(1)

L-Istati Membri jistgħu jiddeċiedu li japprovaw iċ-ċertifikati ta’ kompetenza tal-baħħara maħruġa minn pajjiżi terzi, dejjem jekk il-pajjiż terz rilevanti jkun rikonoxxut mill-Kummissjoni bħala pajjiż li jiżgura l-konformità mar-rekwiżiti tal-Konvenzjoni internazzjonali dwar Standards ta’ Taħriġ, Ċertifikazzjoni u Għassa għall-Baħħara tal-1978, kif emendata (il-Konvenzjoni STCW) (2);

(2)

Il-Ġeorġja hi rrikonoxxuta fuq il-livell tal-Unjoni Ewropea skont il-proċedura stabbilita mill-Artikolu 18(3)(c) tad-Direttiva 2001/25/KE tal-Ewropew u tal-Kunsill tal-4 ta’ April 2001 dwar il-livell minimu ta’ taħriġ tal-baħħara (3) waqt li r-rikonoxximenti taċ-ċertifikati tal-Ġeorġja mill-Italja u l-Greċja huma ppublikati f’Il-Ġurnal Uffiċjali tal-Unjoni Ewropea (4) u għalhekk jibqgħu validi f’konformità mal-Artikolu 19(5) tad-Direttiva 2008/106/KE, minkejja l-fatt li d-Direttiva 2001/25/KE ġiet irrevokata;

(3)

Il-Kummissjoni vvalutat l-edukazzjoni marittima, it-taħriġ u s-sistemi ta’ ċertifikazzjoni fil-Ġeorġja, f’konforma mal-Artikolu 21(1) tad-Direttiva 2008/106/KE, biex tivverifika jekk dan il-pajjiż ikomplix jikkonforma mar-rekwiżiti tal-Konvenzjoni STCW u jekk ittiħdux miżuri xierqa biex ikunu evitati frodi fil-ħruġ ta’ ċertifikati. Din il-valutazzjoni, li kienet ibbażata fuq ir-riżultati ta’ spezzjoni għat-tfittxija tal-fatti li għamlu l-esperti tal-Aġenzija Ewropea għas-Sigurtà Marittima f’Settembru 2006, kixfet diversi nuqqasijiet;

(4)

Il-Kummissjoni tat rapport lill-Istati Membri dwar ir-riżultati tal-valutazzjoni ta’ konformità;

(5)

Wara, il-Kummissjoni, permezz tal-ittri tas-27 ta’ Frar 2009 u tat-23 ta’ Marzu 2010, talbet lill-Awtoritajiet Ġeorġjani biex jibagħtulha provi li juru jekk in-nuqqasijiet li ħarġu mill-valutazzjoni kinux ġew indirizzati kif xieraq;

(6)

Fil-każijiet fejn kienu ġew identifikati nuqqasijiet matul il-valutazzjoni ta’ konformità mal-Konvenzjoni STCW, l-Awtoritajiet Ġeorġjani pprovdew lill-Kummissjoni, fuq talba tagħha, permezz tal-ittri tal-1 ta’ Mejju 2009, tat-12 ta’ Jannar 2010, tas-17 ta’ Frar 2010 u tal-14 ta’ April 2010, xi informazzjoni dwar l-implimentazzjoni ta’ azzjoni korrettiva biex tindirizza dawn il-kwistjonijiet;

(7)

L-evalwazzjoni tat-tweġibiet tal-Awtoritajiet Ġeorġjani, li twettqet mill-Kummissjoni, kkonfermat li l-informazzjoni pprovduta tindirizza biss parti żgħira ta’ dawn in-nuqqasijiet, filwaqt li żvelat li l-maġġoranza tan-nuqqasijiet li ġew identifikati matul il-valutazzjoni ta’ konformità għadhom mhux solvuti. Dawn in-nuqqasijiet jikkonċernaw diversi sezzjonijiet tal-Konvenzjoni STCW u speċjalment in-nuqqas ta’ dispożizzjonijiet nazzjonali biex jiġu implimentati ċerti rekwiżiti tal-Konvenzjoni STCW bħal, b’mod partikolari, l-implimentazzjoni ta’ sistema ta’ standards ta’ kwalità u l-użu ta’ simulaturi, l-iffunzjonar ta’ sistemi ta’ standards ta’ kwalità kemm fl-Istituzzjonijiet tal-Amministrazzjoni kif ukoll fi ftit Istituzzjonijiet tal-Edukazzjoni u t-Taħriġ Marittimu, il-monitoraġġ ta’ dawn l-Istituzzjonijiet mill-Amministrazzjoni, kif ukoll numru ta’ rekwiżiti ta’ ċertifikazzjoni li għandhom x’jaqsmu mad-dipartimenti kemm tal-gverta kif ukoll tal-magna;

(8)

Dawn in-nuqqasijiet ta’ konformitajiet jaffettwaw dispożizzjonijiet varji ewlenin tal-Konvenzjoni STCW u jirriskjaw li jaffettwaw il-livell kumplessiv ta’ kompetenza tal-baħħara detenturi ta’ ċertifikati maħruġa mill-Ġeorġja;

(9)

Ir-riżultati tal-valutazzjoni ta’ konformità u tal-evalwazzjoni tat-tagħrif mibgħut mill-Awtoritajiet Ġeorġjani juru li l-Ġeorġja ma tikkonformax bis-sħiħ mar-rekwiżiti rilevanti tal-Konvenzjoni STCW u li għalhekk, ir-rikonoxximent tagħha mill-Unjoni Ewropea għandu jkun irtirat;

(10)

Il-miżuri pprovduti f’din id-Deċiżjoni huma skont l-opinjoni tal-Kumitat dwar l-Ibħra Protetti u l-Prevenzjoni tat-Tniġġis mill-Vapuri,