–

għall-Bundesverband der Verbraucherzentralen und Verbraucherverbände - Verbraucherzentrale Bundesverband e.V., minn P. Wassermann, Rechtsanwalt,

–

għal NEW Niederrhein Energie und Wasser GmbH, minn T. Höch, Rechtsanwalt,

–

għall-Kummissjoni Ewropea, minn P. Kienapfel, P. Ondrůšek u I. Rubene, bħala aġenti,

1

It-talba għal deċiżjoni preliminari tirrigwarda l-interpretazzjoni tal-Artikolu 7(1) u (4) tad-Direttiva 2005/29/KE tal-Parlament Ewropew u tal-Kunsill tal‑11 ta’ Mejju 2005 dwar prattiċi kummerċjali żleali fin-negozju mal-konsumatur fis-suq intern u li temenda d-Direttiva tal-Kunsill 84/450/KEE, id-Direttivi 97/7/KE, 98/27/KE u 2002/65/KE tal-Parlament Ewropew u tal-Kunsill, u r-Regolament (KE) Nru 2006/2004 tal-Parlament Ewropew u tal-Kunsill (Direttiva dwar Prattiċi Kummerċjali Żleali) (ĠU 2005, L 149, p. 22, rettifika fil-ĠU 2006, L 114, p. 86).

2

Din it-talba tressqet fil-kuntest ta’ kawża bejn il-Bundesverband der Verbraucherzentralen und Verbraucherverbände – Verbraucherzentrale Bundesverband e.V. (l-Unjoni Federali taċ-Ċentri u tal-Assoċjazzjonijiet tal-Konsumaturi, il-Ġermanja) (iktar ’il quddiem l-“Unjoni Federali”) u NEW Niederrhein Energie und Wasser GmbH dwar reklamar allegatament qarrieqi għal offerta ta’ provvista ta’ elettriku.

Il‑kuntest ġuridiku

Id‑dritt tal‑Unjoni

3

Il-premessi 6, 7, 14 u 18 tad-Direttiva 2005/29 jistipulaw:

4

L-Artikolu 2 ta’ din id-direttiva jipprovdi:

5

L-Artikolu 7 tal-imsemmija direttiva jipprevedi:

Id‑dritt Ġermaniż

6

Il-Gesetz gegen den unlauteren Wettbewerb (il-Liġi li Tipprojbixxi l-Kompetizzjoni Żleali) tat‑3 ta’ Lulju 2004 (BGBl. 2010 I, p. 254), fil-verżjoni tagħha fis-seħħ fit‑28 ta’ Mejju 2022 applikabbli għat-tilwima fil-kawża prinċipali (iktar ’il quddiem l-“UWG”), hija intiża, b’mod partikolari, li tittrasponi fid-dritt Ġermaniż id-Direttiva 2005/29.

7

Skont l-Artikolu 5bis(1) u (3) tal-UWG:

8

L-Artikolu 5ter(1) tal-UWG jipprovdi:

Il‑kawża prinċipali u d‑domanda preliminari

9

NEW Niederrhein Energie und Wasser, li teżerċita l-attività tagħha fit-territorju Ġermaniż kollu, tipprovdi l-elettriku, b’mod partikolari, lil klijenti li għandhom sistema ta’ tisħin tal-elettriku tal-ħażna (iktar ’il quddiem l-“elettriku użat għal finijiet ta’ tisħin”). Għalhekk, din il-kumpannija tbigħ lil dawn il-klijenti, b’mod partikolari, l-elettriku ffatturat b’tariffa mnaqqsa matul is-“sigħat off-peak” li jikkorrispondu għal perijodu ta’ ħin ta’ bil-lejl u intiż għall-provvista ta’ enerġija ta’ din is-sistema.

10

Mid-deċiżjoni tar-rinviju jsegwi li l-konsum tal-imsemmija klijenti ta’ elettriku użat għal finijiet ta’ tisħin u ta’ elettriku użat għal finijiet oħra jista’ jingħadd separatament jew flimkien. Fil-każ li jingħaddu flimkien, jintuża arloġġ b’tariffa doppja li jkollu żewġ readers li jirreġistraw il-konsum tal-elettriku, wieħed, bit-tariffa mnaqqsa għas-sigħat off-peak, l-ieħor, bit-tariffa sħiħa, applikata matul is-sigħat l-oħra tal-ġurnata.

11

Il-qorti tar-rinviju tippreċiża li l-klijenti jistgħu jikkonsmaw, matul is-sigħat ta’ applikazzjoni tat-tariffa mnaqqsa, minbarra l-elettriku użat għal finijiet ta’ tisħin, l-elettriku użat għal finijiet oħra, u dan il-konsum tal-aħħar ma jistax jiġi rreġistrat separatament. Ċerti operaturi u operaturi ta’ netwerks ta’ distribuzzjoni tal-elettriku jimponu, f’din is-sitwazzjoni, fuq il-fornituri tal-elettriku kwantità msejħa “ta’ kumpens” (iktar ’il quddiem il-“kwantità ta’ kumpens”), li tikkorrispondi għal fatturazzjoni bit-tariffa sħiħa ta’ parti mill-konsum tal-elettriku ffatturat bit-tariffa mnaqqsa u li hija ppreżentata fil-forma ta’ perċentwali fissa.

12

Fuq is-sit internet tagħha, www.new-energie.de, NEW Niederrhein Energie und Wasser, li tgħaddi lill-klijenti tagħha l-kwantità ta’ kumpens stabbilita mill-operaturi tan-netwerks ta’ distribuzzjoni tal-elettriku, tqiegħed għad-dispożizzjoni tal-pubbliku simulatur ta’ tariffi tal-elettriku. Dan tal-aħħar jista’ jintuża wkoll mill-persuni li jikkonsmaw l-elettriku użat għal finijiet ta’ tisħin u li għandhom arloġġ b’tariffa doppja. Il-persuni kkonċernati għandhom, għal dan l-għan, jintroduċu l-kodiċi postali tagħhom kif ukoll il-kwantitajiet ta’ elettriku li huma jkunu kkonsmaw jew li jikkorrispondu għall-bżonn tagħhom abbażi tat-tariffa mnaqqsa u tat-tariffa sħiħa, rispettivament. Dan is-simulatur jikkalkola għalhekk offerta ta’ tariffi li huma jistgħu jaċċettaw u, għaldaqstant, jikkonkludu kuntratt ta’ provvista tal-elettriku ma’ NEW Niederrhein Energie und Wasser.

13

Skont l-Unjoni Federali, l-assenza ta’ indikazzjoni, waqt l-użu tal-imsemmi simulatur, tal-kwantità ta’ kumpens mgħoddija fuq il-konsumatur ikkonċernat tikkostitwixxi ksur tal-projbizzjoni ta’ ommissjoni qarrieqa u, għaldaqstant, tal-UWG. Fil-fatt, il-prezz definittiv muri mis-simulatur tat-tariffi huwa inqas mill-prezz reali, peress li ma jiħux inkunsiderazzjoni l-perċentwali miżmum bħala l-kwantità ta’ kumpens.

14

L-Unjoni Federali talbet lill-qrati Ġermaniżi kompetenti, kemm fl-ewwel istanza kif ukoll fl-appell, sabiex jikkundannaw lil NEW Niederrhein Energie und Wasser sabiex tieqaf, b’mod partikolari, milli tirreklama offerta ta’ provvista ta’ elettriku użat għal finijiet ta’ tisħin mingħajr ma jkun indikat espressament lill-konsumatur, fil-kuntest tal-proċess kuntrattwali u, b’mod iktar preċiż, f’dak li jirrigwarda l-metodu ta’ fatturazzjoni ta’ dan l-elettriku, il-perċentwali miżmum bħala l-kwantità ta’ kumpens u applikat fil-każ ta’ kontabbiltà konġunta tal-konsum tal-imsemmi elettriku u ta’ dak użat għal finijiet oħra, permezz ta’ arloġġ b’tariffa doppja.

15

Peress li dawk il-qrati ċaħdu dawn it-talbiet, l-Unjoni Federali ppreżentat rikors għal reviżjoni quddiem il-Bundesgerichtshof (il-Qorti Federali tal-Ġustizzja, il-Ġermanja), il-qorti tar-rinviju, billi tenniet it-talba tagħha intiża għall-waqfien ta’ dan ir-reklamar.

16

Mid-deċiżjoni tar-rinviju jsegwi li l-kundizzjonijiet ġenerali ta’ bejgħ tal-konvenuta fil-kawża prinċipali, li l-persuna kkonċernata għandha tikkonferma li saret taf bihom waqt il-proċess ta’ aċċettazzjoni, fuq l-internet, tal-offerta relatata mal-provvista ta’ elettriku użat, b’mod partikolari, għal finijiet ta’ tisħin, jippreċiżaw li huwa l-operatur tan-netwerk lokali ta’ distribuzzjoni tal-elettriku li għandu jiddetermina l-ammont ta’ ħin ta’ bil-lejl u l-perċentwali miżmum skont l-ammont ta’ kumpens. Huwa ddikjarat ukoll li dan tal-aħħar ġie ffissat għal 25 % mill-operatur tan-netwerk għaż-żona ġeografika li taħtha taqa’ s-sede tal-konvenuta fil-kawża prinċipali.

17

Il-qorti tar-rinviju tqis li r-reklamar għal offerta ta’ provvista ta’ elettriku li jirriżulta mit-tqegħid għad-dispożizzjoni, mill-fornitur, ta’ simulatur ta’ tariffi online jikkostitwixxi “stedina għax-xiri”, fis-sens tal-leġiżlazzjoni Ġermaniża rilevanti li tittrasponi, b’mod partikolari, l-Artikolu 7(4) tad-Direttiva 2005/29.

18

Issa, skont dik il-qorti, peress li d-deċiżjoni kummerċjali finali tal-konsumatur, jiġifieri dik li jiġi konkluż kuntratt ta’ provvista tal-elettriku, toriġina mill-impenn tal-proċess kuntrattwali, l-indikazzjoni mill-konvenuta fil-kawża prinċipali fil-kundizzjonijiet ġenerali tal-bejgħ tagħha tal-perċentwali użata abbażi tal-kwantità ta’ kumpens applikabbli ma hijiex xierqa sabiex tissodisfa, b’mod partikolari minn perspettiva ratione temporis, l-obbligu ta’ informazzjoni impost fuqha. B’mod partikolari, l-informazzjoni dwar kif jiġi kkalkolat il-prezz iffatturat jeħtieġ li tiġi pprovduta fil-kuntest tal-użu tas-simulatur, filwaqt li jiġi speċifikat il-perċentwal eżatt skont l-ammont ta’ kumpens applikabbli għall-persuna kkonċernata. Għalhekk, l-inklużjoni ta’ dan il-perċentwali fil-kalkolu tal-prezz tal-elettriku tippermetti lill-konsumaturi jqabblu l-offerta tal-konvenuta fil-kawża prinċipali ma’ dik ta’ fornituri oħra.

19

L-imsemmija qorti tqis li jkun hemm lok li tintlaqa’ l-azzjoni għal inġunzjoni mressqa quddiemha mill-Unjoni federali jekk jiġi kkunsidrat li l-informazzjoni li għandha tiġi pprovduta mill-konvenuta fil-kawża prinċipali, skont l-Artikolu 7(1) u (4)(ċ) tad-Direttiva 2005/29, fir-rigward tal-mod kif il-prezz huwa kkalkolat, għandha tintegra l-perċentwali eżatta adottata abbażi tal-ammont ta’ kumpens, b’tali mod li l-persuna kkonċernata, li taf il-konsum tal-elettriku tagħha, tkun tista’ tipproċedi b’mod awtonomu għall-kalkolu ta’ dan il-prezz. Tali interpretazzjoni hija konformi mal-għan ta’ din id-direttiva li hija intiża li tiggarantixxi livell għoli ta’ protezzjoni tal-konsumaturi, u tista’ tiġi dedotta mill-kuntest leġiżlattiv li fih jaqa’ dan l-Artikolu 7(4)(ċ) tad-Direttiva 2005/29.

20

Il-qorti tar-rinviju tqis li l-konsumatur għandu bżonn tali informazzjoni sabiex jieħu deċiżjoni kummerċjali informata, u tqis li l-ommissjoni ta’ din l-informazzjoni importanti tista’ twasslu sabiex jieħu deċiżjoni kummerċjali li kieku ma kienx jieħu f’ċirkustanzi oħra.

21

Barra minn hekk, dik il-qorti ssostni li, minkejja li l-istanza tal-appell ikkunsidrat li l-konvenuta fil-kawża prinċipali ma kinitx f’pożizzjoni li tindika l-informazzjoni dwar il-perċentwali eżatta relatata mal-ammont ta’ kumpens applikabbli fiż-żona ġeografika koperta minn netwerk partikolari, sa fejn l-operaturi ta’ netwerks ta’ distribuzzjoni tal-elettriku rarament jippubblikaw din l-informazzjoni, dik l-istanza, madankollu, ma kkonstatatx l-impossibbiltà għall-konvenuta fil-kawża prinċipali li tikseb l-imsemmija informazzjoni mingħand dawn l-operaturi.

22

Madankollu, l-imsemmija qorti tirrileva li l-espressjoni “il-mod li bih il-prezz hu kalkolat”, li tinsab fl-Artikolu 7(4)(ċ) tad-Direttiva 2005/29, tista’ wkoll tiġi interpretata fis-sens li informazzjoni ġenerali tal-konsumatur dwar l-elementi rilevanti tal-kalkolu tal-prezz tista’ tirriżulta suffiċjenti.

23

Huwa f’dawn iċ-ċirkustanzi li l-Bundesgerichtshof (il-Qorti Federali tal-Ġustizzja) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domanda preliminari li ġejja:

Fuq id‑domanda preliminari

24

Preliminarjament, għandu jiġi rrilevat li mid-deċiżjoni tar-rinviju jsegwi li l-partijiet fil-kawża prinċipali ma jaqblux fir-rigward tal-kwistjoni dwar jekk is-simulatur ta’ tariffi disponibbli fuq is-sit internet tal-fornitur tal-elettriku, li jippermetti lill-konsumatur ikkonċernat jikkalkola l-prezz mensili li għandu jitħallas għall-elettriku użat, b’mod partikolari, għal finijiet ta’ tisħin, għandux jinkludi l-indikazzjoni dwar il-perċentwali eżatta relatata mal-ammont ta’ kumpens applikata mill-fornitur tal-elettriku lil dan il-konsumatur, b’tali mod li dan tal-aħħar, li jaf il-konsum tal-elettriku tiegħu, ikun jista’ jipproċedi b’mod awtonomu għall-kalkolu ta’ dan il-prezz.

25

F’dawn iċ-ċirkustanzi, permezz tad-domanda preliminari tagħha, il-qorti tar-rinviju tistaqsi, essenzjalment, jekk l-Artikolu 7(1) u (4)(ċ) tad-Direttiva 2005/29 għandux jiġi interpretat fis-sens li, fil-kuntest ta’ reklamar fuq l-internet għal offerta ta’ provvista ta’ elettriku, l-informazzjoni relatata mal-mod kif il-prezz huwa kkalkolat għandha tinkludi l-perċentwali eżatta ta’ komponent varjabbli, bħall-ammont ta’ kumpens, applikata mill-fornitur tal-elettriku lill-konsumatur ikkonċernat, b’tali mod li dan tal-aħħar, hekk kif ikun jaf il-konsum tal-elettriku tiegħu, ikun jista’ jipproċedi b’mod awtonomu għall-kalkolu ta’ dan il-prezz.

26

Għandu jitfakkar li hija biss prattika kummerċjali kklassifikata preċedentement bħala “stedina għax-xiri” li hija koperta mill-Artikolu 7(4) tad-Direttiva 2005/29, filwaqt li l-prattiki kummerċjali kollha, inklużi l-istediniet għax-xiri, huma suġġetti għad-dispożizzjonijiet tal‑Artikolu 7(1) sa (3) u (5) ta’ din id-direttiva (sentenza tat‑12 ta’ Mejju 2011, Ving Sverige, C‑122/10, EU:C:2011:299, punt 24).

27

Peress li l-qorti tar-rinviju tqis li r-reklamar għal offerta ta’ provvista ta’ elettriku permezz ta’ simulatur ta’ tariffi mqiegħda għad-dispożizzjoni tal-konsumatur fuq is-sit internet tal-fornitur tal-elettriku jikkostitwixxi “stedina għax-xiri”, fis-sens tal-Artikolu 2(i) tad-Direttiva 2005/29, għandu jiġi rrilevat li din id-dispożizzjoni tiddefinixxi dan il-kunċett bħala “komunikazzjoni kummerċjali li tindika karatteristiċi tal-prodott u l-prezz f’mod adegwat għall-mezzi ta’ komunikazzjoni kummerċjali li ntużaw u li għalhekk tippermetti l-konsumatur jagħmel xirja”.

28

Barra minn hekk, il-Qorti tal-Ġustizzja ppreċiżat li, bħala forma partikolari ta’ reklamar, l-istedina għax-xiri hija suġġetta għal obbligu msaħħaħ ta’ informazzjoni skont l-Artikolu 7(4) tad-Direttiva 2005/29, moqri flimkien mal-premessa 14 ta’ din tal-aħħar (sentenza tat‑12 ta’ Mejju 2011, Ving Sverige, C‑122/10, EU:C:2011:299, punt 28).

29

Għalhekk, kull stedina għax-xiri għandha tinkludi ammont ta’ informazzjoni essenzjali, elenkata fl‑Artikolu 7(4) tad-Direttiva 2005/29, li l-konsumatur għandu bżonn sabiex jieħu deċiżjoni kummerċjali informata. Din l-informazzjoni tinkludi, konformement mal-punt (ċ) ta’ din id-dispożizzjoni, il-prezz inklużi t-taxxi, jew, fejn in-natura tal-prodott tfisser li l-prezz ma jistax jiġi raġonevolment ikkalkolat minn qabel, il-mod li bih il-prezz huwa kkalkolat.

30

Mill-kliem tal-Artikolu 7(4)(ċ) tad-Direttiva 2005/29 jirriżulta, qabelxejn, li għandha ssir distinzjoni bejn l-indikazzjoni tal-prezz finali u dik relatata mal-mod kif dan il-prezz huwa kkalkolat, sussegwentement, li hija n-natura tal-prodott li tiddetermina s-sitwazzjoni li fiha l-imsemmi prezz ma jistax raġonevolment jiġi kkalkolat minn qabel mill-bejjiegħ jew fornitur, u, fl-aħħar nett, li, jekk il-bejjiegħ jew fornitur ma jkunx jista’ jindika dan l-istess prezz, huwa għandu jindika l-modalitajiet li abbażi tagħhom dan huwa kkalkolat jew, fi kliem ieħor, il-metodu ta’ kalkolu tal-prezz finali.

31

Għaldaqstant, meta l-prezz finali tal-provvista tal-elettriku ma jistax raġonevolment jiġi kkalkolat minn qabel, peress li jista’ jiddependi minn ċerti elementi, bħal, pereżempju, spejjeż sostnuti minn fornitur tal-elettriku, iżda li huma indipendenti mir-rieda ta’ dan tal-aħħar u varjabbli jew inkella, bħalma tirrileva l-qorti tar-rinviju, il-kwantità ta’ elettriku effettivament ikkonsmat mill-konsumatur, l-informazzjoni dwar l-applikazzjoni ta’ element bħal perċentwali ta’ żieda abbażi tal-ammont ta’ kumpens, inkluż mill-bejjiegħ jew fornitur fil-prezz finali, taqa’ taħt “il-mod li bih il-prezz hu kalkolat”, fis-sens tal-Artikolu 7(4)(ċ) tad-Direttiva 2005/29 u, bħala tali, tikkostitwixxi informazzjoni sostanzjali li l-konsumatur għandu bżonn sabiex jieħu deċiżjoni kummerċjali informata.

32

Barra minn hekk, konformement mal-Artikolu 7(1) tad-Direttiva 2005/29, stedina għax-xiri, bħar-reklamar inkwistjoni fil-kawża prinċipali, titqies li hija qarrieqa jekk din tħalli barra informazzjoni importanti li l-konsumatur medju għandu bżonn, fid-dawl tal-kuntest, sabiex jieħu deċiżjoni kummerċjali informata u għalhekk twasslu jew tista’ twasslu jieħu deċiżjoni kummerċjali li ma kienx jieħu f’ċirkustanzi oħra.

33

Mill-kunsiderazzjonijiet preċedenti jirriżulta li informazzjoni importanti, bħall-indikazzjoni dwar l-applikazzjoni ta’ perċentwali ta’ żieda skont l-ammont ta’ kumpens, għandha tidher fi stedina għax-xiri bħal dik inkwistjoni fil-kawża prinċipali, meta l-konsumatur medju, fid-dawl tal-kuntest, ikollu bżonnha sabiex jieħu deċiżjoni kummerċjali informata.

34

Għandu jiġi rrilevat li, għall-finijiet tal-interpretazzjoni tad-dispożizzjonijiet tad-Direttiva 2005/29, il‑kunċett ta’ “konsumatur” għandu importanza kbira. Din id-direttiva tinkludi bħala kriterju ta’ evalwazzjoni l-konsumatur medju li huwa normalment informat u raġonevolment attent u kawt, fid-dawl tal-fatturi soċjali, kulturali u lingwistiċi (sentenza tat‑12 ta’ Mejju 2011, Ving Sverige, C‑122/10, EU:C:2011:299, punt 22).

35

Għalhekk, fir-rigward tan-natura qarrieqa ta’ reklamar, il-qrati nazzjonali għandhom jieħdu inkunsiderazzjoni l-perċezzjoni tal-konsumatur medju, normalment informat u raġonevolment attent u avżat (sentenza tat‑12 ta’ Mejju 2011, Ving Sverige, C‑122/10, EU:C:2011:299, punt 23 u l-ġurisprudenza ċċitata).

36

Għandu jingħad ukoll li, bħalma jirriżulta mill-premessa 18 tad-Direttiva 2005/29, il-kunċett ta’ “konsumatur medju” ma huwiex kunċett statistiku u li, sabiex tiġi ddeterminata r-reazzjoni tipika ta’ dan il-konsumatur f’sitwazzjoni partikolari, il-qrati u l-awtoritajiet nazzjonali għandhom jużaw il-ġudizzju rispettiv tagħhom.

37

Dan ingħad, il-formulazzjoni tal-Artikolu 7(4)(ċ) tad-Direttiva 2005/29 ma tippreskrivix lill-bejjiegħ jew fornitur il-mod kif għandu jinforma lill-konsumatur bil-modalitajiet ta’ kalkolu tal-prezz.

38

Barra minn hekk, minħabba n-natura tal-prodott ikkonċernat u, b’mod partikolari, il-kundizzjonijiet ta’ produzzjoni, ta’ provvista jew ukoll ta’ użu finali ta’ dan il-prodott, il-bejjiegħ jew fornitur jista’ ma jkunx f’pożizzjoni li jkollu, minn qabel u b’mod preċiż, il-komponenti kollha tal-prezz finali, b’tali mod li ma jkunx jista’ jikkomunika lill-konsumatur il-metodu ta’ kalkolu ta’ dan il-prezz b’mod li l-persuna kkonċernata tkun tista’ tipproċedi hija stess għal dan il-kalkolu.

39

Għaldaqstant, il-livell ta’ informazzjoni dwar il-mod kif il-prezz huwa kkalkolat ma jistax jimplika li l-konsumatur għandu jkun f’pożizzjoni, abbażi ta’ din l-informazzjoni, li jipproċedi huwa stess għall-kalkolu ta’ dan il-prezz u li b’hekk jasal għal riżultat ta’ numru definittiv.

40

F’dan ir-rigward, għandu jitfakkar li d-Direttiva 2005/29 ma tinkludi ebda rekwiżit preċiż fir-rigward tal-livell u tal-mezz li għandu jkollha informazzjoni importanti (ara, f’dan is-sens, is-sentenza tat‑8 ta’ Frar 2017, Carrefour Hypermarchés, C‑562/15, EU:C:2017:95, punt 37).

41

Għalhekk, informazzjoni dwar il-mod kif il-prezz huwa kkalkolat, fis-sens tal-Artikolu 7(4)(ċ) ta’ din id-direttiva, tista’ tippreżenta ruħha, pereżempju, fil-forma ta’ firxa ta’ perċentwali, jew ta’ perċentwali preċiża iżda kundizzjonali fl-applikazzjoni tagħha, jew inkella ta’ perċentwali stabbilita minn qabel iżda akkumpanjata mill-indikazzjoni li l-livell tagħha jista’ jvarja maż-żmien minħabba elementi varjabbli indipendenti mir-rieda tal-bejjiegħ jew fornitur.

42

Tali interpretazzjoni tal-Artikolu 7(4)(ċ) tad-Direttiva 2005/29 hija kkorroborata mill-eżami tal-istruttura ġenerali tal-Artikolu 7 ta’ din id-direttiva.

43

F’dan ir-rigward, għandu jitfakkar, fl-ewwel lok, li, konformement mal-Artikolu 7(2) tad-Direttiva 2005/29, stedina għax-xiri, bħar-reklamar inkwistjoni fil-kawża prinċipali, tinkludi ommissjoni qarrieqa, b’mod partikolari, meta l-bejjiegħ jew fornitur jaħbi l-informazzjoni dwar il-mod kif il-prezz huwa kkalkolat jew jipprovdiha b’mod mhux ċar, mhux intelliġibbli, ambigwu jew mhux f’waqtu u meta, fi kwalunkwe każ, il-konsumatur medju b’hekk jitwassal jew jista’ jasal sabiex jieħu deċiżjoni kummerċjali li ma kienx jieħu f’ċirkustanzi oħra.

44

Minn dan jirriżulta li l-bejjiegħ jew fornitur għandu jindika l-elementi kollha li jikkostitwixxu l-kalkolu tal-prezz. Bl-istess mod, kull wieħed minn dawn l-elementi għandu jiġi kkomunikat mill-bejjiegħ jew fornitur b’tali mod li l-konsumatur medju jkun f’pożizzjoni li jieħu deċiżjoni kummerċjali b’għarfien sħiħ tal-fatti.

45

Fit-tieni lok, konformement mal-Artikolu 7(1) tad-Direttiva 2005/29, in-natura qarrieqa tal-prattika kummerċjali għandha tiġi evalwata fid-dawl, b’mod partikolari, tal-kuntest fattwali ta’ din il-prattika, tal-karatteristiċi kollha tagħha kif ukoll tal-limiti rispettivi tal-mezz ta’ komunikazzjoni użat. L-Artikolu 7(3) ta’ din id-direttiva jipprevedi, min-naħa tiegħu, li, sabiex jiġi ddeterminat jekk xi informazzjoni tħallietx barra, għandhom jittieħdu inkunsiderazzjoni l-limitazzjonijiet ta’ spazju u ta’ żmien tal-mezz tal-komunikazzjoni użati kif ukoll il-miżuri meħuda mill-bejjiegħ jew fornitur sabiex jagħmel din l-informazzjoni disponibbli għall-konsumaturi permezz ta’ mezzi oħra (ara, f’dan is-sens, is-sentenza tat‑12 ta’ Mejju 2011, Ving Sverige, C‑122/10, EU:C:2011:299, punti 53 u 54).

46

Minn dawn id-dispożizzjonijiet jirriżulta li l-portata tal-informazzjoni dwar il-mod kif il-prezz huwa kkalkolat u li għandha tiġi kkomunikata minn bejjiegħ jew fornitur fil-kuntest ta’ stedina għax-xiri għandha tiġi evalwata skont, b’mod partikolari, il-kuntest fattwali ta’ din l-istedina għax-xiri u l-mezz ta’ komunikazzjoni użat (ara, f’dan is-sens, is-sentenzi tat‑12 ta’ Mejju 2011, Ving Sverige, C‑122/10, EU:C:2011:299, punt 55, u tas‑26 ta’ Ottubru 2016, Canal Digital Danmark, C‑611/14, EU:C:2016:800, punt 27).

47

Il-qorti tar-rinviju tindika li la huwa stabbilit u lanqas manifest li l-mezz ta’ komunikazzjoni użat għall-finijiet tal-prattika kummerċjali kkonċernata, jiġifieri simulatur ta’ tariffi disponibbli fuq is-sit internet tal-konvenuta fil-kawża prinċipali, jimponi limitazzjonijiet ta’ spazju jew ta’ ħin.

48

Madankollu, sabiex tiġi ddeterminata l-portata tal-informazzjoni li l-bejjiegħ jew fornitur għandu jikkomunika dwar il-metodu ta’ kalkolu tal-prezz, il-qorti tar-rinviju għandha tieħu inkunsiderazzjoni l-kuntest fattwali li fih jidħol ir-reklamar inkwistjoni fil-kawża prinċipali.

49

F’dan ir-rigward, minn naħa, il-konvenuta fil-kawża prinċipali ssostni, aspett li ma huwiex il-kompitu tal-Qorti tal-Ġustizzja li tivverifika, li hija ma hijiex raġonevolment f’pożizzjoni li tindika, fir-reklamar tagħha, il-perċentwali eżatta relatata mal-ammont ta’ kumpens. Hija tallega għalhekk li l-operaturi tan-netwerks ta’ distribuzzjoni tal-elettriku stabbiliti fit-territorju Ġermaniż iżommu, xi drabi, perċentwali differenti u varjabbli maż-żmien, b’tali mod li, jekk hija kellha tindika f’ħin reali lill-konsumaturi l-ammont eżatt ta’ tali perċentwali, hija jkollha tistaqsi ta’ kuljum lil dawn l-operaturi kollha dwar kull modifika eventwali ta’ dan l-element. Issa, tali mod ta’ kif wieħed jipproċedi jkun juża, skont il-konvenuta fil-kawża prinċipali, riżorsi sproporzjonati.

50

Min-naħa l-oħra, mid-deċiżjoni tar-rinviju jsegwi li r-reklamar li juri l-proposti tariffarji ġġenerati mis-simulatur tat-tariffi jinkludi ħolqa għall-kundizzjonijiet ġenerali ta’ bejgħ applikati mill-konvenuta fil-kawża prinċipali. F’dan id-dokument, din tal-aħħar tindika lill-konsumatur li huwa l-operatur tan-netwerk lokali li jiddetermina l-parti tal-ħin ta’ bil-lejl li tikkorrispondi għall-applikazzjoni tat-tariffa mnaqqsa kif ukoll il-perċentwali miżmum skont l-ammont ta’ kumpens u li dan tal-aħħar ġie ffissat għal 25 % mill-operatur tan-netwerk lokali għaż-żona ġeografika li fiha jinsab l-uffiċċju rreġistrat tiegħu.

51

Mill-kunsiderazzjonijiet preċedenti jirriżulta li, fil-kuntest fattwali tal-istedina għax-xiri inkwistjoni fil-kawża prinċipali, ma jistax jitqies, bla ħsara għall-verifiki li għandha twettaq il-qorti tar-rinviju, li din l-istedina tinkludi “ommissjoni qarrieqa” fis-sens tal-Artikolu 7(1) u (4) tad-Direttiva 2005/29, sakemm il-ħolqa għall-kundizzjonijiet ġenerali ta’ bejgħ, li fihom jinsabu indikazzjonijiet dwar il-perċentwali adottata skont il-kwantità ta’ kumpens, tintwera b’mod viżibbli u li l-aċċettazzjoni tal-offerta mill-konsumatur tkun suġġetta teknikament għall-konferma mogħtija minnu tal-għarfien ta’ dawn il-kundizzjonijiet, li jippermetti li jiġi ggarantit li dan il-konsumatur jieħu d-deċiżjoni kummerċjali tiegħu b’għarfien sħiħ tal-fatti.

52

Fid-dawl tal-kunsiderazzjonijiet preċedenti kollha, ir-risposta għad-domanda magħmula għandha tkun li l-Artikolu 7(1) u (4)(ċ) tad-Direttiva 2005/29 għandu jiġi interpretat fis-sens li, fil-każ ta’ stedina għax-xiri mwettqa permezz ta’ komunikazzjoni kummerċjali online, l-informazzjoni relatata mal-mod kif il-prezz huwa kkalkolat ma għandhiex neċessarjament tinkludi l-perċentwali eżatta ta’ komponent varjabbli bħall-ammont ta’ kumpens applikat mill-fornitur tal-elettriku lill-konsumatur ikkonċernat, b’tali mod li dan tal-aħħar, hekk kif ikun jaf il-konsum tal-elettriku tiegħu, ikun jista’ jipproċedi b’mod awtonomu għall-kalkolu ta’ dan il-prezz, sakemm din il-komunikazzjoni tindika l-applikabbiltà bħala prinċipju ta’ tali perċentwali, flimkien mal-ammont possibbli tagħha u ta’ elementi li għandhom effett fuqu, u b’hekk tippermetti lill-konsumatur medju jieħu d-deċiżjoni kummerċjali tiegħu b’għarfien sħiħ tal-fatti.

Fuq l‑ispejjeż

53

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.