(3)

Is é atá sa táirge atá faoi réir clárú (‘an táirge lena mbaineann’) snáth filiméadach leanúnach sintéiseach polaimídí alafatacha, nach bhfuil cóirithe lena mhiondíol, lena n-áirítear aonfhiliméad sintéiseach atá níos lú ná 67 ndeiciteics ar dlús. Áirítear leis an táirge atá faoi réir clárú gach athraitheach snátha atá déanta as níolón nó as polaimídí alafatacha eile, bídís uigithe nach mó ná 50 teics in aghaidh na snáithe nó ná bídís, iad singil, dúbailte, iolrach (fillte) nó cáblaithe, (nó athraithigh díobh), casta nó neamhchasta, a aicmítear faoi láthair faoi chóid AC 5402 31 00 , 5402 45 00 , 5402 51 00 agus 5402 61 00 agus de thionscnamh Dhaon-Phoblacht na Síne.

(4)

Ní áirítear snáth polaimíde ardrighnis a thagann faoi chód AC 5402 19 00 .

(5)

Faoi Airteagal 14(5) den bhun-Rialachán, féadfar allmhairí an táirge lena mbaineann a chur faoi réir clárú chun a áirithiú go bhféadfar na dleachtanna sin a thobhach go cúlghabhálach, má chomhlíontar na coinníollacha is gá, ar na hallmhairí cláraithe i gcomhréir leis na forálacha dlí is infheidhme, i gcás ina mbeidh torthaí ar na himscrúduithe as a dtiocfadh forchur dleachtanna frithdhumpála.

(6)

Chinn an Coimisiún, ar a thionscnamh féin, allmhairí an táirge lena mbaineann a chur faoi réir clárú faoi Airteagal 14(5) den bhun-Rialachán. Na coinníollacha le haghaidh bhailiú cúlghabhálach na ndleachtanna, más ann dóibh, déanfar measúnú orthu sa Rialachán lena bhforchuirfear dleachtanna cinntitheacha.

(7)

Aon dliteanas a bheidh ann amach anseo, is as torthaí an imscrúdaithe frithdhumpála a thiocfadh sé.

(8)

De réir na ríomhanna arna soláthar sa ghearán inar iarradh imscrúdú frithdhumpála a thionscnamh, meastar go bhfuil corrlaigh dhumpála idir 49 % agus 131 % ann agus go bhfuil leibhéal díothaithe díobhála idir 92 % agus 98 % ann le haghaidh an táirge lena mbaineann sa bhliain 2024. De ghnáth, dhéanfaí an méid dliteanais a d’fhéadfadh a bheith ann amach anseo a shocrú ar an leibhéal is ísle den dá leibhéal sin de réir Airteagal 7(2) den bhun-Rialachán.

(9)

Má thagann an Coimisiún ar fhianaise le linn an imscrúdaithe gur ann do shaobhadh ar amhábhair de bhun Airteagal 7(2a) den bhun-Rialachán, dhéanfaí an méid dliteanais a d’fhéadfadh a bheith ann amach anseo a shocrú ar leibhéal an chorrlaigh dumpála mar a fhoráiltear in Airteagal 7(2b) den bhun-Rialachán má chinntear nár leor dleacht faoi bhun an chorrlaigh dumpála chun deireadh a chur leis an díobháil a bhain do thionscal an Aontais.

(10)

Mar sin féin, ag an gcéim seo ní féidir leis an gCoimisiún an méid dliteanais a d’fhéadfadh a bheith ann amach anseo a mheas. Dá bhrí sin, is ar mhaithe le faisnéis amháin atá na méideanna a luaitear sa ghearán agus ní féidir aon choinne a bheith leis an leibhéal iarbhír dliteanais a shuífear mar thoradh ar an imscrúdú a bheith bunaithe orthu.

(11)

Aon fhaisnéis phearsanta a bhailítear i gcomhthéacs an chlárúcháin seo, déanfar í a láimhseáil i gcomhréir le Rialachán (AE) 2018/1725 ó Pharlaimint na hEorpa agus ón gComhairle (3) maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin,