31.3.2011   

MT

Il-Ġurnal Uffiċjali tal-Unjoni Ewropea

C 99/9


KOMUNIKAZZJONI MILL-KUMMISSJONI

Dokument ta' gwida dwar l-applikazzjoni mhux obbligatorja tal-Artikolu 10c tad-Direttiva Nru 2003/87/KE

2011/C 99/03

1.   INTRODUZZJONI

(1)

L-Artikolu 10c tad-Direttiva Nru 2003/87/KE tal-Parlament Ewropew u tal-Kunsill tat-13 ta' Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva 96/61/KE (1) jippermetti lill-Istati Membri li s-sistemi tal-elettriku tagħhom jissodisfaw ċerti kriterji biex jipprovdu allokazzjoni tranżizzjonali ta' kwoti gratis ta' emissjonijiet għall-installazzjonijiet tal-produzzjoni tal-elettriku. Il-kriterji huma relatati mal-ħtieġa li s-sistema tal-enerġija tiġi mmodernizzata, u l-Istati Membri li jiddeċiedu jużaw din l-alternattiva għandhom, b'mod parallel, jieħdu azzjoni li tkun immirata lejn is-sikurezza tal-investimenti fis-sistema tal-enerġija, bħal aġġornamenti tal-infrastruttura, teknoloġiji ġodda eċċ., ta' ammont li jikkorrispondi għall-valur tal-allokazzjonijiet gratis tal-emissjonijiet korrispondenti.

(2)

Għandu jiġi enfasizzat li l-Istati Membri li jissodisfaw il-kriterji mhumiex mitluba jużaw l-alternattiva, u jistgħu jagħżlu li ma jagħmlux dan fid-dawl tad-dħul mill-irkant li se jkunu qed jitilfu billi jagħmlu hekk. Madankollu, dawk li japplikaw l-alternattiva għandhom ikunu konformi mad-dispożizzjonijiet tal-Artikolu 10c tad-Direttiva 2003/87/KE.

(3)

Huwa importanti li jkun hemm sistema armonizzata ta' skambjar tal-emissjonijiet għall-aqwa sfruttar tal-benefiċċji tal-iskambjar tal-emissjonijiet u sabiex ikunu evitati distorsjonjiet tal-kompetizzjoni fis-suq intern. Fir-rigward ta' dan, id-Direttiva Nru 2003/87/KE tistabbilixxi l-irkant bħala l-prinċipju bażiku għall-allokazzjoni tal-kwoti tal-emissjonijiet, hekk kif inhi l-iktar waħda sistema sempliċi, u b'mod ġenerali hija meqjusa bħala l-iktar waħda ekonomikament effiċjenti. L-irkant jipprovdi wkoll kundizzjonijiet indaqs għall-kompetizzjoni fis-suq intern tal-elettriku sabiex ikompli jiżviluppa.

(4)

Barra minn hekk, id-Direttiva Nru 2003/87/KE tistipula espliċitament li l-irkantar sħiħ għandu jkun ir-regola mill-2013 'il quddiem għas-settur tal-elettriku, meta wieħed iqis il-ħila tas-settur li jgħaddi l-kost tal-għażla ta' CO2 lill-konsumaturi bħala prezz tal-elettriku u għalhekk jiġġenera profitti addizzjonali (“profitti żejda”). L-irkant se jelimina dawn il-profitti żejda.

(5)

L-Artikolu 10c tad-Direttiva Nru 2003/87/KE fih dispożizzjonijiet li jidderogaw minn għadd ta' prinċipji fundamentali tad-Direttiva Nru 2003/87/KE, b'mod partikolari, l-approċċ armonizzat bis-sħiħ lejn l-allokazzjoni, l-introduzzjoni tal-irkant bħala metodu ta' allokazzjoni awtomatika u l-esklużjoni espliċita ta' allokazzjoni gratis ta' kwoti ta' emissjonijiet fir-rigward tal-produzzjoni tal-elettriku. Il-mira ta' dawn il-prinċipji u r-regoli hi li jkun żgurat l-ogħla grad possibli ta' effiċjenza ekonomika fl-iskema. Skont dan, l-implimentazzjoni tal-Artikolu 10c m'għandhiex taffettwa ħażin dawn ir-regoli ġenerali u l-għanijiet tad-Direttiva Nru 2003/87/KE.

(6)

F'dan l-isfond u meta wieħed iżomm f'moħħu t-tħassib ta' bosta Stati Membri fir-rigward tad-distorsjonijiet potenzjali tal-kompetizzjoni li joħorġu mill-applikazzjoni tal-Artikolu 10c tad-Direttiva Nru 2003/87/KE, il-Kummissjoni tqis li hu neċessarju li tingħata gwida dwar l-implimentazzjoni tal-Artikolu 10c għar-raġunijiet li ġejjin:

—

Id-Direttiva titlob lill-Kummissjoni tivvaluta applikazzjonijiet individwali li jibagħtu l-Istati Membri li jixtiequ japplikaw l-Artikolu 10c tad-Direttiva Nru 2003/87/KE. Billi wieħed jadotta dan id-dokument ta' gwida, il-Kummissjoni tistipula qafas trasparenti għall-valutazzjoni tagħha.

—

L-Artikolu 10c tad-Direttiva Nru 2003/87/KE jirrappreżenta eżenzjoni mill-prinċipji fundamentali tad-Direttiva Nru 2003/87/KE. Għandu jkun żgurat li din l-eżenzjoni tiġi interpretata u applikata b'tali mod li ma taffettwax b'mod ħażin l-għanijiet kumplessivi li d-Direttiva tistipula.

—

Filwaqt li l-Artikolu 10c(3) tad-Direttiva Nru 2003/87/KE jitlob lill-Kummissjoni tagħti gwida “sabiex jiġi żgurat li l-metodoloġija tal-allokazzjoni tevita distorsjonijiet bla bżonn tal-kompetizzjoni u kemm jista' jkun timminimizza l-impatti negattivi fuq l-inċentivi biex jitnaqqsu l-emissjonijiet” permezz ta' proċedura ta' komitoloġija, elementi oħra marbuta mal-metodoloġija ta' allokazzjoni, bħall-ammont massimu ta' kwoti gratis ta' emissjonijiet kif imfissra mill-Artikolu 10c(2), wkoll jeħtieġ li jkun hemm fehim komuni dwarhom.

—

L-ambitu tal-Artikolu 10c tad-Direttiva Nru 2003/87/KE jikkonċerna biss is-settur tal-ġenerazzjoni tal-elettriku. Għal din ir-raġuni, hu neċessarju li jinkiseb ukoll fehim komuni fir-rigward ta' liema installazzjonijiet huma eliġibbli li jirċievu kwoti gratis ta' emissjonijiet skont din id-dispożizzjoni.

—

Għadd ta' termini tekniċi introdotti fl-Artikolu 10c tad-Direttiva Nru 2003/87/KE (eżempju konsum nazzjonali gross finali, valur kummerċjali tal-kwoti gratis tal-emissjonijiet) ma ġewx definiti f'dik id-Direttiva. Sabiex wieħed jiżgura li jkun hemm applikazzjonijiet konsistenti ta' dawn id-dispożizzjonijiet bejn l-Istati Membri li jistgħu japplikaw l-Artikolu 10c, huwa neċessarju li jkun hemm gwida ċara.

—

Xi dispożizzjonijiet tal-Artikolu 10c tad-Direttiva Nru 2003/87/KE jirriżultaw fi grad ta' diskrezzjoni għall-Istati Membri matul l-implimentazzjoni tagħhom. Dan, b'mod partikolari, japplika għall-pjan nazzjonali ta' kull Stat Membru u l-investimenti relatati ma' dan. Dispożizzjonijiet oħra jintroduċu elementi ġodda għad-Direttiva Nru 2003/87/KE li għandhom bżonn ikunu rikonċiljati mal-approċċ imsejjes fuq is-suq tal-iskema. L-implimentazzjoni tal-Artikolu 10c ma għandhiex tmur kontra l-għanijiet tad-Direttiva Nru 2003/87/KE, u lanqas ma timmina l-kundizzjonijiet indaqs fis-suq intern tal-Unjoni.

2.   L-GĦADD MASSIMU TA' KWOTI TRANŻIZZJONALI ALLOKATI GRATIS FIL-LIVELL TA' STAT MEMBRU

2.1.   Determinazzjoni ta' għadd massimu

(7)

L-Artikolu 10c(2) tad-Direttiva Nru 2003/87/KE jiddetermina l-għadd massimu ta' allokazzjoni gratis ta' kwoti ta' emissjonijiet li jistgħu jiġu allokati lill-installazzjonijiet eliġibbli fi Stati Membri eliġibbli fl-2013. Skont din id-dispożizzjoni, dan l-għadd għandu jonqos fis-snin li ġejjin u jirriżulta f'allokazzjonijiet mhux gratis ta' kwoti ta' emissjonijiet fl-2020.

(8)

Meta tiġi vvalutata applikazzjoni skont l-Artikolu 10c(6), il-Kummissjoni se tanalizza jekk l-għadd massimu ta' kwoti tal-emissjonijiet li huma disponibbli gratis skont l-Artikolu 10c tad-Direttiva Nru 2003/87/KE fl-2013 fi Stat Membru partikolari jaqbiżx l-għadd li joħroġ mill-kalkolu stipulat fl-Anness I, li hu msejjes fuq l-Artikolu 10c(2).

2.2.   Tnaqqis gradwali ta' allokazzjonijiet gratis

(9)

L-Artikolu 10c(2) tad-Direttiva Nru 2003/87/KE jistipula b'mod ċar li “l-allokazzjoni tranżitorja [tranżizzjonali] totali ta' kwoti gratis … għandhom jonqsu gradwalment wara dan, sabiex ma jkunx hemm kwoti gratis fl-2020.” Għal din ir-raġuni, huwa mandatorju li jkun hemm mogħdija gradwali li tkun kredibbli u konvinċenti mill-punt tat-tluq ta' allokazzjoni gratis ta' kwoti ta' emissjonijiet fl-2013 sal-aħħar punt ta' allokazzjoni gratis ta' kwoti ta' emissjonijiet fl-2020.

(10)

Fid-dawl tal-mandat legali sabiex tispiċċa gradwalment l-allokazzjoni gratis tal-kwoti tal-emissjonijiet minn livell massimu ta' 70 % għal 0 % f'perjodu ta' mhux iktar minn seba' snin, mogħdija gradwali li tkun kredibbli u konvinċenti lejn l-ebda allokazzjoni gratis ta' kwoti tal-emissjonijiet fl-2020 tinkludi xejra 'l isfel ċara li hi riflessa fil-passi interim bejn 70 % u 0 %.

(11)

Meta tivvaluta applikazzjoni mibgħuta skont l-Artikolu 10c(5) tad-Direttiva Nru 2003/87/KE, il-Kummissjoni se tanalizza jekk l-Istati Membri iwettqux tranżizzjoni gradwali li tkun kredibbli u konvinċenti għal irkantar bis-sħiħ. It-treġġigħ lura eċċessiv tat-tnaqqis jirriżulta f'għadd ogħla ta' kwoti gratis kumplessivi ta' emissjonijiet allokati matul il-perjodu kollu bejn l-2013 u l-2020, u konsegwentament ikollu l-effett li jikkawża distorsjoniijet ta' kompetizzjoni bla bżonn fis-suq tal-Unjoni. Dan mhuwiex kompatibbli mal-Artikolu 10c(5) tad-Direttiva. Il-Kummissjoni tqis li l-Istati Membri għandhom xi tip ta' diskrezzjoni biex ifasslu mogħdija xierqa ta' tnaqqis. Il-Kummissjoni tqis li l-kundizzjoni ta' tnaqqis gradwali tkun sodisfatta u li l-kompetizzjoni ma għandhiex tiġi distorta meta Stat Membru jkun pprovda għal mogħdija lineari ta' tnaqqis jew għal mogħdija ta' tnaqqis nonlineari li fiha t-tnaqqis tal-kwoti tal-emissjonijiet allokati gratis bejn kwalunkwe sentejn konsekuttivi fil-perjodu ta' bejn l-2013 u l-2020 ivarja b'mhux iktar minn 50 % mill-medja tat-tnaqqis annwali li hu neċessarju fis-snin li fadal sabiex tintlaħaq iċ-ċifra ta' 0 % fl-2020.

3.   STALLAZZJONIJIET ELIĠIBBLI

3.1.   Data ta’ skadenza

(12)

Sabiex ikunu eliġibbli u jibbenefikaw minn allokazzjoni gratis ta' allokazzjoni ta' emissjonijiet għall-produzzjoni tal-elettriku, l-installazzjonijiet kellhom jibdew joperaw mill-31 ta' Diċembru 2008. Fl-applikazzjoni tagħhom skont l-Artikolu 10c(5) tad-Direttiva Nru 2003/87/KE, l-Istati Membri għandhom juru li l-installazzjonijiet fit-territorju rispettiv tagħhom meqjusa bħala eliġibbli għal allokazzjoni tranżizzjonali gratis ta' kwoti ta' emissjonijiet skont l-Artikolu 10c tad-Direttiva Nru 2003/87/KE jissodisfaw il-kundizzjonijiet billi jindikaw l-emissjonijiet verifikati ta' dawn l-installazzjonijiet għall-perjodu ta' bejn l-2008 u l-2010 inkluż in-numru tal-permess u d-detentur tal-kont tal-installazzjoni kkonċernata, kif reġistrata fis-CITL. Din l-informazzjoni għandha sservi wkoll bħala prova li l-installazzjoni għadha attiva u sadanittant ma waqqfitx l-operat tagħha.

(13)

Min-naħa l-oħra, l-installazzjonijiet jistgħu jkunu eliġibbli wkoll għal allokazzjoni tranżizzjonali gratis ta' kwoti ta' emissjonijiet skont l-Artikolu 10c tad-Direttiva Nru 2003/87/KE jekk il-proċess ta' investiment rilevanti kien “inizjat fiżikament” sal-31 ta' Diċembru 2008.

(14)

Dan jimplika li d-deċiżjonijiet rilevanti għall-bini ta' impjant ġdid tal-elettriku kellhom jittieħdu mingħajr ma jiġu affettwati mill-prospett li jirċievu kwoti gratis tal-emissjonijiet għall-impjant il-ġdid.

(15)

Fid-dawl tal-kunsiderazzjonijiet imsemmijin hawn fuq, għandu jitqies proċess ta' investiment li ġie inizjat fiżikament mhux iktar tard mill-31 ta' Diċembru 2008 jekk ikun jista' jintwera li d-deċiżjoni tal-investiment ma kinitx influwenzata mill-alternattiva li tintlaqa' allokazzjoni gratis ta' kwoti ta' emissjonijiet. Għalhekk, l-Istati Membri jistgħu jagħtu evidenza sostanzjata li:

—

Xogħol ta' kostruzzjoni fiżikament inbeda u kien viżibbli sal-31 ta' Diċembru 2008; jew li

—

ġie ffirmat kuntratt għall-kostruzzjoni tal-impjant tal-elettriku in kwistjoni qabel il-31 ta' Diċembru 2008 bejn investitur (normalment l-operatur tal-impjant) u kumpanija responsabbli mix-xogħol ta' kostruzzjoni.

Il-Kummissjoni tifhem li, f'dan il-kuntest, ix-xogħol ta' kostruzzjoni li fiżikament diġà nbeda jista' jinkludi wkoll xogħol preparatorju għall-kostruzzjoni tal-impjant inkwistjoni, imma dan dejjem għandu jsir abbażi ta' approvazzjoni espliċita, jekk ikun neċessarju, tal-awtorità nazzjonali rilevanti. L-Istati Membri għandhom jibagħtu dokument ta' awtorizzazzjoni rilevanti, li għandu jkollu status legali sostantiv maħruġ skont il-liġi nazzjonali jew tal-Unjoni. Fin-nuqqas ta' rekwiżit għal approvazzjoni espliċita għal xogħol preparatorju, evidenza oħra tista' tkun neċessarja sabiex jiġi stabbilit li x-xogħol ta' kostruzzjoni jkun diġà nbeda fiżikament.

Il-lista ta' hawn fuq ma għandhiex titqies eżawrjenti, minħabba li l-Istati Membri jista' jkollhom mezzi oħra sabiex jipprovdu evidenza permezz ta' dokumenti li t-teħid ta' ċerta deċiżjoni dwar l-investiment ma kienx influwenzat mill-alternattiva li wieħed jirċievi allokazzjoni gratis ta' kwoti tal-emissjonijiet.

(16)

Meta ssir valutazzjoni skont l-Artikolu 10c(6) tad-Direttiva Nru 2003/87/KE, il-Kummissjoni se titlob evidenza ċara u sostanzjata li dawn il-kundizzjonijiet ikunu ġew ssodisfati. Fl-applikazzjoni tagħhom skont l-Artikolu 10c(5) tad-Direttiva Nru 2003/87/KE, l-Istati Membri għandhom jibagħtu l-informazzjoni kollha rilevanti f'dan ir-rigward. Inkella, il-Kummissjoni se tirrifjuta l-lista ta' installazzjonijiet koperti mill-applikazzjoni.

3.2.   Stallazzjoniijiet għall-produzzjoni tal-elettriku

(17)

Skont l-Artikolu 10c(1) tad-Direttiva Nru 2003/87/KE, l-Istati Membri għandhom jallokaw gratis il-kwoti tal-emissjonijiet b'mod tranżizzjonali lill-installazzjonijiet għall-produzzjoni tal-elettriku. M'hemmx definizzjoni tal-frażi “stallazzjonijiet għall-produzzjoni tal-elettriku” fid-Direttiva Nru 2003/87/KE. Bħala eċċezzjoni mir-regola ġenerali tad-Direttiva Nru 2003/87/KE li l-ebda kwota tal-emissjonijiet ma għandha tiġi allokata gratis fir-rigward tal-produzzjoni tal-elettriku, il-frażi għandha tiġi interpretata b'tali mod li ma għandhiex taffettwa ħażin l-għanijiet tad-Direttiva.

(18)

Dan it-tip ta' approċċ hu appoġġat mill-fatt li jeħtieġ li jitnaqqsu l-impatti negattivi li joħorġu mill-implimentazzjoni tal-Artikolu 10c tad-Direttiva Nru 2003/87/KE milli jiġi affettwat is-settur industrijali tal-Istat Membru konċernat u s-suq madwar l-Unjoni.

(19)

B'ħarsa lejn definizzjoni tal-ambitu tat-terminu “stallazzjonijiet għall-produzzjoni tal-elettriku”, qed issir referenza għal “ġeneratur tal-elettriku” kif imfisser fl-Artikolu 3(u) tad-Direttiva Nru 2003/87/KE u kif inhu msemmi wkoll fl-Artikolu 10c(2) ta' din id-Direttiva. Skont dan il-kunċett, l-installazzjonijiet kollha li jipproduċu esklussivament l-elettriku jew installazzjonijiet li jipproduċu l-elettriku u s-sħana huma koperti (2). Madankollu, l-installazzjonijiet li jwettqu attività oħra elenkata fl-Anness I għad-Direttiva Nru 2003/87/KE flimkien mal-kombustjoni tal-fjuwils, jiġifieri l-produzzjoni tal-elettriku u/jew tas-sħana, mhumiex inklużi f'din id-definizzjoni.

(20)

Fid-dawl tal-kunsiderazzjonijiet imsemmijin hawn fuq, il-Kummissjoni tqis bħala eliġibbli għal allokazzjoni gratis tal-kwoti tal-emissjonijiet skont l-Artikolu 10c(1) tad-Direttiva Nru 2003/87/KE:

(a)

Installazzjonijiet li jikkwalifikaw bħala ġeneratur tal-elettriku skont l-Artikolu 3(u) tad-Direttiva Nru 2003/87/KE u,

(b)

fil-każ ta' installazzjonijiet li jipproduċu l-elettriku u s-sħana, qed jitqiesu biss l-installazzjoniijiet li għalihom l-emissjonijiet rilevanti jistgħu jiġu attribwiti għall-produzzjoni tal-elettriku.

(21)

Fil-valutazzjoni tagħha skont l-Artikolu 10c(6) tad-Direttiva Nru 2003/87/KE, il-Kummissjoni se tivverifika jekk tkunx ingħatat l-evidenza li hi neċessarja biex tiżgura l-konformità mal-kriterji msemmija hawn fuq.

(22)

Sabiex ikunu determinati emissjonijiet li jistgħu jkunu attribwiti għall-elettriku għall-installazzjonijiet li jipproduċu kemm elettriku u kemm sħana, l-Istati Membri għandhom jiżguraw kompatibbiltà mal-miżuri ta' implimentazzjoni skont l-Artikolu 10a, u b'mod partikolari l-Artikolu 10a(4) tad-Direttiva Nru 2003/87/KE u għandhom jagħmlu referenza għall-metodoloġija tal-allokazzjoni skont l-Artikolu 10c(3) tad-Direttiva Nru 2003/87/KE.

4.   REKWIŻITI GĦALL-PJAN NAZZJONALI

4.1.   Prinċipji għall-Pjan Nazzjonali

(23)

Skont l-Artikolu 10c(1) tad-Direttiva Nru 2003/87/KE, l-Istati Membri kkonċernati għandhom jibagħtu pjan nazzjonali għall-investimenti lill-Kummissjoni. Il-Kummissjoni tirrakkomanda li l-pjan nazzjonali għandu jkun imsejjes fuq għadd ta' prinċipji komuni mfasslin b'tali mod li jiżguraw bl-aqwa mod possibbli implimentazzjoni ġusta u konsistenti tal-miri li joħorġu mid-Direttiva Nru 2003/87/KE b'mod ġenerali, u b'mod partikolari mill-Artikolu 10c.

Prinċpju 1: Il-pjan nazzjonali għandu jidentifika investimenti, li jikkontribwixxu b'mod dirett jew indirett (investimenti fin-netwerks u servizzi anċillari) biex inaqqsu l-emissjonijiet tal-gassijiet b'effett serra b'mod kost-effikaċi.

Prinċipju 2: L-investimenti identifikati fil-pjan nazzjonali għandhom ikunu mfasslin b'mod li fil-ġejjieni jeliminaw, safejn possibbli s-sitwazzjonijiet msemmijin fl-Artikolu 10c(1), (a) (3) u (b) (4) u l-ewwel kundizzjoni fil-punt (c) (5) tad-Direttiva Nru 2003/87/KE.

Prinċipju 3: L-investimenti għandhom ikunu kompatibbli bejniethom u ma' leġiżlazzjoni oħra rilevanti tal-Unjoni. Ma għandhomx jirrinforzaw il-pożizzjonijiet dominanti tagħhom u lanqas ma jgħawġu il-kompetizzjoni u l-kummerċ fis-suq intern u, fejn possibbli, isaħħu l-kompetizzjoni fis-suq intern tal-elettriku.

Prinċipju 4: L-investimenti identifikati fil-pjan nazzjonali għandhom jiżdiedu mal-investimenti li l-Istati Membri għandhom jagħmlu sabiex ikunu konformi mal-miri l-oħra jew ir-rekwiżiti legali li joħorġu mil-liġi tal-Unjoni. Ma għandhomx jikkonċernaw ukoll l-investimenti, li jkunu meħtieġa jaqblu mal-provvista u d-domanda tal-elettriku li iktar ma tmur dejjem tiżdied.

Prinċipju 5: L-investimenti identifikati fil-pjan nazzjonali għandhom jikkontribwixxu għad-diversifikazzjoni, u jnaqqsu l-intensità tal-karbonju, tat-taħlita tal-elettriku u s-sorsi tal-provvista tal-enerġija għall-produzzjoni tal-elettriku.

Prinċipju 6: L-investimenti għandhom ikunu ekonomikament vijabbli fin-nuqqas tal-allokazzjoni gratis tal-kwoti tal-emissjonijiet skont l-Artikolu 10c tad-Direttiva Nru 2003/87/KE, ladarba tispiċċa l-allokazzjoni tranżizzjonali ta' dawn il-kwoti, bl-eċċezzjoni tat-teknoloġiji speċifiċi definiti minn qabel li joħorġu u li jkunu għadhom fl-istadju ta' demostrazzjoni u elenkati fl-Anness III.

(24)

L-investimenti identifikati fil-pjan nazzjonali għandhom, safejn possibbli, jikkonformaw ma' dawn il-prinċipji. Meta l-konformità mal-prinċipji kollha ma tkunx tista' tiġi żgurata għal ċertu investiment, l-Istat Membru kkonċernat għandu jagħti raġunijiet dettaljati li jkunu wasslu għal dan. Fi kwalunkwe każ, dawn l-investimenti ma għandhomx ikunu kontra dawn il-prinċipji jew inkella jdgħajfu l-miri tagħhom. Bl-istess mod, l-investimenti ma jistgħux inaqqsu l-importanza tal-miri stipulati fit-Trattati jew f'leġiżlazzjoni oħra rilevanti tal-Unjoni.

(25)

Meta tivvaluta l-applikazzjoni mibgħuta skont l-Artikolu 10c(5) tad-Direttiva Nru 2003/87/KE, il-Kummissjoni se tanalizza safejn hu possibbli l-investimenti identifikati li jikkonformaw ma' dawn il-prinċipji. Jekk l-informazzjoni mogħtija mill-Istati Membri fl-applikazzjoni tagħhom skont l-Artikolu 10c(5) tad-Direttiva Nru 2003/87/KE ma tkunx biżżejjed dettaljata sabiex il-Kummissjoni tkun tista' twettaq valutazzjoni komprensiva li tippermetti konklużjoni msejsa sew, il-Kummissjoni tista' titlob informazzjoni addizzjonali. Jekk din l-informazzjoni addizzjonali ma tistax tingħata fil-ħin, il-Kummissjoni tirrifjuta l-partijiet korrispondenti tal-pjan nazzjonali. Il-Kummissjoni tista' tqis ukoll informazzjoni u opinjonijiet minn sorsi oħra sabiex ittejjeb il-valutazzjoni tal-applikazzjoni.

(26)

Abbażi tad-dispożizzjonijiet tad-Direttiva Nru 2001/42/KE tal-Parlament Ewropew u tal-Kunsill tas-27 ta' Ġunju 2001 dwar l-istima tal-effetti ta' ċerti pjanijiet u programmi fuq l-ambjent (6), l-Istati Membri għandhom jivverifikaw jekk hijiex tintalab valutazzjoni ambjentali tal-pjan nazzjonali.

(27)

Il-Kummissjoni se tkompli tinnota li l-allokazzjoni gratis tal-kwoti tal-emissjonijiet għall-ġeneraturi tal-elettriku u l-finanzjament tal-investimenti korrispondenti mitluba mill-Artikolu 10c tad-Direttiva Nru 2003/87/KE se jinvolvu prinċiparjament l-għajnuna mill-Istat fit-tifsira tal-Artikolu 107(1) tat-TFUE. Skont l-Artikolu 108(3) tat-TFUE, l-Istati Membri għandhom jinnotifikaw lill-Kummissjoni bil-miżuri li jinvolvu l-għajnuna mill-Istat. Wara n-notifika, l-Istati Membri jistgħu ma jdaħħlux miżuri proposti fis-seħħ sakemm din il-proċedura tkun wasslet għal deċiżjoni finali mill-Kummissjoni. Fil-ġejjieni qrib, il-Kummissjoni biħsiebha tadotta kriterji ta' kompatibbiltà għall-valutazzjoni ta' din it-tip ta' għajnuna. Applikazzjoni skont l-Artikolu 10c(5) tad-Direttiva Nru 2003/87/KE, u xi deċiżjoni konsegwenti mill-Kummissjoni, hija kollha kemm hi mingħajr preġudizzju għall-obbligi ta' notifika dwar l-għajnuna mill-Istat tal-Istati Membri skont l-Artikolu 108 tat-TFUE, u l-Istati Membri għandhom iħejju għal kwalunkwe notifika dwar l-għajnuna mill-Istat kif xieraq. Meta ssir il-valutazzjoni tal-allokazzjoni gratis tal-kwoti u tal-pjanijiet nazzjonali skont l-Artikolu 107(3) tat-TFUE, il-Kummissjoni tiżgura li tal-aħħar ma twassalx għal distorsjoni bla bżonn tal-kompetizzjoni, filwaqt li titqies il-mira tal-interess komuni stipulat fl-Artikolu 10c tad-Direttiva Nru 2003/87/KE. B'mod partikolari, meta l-pjan nazzjonali jibbaża l-għajnuna fuq għadd limitat ta' benefiċjarji jew meta l-għajnuna għandha mnejn tirrinforza l-pożizzjoni fis-suq tal-benefiċjarji, l-Istati Membri għandhom juru li l-għajnuna mhux se tgħawweġ il-kompetizzjoni lil hinn minn dak li hu strettament neċessarju fid-dawl tal-miri kumplessivi ta' din id-Direttiva.

4.2.   Investimenti eliġibbli

(28)

Fid-dawl tat-titlu u l-kuntest kumplessiv tal-Artikolu 10c tad-Direttiva Nru 2003/87/KE, l-investimenti eliġibbli li jinsabu taħt din id-dispożizzjoni jikkonċernaw is-settur tal-elettriku u għandhom jitwettqu mill-25 ta' Ġunju 2009 lil hinn. Madankollu, għall-prinċipju, l-investimenti f'setturi oħra tal-enerġija mhumiex esklużi, dejjem jekk jibbenefikaw minn ġustifikazzjoni b'saħħitha abbażi tal-Artikolu 10c tad-Direttiva Nru 2003/87/KE.

(29)

L-Istati Membri jinsabu f'pożizzjoni tajba li jiddeċiedu liema investimenti jikkontribwixxu bl-aqwa mod għall-modernizzazzjoni tas-settur tal-ġenerazzjoni tal-elettriku, u li huma responsabbli għall-identifikazzjoni tal-investimenti li jikkonformaw mar-rekwiżiti stipulati fid-Direttiva. Għandhom jikkoordinaw ukoll ir-rappurtar dwar l-implimentazzjoni tal-investimenti li jsiru skont l-Artikolu 10c tad-Direttiva Nru 2003/87/KE fil-livell nazzjonali (7).

(30)

Fil-pjanijiet nazzjonali, l-Istati Membri għandhom jiffissaw lista ta' installazzjonijiet li jwettqu l-investimenti identifikati fil-pjan nazzjonali u jispeċifikaw il-lista ta' investimenti skedati li għandhom joħorġu mill-allokazzjoni gratis tal-kwoti tal-emissjonijiet. Għandhom jispeċifikaw ukoll sa liema punt se jiġu ffinanzjati mid-dħul tal-allokazzjoni gratis tal-kwoti tal-emissjonijiet u f'liema sena se jdur iċ-ċiklu tal-investiment.

(31)

L-investimenti ffinanzjati mid-dħul tal-allokazzjoni gratis tal-kwoti tal-emissjonijiet skont l-Artikolu 10c tad-Direttiva Nru 2003/87/KE jistgħu jkunu supplimentari għall-investimenti li huma parzjalment iffinanzjati minn sorsi oħra tal-Unjoni (eż. fondi li jsiru disponbbli mir-riżerva tal-entrati l-ġodda skont l-Artikolu 10a(8) tad-Direttiva Nru 2003/87/KE, il-fondi reġjonali, in-Netwerk TEN-E, il-Programm Ewropew ta' Rkupru Ekonomiku, il-Programm Ewropew tal-Enerġija għall-Irkupru, il-Pjan SET, eċċ) jekk ikunu konformi mar-rekwiżiti stipulati f'dan id-dokument u jekk ikunu kompatibbli ma' dawk l-istrumenti jew is-sorsi. F'dawn il-każijiet, madankollu, il-parti biss tal-investiment li tibbenefika mill-fondi li jakkumulaw minn allokazzjoni gratis tal-kwoti tal-emissjonijiet skont l-Artikolu 10c tad-Direttiva Nru 2003/87/KE hija rilevanti għall-finijiet tal-Artikolu 10c tad-Direttiva dejjem jekk ikunu mħarsa r-regoli tal-Unjoni dwar il-limiti ġenerali tal-finanzjament.

(32)

Fl-Anness IV tingħata kjarifika oħra fir-rigward tat-tifsira min-naħa tal-Kummissjoni tat-termini “infrastruttura”, “teknoloġiji nodfa”, “diversifikazzjoni tat-taħlita ta' enerġija u sorsi ta' forniment”, użati fl-Artikolu 10c(1) tad-Direttiva Nru 2003/87/KE.

(33)

Fl-Anness V hemm lista mhux eżawrjenti ta' tipi ta' investimenti eliġibbli skont l-Artikolu 10c tad-Direttiva Nru 2003/87/KE.

4.3.   Valur kummeċjali

(34)

Skont l-Artikolu 10c(1) tad-Direttiva Nru 2003/87/KE, l-ammont ta' investimenti identifikati fil-pjan nazzjonali għandu jkun ekwivalenti, safejn hu possibbli, għall-valur kummeċjali tal-kwoti gratis tal-emissjonijiet. Il-valur kummeċjali tal-kwoti tal-emissjonijiet għandu jintuża bħala punt ta' referenza għall-Istati Membri li huma eliġibbli li jiddeterminaw, fil-pjanijiet nazzjonali tagħhom, l-ammont li għandu jiġi investit fil-livell nazzjonali.

(35)

Minħabba li l-Istati Membri għandhom ikunu jistgħu jipprovdu figura preċiża tal-ammont li biħsiebhom jinvestu skont l-Artikolu 10c tad-Direttiva Nru 2003/87/KE fil-pjanijiet nazzjonali, il-valur kummeċjali ta' xi kwoti tal-emissjonijiet li għandhom jiġu allokati gratis skont l-Artikolu 10c tad-Direttiva Nru 2003/87/KE għandu jkun determinat minn qabel u ma jistax jiġi aġġustat wara (8).

(36)

Il-Kummissjoni tirrakkomanda li l-valur kummeċjali tal-kwoti tal-emissjonijiet allokati gratis għandu joħroġ mit-tbassir imsejjes fuq il-mudelli tal-prezzijiet tal-karbonju fl-Ewropa kif stipulat fid-Dokument ta' Ħidma tal-Istaff tal-Kummissjoni 2010 li jakkumpanja l-Komunikazzjoni tal-Kummissjoni (2010) 265 finali (9). Id-dokument imsemmi qabel jipprovvdi tbassir aġġornat li jqis ċirkostanzi ġodda fl-Unjoni.

(37)

Skont dan, il-valuri annwali, kif stipulati fl-Anness VI u li jqis il-leġiżlazzjoni attwali u l-miri tat-tnaqqis tal-emissjonijiet, għandhom jintużaw bħala referenza mill-Istati Membri sabiex jiddeterminaw il-valur kummerċjali annwali tal-allokazzjoni gratis tal-kwoti tal-emissjonijiet applikati fil-pjanijiet nazzjonali tagħhom. Fid-dawl tar-regoli rilevanti dwar l-għajnuna mill-Istat, l-Istati Membri jistgħu jiddeċiedu jużaw valuri ogħla sabiex jiddeterminaw l-ammont li għandhom jinvestu: il-figuri mogħtija fl-Anness VI jirrappreżentaw biss livell minimu li għandu japplika.

(38)

Ħlief jekk Stat Membru jista' jistabbilixxi li dan se jkun oġġettivament impossibbli, il-valur tal-investimenti kif hemm fil-qafas tal-Artikolu 10c tad-Direttiva fi Stat Membru partikolari għandu jikkorrispondi mal-valur kummeċjali tal-kwoti tal-emissjonijiet allokati gratis meta tapplika d-Direttiva. F'applikazzjonijiet skont l-Artikolu 10c(5) tad-Direttiva Nru 2003/87/KE, l-Istati Membri għandhom jipprovdu l-evidenza neċessarja sabiex il-Kummissjoni tkun tista' twettaq il-valutazzjoni tagħha skont l-Artikolu 10c(6) tad-Direttiva Nru 2003/87/KE.

4.4.   Mekkaniżmu li jiżgura l-bilanċ bejn l-ammont tal-investimenti u l-kwoti gratis tal-emissjonijiet

(39)

Id-Direttiva Nru 2003/87/KE tagħraf b'mod espliċitu l-fatt li l-allokazzjoni gratis tal-kwoti tal-emissjonijiet tista' tirriżulta fi profitti mhux mistennija, b'mod partikolari meta l-operaturi jistgħu jwasslu l-valur finanzjarju tal-kwoti tal-emissjonijiet għand il-konsumaturi tagħhom. Dan hu l-każ għall-produtturi tal-elettriku u jirrappreżenta waħda mir-raġunijiet li tat lok biex id-Direttiva Nru 2003/87/KE tagħti l-possibbiltà biex l-irkant jitqies bħala regola awtomatika ta' allokazzjoni, maħsuba “biex telimina l-profitti mhux mistennija” (10).

(40)

B'deroga mill-prinċipju tal-irkant bħala metodu awtomatiku ta' allokazzjoni, l-Artikolu 10c tad-Direttiva Nru 2003/87/KE jipprovdi għal allokazzjoni gratis ta' kwoti ta' emissjonijiet lill-ġeneraturi tal-elettriku, li twassal għal aċċettazzjoni taċita ta' kif wieħed iħares lejn il-profitti mhux mistennija. Madankollu, l-Artikolu 10c ta' din id-Direttiva jimmira b'mod ċar lejn il-profitti li għandhom jintużaw għall-modernizzazzjoni tal-ġenerazzjoni tal-elettriku fl-Istat Membru kkonċernat.

(41)

Miżura tal-liġi tal-Unjoni għandha tiġi interpretata fid-dawl tal-objettivi tagħha. Abbażi tad-dispożizzjonijiet tal-Artikolu 10c tad-Direttiva Nru 2003/87/KE u fid-dawl tal-objettiv fundamentali tagħha, wieħed jista' jikkonkludi li l-profitti mhux mistennija li jakkumulaw lill-kumpaniji li jibbenefikaw minn allokazzjoni gratis ta' kwoti ta' emissjonijiet għandhom jintużaw għall-modernizzazzjoni tal-ġenerazzjoni tal-elettriku fl-Istat Membru kkonċernat. Fl-istess waqt, l-aqwa użu tal-valur tal-kwoti tal-emissjonijiet allokati gratis iwassal għall-fatt li l-kwoti tal-emissjonijiet allokati gratis mhumiex użati biex jiġu ffinanzjati l-investimenti li l-kumpaniji konċernati jistgħu jkunu wettqu, sabiex ikunu konformi ma' objettivi u rekwiżiti legali oħra li joħorġu mil-liġi tal-Unjoni. Inkella, dawn ikunu magħmula biss minn profitti oħra, li d-Direttiva Nru 2003/87/KE trid telimina u għalhekk din is-sitwazzjoni konsegwentament tmur kontra l-objettivi tad-Direttiva. Barra minn hekk, din tista' tikkawża distorsjonijiet bla bżonn tal-kompetizzjoni li jkunu inkompatibbli mal-Artikolu 10c(5) tad-Direttiva.

(42)

Għal dawn ir-raġunijiet, ir-riċevitur tal-kwoti tal-emissjonijiet allokati gratis skont l-Artikolu 10c tad-Direttiva Nru 2003/87/KE ikun jeħtieġ juża l-valur tal-kwoti tal-emissjonijiet allokati gratis billi jagħmel investiment li jkun identifikat fil-pjan nazzjonali skont l-Artikolu 10c(1). Meta l-kumpaniji jirċievu kwoti ta' emissjonijiet allokati gratis mingħajr ma jsir dan l-investiment jew meta jirċievu kwoti ta' emissjonijiet gratis iktar mill-ammont neċessarju biex isir(u) l-investiment(i) rilevanti identifikat(i) fil-pjan nazzjonali, ikunu meħtieġa jipprovdu l-valur tal-kwoti żejda lill-entità rilevanti li tagħmel l-investiment.

(43)

Minħabba li l-pjan nazzjonali mfassal sabiex jimmodernizza l-ġenerazzjoni tal-elettriku fl-Istat Membru konċernat jista' jkun fih investimenti li jsiru minn kumpaniji li mhumiex soġġetti għal konformità mal-iskema tal-Unjoni (11), mhux il-kumpaniji kollha li għandhom il-ħsieb li jagħmlu investimenti identifikati fil-pjan nazzjonali ser/jistgħu jirċievu kwoti allokati gratis. Fid-dawl tad-dispożizzjonijiet tal-Artikoli 10c(1) u 10c(4) tad-Direttiva Nru 2003/87/KE, l-operaturi tat-trażmissjoni jew tas-sistemi tad-distribuzzjoni skont it-tifsira tal-Artikolu 2(4) u (6) tad-Direttiva Nru 2009/72/KE tal-Parlament Ewropew u tal-Kunsill tat-13 ta' Lulju 2009 dwar ir-regoli komuni għas-suq intern fil-qasam tal-elettriku u li temenda (tħassar) id-Direttiva 2003/54/KE (12) jirrappreżentaw l-operaturi tan-netwerk skont it-tifsira tal-Artikolu 10c(4) tad-Direttiva Nru 2003/87/KE. Dawn il-kumpaniji jistgħu ma jkunux involuti b'mod ġenerali fil-ġenerazzjoni jew fil-forniment tal-elettriku. Għalhekk ma jistgħux jirċievu kwoti, imma madankollu jeħtieġu jagħmlu l-investimenti identifikati fil-pjan nazzjonali.

(44)

Skont il-prinċipju 3 tal-prinċipji għall-pjan nazzjonali u skont il-paragrafu 27 ta' dan id-dokument ta' gwida, meta l-investimenti fil-ġenerazzjoni jew fil-forniment tal-elettriku, li kienu ġew identifikati fil-pjan nazzjonali skont l-Artikolu 10c(1) tad-Direttiva Nru 2003/87/KE, iwasslu għal distorsjonijiet bla bżonn tal-kompetizzjoni jew inkella jheddu li jirrinforzaw il-pożizzjoni dominanti, l-Istati Membri jistgħu jinsistu mal-benefiċjarji li jitolbu kwoti gratis sabiex jagħtu fondi għall-investimenti fis-sistemi tat-trażmissjoni u d-distribuzzjoni, jew għall-ġenerazzjoni jew il-forniment tal-elettriku li ma jwasslux għal distorsjoni bħal din.

(45)

Jista' wkoll ma jkunx eskluż li jkunu ġew allokati lill-kumpaniji għadd ta' kwoti gratis ta' emissjonijiet ta' valur inqas minn dak li jintalab biex ikun kopert investiment identifikat fil-pjan nazzjonali. F'din l-eventwalità, jista' jkun xieraq li dawn il-kumpaniji jkunu jistgħu jwettqu l-investiment identifikat fil-pjan nazzjonali.

(46)

Għal dawn ir-raġunijiet, l-Istati Membri jistgħu jistabbilixxu, meta jkun neċessarju u xieraq, mekkaniżmu biex iqisu t-trasferiment rilevanti ta' fondi fil-każijiet imsemmijin fuq.

(47)

Dan il-mekkaniżmu għandu fi kwalunkwe każ iqis ir-rekwiżiti li ġejjin:

(a)

Il-valur tal-kwoti tal-emissjonijiet allokati gratis fil-qafas tal-Artikolu 10c tad-Direttiva Nru 2003/87/KE hu rifless mill-investimenti identifikati fil-pjan nazzjonali u għandu jitwettaq sabiex ikun jista' jitqabbel l-ammont tal-investimenti mal-valur tal-kwoti tal-emissjonijiet allokati gratis.

(b)

L-investimenti inklużi fil-pjan nazzjonali u li huma ffinanzjati permezz tal-mekkaniżmu għandhom ikunu konformi mar-regoli tal-għajnuna mill-Istat (13).

(ċ)

L-aġġustamenti annwali tal-fondi u l-investimenti inkluż il-fondi annwali jew l-investimenti li jiġu trasferiti minn sena għall-oħra għandhom jitħallew isiru sakemm l-ammont li għandu jiġi investit skont il-pjan nazzjonali ikun daqs jew iktar mill-valur totali tas-suq tal-kwoti gratis tal-emissjonijiet matul il-perjodu kollu li l-Istat Membru jkun applika għal deroga skont l-Artikolu 10c tad-Direttiva Nru 2003/87/KE (ara wkoll it-Taqsima 2.2).

(48)

Meta l-Istati Membri jużaw id-dħul li jistgħu jakkwistaw mill-irkant (14) jew minn xi forma oħra ta' dħul tal-Istat, sabiex jiffinanzjaw l-investimenti elenkati fil-pjan nazzjonali jista' jwassal għal profitti mhux mistennija għall-ġeneraturi tal-enerġija li jirċievu l-kwoti gratis skont l-Artikolu 10c tad-Direttiva Nru 2003/87/KE. Fid-dawl tal-premessi 15 u 19, tad-Direttiva ta' emenda Nru 2009/29/KE kif ukoll l-Artikolu 10c(5)(e), u l-approċċ u l-objettivi ġenerali tad-Direttiva, li tipprovdi għall-irkant bħala l-metodu awtomatiku ta' allokazzjoni, il-Kummissjoni tirrifjuta kwalunkwe applikazzjoni li titressaq skont l-Artikolu 10c(5) li twassal għal dan it-tip ta' approċċ.

5.   KWOTI MHUX TRASFERIBBLI

(49)

L-Istati Membri li jagħmlu użu mill-alternattiva li jiġu allokati gratis kwoti skont l-Artikolu 10c tad-Direttiva Nru 2003/87/KE jistgħu jiddeċiedu li dawn il-kwoti jistgħu jintużaw biss għaċ-ċediment mill-installazzjoni fis-sena li kienu allokati għaliha. Kumpanija li tirċievi kwoti li jkunu soġġetti għal kondizzjonalità bħal din ma jistgħux ibigħu dawn il-kwoti fis-suq, jittrasferixxuhom għal sena oħra jew jippermettu li dawn jiġu ċeduti minn installazzjoni oħra (anke saħansitra tal-istess kumpanija).

(50)

Stat Membru li jintroduċi kondizzjonalità bħal din ikun fir-riskju li jimplimenta l-Artikolu 10c b'tali mod li ma jkunx kompatibbli mal-objettivi u l-arkitettura tal-iskema tal-Unjoni, li hi mfassla biex tottjeni tnaqqis ġenerali tal-emissjonijiet f'manjiera kost-effikaċi u effiċjenti mil-lat ekonomiku. Il-liġi ma tippermettix li l-Istati Membri jimplimentaw id-Direttiva Nru 2003/87/KE b'tali mod li jmur kontra l-objettivi fundamentali tagħha.

(51)

Kwoti mhux transferibbli jeliminaw inċentivi biex jittieħdu miżuri għat-tnaqqis tal-emissjonijiet li jkunu disponibbli għad-detentur tal-kwoti mhux transferibbli li huma fattibbli b'kostijiet li jammontaw għal inqas mill-prezz attwali tal-kwoti tal-emissjonijiet. Min-naħa tad-detentur tal-kwoti mhux transferibbli, il-fatt li jittieħdu dawn il-miżuri għat-tnaqqis dejjem jidher li jqum iktar milli kieku l-emissjonijiet ikunu koperti bi kwoti mhux transferibbli.

(52)

Fid-dawl ta' dawn il-kunsiderazzjonijiet, il-Kummissjoni tirrakkomanda bis-sħiħ li l-Istati Membri ma jużawx l-alternattiva li jiġu allokati emissjonijiet li mhumiex transferibbli. Madankollu, fejn l-Istati Membri xorta waħda jikkunsidraw din l-alternattiva bħala waħda neċessarja, għandhom juru li din l-alternattiva hija użata biss minħabba li hi neċessarja sabiex jintlaħaq l-objettiv warajha li hu rifless fl-Artikolu 10c u li ma jistax jintlaħaq b'mod iktar effikaċi permezz ta' mezzi oħra. Ir-raġunijiet tal-Istati Membri għandhom iqisu l-inċentivi maħluqa fir-rigward tat-tnaqqis tal-emissjonijiet u ż-żieda potenzjali tal-kostijiet ta' konformità tal-ETS li jirriżultaw mill-għażla li ssir biex uħud mill-kwoti isiru mhux transferibbli.

(53)

Fid-dawl ta' u mingħajr preġudizzju għal dak li ntqal hawn fuq, il-Kummissjoni hi tal-fehma li għall-anqas, il-biċċa l-kbira tal-kwoti tal-emissjonijiet allokati gratis skont l-Artikolu 10c tad-Direttiva għandhom ikunu transferibbli. Tirrakkomanda li għandha ssir limitazzjoni tal-għadd ta' kwalunkwe kwoti li ma jistgħux jiġu trasferibbli lil xi ħadd li ma jaqbiżx l-emissjonijiet totali li jakkumulaw mill-provvista tal-elettriku lis-setturi li ma jirriskjawx li jintroduċu distorsjonijiet tal-kompetizzjonijiet fis-settur industrijali tal-Istat Membru kkonċertat jew tal-Unjoni (eż dan jista' jkun il-każ fis-settur tad-djar). Barra minn hekk, l-Artikolu 10c(5)(e) u 10c(6), il-Kummissjoni se jkollha tirrifjuta l-applikazzjoni li tista' toħloq distorsjonijiet tal-kompetizzjoni.

(54)

Meta tiġi vvalutata applikazzjoni mibgħuta skont l-Artikolu 10c(5), il-Kummissjoni teżamina jekk fid-dawl tal-objettivi tad-Direttiva Nru 2003/87/KE b'mod ġenerali, u l-objettiv speċifiku tal-Artikolu 10c tad-Direttiva Nru 2003/87/KE b'mod partikolari l-għadd ta' kwoti gratis tal-emissjonijiet li jkunu saru mhux transferibbli huwiex ġustifikat, jiġifieri jekk hux neċessarju u proporzjonat, u wkoll jekk dan joħloqx distorsjonijiet bla bżonn tal-kompetizzjoni. Il-Kummissjoni tirrifjuta l-applikazzjoni mibgħuta skont l-Artikolu 10c(5) jekk issib li dawn il-kundizzjonijiet ma ġewx ssodisfati.

6.   IL-MONITORAĠĠ U L-INFURZAR

6.1.   Valutazzjoni tal-applikazzjoni

(55)

Skont l-Artikolu 10c(6) tad-Direttiva Nru 2003/87/KE, il-Kummissjoni tivvaluta l-applikazzjoni filwaqt li tqis l-elementi kollha rilevanti inkluż dawk elenkati fl-Artikolu 10c(5). Tqis ukoll l-obbligi li joħorġu mit-Trattati u l-prinċipji ġenerali tal-liġi tal-Unjoni. Sabiex ikun żgurat proċess ta' valutazzjoni effiċjenti, l-applikazzjoni għandha tkun imsejsa fuq il-mudell mogħti fl-Anness VII ta' dan id-dokument. Il-Kummissjoni tinizja l-valutazzjoni tal-applikazzjoni biss ladarba titressaq l-informazzjoni kollha rilevanti inkluż l-evidenza neċessarja li tappoġġa din l-informazzjoni.

(56)

L-Artikolu 10c tad-Direttiva Nru 2003/87/KE ġie introdott sabiex jagħti lok għall-modernizzar tal-ġenerazzjoni tal-elettriku fl-Istati Membri eliġibbli. Għal din ir-raġuni, l-artikolu jipprovdi għal eċċezzjoni minn prinċipju essenzjali tad-Direttiva. Skont il-każistika prevelanti, din l-eċċezzjoni għandha tiġi interpretata u applikata b'mod ristrett għal dak li hu neċessarju biex jinkiseb l-objettiv stabbilit fl-Artikolu 10c, mingħajr ma jitqiegħdu fil-periklu l-objettivi kumplessivi tad-Direttiva Nru 2003/87/KE.

(57)

Fir-rigward tal-valur tal-kwoti tal-emissjonijiet allokati gratis, u r-relazzjoni tagħhom mal-ammont tal-investimenti mitlub fl-Artikolu 10c(1) tad-Direttiva Nru 2003/87/KE, hu importanti li wieħed iżomm f'moħħu li l-kwoti tal-emissjonijiet allokati gratis iwasslu sabiex il-kumpaniji jakkumulaw profitti mhux mistennija, jekk il-valur ta' dawn il-kwoti tal-emissjonijiet ma jkunux intużaw għall-investimenti jew jekk il-valur ta' dawn il-kwoti tal-emissjonijiet jkunu ntużaw għall-investimenti li kellhom jitwettqu, sabiex jikkonformaw mal-objettivi l-oħra u r-rekwiżiti legali li jirriżultaw mil-liġi tal-Unjoni. F'dan il-każ, mhux se jkun hemm kontribut korrispondenti sabiex jintlaħaq l-objettiv li għalih tkun ġiet aċċettata allokazzjoni gratis ta' kwoti tal-emissjonijiet skont l-Artikolu 10c.

(58)

Barra minn hekk, hu għaqli li wieħed iżomm f'moħħu li l-vantaġġi li joħorġu mill-allokazzjoni gratis tal-kwoti tal-emissjonijiet skont l-Artikolu 10c tad-Direttiva Nru 2003/87/KE jistgħu jikkawżaw distorsjonijiet bla bżonn tal-kompetizzjoni li jkunu inkonsistenti mal-Artikolu 10c(5)(e) jekk ma jintużawx għall-finijiet li għalihom ikunu ġew allokati.

(59)

Għal dawn ir-raġunijiet, il-valutazzjoni tal-Kummissjoni b'mod partikolari se tagħmel enfasi fuq jekk il-valur tal-kwoti tal-emissjonijiet mogħtija gratis lill-installazzjonijiet eliġibbli skont l-Artikolu 10c tad-Direttiva Nru 2003/87/KE hux użat għall-investimenti mwettqa minn dawn l-installazzjonijiet, jew, meta dan ma jkunx il-każ, tivverifika l-valur tal-kwoti gratis tal-emissjonijiet li jkun disponibbli għall-installazzjonijiet/operaturi jew għall-kumpaniji li ma jkunux irċevew biżżejjed kwoti tal-emissjonijiet biex ikopru l-investimenti rispettivi identifikati fil-pjan nazzjonali.

(60)

Għal raġunijiet ta' trasparenza u sabiex tkun tista' ssir valutazzjoni b'saħħitha tal-applikazzjoni mill-Kummissjoni, l-Istati Membri għandhom jippubblikaw applikazzjoni qabel ma din titressaq lill-Kummissjoni sabiex il-Kummissjoni tkun tista' tqis l-informazzjoni u l-fehmiet minn sorsi oħra. Kwalnukwe applikazzjoni mressqa minn Stat Membru għandha titqies informazzjoni ambjentali u għandha tkun soġġetta għar-rekwiżiti stipulati fid-Direttiva Nru 2003/4/KE tal-Parlament Ewropew u tal-Kunsill tat-28 ta' Jannar 2003 dwar l-aċċess pubbliku għat-tagħrif ambjentali u li tħassar id-Diretiva tal-Kunill 90/313/KEE (15) u r-Regolament (KE) Nru 1367/2006 tal-Parlament Ewropew u tal-Kunsill tas-6 ta' Settembru 2006 dwar l-applikazzjoni għall-istituzzjonijiet u l-korpi tal-Komunità tad-dispożizzjonijiet tal-Konvenzjoni ta’ Aarhus dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta’ Deċiżjonijiet u l-Aċċess għall-Ġustizzja fi Kwistjonijiet Ambjentali (16). L-Istati Membri se jintalbu jivverifikaw ukoll jekk hemmx il-ħtieġa li ssir valutazzjoni ambjentali tal-pjan nazzjonali tagħhom, abbażi tad-dispożizzjonijiet tad-Direttiva Nru 2001/42/KE.

6.2.   Dispożizzjonijiet dwar il-monitoraġġ u l-infurzar skont l-Artikolu 10c(5) tad-Direttiva 2003/87/KE

(61)

L-Istati Membri għandhom jistipulaw dispożizzjonijiet ċari u effikaċi dwar il-monitroaġġ u l-infurzar fir-rigward tal-investimenti spekulati fil-pjan nazzjonali sabiex jiżguraw eżekuzzjoni xierqa tal-investimenti identifikati fil-pjan nazzjonali. Skont l-Artikolu 10c(5)(d) tad-Direttiva Nru 2003/87/KE, dawn id-dispożizzjonijiet għandhom jiġu stipulati b'mod dettaljat f'applikazzjoni għal allokazzjoni gratis tal-kwoti tal-emissjonijiet.

(62)

Hija r-responsabbiltà tal-Istati Membri li jimmonitorjaw u jinfurzaw l-investimenti identifikati fil-pjanijiet nazzjonali tagħhom. Meta ssir valutazzjoni ta' applikazzjoni tal-Istati Membri għal allokazzjoni gratis tal-kwoti tal-emissjonijiet skont l-Artikolu 10c(6) tad-Direttiva Nru 2003/87/KE, il-Kummissjoni se tagħti importanza partikolari lill-fatt jekk l-Istat Membru jipprovdix jew le dispożizzjonijiet ċari u effikaċi dwar il-monitoraġġ u l-infurzar għall-implimentazzjoni tal-pjan nazzjonali, inkluż mekkaniżmu li jimmonitorja mill-qrib u li jinforza b'mod effikaċi l-investimenti identifikati fil-pjan nazzjonali tiegħu. Għalhekk, l-Istati Membri għandhom jiżguraw li jkunu daħħlu fis-seħħ il-liġijiet, ir-regolamenti u d-dispożizzjonijiet amministrattivi li huma neċessarji sabiex l-investimenti ikunu soġġetti għal skrutinju mill-awtoritajiet nazzjonali kompetenti identifikati b'mod ċar fl-applikazzjoni.

(63)

L-elementi li ġejjin huma importanti f'dan ir-rigward:

—

Id-dispożizzjonijiet għandhom jiddefinixxu sensiela ta' indikaturi ta' konformità, eżempji ta' dawn jinsabu fl-Anness VIII. Għandhom jintużaw mill-awtoritajiet nazzjonali kompetenti sabiex jivvalutaw il-progress u l-kompatibbiltà tal-investimenti mar-rekwiżiti li jinsabu fid-Direttiva Nru 2003/87/KE u f'dan id-dokument ta' gwida.

—

Is-superviżjoni fuq il-post għandha tkun maħsuba sabiex tiġi vverifikata l-implimentazzjoni tal-investimenti fis-sitwazzjoni reali. Dan għandu jinkludi verifiki fuq il-post u verifikazzjoni annwali indipendenti mill-awdituri esterni għal kull investiment. L-awdituri għandhom joħorġu dokument uffiċjali li jiċċertifika n-natura ta' kull investiment u l-ammont eżatt li jintefaq kull sena. Dawn id-dokumenti għandhom juru wkoll il-veraċità tal-ispejjeż mġarrba.

—

Id-dispożizzjonijiet għandhom jadottaw valutazzjoni kwantitattiva u kwalitattiva li ssir minn parti terza tal-investimenti sabiex tingħata evidenza sostanzjata u indipendenti li l-investimenti jikkonformaw mad-Direttiva Nru 2003/87/KE, dan id-dokument ta' gwida u l-pjan nazzjonali.

—

Meta l-kumpaniji ma jkunux konformi mal-obbligi tagħhom li jinvestu (jew li ma jikkontribwixxux għall-investimenti billi jittrasferixxu l-valur tal-kwoti gratis tal-emissjonijiet li ma jkunux ġew investiti fil-mekkaniżmu sabiex ikun żgurat il-bilanċ bejn l-ammont ta' investimenti u l-kwoti gratis tal-emissjonijiet), l-Istati Membri għandhom jistabbilixxu penali u miżuri korrettivi bil-għan li jirkupraw il-bilanċ bejn il-valur tal-kwoti gratis tal-emissjonijiet skont l-Artikolu 10c tad-Direttiva Nru 2003/87/KE u l-ammont tal-investimenti identifikati fil-pjan nazzjonali. Dawn il-miżuri għandhom ikunu effikaċi, proporzjonati u dissważivi u għandhom jinkludu:

—

Obbligu li jerġgħu jitħallsu lura l-kwoti tal-emissjonijiet allokati gratis (ivvalutati skont il-valur kummeċjali meta jsir il-ħlas lura) sal-ammont tan-nuqqas ta' investiment osservat;

—

Il-qbid awtomatiku tal-kwoti mill-kumpaniji li ma jkunux konformi mal-obbligi tagħhom li joħorġu mill-pjan nazzjonali rispettiv u dan id-dokument ta' gwida inkluż il-konverżjoni mill-ġdid tal-kwoti gratis tal-emissjonijiet fi kwoti biex jiġu rkantati mill-Istat Membru kkonċernat.

—

Penali finanzjarji dissważivi ta' natura punitiva;

—

Għandu jkun possibbli li jsir trasferiment ta' parti mill-investimenti maħsuba għal installazzjoni minn sena għall-oħra f'ammont ekwivalenti għan-nuqqas ta' investimenti osservat dik is-sena. Hija r-responsabbiltà tal-Istat Membru li jiggarantixxi li l-ammont xieraq tal-fondi jiġi investit matul il-perjodu ta' applikazzjoni.

(64)

Ir-riżultati tal-proċess ta' monitoraġġ u ta' infurzar, flimkien mal-evidenza sostanzjata, għandhom jiġu rrappurtati kull sena fir-rapporti annwali li għandhom jitressqu mill-Istati Membri lill-Kummissjoni skont l-Artikolu 10c(1) tad-Direttiva Nru 2003/87/KE. B'mod partikolari, mar-rapporti għandhom jiġu annessi kopji tad-dokumenti taċ-ċertifikazzjoni tal-awditur estern (issiġġillati bit-timbru uffiċjali) kif ukoll traduzzjoni uffiċjali għall-Ingliż (jekk dawn ma jkunux diġà bl-Ingliż). L-Istati Membri jistgħu jagħżlu li jagħmlu r-rapporti annwali tal-operaturi rilevanti pubbliċi.

6.3.   Rapporti annwali skont l-Artikolu 10c(1) tad-Direttiva 2003/87/KE

(65)

Ir-rapporti annwali tal-Istati Membri dwar l-investimenti li jkunu saru biex tiġi mmodernizzata l-ġenerazzjoni tal-elettriku skont l-Artikolu 10c(1) tad-Direttiva Nru 2003/87/KE għandhom jitressqu lill-Kummissjoni sal-31 ta' Jannar ta' kull sena, mill-2014 'il quddiem. Għandhom janalizzaw in-natura u l-ammont tal-investimenti li jkunu saru matul is-sena ta' qabel (17).

(66)

Ir-rapporti annwali għandhom jikkonfermaw b'evidenza sostanzjata li l-investimenti huma implimentati f'sitwazzjoni reali u jikkonformaw mar-rekwiżiti stipulati fid-Direttiva Nru 2003/87/KE u f'dan id-dokument ta' gwida, u b'mod partikolari, li jikkontribwixxu għat-tnaqqis tal-emissjonijiet tal-gass b'effett serra.

(67)

Ir-rapporti jeħtieġu juru wkoll li l-ammont annwali investit hu koerenti mal-ammont totali ta' investimenti maħsuba għall-perjodu sħiħ ta' applikazzjoni, kif stipulat fil-pjan nazzjonali tal-Istati Membri f'referenza għall-valur kummeċjali tal-kwoti tal-emissjonijiet allokati gratis definiti f'dan id-dokument ta' gwida. L-investimenti ma għandhomx għalfejn jaqblu mal-valur kummeċjali determinat tal-kwoti tal-emissjonijiet allokati gratis fuq bażi annwali. Madankollu, kwalunkwe diskrepanza bejn il-valur tal-kwoti tal-emissjonijiet allokati gratis u l-ammont tal-investimenti għandhom ikunu rimedjati fis-sena ta' wara dik li fiha tkun inżammet mogħdija ta' investiment kredibbli matul il-perjodu ta' applikazzjoni, filwaqt li jitqies l-għadd dejjem nieżel ta' kwoti ta' emissjonijiet li jistgħu jiġu allokati gratis.

(68)

Skont l-Artikolu 10c(4) tad-Direttiva Nru 2003/87/KE, ir-rapporti annwali għandhom jiġu msejsa fuq ir-rapporti li jibagħtu l-operaturi kull 12-il xahar lill-Istati Membri dwar l-implimentazzjoni tal-investimenti tagħhom stipulati fil-pjan nazzjonali. Għandhom jistrieħu wkoll fuq sorsi supplimentari ta' informazzjoni, b'mod paritkolari dejta uffiċjali u dejta li tkun ivverifikata indipendentament. Sorsi ta' dejta u r-referenza tad-dokumenti ta' evidenza għandhom ikunu disponibbli fir-rapporti.

(69)

Ir-rapporti annwali tal-Istati Membri lill-Kummissjoni għandhom ikunu disponibbli b'mod trasparenti. Skont l-Artikolu 10c(4) tad-Direttiva Nru 2003/87/KE, ir-rapporti annwali tal-Istati Membri li jintbagħtu lill-Kummissjoni għandhom ikunu pubbliċi. Fi kwalunkwe każ, għandha titqies il-kunfidenzjalità tal-informazzjoni li tkun kummerċjalment sensittiva.

(70)

Fil-valutazzjoni tagħha skont l-Artikolu 10c(6) tad-Direttiva Nru 2003/87/KE, il-Kummissjoni teżamina l-korretezza tar-rapporti annwali abbażi tal-evidenza mogħtija. Tista' titlob iktar informazzjoni jekk ma titressaqx l-evidenza kollha rilevanti.

(71)

Meta Stat Membru ma jagħtix biżżejjed evidenza permezz tar-rapporti annwali tiegħu, li l-investimenti identifikati fil-pjan nazzjonali huma mwettqa skont l-iskeda u l-valur ta' allokazzjoni gratis tal-kwoti tal-emissjonijiet kif stipulat fil-pjan nazzjonali, u ħlief meta

—

l-Istat Membru kkonċernat jista' jippreżenta permezz tar-rapporti annwali tiegħu ġustifikazzjoni soda għat-tnaqqis tal-investimenti f'sena partikolari, jew

—

l-Istat Membru kkonċernat jista' jagħti evidenza li l-miżuri korrettivi, kif stipulati fl-applikazzjoni tiegħu skont l-Artikolu 10c(5) (d) ġew infurzati; jew

—

ir-rapport annwali tas-sena sussegwenti jipprovdi evidenza li t-tnaqqis tal-investimenti osservati fis-sena ta' qabel ġie rimedjat,

il-Kummissjoni hija tal-fehma li hemm ksur ta' kondizzjonalità stabbilita fl-Artikolu 10c tad-Direttiva Nru 2003/87/KE fir-rigward tal-allokazzjoni gratis tal-kwoti tal-emissjonijiet u l-investimenti skont l-Artikolu 10c(1). Minħabba li din il-kundizzjonalità hija kruċjali biex jinkisbu l-objettivi fundamentali tal-Artikolu 10c, tnaqqis ta' investiment jirriżulta f'akkwisti addizzjonali għall-kumpanija kkonċernata u ma jikkontribwixxix biex jinkisbu l-objettivi fundamentali tad-Direttiva Nru 2003/87/KE jew tal-Artikolu 10c b'mod partikolari. Konsegwentament, dan jista' jwassal għal applikazzjoni illegali tad-Direttiva Nru 2003/87/KE li tmur kontra l-objettivi fundamentali tagħha. Dan jista' jqajjem tħassib sinifikanti lill-Kummissjoni skont ir-regoli tal-għajnuna mill-Istat. Jekk ikun neċessarju, il-Kummissjoni tista' tniedi investigazzjoni skont l-Artikolu 108(2) TFUE u/jew proċeduri ta' ksur. Proċedura skont l-Artikolu 108(2) TFUE tista' tirriżulta fis-sospensjoni ta' allokazzjoni gratis skont l-Artikolu 10c tad-Direttiva Nru 2003/87/KE ta' għadd ta' kwoti tal-emissjonijiet li jikkorrispondu għall-ammont tat-tnaqqis fl-investiment. Jekk is-sitwazzjoni ma tiġix rimedjata, l-Istat Membru kkonċernat għandu ultimament jagħmel irkant tal-għadd korrispondenti tal-kwoti skont ir-Regolament adottat skont l-Artikolu 10(4) tad-Direttiva Nru 2003/87/KE.


(1)  ĠU L 275, 25.10.2003, p. 32.

(2)  Huwa importanti li anke l-installazzjonijiet li minn lenti purament legali jistgħu jitqiesu ġeneraturi tal-elettriku skont l-Artikolu 3 punt u tad-Direttiva Nru 2003/87/KE ma jitqisux eliġibbli għal allokazzjonijiet gratis skont l-Artikolu 10c tad-Direttiva Nru 2003/87/KE, jekk ma jwettqux attività industrijali oħra, anke jekk din l-attività industrijali jista' jkun ma taqax fl-ambitu tal-Anness I għad-Direttiva Nru 2003/87/KE, minħabba li tista' ma tkunx elenkata f'dan l-Anness jew inkella ma taqbiżx il-limitu għall-attività industrijali rispettiva kif stipulat fl-Anness I għad-Direttiva Nru 2003/87/KE.

(3)  Fl-2007, ma kien hemm l-ebda konnessjoni diretta jew indiretta man-netwerk UCTE li kien hemm qabel.

(4)  Fl-2007, il-konnessjoni man-netwerk UCTE li kien hemm qabel kienet permezz ta' linja waħda b'kapaċità ta' inqas minn 400 MW.

(5)  Fl-2006, iktar minn 30 % tal-elettriku kien prodott minn fjuwil uniku tal-fossili.

(6)  ĠU L 197, 21.7.2001, p. 30.

(7)  Ara wkoll il-Kapitolu 6 u l-Anness VII.

(8)  Ma hemmx konnessjoni bejn id-determinazzjoni tal-valur kummeċjali tal-kwoti gratis għall-finijiet ta' din il-Komunikazzjoni u l-valuri tas-suq li għandhom jiġu determinati skont il-valutazzjonijiet tal-għajnuna mill-Istat. Dan lanqas ma jiddependi mill-evoluzzjoni fil-ġejjieni tal-prezzijiet tal-karbonju fl-Ewropa matul it-tielet perjodu ta' negozjar. Id-Direttiva toffri ftit flessibbiltà f'dan ir-rigward hi u tistipula li l-ammont tal-investiment għandu jkun ekwivalenti “safejn hu possibbli” għall-valur kummeċjali tal-allokazzjoni gratis. Dan ifisser li d-determinazzjoni tal-valur kummeċjali tal-kwoti gratis għall-implimentazzjoni tal-Artikolu 10c għandha tkun imsejsa fuq ipotesi kredibbli u persważiva ex ante tal-evoluzzjoni tal-ġejjieni tal-prezzijiet tal-karbonju, imma ma għandhiex għalfejn tirrifletti eżatt il-valuri ta' kuljum ta' kuntratti attwali, futuri u forwards dwar is-swieq Ewropej tal-karbonju mill-2013 sal-2020.

(9)  SEC(2010) 650, id-Dokument ta' Ħidma tal-Istaff tal-Kummissjoni li jakkumpanja l-Komunikazzjoni mill-Kummissjoni lill-Parlament Ewropew, il-Kunsill, il-Kumitat Ekonomiku u Soċjali Ewropew u l-Kumitat tar-Reġjuni, Analiżi tal-alternattivi lil hinn minn 20 % tat-tnaqqis tal-emissjonijiet tal-gass b'effett serra u r-riskju tar-rilaxxi tal-kabonju, informazzjoni fl-Isfond u Analiżi, Parti II.

(10)  Ara Premessa 15 tad-Direttiva Nru 2009/29/KE.

(11)  L-Artikolu 10c(4) isemmi b'mod espliċitu l-operaturi tan-netwerk, li skont il-leġiżlazzjoni tal-Unjoni dwar is-suq intern għall-elettriku (Direttiva Nru 2009/72/KE) m'għandhom ikollhom xejn x'jaqsmu mal-produzzjoni tal-elettriku. L-operaturi tal-ġenerazzjoni tal-elettriku rinnovabbli wkoll ma għandhomx jirċievu kwoti, imma huma koperti mill-ambitu tal-investimenti stipulati fl-Artikolu 10c(1).

(12)  ĠU L 211, 14.8.2009, p. 55.

(13)  Ara l-paragrafu 27.

(14)  L-Artikolu 10(3) jirrikjedi biss għall-anqas 50 % tad-dħul li għandu jintuża għall-finijiet relatati mal-klima, filwaqt li l-50 % (massimu) il jibqa' jitħalla għal kollox għad-diskrezzjoni tal-Istati Membri.

(15)  ĠU L 41, 14.2.2003, p. 26.

(16)  ĠU L 264, 25.9.2006, p. 13.

(17)  L-ewwel rapport annwali li jitressaq fl-2014 għandu jkopri l-investimenti li jkunu saru bejn il-25 ta' Ġunju 2009 sal-31 ta' Diċembru 2013.


ANNESS I

Determinazzjoni tal-għadd massimu ta' kwoti gratis

Sabiex tkun definita l-kwantità ta' allokazzjonijiet gratis tal-kwoti tal-emissjonijiet fl-2013 u fis-snin sussegwenti għal Stat Membru li hu eliġibbli biex japplika skont l-Artikolu 10c tad-Direttiva Nru 2003/87/KE, jeħtieġ li jittieħdu l-passi li jmiss:

(a)

Tiġi determinata l-medja tal-emissjonijiet annwali mis-sena 2005 sal-2007 tal-installazzjonijiet kollha eliġibbli.

(b)

Tiġi determinata l-proporzjon tal-medja annwali mis-sena 2005 sal-2007 tal-Konsum Nazzjonali Gross Finali (GFNC) mal-medja annwali mis-sena 2005 sal-2007 tal-Produzzjoni Grossa Totali tal-Elettriku (TGEP). Il-figura li tirriżulta (f'perċentwal) se tindika s-sehem tal-emissjonijiet li jikkorrispondi għall-GFNC05-07.

(ċ)

Il-medja tal-emissjonijiet annwali mis-sena 2005 sal-2007 (ara l-punt (a)) teżiġi li tkun immultiplikata bis-sehem tal-emissjonijiet li jikkorrispondi għall-GFNC05-07 (ara l-punt (b)).

(d)

Ir-riżultat se jirrifletti l-kwantità tal-kwoti biex ikunu koperti 100 % tal-emissjonijiet mill-ġenerazzjoni tal-elettriku li jikkorrispondu għall-GFNC. Dan għandu jiġi mmultiplikat b'fattur varjabbli, li fl-2013 ma għandux jaqbeż 0,7 (70 %), għandu jonqos kull sena mill-2013 'il quddiem u għandu jammonta għal 0 (0 %) fl-2020, li jirriżulta fil-massimu tal-allokazzjoni tranżizzjonali gratis tal-kwoti tal-emissjonijiet li hu permess mid-Direttiva 2003/87/KE fl-2013 u fis-snin sussegwenti.

Il-formula li ġejja tiddetermina l-kwantità massima tal-kwoti gratis tal-emissjonijiet skont l-Artikolu 10c(2):

TQFAx = (GFNC05-07/TGEP05-07) × AAQEEI 05-07 × ax

Abbrevjazzjoni

Spjegazzjoni

TQFAx

Kwantità totali tal-allokazzjoni gratis fis-sena x, bl-ittra x tirrappreżenta kull sena bejn l-2013 u l-2020

x

Fattur varjabbli li jirrappreżenta kull sena fil-perjodu ta' bejn l-2013 u l-2020

GFNC05-07

Medja annwali ta' bejn l-2005 u l-2007 tal-Konsum Nazzjonali Gross Finali

TGEP05-07

Medja annwali ta' bejn l-2005 u l-2007 tal-produzzjoni grossa totali tal-elettriku (kodiċi tal-Eurostat 107000 taħt il-kodiċi tal-prodott 6000“elettriku”)

AAQEEI 05-07

Medja tal-kwantità annwali tal-emissjonijiet mill-installazzjonijiet eliġibbli bejn is-sena 2005 u l-2007

ax

Fattur varjabbli li jirrappreżenta s-sehem tal-medja annwali tal-emissjonijiet ivverifikati bejn l-2005 u l-2007 li jikkorrispondi għall-konsum nazzjonali gross finali tal-Istat Membru kkonċernat. Il-valur tal-fattur varjabbli ma għandux jaqbeż il-figura ta' 0,7 (70 %) fl-2013, (a2013), u għandu jonqos kull sena wara l-2013 u għandu jammonta għal 0 (0 %) fl-2020.

Sabiex jitwettaq il-kalkolu, l-Istati Membri jeħtieġu jidentifikaw l-installazzjonijiet eliġibbli għall-allokazzjoni gratis tal-kwoti tal-emissjonijiet skont l-Artikolu 10c tad-Direttiva Nru 2003/87/KE. Għall-installazzjonijiet li ma jipproduċux biss elettriku imma wkoll sħana, għandhom jitqiesu biss l-emissjonijiet li jistgħu jkunu attribwiti għall-produzzjoni tal-elettriku.

Fl-Anness I, wieħed isib iktar kjarifika tal-kunċett tal-Konsum Nazzjonali Gross Finali kif ukoll il-formula biex jiġi kkalkulat.

Il-kwantità totali tal-kwoti li tirriżulta mill-formula li tidher hawn fuq tirrappreżenta l-għadd massimu tal-kwoti gratis fil-livell nazzjonali fis-sena x.


ANNESS II

Konsum Nazzjonali Gross Finali u l-formula biex jiġi kkalkulat

Il-kunċett tal-konsum nazzjonali gross finali (GFNC) tal-elettriku huwa l-element li jiddetermina l-għadd massimu ta' kwoti gratis tal-emissjonijiet skont l-Artikolu 10c(2) tad-Direttiva 2003/87/KE. Dan, madankollu, ma jikkorrispondix għal terminu statistiku definit jew użat mill-Eurostat u għalhekk, għandu jiġi interpretat fil-kuntest tal-Artikolu 10c.

Fid-dawl tad-dispożizzjonijiet rilevanti tal-Artikolu 10c tad-Direttiva, il-konsum nazzjonali gross finali għandu jinkludi l-ammont tal-elettriku li jasal għand il-konsumatur finali, jiġifieri il-konsum totali ta' elettriku tal-konsumaturi domestiċi kollha f'pajjiż partikolari inkluż is-sehem tal-produzzjoni totali tal-elettriku li hu neċessarju sabiex ikun iġġenerat, ittrasportat u distribwit l-elettriku li fl-aħħar mill-aħħar jiġi kkunsmat.

Fir-rigward tal-esportazzjoni u l-importazzjoni tal-elettriku, titqies l-importazzjoni biss li taqbeż l-esportazzjoni (l-importazzjoni netta) f'termini ta' GFNC fi Stat Membru partikolari. Minħabba li l-produtturi tal-elettriku fi Stat Membru ma għandhomx jirċievu kwoti gratis tal-emissjonijiet għall-elettriku li jiġi kkunsmat imma li ma jiġix ġenerat f'dan l-Istat Membru, id-determinazzjoni tal-GFNC għandha teskludi l-importazzjoni netta.

Il-konsum nazzjonali gross finali jikkonċerna biss l-elettriku u mhux xi forma oħra ta' enerġija. Għal raġunijiet ta' trasparenza, għandu jkun ibbażat fuq id-dejta disponibbli għall-pubbliku u kunċetti statistiċi li jkunu b'mod ġenerali rikonoxxuti, kif provdut u użat mill-Eurostat. Il-formula għall-kalkolu tal-GFNC tinsab hawn taħt.

GFNC = FEC – MNET + {[(FEC – MNET)/(TGEP + MNET)] × TDL} + {[(FEC – MNET)/TGEP] × CEG}

 

Kunċetti statistiċi

Il-kodiċi tal-Eurostat skont il-kodiċi tal-prodott 6000“enerġija elettrika”

GFNC

Konsum nazzjonali gross finali tal-elettriku

Mhux applikabbli

FEC

Konsum finali tal-enerġija (f'termini ta' elettriku)

101700

MNET

Importazzjoni netta tal-elettriku

100600

TGEP

Produzzjoni grossa totali tal-elettriku

107000

TDL

Telf mit-Trażmissjoni u mid-Distribuzzjoni

101400

CEG

Konsum tal-elettriku tas-settur tal-elettriku

101301

Il-medja annwali bejn is-sena 2005 u l-2007 tal-kunċetti indikati fit-tabella tirrappreżenta l-input xieraq tal-formula. Ir-riżultat tal-formula jirrappreżenta GFNC05-07 kif użat fl-Anness I.


ANNESS III

Teknoloġiji speċifiċi definiti minn qabel li jitfaċċaw fl-istadju ta' dimostrazzjoni

A.   KATEGORIJI TAL-PROĠETTI

I.   Kategoriji ta' proġetti ta' dimostrazzjoni CCS (b'limiti minimi ta' kapaċità  (1) ):

—

il-produzzjoni tal-enerġija: qabel il-kombustjoni 250 MW;

—

il-produzzjoni tal-enerġija: wara l-kombustjoni 250 MW;

—

il-produzzjoni tal-enerġija: ossikarburant 250 MW;

II.   Kategoriji ta' proġetti ta' dimostrazzjoni RES innovattivi (b'limiti minimi ta' kapaċità):

—

Subkategoriji ta' proġetti fis-settur tal-bijoenerġija:

—

Konverżjoni ta’ linjoċelluloża f’vetturi bijoenerġetiċi intermedji solidi, likwidi jew semilikwidi permezz ta’ piroliżi, b’kapaċità ta’ 40 kt fis-sena tal-prodott finali;

—

Konverżjoni ta’ linjoċelluloża f’vetturi bijoenerġetiċi intermedji solidi, likwidi jew semilikwidi permezz ta’ torrefazzjoni, b’kapaċità ta’ 40 kt fis-sena tal-prodott finali;

—

Konverżjoni ta’ linjoċelluloża f’Gass Naturali Sintetiku jew gass ta’ sinteżi u/jew f’enerġija permezz tal-gassifikazzjoni, b’kapaċità ta’ 40 miljun metri kubi normali fis-sena (M Nm3 fis-sena) tal-prodott finali jew 100 GWh fis-sena ta’ enerġija elettrika;

—

Konverżjoni ta’ linjoċelluloża f’bijofjuwils jew bijolikwidi u/jew f’enerġija inkluż permezz ta’ gassifikazzjoni b’tisħin dirett b’kapaċità ta’ 15-il miljun litru fis-sena (Ml fis-sena) tal-prodott finali jew 100 GWh fis-sena ta’ enerġija elettrika. Il-produzzjoni ta' Gass Naturali Sintetiku hija eskluża minn din is-subkategorija;

—

Konverżjoni ta’ materja prima linjoċelluloża, bħalma huma likur iswed u/jew prodotti ta’ piroliżi jew torrefazzjoni, permezz ta’ gassifikazzjoni ta’ fluwidi li jġorru partikuli, fi kwalunkwe bijofjuwil b’kapaċità ta’ 40 Ml fis-sena tal-prodott finali;

—

Konverżjoni ta’ linjoċelluloża f’enerġija elettrika b’effiċjenza ta’ 48 % abbażi ta’ valur kalorifiku inferjuri (umdità ta’ 50 %) b’kapaċità ta’ 40 MWe jew ogħla;

—

Konverżjoni ta’ linjoċelluloża f’etanol u alkoħols superjuri permezz ta’ proċessi kimiċi u bijoloġiċi, b’kapaċità ta’ 40 Ml fis-sena tal-prodott finali;

—

Konverżjoni ta’ linjoċelluloża u/jew ta’ skart tad-djar f’bijogass, f’bijofjuwils jew bijolikwidi permezz ta’ proċessi kimiċi u bijoloġiċi, b’kapaċità ta’ 6 MNm3 fis-sena ta’ Metanu jew 10 Ml fis-sena tal-prodott finali;

—

Konverżjoni ta’ alka u/jew mikro-organiżmi f’bijofjuwils u bijolikwidi permezz ta’ proċessi kimiċi u/jew bijoloġiċi, b’kapaċità ta’ 40 Ml fis-sena tal-prodott finali;

Nota: Il-kriterji tas-sostenibbiltà kif ipprovduti fid-Direttiva 2009/28/KE tal-Parlament Ewropew u tal-Kunsill (2) dwar il-promozzjoni tal-użu tal-enerġija minn sorsi rinnovabbli, għandhom jiġu sodisfatti għall-bijofjuwils u l-bijolikwidi skont it-tifsira ta' dik id-Direttiva.

—

Enerġija solari konċentrata – subkategoriji ta' proġetti:

—

Sistema parabolika-ċilindrika jew sistema Fresnel li tuża mluħa mdewba jew likwidi oħra ta' trasferiment tas-sħana li ma jagħmlux ħsara lill-ambjent, b'kapaċità nominali ta' 30 MW;

—

Sistema parabolika-ċilindrika jew sistema Fresnel imsejsa fuq il-Produzzjoni Diretta ta’ Fwar, b’kapaċità nominali ta’ 30 MW. It-temperatura tal-fwar prodott direttament għandha tkun ogħla minn 500 °C;

—

Sistema ta' torri li tuża ċiklu ta' fwar b'temperatura għolja (jew sistema ta' torrijiet multipli, jew taħlita ta' kolletturi linjari u torri wieħed), b'kapaċità nominali ta' 50 MW;

—

Sistema ta' torri li tuża l-arja miżmuma fi pressjoni atmosferika ogħla minn dik ambjentali b'temperatura ogħla minn 750 °C u turbina ibrida solari u tal-gass, b'kapaċità nominali ta' 30 MW;

—

Impjanti tal-enerġija ta' daqs kbir b'dixx Stirling b'effiċjenza ta' konverżjoni tal-enerġija solari f'enerġija elettrika ta' aktar minn 20 % u b'kapaċità nominali ta' mill-inqas 25 MW;

Nota: L-impjanti ta' dimostrazzjoni ma jistgħux jinkludu sistemi ta' dry cooling u sistemi ibridi, kif ukoll sistemi (avvanzati) ta' ħżin tas-sħana.

—

Subkategoriji ta' proġetti fis-settur fotovoltajku:

—

Impjanti tal-enerġija fotovoltajka ta' daqs kbir, b'kapaċità nominali ta' 20 MW;

—

Impjanti tal-enerġija fotovoltajka ta' daqs kbir li jużaw multi-junction Si-thin-film, b'kapaċità nominali ta' 40 MW;

—

Impjanti tal-enerġija fotovoltajka ta’ daqs kbir li jużaw ċelloli tal-Copper indium gallium (di)selenide (CIGS), b’kapaċità nominali ta’ 40 MW;

—

Subkategoriji ta' proġetti fis-settur ġeotermiku:

—

Sistemi ġeotermiċi mtejba fl-oqsma ta' stress tat-tensjoni, b'kapaċità nominali ta' 5 MWe;

—

Sistemi ġeotermiċi mtejba fl-oqsma ta' stress tal-kompressjoni, b'kapaċità nominali ta' 5 MWe;

—

Sistemi ġeotermiċi mtejba f'żoni bi blat, sedimentarju u granit, kumpatt u fond u strutturi kristallini oħra, b'kapaċità nominali ta' 5 MWe;

—

Sistemi ġeotermiċi mtejba f'żoni ta' ġebla franka fil-fond, b'kapaċità nominali ta' 5 MWe;

Nota: Applikazzjonijiet Kumbinati ta' Saħħa u Enerġija (CHP) bl-istess limiti ta' enerġija elettrika huma eliġibbli biss fir-rigward tal-produzzjoni tal-elettriku

—

Subkategoriji ta' proġetti fis-settur tal-enerġija mir-riħ:

—

Enerġija mir-riħ lil hinn mix-xtut (l-iżgħar daqs tat-turbini 6 MW), b’kapaċità nominali ta’ 40 MW;

—

Enerġija mir-riħ lil hinn mix-xtut (l-iżgħar daqs tat-turbini 8 MW), b’kapaċità nominali ta’ 40 MW;

—

Enerġija mir-riħ lil hinn mix-xtut (l-iżgħar daqs tat-turbini 10 MW), b’kapaċità nominali ta’ 40 MW;

—

Sistemi ta' enerġija mir-riħ lil hinn mix-xtut li jżommu f'wiċċ il-baħar, b'kapaċità nominali ta' 25 MW;

—

Turbini tar-riħ fuq l-art addattati għall-aħjar użu fuq terreni kumplessi (bħal terreni bl-imsaġar, żoni muntanjużi): b'kapaċità nominali ta' 25 MW;

—

Turbini tar-riħ fuq l-art addattati għall-aħjar użu fi klima kiesħa (kumpatibbli ma' kundizzjonijiet ta' temperatura aktar baxxa minn – 30 °C u ma' kundizzjonijiet ta' silġ qawwi) b'kapaċità nominali ta' 25 MW;

—

Subkategoriji ta' proġetti fis-settur tal-enerġija oċeanika:

—

Mezzi li jużaw l-enerġija tal-mewġ, b'kapaċità nominali ta' 5 MW;

—

Mezzi li jużaw l-enerġija tal-ibħra/tal-kurrent, b'kapaċità nominali ta' 5 MW;

—

Konverżjoni ta' enerġija termika (OTEC) b'kapaċità nominali ta' 10 MW;

—

Subkategoriji ta' proġetti fis-settur tal-enerġija idroelettrika:

—

Produzzjoni tal-enerġija permezz ta' Ġeneraturi Superkondutturi ta' Temperatura għolja: 20 MW;

—

Subkategoriji ta' proġetti fis-settur tal-Ġestjoni Deċentralizzata ta' Enerġiji Rinnovabbli (netwerks intelliġenti):

—

Ġestjoni ta' enerġiji rinnovabbli u l-aħjar użu għall-Ġeneraturi Distribwiti fuq skala żgħira u medja f'żoni rurali, li l-enerġija li l-aktar jiġġeneraw hi dik solari: 20 MW fuq in-netwerk ta' Vultaġġ Baxx + 50 MW fuq in-netwerk ta' Vultaġġ Medju;

—

Ġestjoni ta' enerġiji rinnovabbli u l-aħjar użu għall-Ġeneraturi Distribwiti fuq skala żgħira u medja f'żoni rurali, li l-enerġija li l-aktar jiġġeneraw hi dik mir-riħ: 20 MW fuq in-netwerk ta' Vultaġġ Baxx + 50 MW fuq in-netwerk ta' Vultaġġ Medju;

—

Ġestjoni ta' enerġiji rinnovabbli u l-aħjar użu għall-Ġeneraturi Distribwiti fuq skala żgħira u medja f'żoni urbani: 20 MW fuq in-netwerk ta' Vultaġġ Baxx + 50 MW fuq in-netwerk ta' Vultaġġ Medju;

Nota: Ma jistax jiġi eskluż l-użu ta' tagħbijiet attivi (mezzi elettriċi ta' tisħin/heat pumps eċċ.).


(1)  Il-limiti ta’ enerġija CCS huma indikati bħala produzzjoni elettrika grossa qabel il-qbid.

(2)  ĠU L 140, 5.6.2009, p. 16.


ANNESS IV

Infrastruttura, teknoloġiji nodfa, diversifikazzjoni tat-taħlita ta' enerġija u sorsi ta' forniment

Mill-kuntest ta' kif jintuża l-kunċett “infrastruttura” f'leġiżlazzjoni rilevanti tal-Unjoni (1), hemm indikazzjoni ċara li t-terminu “infrastruttura” jinkludi l-faċilitajiet kollha relatati li huma mitluba biex ikun żgurat it-twassil tal-elettriku (trażmissjoni u distribuzzjoni). Dan minkejja l-fatt li l-kunċett “infrastruttura” jista' jagħti wieħed x'jifhem li jkopri l-impjanti li jiġġeneraw l-elettriku.

Filwaqt li ma hemmx definizzjoni applikabbli ta' “teknoloġiji nodfa”, għall-finijiet ta' dan id-dokument ta' gwida, il-Kummissjoni tuża t-terminu sabiex tirreferi għal teknoloġiji għall-produzzjoni tal-elettriku li jwasslu għal emissjonijiet rilattivament iktar baxxi tal-karbonju jew għal livell ogħla ta' protezzjoni ambjentali, inkluż l-enerġija minn sorsi rinnovabbli.

Il-Kummissjoni tqis li ż-żieda tas-sehem tas-sorsi tal-enerġija rinnovabbli fil-forniment totali tal-enerġija primarja u fil-ġenerazzjoni tal-elettriku dejjem tikkontribwixxi għad-diversifikazzjoni tat-taħlita ta' enerġija u sorsi ta' forniment sabiex il-forniment kumplessiv tal-enerġija ikun iktar ibbilanċjat u inqas dipendenti mill-importazzjoni tal-fjuwils fossili.

Meta tonqos il-produzzjoni tal-enerġija indiġena, togħla d-dipendenza fuq l-enerġija impurtata (2). Pereżempju, sal-2020, l-importazzjoni tal-gass tal-Unjoni mistennija tiżdied minn 61 % kif inhi s-sitwazzjoni llum għal 73 %. Filwaqt li dan jidher li jirrappreżenta bilanċ raġonevoli fil-livell tal-Unjoni, għadd ta' Stati Membri, li huma eliġibbli skont l-Artikolu 10c, jistrieħu fuq fornitur wieħed għal 100 % tal-ħtiġijiet tal-gass tagħhom. F'dawn il-każijiet, l-investimenti mfassla għad-diversifikazzjoni tal-fornimenti tal-gass għal dawn l-Istati Membri jistgħu jikkontribwixxu b'mod konsiderevoli għad-diversifikazzjoni tat-taħlita ta' enerġija u r-rinfurzar tas-sigurtà tal-forniment ta' dawn l-Istati Membri. Dan l-investiment għandu jkun kompatibbli mal-mira li titnaqqas l-intensità tal-karbonju tal-forniment tal-enerġija ta' dawn l-Istati Membri, li hija wkoll mod ta' kif tiġi rrinfurzata s-sigurtà tal-forniment, u fl-istess ħin jitnaqqsu l-emissjonijiet tal-gass b'effett serra.


(1)  Id-Direttiva 2003/54/KE dwar ir-regoli komuni għas-suq intern fil-qasam tal-elettriku u li tħassar id-Direttiva 96/92/KE, id-Direttiva 2009/72/KE dwar ir-regoli komuni għas-suq intern fil-qasam tal-elettriku u li temenda d-Direttiva 2003/54/KE, ir-Regolament (KE) Nru 714/2009 dwar kondizzjonijiet għall-aċċess għan-netwerks għall-bdil bejn il-fruntieri fl-elettriku u li jħassar ir-Regolament (KE) Nru 1228/2003 u d-Direttiva 2009/28/KE dwar il-promozzjoni tal-użu tal-enerġija minn sorsi rinnovabbli u li temenda u sussegwentement tħassar id-Direttivi 2001/77/KE u 2003/30/KE.

(2)  Ara l-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar it-Tieni Analiżi Strateġika dwar l-Enerġija – Pjan ta’ Azzjoni tal-UE għas-Sigurtà u s-Solidarjetà tal-Enerġija, COM(2008) 781.


ANNESS V

Tipi ta' investimenti eliġibbli

It-tipi ta' investimenti eliġibbli skont l-Artikolu 10c tad-Direttiva 2003/87/KE huma li ġejjin:

Tipi ta' investiment

A

Immodernizzar tal-infrastruttura

B

Aġġornament tal-infrastruttura

C

Teknoloġiji nodfa

D

Diversifikazzjoni tat-taħlita ta' enerġija

E

Diversifikazzjoni ta' sorsi ta' forniment

L-istrumenti li ġejjin jirrappreżentaw eżempji ta' investimenti eliġibbli skont l-Artikolu 10c:

(a)

Modernizzazzjoni tal-ġenerazzjoni tal-elettriku bil-għan li tirriżulta f'ġenerazzjoni tal-elettriku iktar effiċjenti u CO2 inqas intensiv (relazzjoni aħjar bejn il-konsum tal-elettriku gross u nett, jiġifieri s-sehem tal-konsum tal-elettriku nett fil-konsum gross u inqas emissjonijiet tas-CO2 għal kull MWe);

(b)

Tnaqqis tal-emissjonijiet tas-CO2 permezz tal-immodernizzar tal-impjanti tal-enerġija mill-faħam (l-aqwa proċess)

(c)

Ġenerazzjoni tal-elettriku permezz tas-sorsi tal-enerġija rinnovabbli (lil hinn mill-mira stipulata fid-Direttiva RES) inkluż ir-rekwiżiti tan-netwerk korrispondenti

(d)

Bdil ta' kapaċità tal-ġenerazzjoni intensiva iktar fl-ammont ta' CO2 b'kapaċità tal-ġenerazzjoni li tkun inqas intensiva fl-ammont ta' CO2

(e)

Qbid u ħżin tal-karbonju

(f)

Grids intelliġenti

(g)

CHP inkluż ir-rekwiżiti tan-netwerk korrispondenti

Il-lista mhijiex eżawrjenti. Il-proġetti kollha eliġibbli għandhom jiġu vvalutati għall-kompatibbiltà skont ir-regoli tal-għajnuna mill-Istat sakemm dawn ikunu jinvolvu għajnuna mill-Istat.


ANNESS VI

Tbassir imsejjes fuq il-mudelli tal-prezzijiet tal-karbonju fit-tielet perjodu ta' skambju

Tbassir tal-prezzijiet tal-karbonju (medja annwali f'EUR/tunnellata ta' CO2)

2010-2014

2015-2019

F'EUR 2008

14,5

20,0

F'EUR 2005

13,6

18,7

Dawn il-valuri joħorġu mix-xenarju tal-linja tal-bażi mfisser fid-Dokument ta' Ħidma tal-Istaff tal-Kummissjoni li jakkumpanja l-Komunikazzjoni mill-Kummissjoni “Analiżi tal-alternattivi biex nagħmlu tnaqqis ta' iktar minn 20 % tal-emissjonijiet tal-gass b'effett serra u r-riskju tar-rilaxx tal-karbonju” (traduzzjoni mhux uffiċjali), Informazzjoni ta' sfond u analiżi, Parti II, SEC(2010) 650.


ANNESS VII

Mudell għall-applikazzjoni skont l-Artikolu 10c(5)

Meta jibagħtu l-applikazzjoni tagħhom għal allokazzjoni gratis tranżizzjonali tal-kwoti tal-emissjonijiet skont l-Artikolu 10c(5) tad-Direttiva 2003/87/KE, l-Istati Membri għandhom jużaw il-mudell li ġej u jispeċifikaw l-informazzjoni li tinsab hawn taħt:

A.   Eliġibbiltà tal-Istat Membru

Evidenza li għall-anqas tiġi ssodisfata waħda mill-kundizzjonijiet stipulati fl-Artikolu 10c(1) tad-Direttiva 2003/87/KE.

B.   Eliġibbiltà tal-installazzjonijiet li huma meqjusa li jirċievu allokazzjoni tranżizzjonali tal-kwoti gratis tal-emissjonijiet, l-għadd massimu ta' kwoti gratis tal-emissjonijiet u l-għadd ta' kwoti gratis tal-emissjonijiet allokati għal dawn l-installazzjonijiet inkluż kwoti mhux transferibbli

1.

Lista ta' installazzjonijiet li jitqiesu eliġibbli għal allokazzjoni tranżizzjonali ta' kwoti gratis tal-emissjonijiet skont l-Artikolu 10c tad-Direttiva 2003/87/KE

2.

Għadd massimu ta' kwoti gratis tal-emissjonijiet fl-2013 u fis-snin ta' wara

3.

Allokazzjoni gratis tranżizzjonali msejsa fuq l-installazzjoni tal-kwoti gratis tal-emissjonijiet

3.1.

Għadd ta' kwoti gratis tal-emissjonijiet imsejsa fuq l-emissjonijiet ivverifikati bejn l-2005 u l-2007

3.2.

Għadd ta' kwoti gratis tal-emissjonijiet imsejsa fuq il-punti ta' referenza

3.3.

Informazzjoni dettaljata dwar l-għadd ta' kwoti tal-emissjonijiet mhux transferibbli u allokati għal installazzjonijiet eliġibbli

C.   Pjan nazzjonali u investimenti elenkati fil-pjan nazzjonali, eliġibbiltà tal-investimenti fil-pjan nazzjonali, bilanċ bejn il-valur kummerċjali tal-kwoti tal-emissjonijiet allokati gratis u l-ammont tal-investimenti

Il-pjan nazzjonali jistipula l-istrateġija tal-Istat Membru kkonċernat u kif se tiġi mmodernizzata ġenerazzjoni tal-enerġija elettrika matul il-perjodu ta' allokazzjoni tranżizzjonali tal-kwoti gratis tal-emissjonijiet. Jidentifika l-investimenti f'dan ir-rigward kif ukoll ir-rwol tat-tipi tal-investiment biex jinkiseb l-objettiv. Il-pjan nazzjonali jattribwixxi wkoll l-eżekuzzjoni ta' kull investiment fil-pjan nazzjonali għal xi sena partikolari filwaqt li jqis l-għadd dejjem jonqos ta' kwoti gratis tal-emissjonijiet matul il-perjodu kollu ta' allokazzjoni tranżizzjonali gratis tal-kwoti tal-emissjonijiet.

Għal kull investimenti inkluż fil-pjan nazzjonali, l-Istati Membri għandhom jispeċifikaw

—

Il-kumpanija li qed tagħmel l-investiment

—

It-tip ta' investiment skont l-Anness V

—

L-ammont tal-investiment

—

L-għadd u l-valur kummeċjali tal-kwoti tal-emissjonijiet allokati gratis lill-kumpanija għall-investiment konċernat; kif ukoll

—

Il-prinċipji li l-investiment jikkonforma magħhom inkluż l-informazzjoni neċessarja sabiex tiġi vvalutata l-konformità mal-prinċipji tal-investiment

Meta l-Istati Membri jużaw mekkaniżmu sabiex jiżguraw li l-valur tal-kwoti tal-emissjonijiet gratis li jingħata skont l-Artikolu 10c tad-Direttiva 2003/87/KE jikkorrispondi għall-ammont tal-investimenti identifikati fil-pjan nazzjonali, l-Istati Membri għandhom jispeċifikaw l-approċċ kumplessiv, il-bażi legali u d-dettalji operazzjonali ta' dan il-mekkaniżmu. Għandhom jipprovdu wkoll dispożizzjonijiet legali li jiżguraw li l-informazzjoni dwar l-influssi finanzjarji netti skont dan il-mekkaniżmu huma disponibbli permezz tar-rapporti li għandhom jintbagħtu lill-Kummissjoni skont l-Artikolu 10c(1) tad-Direttiva 2003/87/KE.

D.   Monitoraġġ u infurzar ta' dispożizzjonijiet fir-rigward tal-investimenti maħsuba skont il-pjan nazzjonali

L-Istati Membri għandhom jipprovdu u jistipulaw fid-dettall

—

Deskrizzjoni tal-monitoraġġ u l-infurzar ta' dispożizzjonijiet stabbiliti fl-Istati Membri kkonċernati inkluż l-indikaturi tal-konformità, id-dispożizzjonijiet dwar iż-żjajjar fuq il-post u l-verifika indipendenti tal-investimenti; kif ukoll

—

Dispożizzjonijiet sabiex tkun żgurata l-konformità mal-obbligu tal-kumpaniji li jagħmlu investimenti identifikati fil-pjan nazzjonali inkluż sanzjonijiet fil-każ ta' non-konformità.

E.   Trasparenza u konsultazzjoni pubblika

L-Istati Membri għandhom jagħmlu sommarju tal-proċess li ġie segwit biex tħejjew l-applikazzjoni u l-pjan u kif il-pubbliku ġie infurmat u involut.


ANNESS VIII

Eżempji ta' indikaturi tal-konformità

Id-dispożizzjonijiet ta' monitoraġġ u infurzar għandhom ikopru l-indikaturi tal-konformità użati biex juru li l-investimenti huma konformi mal-prinċipji stipulati fil-gwida, b'mod partikolari fir-rigward tar-rekwiżiti għall-pjanijiet nazzjonali.

Eżempji ta' indikaturi ta' konformità huma elenkati hawn taħt (il-lista mhijiex eżawrjenti):

(a)

Tqabbil tal-fattur tal-emissjonijiet tat-teknoloġija adottat minn kull installazzjoni bis-saħħa ta' investimenti skont l-Artikolu 10c tad-Direttiva Nru 2003/87/KE mal-fattur tal-emissjonijiet tat-teknoloġija użat qabel l-immodernizzar/aġġornament;

(b)

Tqabbil tal-fattur tal-emissjonijiet tat-teknoloġija adottat minn kull installazzjoni bis-saħħa ta' investimenti skont l-Artikolu 10c mal-fattur tal-emissjonijiet tal-teknoloġija disponibbli madwar l-Unjoni filwaqt li jitqies il-fjuwil użat;

(ċ)

Tnaqqis mistenni u implimentat fl-emissjonijiet kollha tal-gassijiet b'effett serra ġġenerati mill-produzzjoni nazzjonali tal-elettriku bis-saħħa ta' investimenti skont l-Artikolu 10c (imqabbel man-negozju li jsir fuq bażi regolari);

(d)

Tnaqqis mistenni u implimentat fis-sehem tal-fjuwil fossili dominanti fil-produzzjoni nazzjonali tal-elettriku bis-saħħa ta' investimenti skont l-Artikolu 10c;

(e)

Akkwisti fl-effiċjenza mistennija u implimentati fin-netwerks tal-proċess/ditribuzzjoni tal-ġenerazzjoni elettrika (f'termini ta' kemm jiġi ffrankat MWh) bis-saħħa ta' investimenti skont l-Artikolu 10c u t-tnaqqis fl-emissjonijiet korrispondenti tas-CO2;

(f)

Żieda mistennija u implimentata fis-sehem tal-fjuwils li ma fihomx CO2 jew li għandhom inqas CO2 fit-taħlita ta' enerġija nazzjonali bis-saħħa ta' investimenti skont l-Artikolu 10c;

(g)

Kapaċitajiet installati (f'MW) li kienu joperaw f'Diċembru 2008 li se jiħdulhom posthom kapaċitajiet ġodda b'inqas karbonju ffinanzjati bis-saħħa ta' investimenti skont l-Artikolu 10c;

(h)

Sehem ta' kapaċitajiet installati u li kienu joperaw f'Diċembru 2008 li ħadulhom posthom kapaċitajiet ġodda b'inqas karbonju ffinanzjati bis-saħħa ta' investimenti skont l-Artikolu 10c, meta mqabbel mal-kapaċitajiet kollha li kienu joperaw f'Diċembru 2008;

(i)

Kapaċitajiet installati (f'MW) ta' enerġija rinovabbli li mistennija jibdew joperaw bis-saħħa tal-investimenti skont l-Artikolu 10c;

(j)

Sehem ta' fondi li joħroġ mill-Artikolu 10c fil-proġett kollu tal-investiment;

(k)

Għall-investimenti li jirċievu fondi skont sorsi oħra tal-Unjoni u/jew sorsi oħra pubbliċi u privati, sehem ta' kull sors ta' finanzjament tal-Unjoni u fondi oħra pubbliċi u privati fl-investiment kollu tal-proġett;

(l)

Prestazzjoni finanzjarja mistennija tal-investimenti skont l-Artikolu 10c (jiġifieri rata finanzjarja tad-dħul, spejjeż/benefiċċji, eċċ).