(1)

Abbażi ta’ valutazzjoni preliminari tar-riskju, ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi lista ta’ pjanti, prodotti tal-pjanti u oġġetti oħra ta’ riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li għandha tiġi segwita sabiex issir il-valutazzjoni tar-riskju msemmija fl-Artikolu 42(4) tar-Regolament (UE) 2016/2031 għal dawk il-pjanti, il-prodotti tal-pjanti u oġġetti oħra ta’ riskju għoli.

(3)

Wara valutazzjoni preliminari tar-riskju, il-frott tal-Momordica L. li joriġina minn pajjiżi terzi jew minn żoni ta’ pajjiżi terzi fejn hu magħruf li jeżisti t-Thrips palmi Karny u fejn hemm nuqqas ta’ miżuri ta’ mitigazzjoni effettivi għal dak il-pest, ġie inkluż fl-Anness tar-Regolament ta’ Implimentazzjoni (UE) 2018/2019 bħala pjanti ta’ riskju għoli.

(4)

Fit-13 ta’ Novembru 2019, il-Messiku ressaq talba lill-Kummissjoni għall-esportazzjoni lejn l-Unjoni tal-frott tal-Momordica charantia L. Dik it-talba kienet appoġġata mid-dossier tekniku rispettiv.

(5)

Fis-27 ta’ Novembru 2019, il-Honduras, is-Sri Lanka u t-Tajlandja ressqu talba lill-Kummissjoni għall-esportazzjoni lejn l-Unjoni tal-frott tal-Momordica charantia L. It-talbiet tagħhom kienu sostnuti bid-dossier tekniku rispettiv.

(6)

Fil-31 ta’ Diċembru 2020, l-Awtorità Ewropea dwar is-Sigurtà fl-Ikel (“l-Awtorità”) adottat opinjonijiet xjentifiċi rigward il-valutazzjoni tar-riskju ta’ komodità tal-frott tal-Momordica charantia L. li joriġina mill-Messiku (4), mill-Honduras (5), mis-Sri Lanka (6) u mit-Tajlandja (7). It-Thrips palmi Karny kien l-uniku pest ta’ tħassib analizzat f’dawk l-opinjonijiet. L-Awtorità evalwat il-miżuri ta’ mitigazzjoni tar-riskji deskritti fid-dossiers għal dak il-pest u stmat il-probabbiltà tal-ħelsien mill-pest.

(7)

Abbażi ta’ dawk l-opinjonijiet, ir-riskju fitosanitarju li jirriżulta mill-introduzzjoni tal-frott tal-Momordica charantia L. mill-Honduras, mill-Messiku, mis-Sri Lanka u mit-Tajlandja fl-Unjoni jista’ jiġi indirizzat permezz ta’ rekwiżiti fitosanitarji tal-importazzjoni sabiex jiġi żgurat li dak ir-riskju jitnaqqas għal livell aċċettabbli u jinżamm hekk. Għalhekk jenħtieġ li l-frott tal-Momordica charantia L. li joriġina minn dawk il-pajjiżi jitneħħa mil-lista ta’ pjanti, prodotti tal-pjanti jew oġġetti oħra ta’ riskju għoli fl-Anness tar-Regolament ta’ Implimentazzjoni (UE) 2018/2019.

(8)

Il-miżuri ta’ mitigazzjoni tar-riskji applikati mis-Sri Lanka huma meqjusa biżżejjed biex ir-riskju fitosanitarju li jirriżulta mill-introduzzjoni fl-Unjoni tal-frott tal-Momordica charantia L. li joriġina minn dak il-pajjiż jinżamm f’livell aċċettabbli.

(9)

Il-Kummissjoni tqis li l-miżuri ta’ mitigazzjoni tar-riskji proposti mill-Honduras, mill-Messiku u mit-Tajlandja fid-dossiers mhumiex biżżejjed, fihom innifishom, biex inaqqsu r-riskju fitosanitarju li jirriżulta mill-introduzzjoni fl-Unjoni tal-frott tal-Momordica charantia L. li joriġina minn dawk il-pajjiżi għal livell aċċettabbli. Għalhekk jenħtieġ li l-importazzjoni fl-Unjoni tal-frott tal-Momordica charantia L. li joriġina minn dawk il-pajjiżi jissodisfa rekwiżiti speċifiċi tal-importazzjoni: jenħtieġ li dak il-frott joriġina minn żona ħielsa mill-pesti, jew minn sit tal-produzzjoni bi protezzjoni fiżika sħiħa, jew minn sit tal-produzzjoni fejn ikunu ttieħdu diversi miżuri dwar il-produzzjoni, it-trattament u l-ispezzjoni ta’ dak il-frott.

(10)

Għaldaqstant, peress li l-Anness II tar-Regolament ta’ Implimentazzjoni tal-Kummissjoni (UE) 2019/2072 (8) jelenka t-Thrips palmi Karny bħala pest ta’ kwarantina fl-Unjoni u l-punt 71 tal-Anness VII ta’ dak ir-Regolament ta’ Implimentazzjoni jipprevedi rekwiżiti speċjali tal-importazzjoni għall-frott tal-Momordica L. li joriġina mill-pajjiżi terzi kollha, jenħtieġ li fl-Anness VII tar-Regolament ta’ Implimentazzjoni (UE) 2019/2072 jiżdiedu r-rekwiżiti speċifiċi tal-importazzjoni għall-frott tal-Momordica charantia L. li joriġina mill-Honduras, mill-Messiku, mis-Sri Lanka u mit-Tajlandja.

(11)

Għalhekk jenħtieġ li r-Regolamenti (UE) 2018/2019 u (UE) 2019/2072 jiġu emendati skont dan.

(12)

Għall-konformità mal-obbligi tal-Unjoni Ewropea li jirriżultaw mill-ftehim tal-Organizzazzjoni Dinjija tal-Kummerċ dwar l-applikazzjoni ta’ miżuri sanitarji u fitosanitarji (9), l-importazzjoni tal-frott tal-Momordica charantia L. li joriġina mill-Honduras, mill-Messiku, mis-Sri Lanka u mit-Tajlandja jenħtieġ li tissokta fl-iqsar żmien possibbli. Għalhekk jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu.

(13)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,