(1)

Il-kwoti tas-sajd għas-sena 2023 ġew stabbiliti bir-Regolamenti tal-Kunsill (UE) 2022/2090 (2), (UE) 2023/194 (3) u (UE) 2023/195 (4).

(2)

Il-kwoti tas-sajd għas-sena 2024 ġew stabbiliti bir-Regolamenti tal-Kunsill (UE) 2023/194, (UE) 2023/2638 (5), (UE) 2024/257 (6) u (UE) 2024/259 (7).

(3)

Skont l-Artikolu 105(1) tar-Regolament (KE) Nru 1224/2009, meta l-Kummissjoni tkun stabbiliet li Stat Membru jkun qabeż il-kwoti tas-sajd li kienu allokati lilu, il-Kummissjoni trid tnaqqas il-kwoti tas-sajd futuri ta’ dak l-Istat Membru.

(4)

Ir-Regolament ta’ Implimentazzjoni tal-Kummissjoni (UE) 2024/2407 (8) stabbilixxa tnaqqis mill-kwoti tas-sajd disponibbli għal ċerti stokkijiet tal-ħut fl-2024 minħabba s-sajd eċċessiv fis-snin ta’ qabel.

(5)

Madankollu, għal ċerti Stati Membri, jiġifieri d-Danimarka, Spanja, in-Netherlands, il-Polonja u l-Portugall, ċertu tnaqqis ma setax isir bir-Regolament ta’ Implimentazzjoni (UE) 2024/2407 mill-kwoti tas-sajd allokati għall-istokkijiet mistada b’mod eċċessiv, għaliex il-kwoti għal dawn l-istokkijiet mhumiex disponibbli għal dawk l-Istati Membri fis-sena 2024.

(6)

L-Artikolu 105(5) tar-Regolament (KE) Nru 1224/2009 jipprevedi li, meta ma jkunx jista’ jsir tnaqqis b’rabta mal-istokk mistad b’mod eċċessiv fis-sena ta’ wara dik li fiha jkun sar sajd eċċessiv minħabba li l-Istat Membru kkonċernat ma jkollux kwota disponibbli għal dak l-istokk tal-ħut, jista’ jsir tnaqqis b’rabta ma’ stokkijiet oħra fl-istess żona ġeografika jew bl-istess valur kummerċjali, wara konsultazzjonijiet mal-Istati Membri kkonċernati.

(7)

Skont il-punt 4 tal-Komunikazzjoni tal-Kummissjoni dwar linji gwida għat-tnaqqis tal-kwoti skont l-Artikolu 105(1), (2) u (5) tar-Regolament (KE) Nru 1224/2009 (9) (“il-Linji Gwida”) tali tnaqqis preferibbilment jenħtieġ li jsir mill-kwoti allokati għall-istokkijiet mistada mill-istess flotta li tkun wettqet sajd eċċessiv mill-kwota.

(8)

L-Istati Membri kkonċernati ġew ikkonsultati fir-rigward ta’ ċertu tnaqqis mill-kwoti tas-sajd allokati għal stokkijiet oħrajn minbarra dawk li ġew mistada b’mod eċċessiv. Għalhekk, jixraq li jsir tnaqqis minn dawk il-kwoti tas-sajd alternattivi allokati lil dawk l-Istati Membri fl-2024.

(9)

F’ċerti każijiet, l-iskambji tal-opportunitajiet tas-sajd konklużi f’konformità mal-Artikolu 16(8) tar-Regolament (UE) Nru 1380/2013 tal-Parlament Ewropew u tal-Kunsill (10) ippermettew tnaqqis sħiħ jew parzjali mill-istess stokkijiet fil-qafas tar-Regolament ta’ Implimentazzjoni (UE) 2024/2407.

(10)

Barra minn hekk, jidher li ċertu tnaqqis previst bir-Regolament ta’ Implimentazzjoni (UE) 2024/2407 jeċċedi l-kwoti adattati disponibbli fis-sena 2024 u, b’riżultat ta’ dan, ma jistax isir kollu f’dik is-sena. F’dawk il-każijiet, skont il-punt 2 tal-Linji Gwida, it-tnaqqis sar sal-limitu sħiħ tal-kwota disponibbli u l-ammonti li jifdal jenħtieġ li jitnaqqsu mill-kwota adattata disponibbli fis-snin sussegwenti sakemm jitħallas lura l-ammont sħiħ ta’ sajd eċċessiv.

(11)

Fl-2023, il-Ġermanja qabżet il-kwota tagħha għal speċijiet oħra fl-ilmijiet Norveġiżi taż-żoni 1 u 2 (OTH/1N2AB.) b’1,320 tunnellata. Barra minn hekk, jibqa’ tnaqqis ta’ 19,997 tunnellata wara s-sajd, mill-Ġermanja, li qabeż il-kwota tagħha tal-OTH/1N2AB. fl-2022, f’konformità mal-punt 2 tal-Linji Gwida. Permezz tal-posta elettronika datata l-1 ta’ Lulju 2024, il-Ġermanja talbet li t-tnaqqis dovut, jiġifieri l-21,317 tunnellata, jitqassam fuq tliet snin. Meta jitqies li, f’konformità mal-punt 3(b) tal-Linji Gwida, ħlas lura aktar bil-mod jista’ jkun eċċezzjonalment possibbli meta l-istokk ikkonċernat jinqabad f’sajd imħallat u telf sinifikanti tal-kwota jipprevjeni l-isfruttament tal-ispeċijiet assoċjati f’dik il-qabda tas-sajd imħallat, din it-talba tista’ tiġi aċċettata. Għalhekk, it-tnaqqis annwali applikabbli għall-kwota Ġermaniża tal-OTH/1N2AB. jammonta għal 7,106 tunnellata fl-2024 u fl-2025 u għal 7,105 tunnellata fl-2026, mingħajr preġudizzju għal kwalunkwe adattament ulterjuri tal-kwota.

(12)

Wara bidliet fid-definizzjoni taż-żona tal-istokkijiet stabbilita fir-Regolament (UE) 2024/257, it-tnaqqis applikabbli għad-Danimarka għas-sajd eċċessiv tal-merluzz tal-linja sewda fl-ilmijiet tal-Unjoni taż-żona 3a (HAD/*03 A-C) fis-sena 2023 issa jenħtieġ li jiġi applikat fuq il-kwota tal-2024 għall-merluzz tal-linja sewda fiż-żona 3a (HAD/*03 A.).

(13)

Il-punt 1 tal-Linji Gwida jiddikjara li, fejn applikabbli, l-iskeda taż-żmien għat-tnaqqis f’każ li tinqabeż waħda mill-kwoti għall-istokkijiet ġestiti mill-organizzazzjonijiet reġjonali tal-ġestjoni tas-sajd trid tiġi adattata għall-iskeda taż-żmien għat-tnaqqis ta’ dawn l-istokkijiet stabbilita fl-organizzazzjonijiet reġjonali tal-ġestjoni tas-sajd ikkonċernati. Ir-Rakkomandazzjoni 22-03 tal-Kummissjoni Internazzjonali għall-Konservazzjoni tat-Tonn tal-Atlantiku (ICCAT) għall-konservazzjoni tal-pixxispad tat-Tramuntana tal-Atlantiku (11) tipprevedi li kwalunkwe qbiż tal-kwota annwali aġġustata fis-sena 2023 irid jitnaqqas mill-kwota/mil-limitu tal-qbid għall-2025. Abbażi ta’ dan, it-tnaqqis — inkluż dak li jirriżulta minn fatturi ta’ multiplikazzjoni applikabbli — minħabba s-sajd eċċessiv fl-2023 għall-istokk tal-pixxispad fl-Oċean Atlantiku, fit-Tramuntana ta’ 5° N (SWO/AN05N), ġestit mill-ICCAT, jenħtieġ li jiġi applikat fl-2025. Konsegwentement, it-tnaqqis stabbilit bir-Regolament ta’ Implimentazzjoni (UE) 2024/2407 minħabba s-sajd eċċessiv fl-2023, mill-Portugall, tal-kwota tiegħu għal SWO/AN05N jenħtieġ li jsir fuq il-kwota tiegħu għall-2025. Barra minn hekk, it-tnaqqis li għandu jsir minħabba s-sajd eċċessiv, fl-2023, minn Franza tal-kwota allokata lil “Stati Membri oħra” — inkluża Franza — esklużivament għall-qabdiet aċċessorji tal-pixxispad fl-Oċean Atlantiku, fit-Tramuntana ta’ 5° N (SWO/AN05N_AMS) jenħtieġ li jsir fuq il-kwota allokata lil Franza għall-2025.

(14)

Bl-istess mod, ir-Rakkomandazzjoni 19-05 tal-ICCAT li tistabbilixxi programm ta’ restawr għall-marlin blu (12) tipprevedi li kwalunkwe qbiż tal-limiti annwali tal-ħatt l-art stabbiliti għas-sena 2023 irid jitnaqqas mil-limiti tal-ħatt l-art matul l-2025. Għalhekk, jenħtieġ li jsir it-tnaqqis stabbilit bir-Regolament ta’ Implimentazzjoni (UE) 2024/2407 minħabba s-sajd eċċessiv fl-2023, minn Spanja, tal-kwota tagħha għall-istokk tal-marlin blu fl-Oċean Atlantiku (BUM/ATLANT) fuq il-kwota tagħha għall-2025.

(15)

Fir-Regolament ta’ Implimentazzjoni (UE) 2024/2407, sar żball tipografiku fir-rigward tal-ammont tat-tnaqqis applikabbli minħabba s-sajd eċċessiv, mill-Polonja, tal-kwota għall-kavall fl-ilmijiet tal-Unjoni taż-żoni 3a, 3b, 3c u 3d; l-ilmijiet tar-Renju Unit taż-żona 2a; l-ilmijiet tal-Unjoni u tar-Renju Unit taż-żona 4; l-ilmijiet Norveġiżi taż-żoni 2a u 4a (MAC/2A34-N). L-ammont li jrid jitnaqqas jenħtieġ li jinqara 636,225 minflok 636,275 tunnellata.

(16)

Għaldaqstant, jenħtieġ li r-Regolament ta’ Implimentazzjoni (UE) 2024/2407 jiġi emendat kif xieraq.

(17)

Jista’ jkun hemm aktar aġġornamenti jew korrezzjonijiet kemm-il darba jinstabu żbalji, ommissjonijiet jew rappurtar ħażin fiċ-ċifri tal-qbid li l-Istati Membri jiddikjaraw skont l-Artikolu 33 tar-Regolament (KE) Nru 1224/2009, kemm fl-eżerċizzji attwali kif ukoll f’dawk ta’ qabel.