtar amach in Iarscríbhinn I a ghabhann le Rialachán (NC) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus maidir leis an gComhtharaif Chustaim, arna leasú le Rialachán (CE) Uimh. 1549/2006 ón gCoimisiún an 17 Deireadh Fómhair 2006, le léiriú sa chaoi go gcaithfear páirteanna de rothar leictreach atá beartaithe, tar éis iad a scaoileadh le haghaidh saorchúrsaíochta, a chóimeáil i rothar leictreach, a bhfuil sonrasc tugtha dóibh ag dhá sholáthraí éagsúla agus a iompraítear i gcoimeádáin éagsúla agus a dhearbhaíonn an soláthraí céanna, in ainm agus thar ceann an choinsíní chéanna, scaipthe thar thréimhse suas le roinnt míonna, ag an oifig chustaim chéanna le haghaidh saorchúrsaíochta trí bhíthin dearbhuithe ar leithligh le haghaidh saorchúrsaíochta, agus ar maoin de chuid an choinsíní iad nuair a scaoiltear iad le haghaidh saorchúrsaíochta, a aicmiú mar rothair leictreacha mar a chuirtear i láthair iad i riocht [díchóimeáilte nó neamhchóimeáilte] de réir bhrí na Rialach thuasluaite, agus dá bhrí sin go dtagann siad faoin gceannteideal taraife céanna, a mhéid a léiríonn tosca oibiachtúla gurb ionann na codanna sin agus aonad iomlán agus go gcuimsíonn siad comhpháirteanna riachtanacha uile na rothar leictreach sin ?’

 Breithniú ar na ceisteanna a tharchuirtear le haghaidh réamhrialú

25      Lena ceist, fiafraíonn an chúirt a rinne an tarchur an bhfuil Riail 2(a) de na Rialacha Ginearálta maidir le Léirmhíniú AC le léiriú sa chaoi nach mór páirteanna rothair leictrigh atá beartaithe, tar éis iad a scaoileadh i saorchúrsaíocht, a chóimeáil i rothar leictreach, a bhfuil sonrasc tugtha dóibh ag dhá sholáthróir éagsúla agus arna n‑iompar i gcoimeádáin éagsúla, a dhearbhaíonn an dearbhóir céanna lena scaoileadh i saorchúrsaíocht ag an oifig custaim chéanna, in ainm agus thar ceann an choinsíní chéanna, trí bhíthin dearbhuithe ar leithligh maidir le scaoileadh i saorchúrsaíocht thar thréimhse suas le roinnt míonna agus ar leis an gcoinsíní iad nuair a scaoiltear i saorchúrsaíocht iad, a aicmiú mar rothair leictreacha a chuirtear i láthair go díchóimeáilte nó go neamhchóimeáilte, de réir bhrí na rialach sin, agus a thagann, dá bhrí sin, faoi cheannteideal taraife amháin, a mhéid a léirítear le tosca oibiachtúla gurb ionann na páirteanna sin agus aonad iomlán agus go n‑áirítear leo comhpháirteanna riachtanacha uile na rothar leictreach sin.

26      Mar réamhphointe, ní mór a mheabhrú, nuair a iarrtar ar Chúirteanna an Aontais Eorpaigh réamhrialú a thabhairt maidir le haicmiú taraife, gurb é an cúram atá uirthi treoir a thabhairt don chúirt náisiúnta maidir leis na critéir lena gcuirfear ar a gcumas na táirgí lena mbaineann a aicmiú i gceart de réir AC, seachas an t‑aicmiú sin a dhéanamh í féin. Is toradh é rangú na n‑earraí atá i gceist, d’fhonn iad a aicmiú chun críche taraife, ar chinneadh fíorasach amháin nach faoi Chúirteanna an Aontais Eorpaigh atá sé a dhéanamh i gcomhthéacs tarchur chun réamhrialú (féach breithiúnas an 28 Aibreán 2022, PRODEX, C‑72/21, EU:C:2022:312, mír 27 agus an cásdlí dá dtagraítear).

27      Ina theannta sin, chinn an Chúirt go gcuireann na Nótaí Míniúcháin, arna dtarraingt suas ag an gCoimisiún, a mhéid a bhaineann le AC, agus iad siúd arna nglacadh ag EDC, a mhéid a bhaineann le CC, go mór le léiriú raon feidhme na gceannteideal taraife éagsúil, gan feidhm cheangailteach dlí a bheith acu, áfach. Dá bhrí sin, ní mór d’ábhar na nótaí sin forálacha AC a chomhlíonadh agus ní féidir leis a raon feidhme a athrú (féach breithiúnas an 10 Márta 2016, VAD agus van Aert, C‑499/14, EU:C:2016:155, míreanna 33 agus 34 agus an cásdlí dá dtagraítear).

28      Ní mór a mheabhrú, i gcomhréir le Riail 1 de na Rialacha Ginearálta maidir le léirmhíniú AC, tá aicmiú taraife earraí le cinneadh de réir théarmaí na gceannteideal agus de réir na nótaí roinne nó caibidle a ghabhann leis an Ainmníocht sin. Ar mhaithe le deimhneacht dhlíthiúil agus chun fíoruithe a éascú, bíonn an critéar cinntitheach maidir le haicmiú taraife na n‑earraí sin le lorg go ginearálta ina saintréithe agus ina n‑airíonna oibiachtúla mar a shainmhínítear i bhfoclaíocht cheannteideal na hAinmníochta sin agus sna nótaí roinne nó caibidle (féach breithiúnas an 28 Aibreán 2022, PRODEX, C‑72/21, EU:C:2022:312, mír 28 agus an cásdlí dá dtagraítear).

29      Foráiltear le Riail 2(a) de na Rialacha Ginearálta maidir le Léirmhíniú AC, a chomhfhreagraíonn do Riail 2(a) de na Rialacha Ginearálta maidir le Léirmhíniú CC, go ‘dtuigfear le haon tagairt i gceannteideal d’airteagal go n‑áireofar léi tagairt don airteagal sin agus é neamhiomlán nó neamhchríochnaithe, ar choinníoll, mar a chuirtear i láthair é, go mbeidh saintréithe fíor-riachtanacha an airteagail iomláin nó an airteagail chríochnaithe ag an airteagal neamhiomlán nó neamhchríochnaithe [agus] áireofar léi tagairt don airteagal iomlán nó don airteagal críochnaithe sin (nó d’airteagal a bheidh le haicmiú mar airteagal iomlán nó airteagal críochnaithe de bhua na rialach sin), agus é á chur láthair ina airteagal neamhchóimeáilte nó díchóimeáilte’.

30      Ní mór saintréithe agus airíonna oibiachtúla na dtáirgí a bheith infhíoraithe tráth an imréitigh custaim. Thairis sin, d’fhéadfadh úsáid bheartaithe táirge a bheith ina critéar oibiachtúil maidir le haicmiú más gné dhílis den táirge í, agus ní mór a bheith in ann an ghné dhílis sin a mheasúnú ar bhonn shaintréithe agus airíonna oibiachtúla an táirge (féach breithiúnas an 27 Meán Fómhair 2007, Medion agus Canon Deutschland C‑208/06 agus C‑209/06, EU:C:2007:553, míreanna 36 agus 37 agus an cásdlí dá dtagraítear).

31      Sa chás seo, ba cheart a thabhairt faoi deara go bhfuil an cheist a tharchuirtear le haghaidh réamhrialú bunaithe ar an mbonn go bhfuil tosca oibiachtúla leordhóthanacha ann chun a léiriú gurb ionann na páirteanna atá i gceist agus aonad iomlán agus go bhfuil siad beartaithe lena gcóimeáil ina dhiaidh sin ina rothair leictreacha iomlána. Is léir ón ordú tarchuir gur cheannaigh an coinsíní céanna na páirteanna atá i gceist ón idirghabhálaí céanna, gur thaisc an dearbhóir céanna na dearbhuithe comhfhreagracha ag an oifig custaim chéanna, go gcomhfhreagraíonn na páirteanna atá i gceist do líon áirithe rothar leictreach iomlán, go bhfágann uimhreacha tagartha na sonrasc gur féidir tacair páirteanna a shainaithint a d’fhéadfadh a bheith ina líon áirithe rothar leictreach, gur scoir an coinsíní de bheith ag allmhairiú rothar leictreach iomlán agus gur leis, tráth a scaoilte i saorchúrsaíocht, na páirteanna atá i gceist.

32      Sa chomhthéacs sin, fiafraíonn an chúirt a rinne an tarchur an gá Riail 2(a) de na Rialacha Ginearálta maidir le Léirmhíniú AC a chur i bhfeidhm maidir le páirteanna lena léirítear, ar bhonn tosca oibiachtúla, gur aonad iomlán iad agus atá beartaithe lena gcóimeáil ina rothair leictreacha iomlána ina dhiaidh sin, i gcás ina raibh na páirteanna sin ina n‑ábhar do dhearbhuithe ar leithligh maidir le scaoileadh i saorchúrsaíocht thar thréimhse suas le roinnt míonna.

33      A mhéid a bhaineann leis an gceanglas a d’fhéadfadh a bheith ann maidir le cur i láthair comhuaineach i gcomhthéacs chur i bhfeidhm Riail 2(a) de na Rialacha Ginearálta maidir le léirmhíniú AC, ní mór a thabhairt faoi deara nach sonraítear i bhfoclaíocht na rialach sin na tréimhsí nach mór na comhpháirteanna d’airteagal iomlán a chur faoi bhráid na n‑údarás custaim lena meas mar aonad amháin.

34      Thairis sin, foráiltear le Nóta Breise 3 a ghabhann le Roinn XVI agus le Nóta Breise 2 a ghabhann le Roinn XVII de AC, dá dtagraítear i míreanna 11 agus 12 thuas, go mbeidh feidhm ag forálacha Riail 2(a) de na Rialacha Ginearálta maidir le Léirmhíniú AC i dtaca le hearraí áirithe a chuirtear i láthair i gcoinsíneachtaí deighilte. Cé nach mbaineann na nótaí sin leis na páirteanna atá i gceist, féadfar a thuiscint nach coinníoll bunriachtanach i ngach cás é cur i láthair comhuaineach na n‑earraí chun Riail 2(a) de na Rialacha Ginearálta maidir le léirmhíniú AC a chur i bhfeidhm.

35      Thairis sin, is léir ó na Nótaí Míniúcháin a ghabhann le AC a bhaineann le Nóta Breise 3 a ghabhann le Roinn XVI de AC, dá dtagraítear i mír 13 thuas, arna léamh i gcomhar le Riail 2(a) de na Rialacha Ginearálta maidir le Léirmhíniú AC, gur féidir le hallmhaireoir a dhearbhú, ón gcéad choinsíneacht de shraith coinsíneachtaí deighilte, na páirteanna ar leithligh de mheaisín, bídís díchóimeáilte nó neamhchóimeáilte, faoin gceannteideal nó faoin bhfo-cheannteideal lena mbaineann an meaisín iomlán, má tá saintréithe fíor-riachtanacha an mheaisín iomláin acu. Ba cheart a mheabhrú i ndáil leis sin go mbaineann an oibleagáid atá ar an dearbhóir faisnéis chruinn a sholáthar freisin le cinneadh an fho-cheannteidil chirt tráth aicmiú taraife na n‑earraí (féach breithiúnas an 15 Meán Fómhair 2011, DP grup, C‑138/10, EU:C:2011:587, mír 40 agus an cásdlí dá dtagraítear).

36      Leanann sé ó na breithnithe roimhe seo nach mór Riail 2(a) de na Rialacha Ginearálta maidir le Léirmhíniú AC a chur i bhfeidhm i gcás ina bhfuil saintréithe fíor-riachtanacha an airteagail iomláin ag na páirteanna ar leithligh d’airteagal. Ní mór a bheith in ann an coinníoll sin a fhíorú ar bhonn tosca oibiachtúla tráth an imréitigh custaim, rud a d’fhéadfadh a bheith amhlaidh fiú mura gcuirtear na páirteanna ar leithligh i láthair an tráth céanna.

37      Ní chaitear amhras ar an léiriú sin le breithiúnais an 8 Bealtaine 1974, Osram (183/73, EU:C:1974:50, mír 7); an 16 Meitheamh 1994, Develop Dr. Eisbein (C‑35/93, EU:C:1994:252, míreanna 19 agus 23); agus an 27 Aibreán 2023, X agus Inspecteur van de Belastingdienst Douane (C‑107/22, EU:C:2023:346, mír 24), inar chinn an Chúirt, i gcomhthéacs léiriú an dara cuid de Riail 2(a) de na Rialacha Ginearálta maidir le Léirmhíniú Ainmníocht na Comhtharaife Custaim, a leagtar amach san Iarscríbhinn a ghabhann le Rialachán (CEE) Uimh. 950/68 ón gComhairle an 28 Meitheamh 1968 maidir leis an gComhtharaif Chustaim (IO 1968 L 172, lch. 1), arna leasú le Rialachán Uimh. 1/73 ón gComhairle an 19 Nollaig 1972 (IO 1973 L 1, lch. 1). lch. 1), nó léiriú an dara cuid de Riail 2(a) de na Rialacha Ginearálta maidir le Léirmhíniú AC, go raibh gá le cur i láthair comhuaineach na gcomhpháirteanna d’earra chun críocha imréitigh custaim d’fhonn iad a mheas mar airteagal a cuireadh i láthair go neamhchóimeáilte nó go díchóimeáilte.

38      Sna cásanna as ar eascair na breithiúnais dá dtagraítear i mír 37 den bhreithiúnas seo, ní raibh an fíoras gur ghá na páirteanna arb ionann iad agus aonad iomlán a chur i láthair go comhuaineach chun críocha imréitigh custaim ina ábhar do na hiarrataí ar réamhrialú, agus mar thoradh air sin níor iarradh ar an gCúirt an coincheap ‘cur i láthair comhuaineach’ a léiriú sna breithiúnais sin.

39      Thairis sin, i mbreithiúnas an 27 Aibreán 2023, X agus Inspecteur van de Belastingdienst Douane (C‑107/22, EU:C:2023:346, míreanna 25 go 28), shonraigh an Chúirt na cúiseanna nach mór Riail 2(a) de na Rialacha Ginearálta maidir le Léirmhíniú AC a léiriú sa chaoi nach féidir leis an bhfíoras go gcuirtear earraí i láthair do na húdaráis chustaim i ndearbhuithe ar leithligh, ann féin, bac a chur ar iad a aicmiú mar earraí neamhchóimeáilte nó díchóimeáilte más rud é, tráth an imréitigh custaim, gur léir ó thosca oibiachtúla eile gur aonad iomlán atá sna hearraí sin agus go bhfuil sé beartaithe iad a chur le chéile ina dhiaidh sin mar airteagal aonair.

40      Shonraigh an Chúirt, i ndáil leis sin, go gcuirfeadh léiriú difriúil ar choincheap ‘airteagal díchóimeáilte nó neamhchóimeáilte’ ar chumas allmhaireoirí, sa chleachtas, trí bhíthin ionramháil réasúnta simplí, amhail na hearraí a chur i láthair i ndearbhuithe ar leithligh, an t‑aicmiú taraife is fabhraí a roghnú dóibh féin i dtaca leis na hearraí atá i gceist, is é sin mar aonad amháin nó ar leithligh (féach breithiúnas an 27 Aibreán 2023, X agus Inspecteur van de Belastingdienst Douane C‑107/22, EU:C:2023:346, mír 26 agus an cásdlí dá dtagraítear).

41      Mar a thug an Coimisiún faoi deara ag an éisteacht, tá nósanna imeachta allmhairiúcháin i ndiaidh teacht chun cinn, amhail coinsíneachtaí deighilte, mar shampla, lena gcuirtear i dtábhacht riosca ionramhála tráth a chuirtear na hearraí faoi bhráid na n‑údarás custaim, rud a chuireann ar chumas allmhaireoirí aicmiú taraife na n‑earraí a roghnú.

42      Bheadh féidearthacht den sórt sin contrártha don phrionsabal nach mór an critéar cinntitheach maidir le haicmiú taraife earraí a lorg go ginearálta ina saintréithe agus ina n‑airíonna oibiachtúla agus, dá bhrí sin, bhainfí den chuspóir a bhaineann le rialuithe custaim a éascú agus leis an deimhneacht dhlíthiúil nach mór a bheith mar bhonn d’aicmiú taraife earraí allmhairithe (féach, de réir analaí, breithiúnas an 27 Aibreán 2023, X agus Inspecteur van de Belastingdienst Douane C‑107/22, EU:C:2023:346, mír 27 agus an cásdlí dá dtagraítear).

43      Dá bhrí sin, i gcás go gcuirtear i láthair earraí do na húdaráis chustaim i ndearbhuithe ar leithligh thar roinnt seachtainí nó míonna, ní féidir leis sin, ann féin, cosc a chur ar aicmiú na n‑earraí sin mar earraí neamhchóimeáilte nó díchóimeáilte de réir bhrí Riail 2(a) de na Rialacha Ginearálta maidir le Léirmhíniú AC más rud é, tráth an imréitigh custaim, gur léir ó thosca oibiachtúla eile gur aonad iomlán iad na hearraí sin agus go bhfuil sé beartaithe iad a chóimeáil ina dhiaidh sin ina earra aonair, rud atá le fíorú ag an gcúirt a rinne an tarchur (féach, chuige sin agus de réir analaí, breithiúnas an 27 Aibreán 2023, X agus Inspecteur van de Belastingdienst Douane, C‑107/22, EU:C:2023:346, mír 28 agus an cásdlí dá dtagraítear).

44      Níl an fíoras go gcuirtear comhpháirteanna earra iomláin i láthair ag an gcustam ag an am céanna ina choinníoll riachtanach chun a chinneadh gur aonad iomlán iad agus gur ‘airteagal […] á chur láthair ina airteagal neamhchóimeáilte nó díchóimeáilte’ atá i gceist, dá bhrí sin, de réir bhrí Riail 2(a), de na Rialacha Ginearálta maidir le Léirmhíniú AC. Níl ann ach comhartha as ar féidir a leithéid de chonclúid a thuiscint, ach ní mór é a mheas i gcomhar le cúinsí ábhartha eile (féach, chuige sin agus de réir analaí, breithiúnas an 27 Aibreán 2023, X agus Inspecteur van de Belastingdienst Douane, C‑107/22, EU:C:2023:346, míreanna 25 agus 30 agus an cásdlí dá dtagraítear).

45      Dá bhrí sin, ní mór Riail Ghinearálta 2(a) de na Rialacha Ginearálta maidir le Léirmhíniú AC, a léiriú sa chaoi nach mór páirteanna de rothar leictreach atá beartaithe, tar éis iad a scaoileadh le haghaidh saorchúrsaíochta, a chóimeáil i rothar leictreach, a bhfuil sonrasc tugtha dóibh ag dhá sholáthraí éagsúla agus a iompraítear i gcoimeádáin éagsúla agus a dhearbhaíonn an dearbhóir céanna, in ainm agus thar ceann an choinsíní chéanna, scaipthe thar thréimhse suas le roinnt míonna, ag an oifig custaim chéanna le haghaidh saorchúrsaíochta trí bhíthin dearbhuithe ar leithligh le haghaidh saorchúrsaíochta, agus ar maoin de chuid an choinsíní iad nuair a scaoiltear iad le haghaidh saorchúrsaíochta, a aicmiú mar rothair leictreacha arna gcur i láthair i riocht díchóimeáilte nó neamhchóimeáilte de réir bhrí na Rialach sin, agus dá bhrí sin go dtagann siad faoin gceannteideal taraife céanna, ar choinníoll go léirítear le tosca oibiachtúla gurb ionann na páirteanna sin agus aonad iomlán agus go gcuimsítear leo comhpháirteanna riachtanacha uile na rothar leictreach sin.

 Costais

46      Os rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte Ginearálta, seachas costais na bpáirtithe sin, inghnóthaithe.

Ar na forais sin,

rialaíonn AN CHÚIRT GHINEARÁLTA (an Cúigiú Dlísheomra ina bhfuil cúigear breithiúna ina suí)

mar seo a leanas:

Maidir le Riail 2(a) de na Rialacha Ginearálta maidir le Léirmhíniú na hAinmníochta Comhcheangailte a leagtar amach in Iarscríbhinn I a ghabhann le Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim, sna leaganacha a eascraíonn, i ndiaidh a chéile, as Rialachán Cur Chun Feidhme (AE) 2018/1602 ón gCoimisiún an 11 Deireadh Fómhair 2018, Rialachán Cur Chun Feidhme (AE) 2019/1776 ón gCoimisiún an 9 Deireadh Fómhair 2019, agus Rialachán Cur Chun Feidhme (AE) 2020/1577 ón gCoimisiún an 21 Meán Fómhair 2020,

ní mór léiriú a dhéanamh mar seo a leanas:

páirteanna de rothar leictreach atá beartaithe, tar éis iad a scaoileadh le haghaidh saorchúrsaíochta, a chóimeáil i rothar leictreach, a bhfuil sonrasc tugtha dóibh ag dhá sholáthraí éagsúla agus a iompraítear i gcoimeádáin éagsúla agus a dhearbhaíonn an dearbhóir céanna, in ainm agus thar ceann an choinsíní chéanna, scaipthe thar thréimhse suas le roinnt míonna, ag an oifig custaim chéanna le haghaidh saorchúrsaíochta trí bhíthin dearbhuithe ar leithligh le haghaidh saorchúrsaíochta, agus ar maoin de chuid an choinsíní iad nuair a scaoiltear iad le haghaidh saorchúrsaíochta, a aicmiú mar rothair leictreacha arna gcur i láthair i riocht díchóimeáilte nó neamhchóimeáilte de réir bhrí na Rialach thuasluaite, agus dá bhrí sin go dtagann siad faoin gceannteideal taraife céanna, ar choinníoll go léirítear le tosca oibiachtúla gurb ionann na páirteanna sin agus aonad iomlán agus go gcuimsítear leo comhpháirteanna riachtanacha uile na rothar leictreach sin.

Sampol Pucurull

Pynnä

Laitenberger

Stancu

 

      Valasidis

Arna thabhairt i gcúirt oscailte i Lucsamburg, an 7 Deireadh Fómhair 2026.

[Sínithe]


*      Teanga an cháis: an Ollainnis.


1      Sonraí rúnda fágtha ar lár.